Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Rijcharipaichi revista  |  Núm. 1, 2018

 CUSHILLA CANGAPACA

Imaguta charishpapash chaihuanmi cushijuna canchi, na mitsashpami carana canchi

Imaguta charishpapash chaihuanmi cushijuna canchi, na mitsashpami carana canchi

ASHTACA GENTECUNACA NINMI: CULQUITA CHARISHPALLA, ASHTACA COSASCUNATA CHARISHPALLAMI CUSHILLA, ALI CAUSARIN NISHPA. Chashna yuyashpami ashtaca millón gentecunaca na samashpa trabajan. Shinapash ¿ciertochu can? ¿Imatata ricupashcanchi?

Cushilla causanamanda parlashpaca shuj revistaca nircami, micunaguta, ropaguta, maipi causana pushtuguta charishca jahua ashtahuan cosascunata charishpapash, na ashtahuan cushilla caita ushanllu nishpa. Shuj revistapash nircami: “Culquimanda llaquilla cashpapash, culquita charingapaj musparijuimandami gentecunaca ashtahuan llaquilla causan” nishpa. Casi 2 mil huatacuna huashamanbash Bibliaca nircami: “Culquita juyashpa causanami, imatapash nalitalla ruranataca sapishna callarichin. Huaquingunaca, ninanda culquita munashpami [...] ninan llaquicunata apanajun” nishpa (1 Timoteo 6:9, 10). Shinaca ¿ima “llaquicunatata” charishca?

COSASCUNATA CUIDANGAPAJ PREOCUPARINCHI, PUÑUITAPASH CHINGACHINCHI. Eclesiastés 5:12​pica ninmi: “Trabajaj runaca, ashatalla micushpapash, vijsa pactajta micushpapash, aligutapacha puñunllami. Ashtahuangarin ashtacata charij runataca, chai charishcacunallatami na puñuchin” nishpa.

ÑUCANCHI MUNASHCASHNA NA CUSHILLA CASHPAMI LLAQUIRINCHI. Ashtahuan charingapaj munaimandami ashtahuanbachaca llaquiririn. Eclesiastés 5:10​pica ninmi: “Culquita ninanda juyaj runaca, culquita mashnata charishpapash na cushijunllu” nishpa. Ashtahuan charingapaj munaimandami huaquingunaca familiahuan, rijsicunahuan canata o Taita Diospa rurana cosascunata ladoman saquishca.

NEGOCIOCUNA, CULQUIPASH BAJARIJPICA LLAQUIRINCHIMI. Proverbios 23:4, 5​pica ninmi: ‘Ama charij tucunatalla ninanda munashpa puringuichu. ¿Charij tucuna yanga cajpitachu, chaitalla ricuria causagringui? Chaicunaca, alas viñajpi jatun anga jatarishpa, jahuata rinshna ñapash chingangallami’ nishpa.

 ¿IMA YUYAICUNATA CUSHILLA CACHUN AYUDAN?

ÑUCANCHIN CHARISHCACUNAHUAN CONTENDO CANA. 1 Timoteo 6:7, 8​pica ninmi: ‘Cai pachapica, imagutapash na charishpami huacharinchi. Shinallata cai pachamandaca, imatapash na apai ushashunllu. Shinaca micunaguta, churajunaguta charishpallata, cushijushpa causashunchi’ nishpa. Imaguta charishpapash chaicunahuan contendo causaj gentecunaca na quejarinajunllu, na shujcunatapash envidiashpa ricunajunllu. Ashtahuangarin, na ashtacata preocuparishpami causan.

NA MITSHASHPA CARANA. Hechos 20:35​pica ninmi: “Carajpi japijcunatapash yalimi carajcunaca, ninanda cushijun” nishpa. Na mitsashpa caranata yachajcunaca, shujcuna cushilla cachun munashpami, tiempogutallapash llujchishpa paicunata imagupipash ayudashpa cushijun. Chaimi, chai gentecunapash randi paicunata juyan, respetan, paicunapa ali amigocuna tucunbash (Lucas 6:38).

COSASCUNAPA RANDICA GENTECUNAMI ASHTAHUAN IMPORTANTE CAN. Proverbios 15:17​pica ninmi: “Virayashca huagra aichata micushpapash, fiñanajushpalla causangapaj randica, aicha illaj caldogutalla micushpapash, juyarishpa causanami ashtahuan ali” can nishpa. Shinaca, ashtaca culquita charinapa randica, ali amigocunata charina, juyashca sintirinami ashtahuan ali can. Imashinami jipaman yachajupashun, cushilla causangapaca juyaita ricuchinami minishtirishcapacha can.

Sudamericamanda Sabina shuti huarmiguca, Bibliapi yuyaicuna ali cajtami cuenta japirca. Paipa cusa jichujpimi, ishcai ushigucunata mantiningapaca ishcai trabajota charirca. Paica cada punllami 4 de la mañanata jatarin carca. Shaijushca chishashpapash, Bibliatami yachajui callarirca. Shinaca ¿imata pasarca?

Culqui faltajllagu catishpapash, Taita Diosmanda yachajushpa, shuj gentecunamanbash pai imata yachajushcata villachishpami cushilla caita usharca (Mateo 5:3). Ashtahuangarin, paipa religión ucupillatami alipacha rijsicunata tarirca.

Mateo 11:19​pica ninmi: ‘Ali yachaita’ charishcataca ‘[ali] ruraicunahuanmi ricuchinajun’ nishpa. Shinaca, cushilla causangapaca, ñucanchi charishca cosascunahuanmi contendo cana capanchi, na mitsashpa carana capanchi, cosascunapa randica gentecunatami pundapi churana capanchi.