Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

Cada punllami caishujhuan chaishujhuan animarishpa cushichirishpa catina canchi

Cada punllami caishujhuan chaishujhuan animarishpa cushichirishpa catina canchi

“Gentecunata animashpa cushichingapaj imapash shimita nina cashpaca nipaichilla” (HECHOS 13:15, NM).

CÁNTICO 53, 45

1, 2. ¿Imamandata shujcunata animashpa cushichinaca minishtirishca can?

CRISTINACA 18 huatacunatami charin. Paica ninmi: “Ñuca taitamamacunaca siempremi ñucataca nalicachishpalla riman. Shungu faquirijtami rimahuan. Ima horapash animashpa cushichinataca na yachanllu. Na pensaringui, na intindingui, gorda nishpallami rimahuan. Shina rimajpimi ushashcata huacani, paicunahuan parlangapapash na munanichu. Imapapash na sirvijshnami sintirini” ninmi [1] (cai tema tucuripi notata ricupangui). Shujcuna na animashpa cushichijpi causanaca llaquimi can.

2 Cutin, shujcunata animashpa cushichishpaca ashtacatami ayudai ushanchi. Rubenga ninmi: “Ñucaca ashtaca huatacunatami imapapash na sirvijshna sintirishpa causashcani. Shinapash shuj punllaca shuj anciano huauquihuanmi villachijurcani. Paica ñuca nali sintirijujta cuenta japishpami, ñucahuan parlarca. Ñuca ima nijta ali uyashpami paica, alimi esforzarijungui nishpa cushichihuarca. Shinallata Jesuspa shimicunata yarichishpami anciano huauquica nihuarca, ñucanchicunaca cada unomi ashtaca gorriongucunamandapash yali valishca canchi nishpa. Gorriongunamanda parlaj textotaca cutin cutinmi yarini. Chai textopi shimicunaca ñuca shungumanmi chayan. Anciano huauquipa ali shimicunaca ashtacatami ayudahuarca” nishpa (Mateo 10:31).

3. a) Shujcunata animashpa cushichinamanda parlashpaca ¿imatata apóstol Pabloca nirca? b) ¿Ima quimsa tapuicunatata cai temapica yachajupashun?

3 Bibliapica ninmi, caishujhuan chaishujhuan cutin cutin animarishpa cushichirinataca na cunganachu canguichi nishpa. Apóstol Pabloca hebreo huauquipanicunataca nircami: ‘Cangunapurapica nali shungu tucushpa,  Taita Diostapash na crishpa anchurijcunaca ama tiachun. Ashtahuangarin cunan causajushpallata, punllandi caishuj chaishuj aliguta yarichirishpa [animashpa cushichishpa] causaichi’ nishpa. Animashpa cushichina imamanda minishtirishca cashcata intindichunmi apóstol Pabloca nircapash: ‘Juchata rurana yuyai pandachingapaj shamujpipash, cangunapurapica pipash ama shinlli shungu tucungapami chashna causana canguichi’ nishpa (Hebreos 3:12, 13). Pipash animashpa cushichijpica tucuicunallatami ali sintirinchi. Chaimandami cai temapica cai quimsa tapuicunata yachajupashun: 1) ¿Imamandata shuj huauquipanicunataca animashpa cushichina capanchi? 2) Jehová Diospash, Jesuspash, apóstol Pablopash shujcunata animashpa cushichishcamandaca ¿imatata yachajui ushapanchi? 3) ¿Imashinata shujcunata animashpa cushichita ushapanchi?

TUCUICUNAMI SHUJCUNA ANIMASHPA CUSHICHICHUN MINISHTINCHI

4. a) ¿Picunallata shujcuna animashpa cushichichun minishtin? b) ¿Imamandata cunan punllacunapi ashtaca gentecunaca na shujcunata animashpa cushichin?

4 Tucuicunallatami shujcuna ñucanchita animashpa cushichichun minishtinchi. Ashtahuanbachaca huahuacunami paicunapa taitamamacuna animashpa cushichichun minishtin. Timothy Evans shuti profesorca ninmi: “Imashinami shuj plantaguca yacuta minishtin, shinallatami huahuacunaca paicunapa taitamamacuna animashpa cushichichun minishtin. Animashpa cushichijpimi huahuacunaca importante, ali sintirin” nishpa. Cunan punllacunapica ‘tucurimui punllacunapimi’ causanajunchi. Chaimandami ashtaca gentecunaca “pitapash na juyajcuna”, paicunapilla pensarijcuna can (2 Timoteo 3:1-5). Huaquin taitamamacunaca paicunapa taitamamacuna na animashpa cushichishcamandami paicunapash huahuacunataca na animashpa cushichin. Mayor gentecunapash shujcuna animashpa cushichichunmi minishtin. Shinapash na shina pasanllu. Shuj ejemplota ricupashun. Ashtaca gentecunaca, paicunapa trabajomandaca pipash na animashpa cushichishcachu nishpami quejarin.

5. ¿Imashinata shujcunata animashpa cushichita ushapanchi?

5 Ñucanchicunapash shujcuna imata alita rurajushcata ricushpami animashpa cushichita ushanchi. Tucuicunallatami imapipash ali can. Chaimandami imapi ali cajta ricushpa o llaquilla, desanimarishca cajta ricushpaca paicunata animashpa cushichishpa ayudana canchi (1 Tesalonicenses 5:14). Ñucanchi huauquipanicunata animashpa cushichingapaca ashtaca oportunidadcunatami charinchi (Eclesiastés 4:9, 10, liingui). Chaimandami tapurina capanchi: “¿Shujcunaca paicunata ñuca alicachishcata, llaquishcataca yachanllu? ¿Paicunata alicachishcata, llaquishcataca siemprechu ricuchini?” nishpa. Bibliapica ninmi: “Runaca, ali shimicunata tigrachishpami cushijun. Ali shimicunata parlachun munashca horaspi parlashpacarin alipachamari” can nishpa (Proverbios 15:23).

6. ¿Imamandata Diabloca Jehovata sirvijcunata desanimachingapaj munan? Shuj ejemplomanda parlapai.

6 Proverbios 24:10pica ninmi: “Imatalla rurana punllapi imata ruranatapash na munashpaca, ushai illajmi tucungui” nishpa. Ñucanchicuna desanimarishpa Jehová Diosmanda caruyai ushashcataca Diabloca alimi yachan. Chaimandami Diabloca Job shuti runagutaca ashtacata llaquichishpa desanimachingapaj munarca. Shinapash Jobca Jehová Diosmandaca nunca na caruyarcachu (Job 2:3; 22:3; 27:5). Ñucanchipash Diablopa trampacunapi ama urmangapaj esforzarishpaca Jehová Diosmandaca na caruyashunllu. Ñucanchi familiatapash, huauquipanicunatapash animashpa cushichishpaca, paicunapash cushilla sintirishpa Jehová Diosmanda ama caruyachunmi ayudashun.

¿PICUNAPA ALI EJEMPLOTATA CATINA CAPANCHI?

7, 8. a) ¿Imashinata Jehová Diosca gentecunata animashpa cushichin? b) ¿Imashinata taitamamacunaca Jehová Diospa ejemplota cati ushan? (Callari dibujota ricupangui).

7 Jehová Diosca siempremi gentecunataca animashpa cushichin. Salmos librota escribij runaguca nircami: “Mandaj Diosca, shungupi ninanda llaquirishpa causajcunapaj ladopimi. Shungupi ninanda llaquirishpa causajcunatami quishpichin” nishpa (Salmo 34:18). Profeta Jeremiaspash mallarishca desanimarishcami carca. Chaimandami Jehová Diosca ayudashami nishpa animashpa cushichirca (Jeremías 1:6-10). Profeta Daniel ña rucugu cajpica shuj angelta cachashpami Jehová Diosca “ninanda juyai tucushca runami cangui” nishpa Danielta shinlliyachirca (Daniel 10:8, 11, 18, 19). Shinaca ¿nachu ñucanchicunapash  precursorcunata, pundashna ñana rurai ushanajuj mayorllacunata, shuj huauquipanicunatapash animashpa cushichita ushanchi?

8 Yaripashun. Jesús nara cai Alpaman shamushpaca ashtaca huatacunatami Jehová Dioshuan jahua cielopi igual carca. Jehová Diosca paipa Churi Jesusta animashpa cushichina minishtirishca cashcataca alimi yacharca. Chaimandami último huatata Jesús villachishpa purijujpica jahua pachamanda Jehová Diosca parlarca. Ishcai viajetami Jehová Diosca nirca: “Caimi, ñuca juyashca Churigu. Paimandami ninanda cushijuni” nishpa (Mateo 3:17; 17:5). Jesusca paipa Taita animashpa cushichijta uyashpami paipa Taita paita juyashcata, alicachishcataca seguro cashcanga. Jipamanbash, huañungapaj shuj punllalla faltajujpimi Jesusca, ninandapacha preocuparishca carca. Chaimandami Jehová Diosca shuj angelta cachashpa Jesustaca animashpa cushichirca (Lucas 22:43). Taitamamacuna, quiquinba huahuacunatapash cutin cutin animashpa cushichishpami Jehová Diospa ejemplota cati ushapanguichi. Imagutapash alita rurajta ricushpaca animashpa cushichipaichi. Shinallata, escuelapi o colegiopi problemacuna o tentacionguna ricurijpica shinlli tucuchun, aguantachunmi ayudana capanguichi.

9. ¿Imatata Jesuspa ejemplomandaca yachajuita ushapanchi?

9 Jesuspa ali ejemplotapashmi catita ushapanchi. Huañungapaj shuj tutalla faltajujpimi Jesusca paipa apostolcunapa chaquicunata maillachishpa yachachirca, humilde canaca minishtirishcami can nishpa. Humilde canata yachajunapa randica, pi ashtahuan mejor cashcata ricuchingapami apostolcunaca paicunapura fiñanajurca. Apóstol Pedrocarin, ñucaca nunca na Jesustaca saquishachu nishpami jariyajurca (Lucas 22:24, 33, 34). Shinapash Jesusca apostolcuna imapi pandarinajujtaca na ricujurcachu. Chaipa randica paicuna imapi ali sirvi ushanata ricushpami nirca, cangunaca ñuca rurashca cosascunatapash ashtahuan yali jatun cosascunatami ruranguichi, Jehová Diospash cangunataca ashtacatami juyan nishpa (Lucas 22:28; Juan 14:12; 16:27). Ñucanchicunapash tapuripashunchi: “¿Ñucaca Jesuspa ejemplota catishpachu shujcuna imapi pandarinajujta ricujunapa randica, paicuna imata ali rurai ushashcata ricuni?” nishpa.

10, 11. ¿Imashinata apóstol Pabloca shuj huauquipanicunata animashpa cushichirca? ¿Imatallata rurangapaj munarca?

10 Apóstol Pablopash cutin cutinmi shuj huauquipanicunamandaca ali cosascunata nin carca. Paica tauca huatacunatami huaquin huauquicunahuan viajarca. Paicunataca alimi rijsirca. Shinapash paicuna imapi pandarishcataca na escribircachu. Chaipa randica paicunapa ali rurashcacunatami alicachirca. Shuj ejemplota ricupashun. Timoteomanda parlashpaca apóstol Pabloca nircami, Timoteoca “Jesusta alipacha crij cashpami, ñuca juyashca huahuashnalla” can nishpa. Shina nishpami Timoteomanga shuj huauquipanicunata cuidachun mingarca (1 Corintios 4:17; Filipenses 2:19, 20). Titomanda parlashpapash Pabloca nircami, Titoca shuj huauquipanicunataca ashtacatami ayudashca, alipacha huauquimi can nishpa (2 Corintios 8:23). Apóstol Pablo paicunamanda imata pensashcata yachashpaca, Timoteopash Titopash ashtacata animarishpami cushijushcanga.

11 Apóstol Pablopash paipa cumba Bernabepash paicunapa causaitapash peligropi churashpami huauquipanicunataca animashpa cushichirca. Shuj ejemplota ricupashun. Listra llactapi gentecunaca paicunata huañuchingapami munanajurca. Shinapash mushuj huauquipanicuna Jehovata sirvishpa catichun munashpami, Pablopash Bernabepash cutin Listra llactaman tigrashpa paicunata animashpa cushichirca (Hechos 14:19-22). Jipamanga, Éfeso llactamanda ashtaca gentecuna ninanda culirashpami Pablotaca llaquichingapaj munanajurca. Shinapash chai llactapi huauquipanicunata animashpa cushichingapaj munaimandami paica chai llactapi quedarca. Hechos 20:1, 2pica ninmi: ‘Pabloca Jesusta catijcunata cayashpa, aliguta yarichishpa ugllarishca jipami cayacaman nishpa, Macedonia llactaman ringapaj llujshirca. Chai llactacunapica, tucui crijcunamanmi aliguta yarichishpa ninanda yachachijurca. Shina villashpandi rishpami, Grecia llactaman chayagrirca’ nishpa.

SHUJCUNATA ANIMASHPA CUSHICHIPASHUN

12. ¿Imamandata tandanajuicunaman rinaca alipacha can?

12 Jehová Diosca ñucanchicuna ali causachun munashpami nishca, tandanajunataca na saquinachu canguichi nishpa. Tandanajuicunapimi ñucanchicunaca  Jehová Diosmandapash yachajunchi, caishujhuan chaishujhuanbash animarishpa cushichirinchi (1 Corintios 14:31; Hebreos 10:24, 25, liingui). Callari parrafopi parlashca Cristinaca ninmi. “Ñucata juyashcata ricuchijpi, animashpa cushichijpimi tandanajuiman rinataca ninanda alicachini. Huaquinbica shungu ucupi ninanda llaquirishcami Tandanajui Huasimanga chayani. Shinapash ñañacuna shamushpa ugllarijpi, juyaillagumi cangui, ñaupaman ali catijushcamandaca ashtacatami cushijunchi nijpica animarishpami cushijuni” nin. Shinaca shujcunata animashpa cushichinaca minishtirishcapachami can (Romanos 1:11, 12).

13. ¿Imamandata ashtaca huatacunata Jehovata sirvinajujcunapash shujcuna animashpa cushichichun minishtin?

13 Ashtaca huatacunata Jehovata sirvinajujcunapashmi shujcuna animashpa cushichichun minishtin. Josueta yaripashun. Canaán alpacunaman ña chayagrinajujpica, Jehová Diosca Josuetami israelitacunata pushachun agllarca. Josueca ashtaca huatacunatami Jehovata sirvijurca. Shinapash Jehová Diosca, Josueta animashpa cushichichunmi Moisestaca nirca: “Cunanga Josuetaca, cushichishpa shinllichishpa mandangui. Paimi, israelcunata ñaupashpa rishpa, can ricugrijuj llactataca, paicunapaj cachun cunga” nishpa (Deuteronomio 3:27, 28). Josueca shuj shuj llactacunahuanmi macanajuna carca. Shuj llactahuan macanajushpacarin huaquinbica mishai tucunami carca. Chaimandami Josueca Moisés animashpa cushichichun minishtirca (Josué 7:1-9). Cunanbica, tucuicunallatami ancianocunatapash, superintendente de circuito huauquicunatapash animashpa cushichita ushanchi. Paicunaca ashtacatami shuj huauquipanicunataca ayudanajushca (1 Tesalonicenses 5:12, 13, liingui). Shuj superintendenteca ninmi: “Huaquin huauquipanicunaca paicunata visitashcamanda agradicishpami shuj cartaguta cun. Chai cartacunataca alichishcami charinchi. Llaquillacuna cashpaca chai cartacunata liishpami alillata sintirinchi. Shinami chai huauquipanicunaca ñucanchita ninanda animashpa cushichishca” nin.

Animashpa cushichishpami huahuacunataca Jehová Diosman ashtahuan quimirichun ayudanchi (Párrafo 14ta ricupangui).

14. ¿Ima ejemplocunata ricuchin, shujcunata consejajushpaca animashpa consejana cashcata?

14 Shuj punllaca Corinto llactamanda huauquipanicunamanmi apóstol Pabloca shuj consejota curca. Chai consejota pactachijpimi Pabloca chai huauquipanicunata animashpa cushichirca (2 Corintios 7:8-11). Shina animashpa cushichijpimi chai huauquipanicunaca alita rurashpa catishcanga. Cunanbi ancianocunapash, taitamamacunapash Pablopa ejemplota catingapami esforzarin. Andrés shuti huauquica ishcai huahuacunatami charin. Paica ninmi: “Animashpa cushichijpimi huahuacunaca cushilla sintirishpa, espiritualmentepash shinlli viñan. Shinllita consejajushpapash animashpa cushichishpami consejana can. Huahuacunaca ima ali cajta yachashpapash, taitamamacuna cutin cutin animashpa cushichishcamandami alita rurashpa causanata yachajun” nin.

SHUJCUNATA ANIMASHPA CUSHICHINGAPACA ¿IMATATA RURANA CAPANCHI?

15. ¿Imashinata shujcunata animashpa cushichi ushapanchi?

15 Huauquipanicunapa ali rurashcacunata alicachishcatapash, paicuna imashina esforzarinajushcatapash ninami canchi (2 Crónicas 16:9; Job 1:8). Shina rurashpaca Jehovapa, Jesuspa ejemplotami catinajushun. Jehová Diospash Jesuspash paicunapa munaita pactachingapaj ñucanchicunaca esforzarijpica, ashagutalla rurajpipash alicachishpami ricun (Lucas 21:1-4; 2 Corintios 8:12, liingui). Shuj  ejemplota ricupashun. Mayorlla huauquipanicunaca ashtacata esforzarishpami tandanajuicunamanbash, villachingapapash llujshin. Paicuna ashtacata esforzarinajushcamandaca ¿animashpa cushichinchichu?

16. ¿Imashinata shujcunata ashtahuan animashpa cushichita ushapanchi?

16 Shujcunata animashpa cushichinataca yariami cana canchi. Pipash alita rurajta ricushpaca animashpa cushichinataca na cunganachu canchi. Shuj punllaca apóstol Pablo Bernabendi Antioquía de Pisidia nishca llactaman rijpimi, chai llacta tandanajuna huasicunapi ñaupaman pushaj huauquicunaca huaquin shimicunata paicunaman nirca. ¿Ima shimicunatata nirca? Traducción del Nuevo Mundo Bibliapi Hechos 13:15pica ninmi: “Jari huauquicuna, gentecunata animashpa cushichingapaj imapash shimita nina cashpaca nipaichilla” nishpa. Shina nijpimi Pablopash paicunata animashpa cushichirca (Hechos 13:13, 14, 16, 42-44). Shujcunata animashpa cushichijpica, shujcunapashmi ñucanchitapash animashpa cushichinga (Lucas 6:38).

17. Shujcunata animashpa cushichingapaj munashpaca ¿imatata rurana capanchi?

17 Imata ali rurashcatami nina canchi. Tiatira congregacionmanda Jesús parlajushpaca, chai congregacionba ima rurashcacunata alicachishcata, imamanda chai rurashcacunata alicachishcatami parlarca (Apocalipsis 2:18, 19, liingui). Shinaca ¿imashinata Jesuspa ejemplota cati ushapanchi? Shuj mama paigulla huahuacunata viñachijujpica, paillagu cashpapash imashina ali viñachijushcata parlashpami animashpa cushichita ushanchiman. Cutin taitamamacuna cashpaca, quiquinba huahuacuna Jehovata sirvingapaj imapi esforzarinajujta ricushpami chaicunamanda animashpa cushichita ushapanguichi. Imata ali ruranajujta ricushpa, chai ali ruraicunamanda animashpa cushichijpimi shujcunaca ñucanchicuna imata ningapaj munajushcata intindinga.

18, 19. Shujcunapash Jehová Diosman ashtahuan quimirichunga ¿imashinata ayudai ushapanchi?

18 Jehová Diosca Moisestami nirca, Josueta animashpa shinlliyachipai nishpa. Shinapash cunanbica, ñana Jehová Diosca ñucanchitaca nijunllu, paita o chaita animapai nishpa. Shina cajpipash, shujcunata animashpa cushichingapaj ñucanchicuna esforzarijpica cushijushpami Jehová Diosca ricujun (Proverbios 19:17; Hebreos 12:12). Shuj ejemplota ricupashun. Shuj huauqui shuj discursota cujpica, chai discursota alicachishcatami chai huauquimanga nita ushanchi. Huaquinbica shuj discursopimi shuj problemata aguantachun, o shuj textota intindichun ayudan. Shuj paniguca cashna nishpami shuj huauquimanga escribirca: “Quiquinhuan ashagutalla parlajpipash, quiquinga ñuca shungupi imashina llaquirijushcata cuenta japishpami ñucataca animashpa cushichihuarcangui, ali sintirichunbash ayudahuarcangui. Plataformamanda yachachijushpapash, ñucahuan parlajushpapash ali shimicunahuan parlajpimi chai shimicuna Jehová Diosmanda shamushcata intindiparcani” nishpa.

19 Shujcunatapash Jehová Diosman ashtahuan quimirichun ayudangapaj munashpaca apóstol Pablopa cai shimicunatami pactachina canchi: ‘Cangunaca caishuj chaishujmi aliguta yarichirina canguichi. Chaitaca ñami ruranajunguichi’ (1 Tesalonicenses 5:11). Shinaca, cada punlla ‘caishujhuan chaishujhuan aliguta yarichirishpa’ o animashpa cushichirishpaca Jehová Diostami cushichishun.

^ [1] (párrafo 1) Huaquin shuticunata cambiashcanchimi.