Agllashca temata ricungapaj

Temacunata ricungapaj

 Lección 12

Pablopa sobrinoca na manllarcachu

Pablopa sobrinoca na manllarcachu

Apóstol Pablopa causaita salvashca jovenmanda parlagrini. Paipa shutita na yachashpapash Pablopa sobrino cashcatami yachanchi. Paica na manllanllu carian. ¿Paimanda parlachun munanguimanllu?...

Jesusmanda yachachijujpimi Pablotaca Jerusalenbi preso churarca. Huaquingunaca Pablota na ricunayachishpami huañuchingapaj parlarinajurca. Paicunaca soldadocunata mandajtaca nircami, Pablotaca Sanedrinman cayapa apamupai nishpa. Paicunaca Sanedrinman rina ñanbimi Pablota huañuchingapaj shuyagrinajurca.

Pablopa sobrinoca Pablomanra tucuita villashpami, jipaca soldadocunata mandajmanbash villarca

Chaitami Pablopa sobrinoca yachaj chayarca. ¿Imatashi rurarca? Paica Pablomanmi villagrirca, candaca huañuchingapami munanajun nishpa. Chaimandami Pabloca paipa sobrinotaca mandarca: “Caitaca uchalla soldadocunata mandajman villagri” nishpa. ¿Nachu Pablo mandashcata ruranaca shinlli carca?... Soldadocunata mandajca importante autoridadmi carca. Shinapash Pablopa sobrinoca na manllashpami soldadocunata mandajman tucuita villarca.

Soldadocunata mandajca ali alimi paitaca uyarca. Chaimandami Pablota ama huañuchichunga casi 500 soldadocunata cacharca. Soldadocunataca mandarcami: “Pablotaca Cesarea llactaman apaichi” nishpa. ¿Imatata yuyangui, Pabloca salvarircacha?... Salvarircami. Nali gentecunaca Pablota na huañuchi usharcachu.

Pablopa sobrinomandaca ¿imatata yachajungui?... Paica na manllarcachu. Canbashmi Pablopa sobrinoshna caita ushangui. Jehovamanda villachingapaca na manllaita charinachu cangui. ¿Na manllashpa Jehovamanda villachinguicha?... Villachinata na saquishpaca gentecunapa causaitami salvai ushangui.