Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Bibliapica ¿imatata yachajuni?

 CAPÍTULO 35

Anaca huahuaguta charingapami munarca

Anaca huahuaguta charingapami munarca

Elcaná runaguca israelitami carca. Paica ishcai huarmicunatami charirca. Paicunaca Ana y Peninami carca. Shinapash Elcaná runaguca Anatami ashtahuan juyan carca. ‘Peniná shuti huarmica huahuacunata charircami. Cutin Anaca na charircachu’. Chaimandami Peniná huarmica ‘Anataca ninanda llaquichin’ carca. Elcanaca paipa familiata cada huatami tabernáculo nishcapi Jehovata adorangapaj Siló shuti puebloman pushan carca. Shuj viajeca Siló pueblopi cashpa Ana huacashpalla parajujtami Elcaná runaguca cuenta japirca. Chaimi paica cashna nirca: ‘Ana, ¿imashpata huacangui? ¿Nachu ñucallata canbaca chunga churicunatapash yali cani?’ candaca juyanimari nishpa.

Chai jipallami Anaca pailla Jehovata mañangapaj rirca. Mañajushpaca Anaca ninanda huacashpami, Jehová Dios ayudahuai nijurca. Shinallata cashnami nirca: ‘Ñucaman shuj jari huahuaguta carajpica, chai huahuagutaca tucui paipa causaipi can Diostalla sirvishpa causachunmi cupasha’ nishpa.

Shina huacashpa shungu ucupilla mañajujpimi, paipa shimi cuyurishpa pai rimajca na uyarirca. Chaimandami Elí sumo sacerdoteca ¿nachu machashca cangui? nishpa Anataca tapurca. Chaimi Anaca cashna nirca: ‘Na machashcachu capani. Ñuca shungupimi ninan llaquihuan cani. Chaitami Diospa ñaupajpi villajupani’ nishpa. Shina nijpimi Elí runaca Anata yangata juchachijushcata cuenta japishpa cashna nirca: “Taita Diosca, can mañajushcataca carangapachami” nishpa. Shina nijpimi Anaca ashata alillata sintirishpa rirca. Chaimanda shuj  huata jipallami, shuj jari huahuaguta charishpa Samuel shutita churarca. ¿Imashinashi Anaca sintirishcanga?

Anaca Jehová Diosman imata nishcata na cungarcachu. Chaimandami ‘huahuata chuchumanda anchuchishca jipalla, Diospa huasiman Siló puebloman aparca’. Anaca Elí runagumanga nircami: “Cai huahuagumandami mañajurcani”. ‘Chaimandami cai huahuagutaca, Taita Diosman cupani. Paica, tucui causaipimi Diospa canga’ nishpa. Jipaca Elcanapash, Anapash ‘paillata rurashpami, túnica nishca uchilla churajunaguta cada huata apan carca’. Chai jipaca Jehová Dios ‘llaquishpa ricujpimi, vijsayu tucushpa quimsa churita, ishcai ushita charirca’.

“Diosta mañaichi, paica carangallami. Mascaichi, taringuichimi” (Mateo 7:7).