Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Huahuacunata yachachipashunchi

 Lección 5

Samuelca Jehovapa nishcatami rurarca

Samuelca Jehovapa nishcatami rurarca

Samuelca uchillamandapachami tabernaculopi sirvishpa causarca. Tabernaculoca Diosta adorana pushtumi carian. ¿Imamanda Samuel chaipi sirvijushcata yachangapaj munanguichu? Chaipaca Ana shuti huarmigumandara yachajushun. Anaca Samuelpa mamami carca.

Anaca huahuata charingapami ninanda munarian. Shinapash na tarita usharcachu. Chaimandami Jehovata mañarca: “Jehová ayudahuai. Ñucaman shuj huahuaguta carajpica tabernaculopi sirvichun cachapashami” nircami. Diosca Anapa mañashcata uyarcami. Chaimandami Anaca shuj jari huahuaguta charishpa Samuel shutita churarca. Samuel quimsa o chuscu huatacunata charijpica Diospa tabernaculopi sirvigrichunmi Anaca saquigrirca.

Tabernaculopi sacerdotecunata mandajca Elí shutimi carca. Paipa ishcai churicunapashmi chaipi sirvinajurca. Tabernaculopica Diostami adoran carca. Chaimandami chaipi sirvijcunaca aliguta portarina carca. Shinapash Samuelca Elipa churicuna nalicunata ruranajujtami ricun carian. ¿Elipa churicunashnacha Samuelpash nalicunata ruran carian?... Samuelca paipa taitamama yachachishcashnami Jehovapa nishcata rurashpa catirca.

¿Nachu Elica paipa churicunataca shinlli shinlli rimana carca?... Churicuna tabernaculopi sirvishpa catichunbash ñana saquinachu carca. Shinapash Elica ricuna cashcamandami ricurca. Chaimandami Jehová Diosca ninanda culirashpa Elitapash paipa churicunatapash llaquichishapachami nirca.

Jehová nishcatami Samuelca Eliman tucuita villarca

Shuj tutaca Samuelca ñami puñujurca. Chaipimi “Samuel” nishpa caparijta uyarca. Elí cayajun yashpami calpashpa paipaman rirca. Elica “na ñucaca cayarcanichu” nircami. Quimsa viajecaman shina pasajpimi Elica Samuelta nirca: “Cayajta uyashpaca, ‘parlapailla Jehová  Dios uyajupanimi ningui’” nircami. Cutin cayajpimi Samuelca, “Jehová Dios parlapailla, uyajupanimi” nirca. Chaipimi Diosca Samuelta nirca: “Eliman caita villapai, nalicunata rurashcamandami candapash canba churicunatapash Diosca llaquichigrinmi” nipai. ¿Eliman chaita villanataca Samuelca manllarcacha?... Manllashcangami. Manllashpapash Jehovata cazuimandami Eliman tucuita villarca. Jipamanga Jehovapa nishca pactarijpimi, Elipash paipa ishcai churicunapash huañurca.

Samuelmandaca ¿imatata yachajunchi? Shujcuna nalicunata ruranajujta ricushpapash Samuelca Jehovapa nishcatami rurashpa catirca. ¿Canbash chaitallata ruranguicha? ¿Samuelshna Jehovata cazunguicha? Tucuipi cazujpica Jehovapash papitopash mamitapash ninandami canmanda cushijunga.

BIBLIAPI LIISHUN: