Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Bibliapica ¿imatata yachajuni?

 CAPÍTULO 52

Jehovapa caballocuna, nina rupajuj carretacuna

Jehovapa caballocuna, nina rupajuj carretacuna

Siria llactata mandaj Ben-Hadad shuti reyca tauca viajetami Israel llactataca llaquichirca. Shinapash profeta Eliseoca siempremi Israel llactata mandaj rey pacajuchun villan carca. Chaimandami Ben-Hadad shuti reyca Eliseota secuestrashpa apachun mandarca. Dotán llactapi cashcata yachaj chayashpami Eliseota japichun Siria llactamanda soldadocunata chaiman cacharca.

Siria llactamanda soldadocunaca tutami Dotán llactaman chayarca. Cayandi tutamanda Eliseota sirvij runagu llujshishpa ricujpica, ashtaca soldadocuna llactata muyuriajujta ricushpami ninanda manllarishpa cashna caparirca: Eliseo “cunanga, ¿imatashi rurashun?” nishpa. Shina nijpimi Eliseoca nirca: “Ama manllaichu. Ñucanchimi, paicunatapash ashtahuan yali ashtacacuna canchi” nishpa. Chai ratomi Jehová Diosca Eliseota ‘sirvij runapa ñavita pascarca. Chashna pascajpimi paipa muyundipica, caballocunapi tiarishca gentecuna, nina rupajuj carretacuna chai loma junda shayanajujta ricurca’.

Siria llactamanda soldadocuna Eliseota japingapaj munajpica Eliseoca Jehová Diosta cashna nishpami mañarca: “Cai gentecunata ñausata rurapai” nishpa. Shinami chai soldadocunaca ricuita ushashpapash, maipi cashcatapash na atinanajurca. Chaimi Eliseoca chai soldadocunataca nirca: ‘Canguna mascajushca  puebloca na caichu. Ñucata catihuaichi, ñucami canguna mascajushca runapaman saquigrisha’ nishpa. Shina nijpimi chai soldadocunaca Eliseota catishpa Samaria llactacaman rirca. Chaipica Israel llactata mandaj reymi causajurca.

Chai llactaman chayashpami Siria llactamanda soldadocunaca maipi cashcata cuenta japirca. Shinapash Israel llactata mandaj reypa maquipimi carca. Chaipimi chai reyca Eliseotaca cashna tapurca: “¿Paicunataca huañuchishallachu?” nishpa. ¿Sirio soldadocuna llaquichingapaj munashcamanda Eliseoca paicunata llaquichigrijurcachu? Na, na llaquichigrijurcachu. Chaimandami Israel llactata mandajtaca cashna nirca: ‘Na huañuchinachu cangui. Ashtahuangarin paicuna micushpa, ufiashpa tigrachun’ saquilla nishpa. Chaimi chai reyca paicunaman ashtaca micunata rurashpa micuchishca jipaca paicunapa huasiman tigrachun saquirca.

“Pai munashcashna ñucanchi imaguta mañajujtapash, Diosca uyanllami. Chaita yachashpami, paita crishpa cushijunchi” (1 Juan 5:14).