Agllashca temata ricungapaj

Temacunata ricungapaj

 CAPÍTULO 36

Jefteca ¿imatata Jehovaman cusha nirca?

Jefteca ¿imatata Jehovaman cusha nirca?

Israelitacunaca cutinmi Jehovapa ñaupajpi nalita ruranajurca. Paicunaca yanga dioscunatami adorai callarirca. Shinapash chai yanga dioscunaca Ammón llactamanda gentecuna llaquichinajujpica na ayudarcachu. Chaimandami israelitacunaca ashtaca huatacunata ninanda sufrishpa causarca. Chaimi paicunaca Jehovata mañanajurca: “Juchatamari rurashcanchi. Cunanga, ñucanchita fiñajcunapaj maquimanda quishpichihuayari” nishpa. Shinallata israelitacunaca, paicunapurapi tiaj shuj dioscunata anchuchishpami, Jehovata cutin sirvinajurca. Chaimi israelitacuna llaqui apanajujta ricushpa Jehová Diosca ninanda llaquirirca.

Israelitacunaca, ammonitacunahuan contrami carca. Chaimandami paicunahuan macanajungapaj rigrinajurca. Chaimi paicunata ñaupaman pushachun Jefté runata agllarca. Paica macanajunataca alimi yacharca. Jefteca Jehovata cashnami mañarca: ‘Ammonitacunataca, ñuca maquipimi churapai. Shina churajpica, macanajuita mishashpa tigrajujpi ñucata  tuparingapaj ñuca huasimanda punda Ilujshimujtaca Taita Diosmanmi cusa’ nishpa. Jehová Diosca Jeftepa mañaita uyashpami ammonitacunataca paipa maquipi churarca.

Jefté macanajuita mishashpa tigrajujpica, paipa ‘shujlla ushimi panderetata huactashpa, bailashpa tuparingapaj Ilujshimurca’. Chaita ricushpaca Jefteca ¿imatashi rurarca? Paica Jehovaman imata cusha nishcata yarishpami cashna nirca: ‘Aij ñuca ushigulla, jatun llaquipipachamari churahuangui’. Jehová Diosman imata cusha nishcata pactachingapaca candami Siló llactapi tiaj tabernáculo nishcapi sirvichun cachana tucuni nishpa. ‘Shina nijpimi ushiguca cashna nirca: Ñuca taitalla, Diosman imagutapash carashapachami nishca cashpaca, imashna can nishcashnallata rurapailla’. Shinapash caigutallami mañapani, ñuca cumba cuitsacunahuan urcucunaman ringapaj ishcai quillata shuyapai, chai jipaca tabernáculo nishcaman rishallami nishpa. Jeftepa ushiguca Jehovata tucuipi cazushpami paipa tucui causaipi tabernáculo nishcapi sirvirca. Chaimi paipa cumbacunaca cada huata paita visitangapaj Siló llactaman rin carca.

‘Paipa churita, ushitara ashtahuan juyajca napacha ñucapajlla causai ushanllu’ (Mateo 10:37).