Agllashca temata ricungapaj

Temacunata ricungapaj

Tucui shunguhuan caranaca cushilla cachunmi ayudan

Tucui shunguhuan caranaca cushilla cachunmi ayudan

SUDAMERICAPI shuj llactamanda, caishuj llactaman yalingapaj frontepi cashpami Alexandraca cashna ninajujta uyarca, “chinotaca saquishpa busca richunlla” nijujta. Alexandra busmanda uriajushpa ricujpica, china llactamanda shuj jovenmi español shimita nali parlai ushashpa fronterata cuidajcunahuan parlangapaj munajujta ricurca. Alexandraca chino shimita parlaj testigo de Jehovacunapa congregacionmandami carca. Chaimandami paica chino shimita yachaimanda chai jovendaca, fronterata cuidajcunahuan parlaita ayudasha nirca.

China llactamanda jarica nircami, cai llactapi cangapaca tucui documentocunatami charini. Shinapash documentocunata, culquitapash shuhuaitami shuhuahuarca nishpa. Fronterata cuidajcunaca na fácil crircachu. Alexandratapash gentecunata secuestrashpa jatujmi can yarin nishpami ricurca. Shinapash jipamanga intindircami, pero documentocunata na charimanda multata paganami tucurca. Chaipapash Alexandrallatami 20 dolarta mañachirca. Shina ayudashcamandami china llactamanda jarica cutin cutin agradicishpa, 20 dólar yalitami pagasha nirca. Alexandraca nircami, imatapash ñuca ganangapaca na ayudarcanichu, ayudashcamandaca ninandami cushijuni nishpa. Shinallata Bibliamanda huaquin publicaciongunata saquishpami, testigo de Jehovacunahuan Bibliata yachajuchunbash animarca.

Pipash nunca na rijsishca gentecunata tucui shunguhuan imatapash cushpa o carashpa ayudashcata uyashpaca ashata manllarishpami uyanchi. Gentecunaca religionda catishpa o na catishpapash Alexandra shina shujcunata ayudanmi. Shinapash ¿quiquinba munaita huashaman saquishpa pitapash ayudaita ushanguimanlla carca? Cai tapuica minishtirishcapachami can. Jesusca nircami: “Carajpi japijcunatapash yalimi carajcunaca, ninanda cushijun” nishpa (Hechos 20:35). Cientificocunapash shinallatami yuyan. Paicunaca yachaj chayashcami, tucui shunguhuan caranaca gentecunapa ali cashcata. Imacunapalla ali cashcata ricupashun.

TUCUI SHUNGUHAUN CUSHIJUSHPA CARAJ

Imashinami ricunchi tucui shunguhuan carana, cushilla canapash casi igualmi can. Apóstol Pablo nircami: “Taita Diosca, cushijushpa carajtami juyan” nishpa. Paica chai punllacunapi Jesusta ali catijcuna, imapash llaqui apashca huauquipanicunata imagutapash cushpa ayudashcamandami parlajurca (2 Corintios 8:4; 9:7). Shinallata Pabloca chai huauquipanicunaca imagutapash carashpa ayudashcamandami cushilla sintirin nijurcami.

Shuj investigacionda rurashpaca yachaj chayashcami: “tucui shunguhuan carana, ayudanaca cushilla yuyaicunata charichun ayudashcata. Shuj gentecunahuanbash ali caita ushashca, ashtahuan confianzata charishpa ali sintirichun ayudashcatapash”. Cutin shuj investigacionda rurajcunaca ninmi: “culquita shujcunaman carajcunaca, imatapash paicunapallata randishpa cushilla sintirishcatapash yali alimi sintirin” nishpa.

Ima horapash quiquinga ¿imatapash ashtahuan ruraitaca na ushanichu nishpa pensarishcanguichu? Tucuicunami tucui shunguhuan carashpa ninanda  cushijuita ushan. Ashatalla o llashajta carashpapash tucuicuna ali yuyaihuan carashpaca cushillami sintirin. Shuj testigo de Jehová huarmica cai revistata rurajcunamanmi asha culquiguta shuj cartahuan cacharca. Chaipica ninmi: “Tauca huatacunatami Tandanajui huasiman rishpaca ashalla culquiguta churai ushashcani. Shinapash Jehová Diosca chaitapash yalitami bendiciahuashca. [...] Pagui ñuca cushcata chasquishcamanda, shina ayudashpaca cushillami sintirini” nishpa.

Shinapash tucui shunguhuan caranaca na culquita caranallaca canllu. Shuj shuj ruraicunahuanbash cushijushpa caraj cashcata ricuchi usharinmi.

TUCUI SHUNGUHUAN CARANACA SALUDPA ALIMI CAN

Tucui shunguhuan ayudanaca ñucanchitapash, shujcunatapashmi cushichin.

Bibliapica ninmi, pipash ali cashpaca paipallatami ali can. Cutin nali cashpaca paillatami llaquipi urman nishpa (Proverbios 11:17). Ali gentecunaca tucui shunguhuanmi paicunapa fuerzata, tiempota cushpa, imagupipash ayudangapaj munan. Shina causanaca ashtahuanbachaca quiquinba salud ali cachunmi ayudan.

Huaquin investigajcunaca ninmi, tucui shunguhuan shujcunata ayudajcunataca ungüicunapash na yapata japinllu. Paicunapa saludca ashata ashatahuan ali can. Esclerosis, Sida ungüita charijcunapash tucui shunguhuan shujcunata ayudashpaca ashtahuan alillatami sintirin. Shinallata tragota ufiana viciota charijcuna chaita saquingapaj shuj tratamientopi cashpa tucui shunguhuan shujcunata ayudashpaca ama pinarijuchun o tragota ufiana viciopi cutin ama urmachunmi ayudan nishpa.

Tucui shunguhuan ayudanaca ¿imamandata ali can? Tucui shunguhuan “llaquina, jahuan jahuan caranaca imapash nali yuyaicunata charishpa ama llaquilla sintirichunmi ayudan”. Shujcunapa munaita pundapi churanaca, yapata preocuparimanda estrés ungüi, presión alta presión baja nishca ungüicuna ama japichunmi ayudan. Shinallata viudo o viuda quedashcacunapash tucui shunguhuan shujcunata ayudashpaca ama yapata llaquilla cachunmi ayudan.

Imashinami ricunchi shujcunata tucui shunguhuan ayudanaca ñucanchipallatami ali can.

TUCUI SHUNGUHUAN CARAJPI AYUDAJPICA SHUJCUNAPASH SHINALLATAMI RURANGA

Jesusca paipa catijcunataca nircami: ‘Shujcunaman caraichi, Diospash cangunaman carangami. Jicharijta jundachishpami cangunaman migllachinga. Shujcunaman imashna carajpipash, chashnallatami Diospash cangunaman caranga’ nishpa (Lucas 6:38). Ñucanchicuna tucui shunguhuan carashpa ayudajpica shuj gentecunaca agradicishpa, paicunapash shinallata rurangapami munanga. Shina ruranaca shujcunata ayudana munaita charichun, ali llevarichunmi ayudan.

Tucui shunguhuan caranaca shujcunapash ayudachun, ali llevarichunmi ayudan.

Gentecuna shujcunahuan imashina llevarijta investigashpaca yachaj chayashcami, “gentecuna shujcunapa munaita pundapi churashpa causajpica shujcunapash shinallata rurangapaj munashcata”. Shinallata ninmi, “pipash tucui shunguhuan shujcunata ayudashcata liishpallatami shuj gentecunapash shinallata rurangapaj munan” nishpa. Cutin shuj investigadorcunaca ninmi, “ñucanchicunapa ruraicunaca ashtaca na rijsishca gentecunapash shinallata rurachunmi animaita ushan” nishpa. Shinaca ñucanchicuna tucui shunguhuan shujcunata ayudajpica,  ñucanchi comunidadpi causajcunapash shinallatami rurangapaj munanga. ¿Nachu shina gentecunapurapi causangapaj munapanguiman? Imashinami ricunchi ashtahuan gentecuna tucui shunguhuan ayudanata gushtajpica tucuicunallatami ali causanchiman.

Tucui shunguhuan ayudashcamanda shuj ali ejemplota ricupashun. Estados Unidos Florida llactapica shuj jatun acapana yalishca jipami, huaquin testigo de Jehovacunaca llaqui apashcacunatami ayudagrinajurca. Paicunaca shuj huasita arreglangapaj ima minishtirishcacunata apamuchunmi shuyanajurca. Chaicamanga shuj vecinopa cerramiento huaglishcata ricushpami paicunaca arreglashpa ayudarca. Jipa punllacunapica chai vecinoca mundo enteropi testigo de Jehovacunata ricuj oficinamanmi shuj cartata cacharca. Chai cartapica nircami: “Quiquinguna ñucata ayudashcataca siempremi agradicisha. Tucuicunamanda yali cushilla gentecunami canguichi” nishpa. Paipash ayudangapaj munashpami testigo de Jehovacuna imashina ayudashcata agradicingapaj culquita cacharca.

CUSHIJUSHPA CARANATACA ¿PITA YACHACHIN?

Cientificocunaca ninmi, “shujcunata ayudana yuyaitaca tucui gentecunallatami shungupi charin” nishpa. Shinallata ninmi, “uchilla huahuacunapash nara parlaita yachajushpallatami shujcunapa munaita pundapi churanata yachan” nishpa. Bibliapica ninmi, gentecunataca “Taita Diosman rijchajtapachami rurarca” nishpa. Chaimandami ñucanchicunapash tucui shunguhuan caranata, ayudanata, juyanatapash yaipi charinchi (Génesis 1:27).

Tucuita Ruraj Jehová Diosca juyaj, na mitsa Diosmi can. Jehovami causaita, ñucanchi cushilla causangapaj imatalla minishtishcatapash carashca (Hechos 14:17; 17:26-28). Bibliapimi Taita Diosmanda, gentecuna jipa punllacunapi cushilla causachun pai imatalla rurashcata, imata ruranatapash yachajui ushanchi * (1 Juan 4:9, 10). Taita Dios na mitsa cashcamanda, paiman rijchajta rurashcamandami ñucanchicunapash pai shina tucui shunguhuan na mitsa cashpa ayudanata gushtanchi. Shinami Taita Diospa ñaupapipash ali ricurinchi (Hebreos 13:16).

Callaripi parlashca Alexandrahuanga ¿imata tucurca? Chai chino jovenman culquita mañachijujpica shuj jarica nircami, maitashi paganga nishpa. Shinapash chai chino jovenga bus shayarina pueblopi causaj amigocunata cayashpami 20 dolartaca Alexandraman pagarca. Shinallata Alexandra nishca shinami chai jovenga Testigocunahuan Bibliata yachajui callarirca. Quimsa quillacuna jipaca Perú llactapi testigo de Jehovacunapa chino shimipi shuj jatun tandanajuipimi chai jovendaca Alexandraca tuparirca. Chai jovenga ninanda agradicishcata ricuchingapami Alexandrata, paita jatun tandanajuiman cumbashpa rijcunatapash paipa restauranteman micuchun invitarca.

Imashinami ricunchi, tucui shunguhuan carana, ayudanaca cushilla causachunmi ayudan. Gentecunata tucui shunguhuan na mitsashpa caraj Jehová Diosta rijsichun ayudanacarin ashtahuan alimi can (Santiago 1:17). ¿Quiquinga tucui shunguhuan carashpa, ayudashpa cushilla sintirishcanguichu?

^ par. 21 Ashtahuan yachajungapaca ¿Imatata Bibliaca Yachachin?, librota ricupangui. Chai librotaca testigo de Jehovacunami llujchishca. Internet jw.org/qvi PUBLICACIONGUNA nishcaman yaicushpa mascapangui).