Jericó llactata ricungapaj rishca ishcai jaricunaca, Rahabpa huasimanmi chayarca. Jericó llactamanda rey chaita yachaj chayashpaca soldadocunatami cacharca. Chaimi Rahab huarmica chai ishcai jaricunataca paipa huasi jahuapi pacashpa soldadocunamanga cashna nirca: Chai jaricunaca na caipichu shuj pushtucunapi mascagrichilla nishpa. Chai jipaca Rahab huarmica chai ishcai jaricunataca nircami: ‘Dios cai llactata cangunaman carashcataca yachanimi’. Chaimi cangunataca ayudagrini. Shinapash ñuca familiata salvanataca ama cungapanguichichu nishpa.

Chaimi chai ishcai jaricunaca Rahabtaca cashna nirca: ‘Ventanapi racuta caupushca puca puchata huatangui’. Shinallata canba tucuilla familiata canba huasipi tandachingui. Shinami canba familiaca salvaringa nishpa.

Rahab huarmica chai ishcai jaricunataca ‘cabiahuan huatashpa ventanata uriajuchishpami’ Jericó llactamanda llujshichun ayudarca. Chai ishcai jaricunaca quimsa punllacunata urcucunapi pacajushpa yalishca jipami Josuepaman tigrarca. Chai jipami israelitacunaca “Jordán yacuta chimbashpa” chai alpacunata japingapaj prepararinajurca. Jericó llactatami pundapica israelitacunaca macanajushpa mishagrinajurca. Chaimi Jehová Diosca israelitacunataca nirca: ‘Cai pueblotaca punllapi shuj viajetallami muyuna  canguichi’ nishpa. Chaimi israelitacunaca sujta punllacunata chai llactataca muyunajurca. Cutin ‘canchis punlla tucujpica, chai pueblotaca canchiscamanmi muyunajurca’. Chai jipaca, sacerdotecunami trompetacunata shinllita huacachirca. Shinallata soldadocunapash ninandami caparinajurca. Chaimi Jericó llactapa pircacunaca urmarca. Shinapash Rahab huarmipa huasi pircacunaca na urmarcachu. Shinami Rahab, paipa familiapash Jehová Diospi confiaimanda salvarirca.

‘Rahab huarmica, paipa llactata ricungapaj rijcunata mingachishpami, shuj ñanda ricuchishpa cacharca. ¿Nachu shina alita rurajpica Diosca imatapash cashcatapacha rurashcatashna chasquishca?’ (Santiago 2:25).