Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Bibliapica ¿imatata yachajuni?

 CAPÍTULO 43

Davidca shuj jatun juchatami rurarca

Davidca shuj jatun juchatami rurarca

Saúl huañushca jipaca David 30 huatacunata charishpami israelitacunapa rey tucurca. Huatacuna yalishca jipa shuj tutaca Davidca huasi jahua patiomandami, shuj juyailla huarmita ricurca. Chaimi Davidca chai huarmi pi cashcata tapuchun cacharca. Shinami chai huarmi Bat-Seba shuti cashcata, Urías shuti soldadohuan cazada cashcatapash yachaj chayarca. Chai jahuami ‘Davidca, chai huarmita pushamuchun cacharca. Ña paipaman pushamujpimi, chai huarmihuan puñurca’. Shinami Bat-Seba huarmica vijsayu quedarca. Chaimi Davidca pai juchapi urmashcata pacangapaj munashpa, paipa soldadocunata mandajman cashna nirca: ‘Uriastaca, ashtahuan shinlli macanajunajuj ñaupajpi churaichi. Chai jipaca, chai macanajuipi huañuchun paitalla saquinguichi’ nishpa. Urías chai macanajuipi huañujpimi Davidca Bat-Seba huarmihuan cazararca.

Jehová Diosca chai tucui nalicunatami ricujurca. ¿Imatashi Jehová Diosca ruragrijurca? Natán shuti profetata Davidhuan parlachun cachajpimi cashna nirca: ‘Shuj pueblopica ishcai runacunami tiarca. Shujca ninan charij, caishujca imagutapash na charijmi carca. Chai charijca, ashtaca llamacunatami charirca. Cutin imagutapash na charijca, pai randishpa viñachishca shuj llamagutallami charirca’. Shinapash chai charij runaca ‘imagutapash na charijpa llamagutami quichurca’ nishpa. Chaita uyashpaca Davidca ninanda culirashpami cashna nirca: Chai charij runaca “huañuchi tucunapachami” can nishpa. Chaimi Natán runaguca nirca: “Chai runaca, canllatamari cangui” nishpa. Shina nijpimi Davidca ninanda llaquirishpa cashna nirca: Juchata rurashpami, Jehovata fiñachishcani nishpa. Chai juchacunapi urmashcamandaca Davidpash, paipa familiapash ashtaca llaquicunatami charirca. Jehová Diosca Davidta cashtigashpapash, juchapi urmashcata na pacashcamanda, humilde cashcamandami causashpa catichun saquirca.

Davidca Jehovapa templo huasita rurangapami munarca. Shinapash Jehová Diosca Davidpa churi Salomondami chai templo huasita rurachun agllarca. Chaimi Davidca, Salomón templo huasita rurangapaj imacunatalla minishtishcata tandachi callarishpa  cashna nirca: Jehová Diospa templo huasica alipachami cana can. Salomón joven cajpipash ñucami ayudagrini nishpa. Chaimi Davidca paipa churi, Jehovapa huasita shayachichun charishca culquita curca. Shinallata ali yachajushca trabajadorcunatami mascarca. Chai jahuami orota, culquita, Tiro llactamanda, Sidón llactamanda cedro caspicunatapashmi tandachirca. Davidca pai huañuna punlla chayajujpimi paipa churi Salomonman templo huasita imashina rurana planocunata cushpa cashna nirca: Jehová Diosmi “paipaj maquihuan rurashpa ricuchihuarca. Paimi, imashna ruranataca tucuillata aliguta rurashpa ricuchishpa” canman cuchun yachachihuarca. “Ashtahuan ali yuyaita japishpa, shinlli tucushpa chaitaca ña rurai callarilla. Na manllanachu cangui” nishpa.

“Maijan cashpapash paipaj juchacunata pacaj runaca, ali causaitaca na ushangachu. Ashtahuangarin juchacunata villashpa, tucuita saquij runataca, Diosmi llaquinga” (Proverbios 28:13).