Israelitacuna casi 40 huatacunata chaquishca pambapi cashpaca, ashtaca ashtaca shinlli llactacunatami macanajushpa mishashca carca. Chai jipaca ‘Jordán yacu ladopi, Jericó shuti pueblo chimba purapi tiaj Moab llacta pambacunapimi, carpacunata shayachishpa’ causanajurca. Israelitacuna Canaán llactaman yaicuchunga ña ashallami faltajurca. Chaipica Moab llactata mandaj Balac shuti reyca israelitacuna alpacunata quichunga yashpami ninanda manllajurca. Chaimi ‘Balaam shuti runata cayashpa’ israelitacunata ima llaquipash japishpachari ali canman nigri nishpa cacharca.

Shinapash Jehová Diosca Balaamdaca nircami: ‘Chai gentecunata, ima llaquipash japishpami ali canman ningapaca ama ringuichu’ nishpa. Chaimi Balaamga Moab llactamanga ñana ringapaj munarca. Cutinmi Balac reyca, Balaamdaca Moab llactaman shamui, “can imata mañajpipash, cupashallami” nirca. Shinapash Balaam runaca Balac reypamanga na rircachu. Chaimandami Jehová Diosca Balaamdaca nirca: “Canda pushangapaj shamushca cajpica, jatarishpa paicunahuan rilla. Shina cajpipash ñuca imata rurai nishcatalla rurangui” nishpa.

Chaimi ‘Balaamga paipa burrogupi tiarishpa Moab llactata mandajcunahuan rirca’. Balaamga Jehová Dios israelitacunata ama shina nigringuichu nishca cajpipash, israelitacunata ima llaquipash japishpachari ali canman nina yuyaihuanmi rijurca. Shina rijujpimi Jehová Diospa shuj angelca ñanbi quimsa viajeta ricurirca. Balaamba ñavipica chai angelca na ricurircachu. Shinapash paipa burroguca angelta ricurcami. Pundapica “chaita ricushpami burroguca, ñanmanda Ilujshishpa pambata rirca”. Jipamanga ‘burroguca, Diospa angelta ricushpami, pirca ladoman quimirishpa, Balaamba chaquita pircapi llapirca’. Chai jipaca burroguca, chaupi ñanbimi siririshpa quedarca. Chai quimsa viajecunatami Balaamga shuj caspihuan burroguta macarca.

Jipamanga Jehová Dios, burroguta parlachijpimi burroguca Balaamda cashna tapurca: ¿Imamandata ñucataca macahuangui? nishpa. Chaimi Balaamga cashna tigrachirca: ‘¿Imashpata ñucata na cazuhuangui? Espadata ñuca maquipi charijushpacarin cunanllatami candaca huañuchiman’ carcani nishpa. Shina nijpimi burroguca cashna nirca: ‘Canga, ñucata charishca punllamandami maimanbash ñucapi tiarishpa purijushcangui. Ashtahuangarin candaca’ ¿nachu siempre cazujushcani? nishpa.

Chai jipami Jehová Diosca Balaambash angelta ricuchun saquirca. Chai angelca nircami: Nachu Jehová Diosca israelitacunataca ima llaquipash japishpachari ali  canman nishpaca ama nigringuichu nishpa. Shina nijpimi Balaamga nirca: Pandarishcanimi ‘chaiman rina nali cajpica, tigrapashallami’ nishpa. Chaimi angelca nirca: “Chai runacunahuan rilla. Shina cajpipash, ñuca ima nishcatallami rimana cangui” nishpa.

Balaamga ¿Taita Diosta cazurcacha? Na, na cazurcachu. Jipamanga quimsa viajetami israelitacunata ima llaquipash japishpachari ali canman ningapaj munarca. Shinapash chai quimsa viajecunatami Jehová Diosca ‘nalicachishpa rimagrijujtaca bendiciana shimicunaman’ tigrachirca. Shinami israelitacunaca Moab llactata llaquichirca, chaipimi Balaamga huañurca. Balaam runa callarimanda Jehová Diosta cazushpaca ¿nacha ali canman carca?

‘Charij tucunatalla na munashpami, ali causana canguichi. Imata charishpapash, chaihuan unaita causajuitaca na ushangachu’ (Lucas 12:15).