Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Huahuacunata yachachipashunchi

 Leccioń 2

Jehová cushijuchunmi Rebecaca munarca

Jehová cushijuchunmi Rebecaca munarca

Rebecapash paipa cusa Isaacpash Jehová Diostaca ninandami juyarca. Cunanga imashina Rebeca Isaacta rijsishcata, imamanda Jehová Rebecamanda cushijushcatapashmi yachajugrinchi.

Isaacpa taitamamaca Abrahán y Sarami carca. Abrahanga munarcami tucui shunguhuan Jehovata juyaj huarmiguhuan Isaac cazarachun. Shinapash paicunaca Canaán llactapimi causanajurca. Chaipi causajcunaca Jehovata na adoranllu carca. Chaimandami Abrahanga paipa sirvijta Harán llactaman cacharca. Chai sirvijca Eliezermi cashcanga. Abrahanba familiacuna Haranbi causanajujpimi Eliezertaca chaiman cacharca. Shinaca Abrahanba familiapurapillatami Eliezerca Isaacpa shuj ali huarmiguta tarina carca.

Rebecaca tauca viajemi yacutaca ashtashcanga

Eliezerca Abrahanba shuj sirvijcunandimi regalocunata 10 camellocunapi apachishpa caruta rirca. ¿Imashinata Eliezerca Isaacpa shuj huarmiguta tarina carca? Eliezerca alimi yacharca Harán llactamanda huarmicunaca shuj pozomanda yacuta llujchij cashcata. Shinaca chai pozo yacu ladoman rishpami Eliezerca Jehovata mañarca: “Ñucamanbash, ñuca camellocunamanbash yacuta carangapaj munaj huarmigumi, can agllashca Isaacpa huarmigu canga” nishpa.

Chai ratomi Rebecaca pozo yacuman  chayamurca. Bibliapica parlanmi Rebecaca juyailla cuitsagu cashcata. Eliezer yacuta mañajpica, Rebecaca nircami: “Quiquinmanbash quiquinba camellocunamanbash yacuta carapashallami nishpa”. Camellocunaca ashtaca yacutami ufian. Shinaca Rebecaca tauca viajemi yacuta ashtashcanga. Página 6pi dibujota ricui. ¿Imatata Rebecaca shinajun?... Yacuta ligero ligero ashtajujta ricushpaca, Eliezerca pai mañashcata Jehová contestajtami cuenta japirca.

Eliezerca juyailla regalocunatami Rebecaman cararca. Rebecaca paipa taitapa huasimanmi Eliezertapash Abrahanba shuj sirvijcunatapash pusharca. Eliezerca parlarcami imapa Abrahán chaiman cachashcata, pai mañashcata imashina Jehová contestashcatapash. Chaita uyashpaca Rebecapa familiaca ninandami cushijurca. Isaacpa huarmi tucuchunbash munarcami.

Canaán llactaman rishpa, chaiman chayashpami Rebecaca Isaachuan cazararca

¿Rebecaca Isaachuan cazarangapaj munarcacha?... Rebecaca yacharcami Eliezerta Jehová cachamushcata. Cazarangapaj munanguichu nishpa paipa familia tapuchijpica, ari nircami. Shinaca Canaanman rishpa, chaiman chayashpami Isaachuan cazararca.

Rebeca tucuipi cazujpimi, Diosca Rebecata cuidarca. Ashtahuanbash Rebecapa familiamandami Jesusca nacirirca. Jehovata cazujpica, Rebecatashnami Diosca candapash cuidanga. Shinami Jehová Diosca canmandapash ninanda cushijunga.