Egipto llactamanda llujshishca ishcai quillacuna jipaca israelitacunaca “Sinaí urcu ñaupajpimi, carpacunata shayachishpa tianajurca”. Chaipimi Jehová Diosca Moisestaca Sinaí urcuman shamui nirca. Chaipica israelitacunaman cashna ningui nircami: Ñucami israelitacunataca salvarcani. ‘Ñuca imata nijta uyashpa, ñucahuan ari ninajushcatapash cazushpaca, tucuicunata yali ñucapajlla cachun agllashca ninan valishca gentecunami canguichi’ nishpa. Sinaí urcumanda Moisés urai shamushpa Jehová Dios ima nishcata israelitacunaman villajpica, paicunaca cashnami tigrachirca: “Mandaj Dios tucui imatalla nishcataca, tucuitami rurashun” nishpa.

Jipamanga Moisesca cutinmi Sinaí urcuman rirca. Chaipimi Jehová Diosca nirca: ‘Quimsa punllapimi ñucaca tucui israelitacuna ricujta, Sinaí urcuta urai shamusha’. Paicunamanga cashna ningui: ‘Caipilla shuyanguichi. Urcuman vichai ritaca, na ushanachu canguichi’ nishpa. Chaimi Moisesca israelitacunata cashna ningapaj urai shamurca, Jehová Dios ima nijta uyangapaj listomi cana canguichi nishpa.

Quimsa punlla jipaca israelitacunaca ‘culun nijta, punchapamba shitamujta, sangu sangu fuyu urcu jahuaman shamujtapashmi ricurca. Chaipica cachuta ninanda huacachijtapashmi uyarca’. Chai jipaca ‘Dios ninapi chai urcuman uriajumujpimi’ israelitacunaca ninanda manllarishpa chujchunajurca. ‘Tucuilla Sinaí urcumi cushni junda carca’. ‘Tucuilla urcumi ninanda chujchujurca’. Shinallata ‘cachuta huacachijpash, ashtahuan ashtahuanmi ninanda uyarijurca’. Chaimi Jehová Diosca nirca: Ñucami Jehová Dios cani “ñuca ñaupajpica, ama shuj dioscunata charinguichu” nishpa.

Moisesca cutinmi Sinaí urcuman tigrarca. Chaipimi Jehová Diosca israelitacunapa leycunata curca. Chai leycunapimi imashina paita adorana cashcata, israelitacuna imashina causana cashcatapash mandajurca. Moisesca chai leycunata escribishpami, israelitacunaman liishpa uyachirca. Chaita uyashpami paicunaca nirca: “Dios tucui imatalla nishcataca, tucuitami rurashun” nishpa. ¿Israelitacuna Jehová Diosman tucuita rurashun nishcataca pactachircacha?

‘Canba Taita Diostaca tucui shunguhuan, tucui almahuan, tucui yuyaihuan juyangui’ (Mateo 22:37).