Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Bibliapica ¿imatata yachajuni?

 CAPÍTULO 31

Gabaonitacunatami Josueca ayudarca

Gabaonitacunatami Josueca ayudarca

Canaanmanda shuj llactacunapashmi Jericó llactapi ima pasashcata yachaj chayarca. Chai llactacunamanda reycunaca ‘Josuepa, israelcunapa contra tucushpa macanajungapami tandanajurca’. Cutin Gabaón llactamanda gentecunaca manllaimandami mauca mauca ropata churajushpa Josuepaman rishpa cashna nirca: “Ñucanchica, caru caru llactamandami shamupanchi”. Jehová ‘Dios Egiptopi, Moab llactapi cangunamanda imatalla rurashcata yachashpami shamupanchi’. Ñucanchicunata na llaquichijpica cangunapa sirvijcunami tucushun nishpa.

Shina nijpimi Josueca paicunata crishpa, na imatapash rurashunllu nirca. ‘Chashna ari nishcamanda quimsa punlla jipami, chai runacunaca paicuna causanajuj ladollapi causajcuna cashcata yachaj chayarca’. Chaimandami Josueca gabaonitacunataca cashna tapurca, ‘¿imashpata cangunaca umachihuarcanguichi?’ nishpa. Chaimi paicunaca cashna nirca: Jehová Dios cangunata ayudajtaca alimi yachaparcanchi. Chaimandami, ‘ñucanchita huañuchinata ninanda manllashpa chashna rurarcanchi’ nishpa. Josueca paipa nishcata pactachishpami paicunataca na imatapash rurarca.

Asha tiempo jipaca Canaán llactamanda picha reycunami paicunapa soldadocunandi gabaonitacunata macanajushpa mishangapaj rirca. Chaita uyashpami Josueca paipa soldadocunandi tuta entero gabaonitacunata salvangapaj rirca. Paicunaca cayandi punllami macanajui callarirca. Canaán llactamanda  gentecunaca ninanda manllarishpami caita chaita rinajurca. Chaimi Jehová Diosca jahua pachamanda rundu rumicunata paicunapa jahuapi urmachirca. Chai jipaca Josueca Jehová Diosta cashnami mañarca: Gabaón pueblo vichaipilla indita shayachipai nishpa. Indica nunca na chai pushtupilla quedashca carcachu. Shinaca Josueca ¿imashpata Jehovata chashna mañarca? Josueca Jehová Diospi tucui shunguhuan confiashcamandami shina mañarca. Chai punllaca israelitacuna Canaán llactamanda reycunata, paicunapa soldadocunatapash mishangacamanmi indica chashna shayarirca.

‘Imatapash usharina cajpillami ari nina canguichi. Na usharijpica na ninami canguichi. Imatapash mirachishpa nijpica Diablomi yarichijun’ (Mateo 5:37).