Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

 Lección 11

¿Picunata Jesusmanda escribirca?

¿Picunata Jesusmanda escribirca?

Cai dibujopica Mateo, Marcos, Lucas, Juan, Pedro, Santiago, Judas, Pablopashmi ricurin. Paicunaca Jesús causashca tiempopi causashcamandami Jesusmanda escribirca. Paicuna escribishca librocunaca Bibliapimi can. ¿Paicunamanda yachajungapaj munanguimanllu?...

Paicunaca ¿picunata can?

Jesuspa ashtahuan ali amigocunaca apóstol Mateo, Juan, Pedromi carca. Paicunaca Jesushuanmi villachishpa purirca. ¿Mateota, Juanda, Pedrota dibujopi ricuchita  ushanguichu?... Mateopash Juanbash cada unomi Jesuspa causaimanda shuj librota escribirca. Ashtahuangarin Juanga Apocalipsis o Revelación librota, Primera, Segunda, Tercera de Juan nishca cartacunatapashmi escribirca. Cutin apóstol Pedroca Primera y Segunda de Pedro nishca cartacunatami escribirca. Segunda de Pedro cartapica, Jehová Dios paipa churi Jesusta “caimi ñuca juyashca Churigu, paimandami ninanda cushijuni” nishcatami villan.

Dibujopi ricurij chaishuj jaricunapashmi Jesusmanda escribirca. Shujca Marcos shutimi can. Paica Jesusta japishpa preso apanajujtami ricushcanga. Cutin chaishujca Lucasmi can. Paica doctormi carca. Jesús huañushca jipami Lucasca Jesusta cati callarishca yarin.

Jesuspa ishcai cati huauquicunapashmi paimanda escribirca. ¿Picuna cajta yachanguichu?... Dibujopimi tiajun. Shujca Santiago, chaishujca Judasmi can. Callaripica Jesús yachachishcata na cringapaj munashpami, Jesusca juizumi chingarijun yarin nishpa pensanajurca. Shinapash jipamanga Jesuspi crishpami paipa catijcuna tucurca.

Cunanga Pablomanda yachajushun. Paipashmi dibujopi ricurin. Jesusta nara cati callarishpaca Saulo shutimi carca. Jesusta catijcunataca nimamanda na ricunayachinllu carca. Pablo ¿imashina Jesusta cati callarishcata yachangapaj munanguimanllu?... Shuj punllaca Damasco llactaman rijushpami Pabloca jahua cielomanda parlajta uyarca. ¿Pita parlarca? Jesusmi parlarca. Pablotaca tapurcami: “¿Imamandata ñucapa catijcunataca ninanda llaquichijungui?” nishpa. Chaita uyashpami Pabloca pai cambiana cashcata cuenta urmashpa Jesusta cati callarirca. Jipamanga Pabloca Bibliapa 14 librocunatami escribirca. Romanos libromanda callarishpa Hebreos librocaman.

Cada punllami Bibliataca liinchi ¿nachu?... Bibliata liishpallami Jesusmandaca ashtahuan yachajungui. ¿Jesusmanda ashtahuan yachajungapaj munanguimanllu?...