Jacobpa familia Egipto llactapi causanajujpipash paicunataca israelitacuna nishpami rijsin carca. Jacobpash, Josepash huañujpica shuj mushuj faraonmi mandai callarirca. Chai faraonga israelitacuna egipciocunata yali ashtahuan miranajujpimi manllarijurca. Chaimi israelitacunataca esclavo cachun churarca. Paicunataca ladrillocunata rurachun, pambapi shinllita trabajachunmi obligan carca. Egipciocuna nali tratajpipash israelitacunaca ashtahuanmi mirashpa catinajurca. Faraón chaita ricushpaca tucuilla chaira nacirishca jari huahuacunata huañuchichunmi mandarca. Cutin huarmi huahuacunataca na huañuchinachu canguichi nishpami mandarca. Israelitacunaca ¿imashinashi sintirinajurca?

Shuj israelita Jokébed shuti huarmiguca shuj juyailla huahuagutami ungurca. Ama huañuchichunmi shuj canastagupi churashpa Nilo yacupi sucuscuna tiaj pushtupi pacashpa saquirca. Chai huahuapa pani Miriamga ima pasajta ricungapami chaipi quedarca.

Faraonba ushica Nilo yacupi armangapaj rishpami shuj canastota ricurca. Chai canastopi shuj huahuagu huacajujta ricushpami llaquirirca. Chaimi Miriamga cashna tapurca: ‘¿Cai huahuaguta canman viñachichun, shuj huarmita cayagrishachu?’ nishpa. Faraonba ushica ari cayagripailla nircami. Shina nijpimi  Miriamga paipa mamata pushamungapaj rirca. Chaimi Jokébed huarmigutaca Faraonba ushica nirca: ‘Cai huahuata apashpa viñachipai. Viñachishcamandaca culquita cushami’ nishpa.

Jokébed huarmiguca chai huahua viñajpica faraonba ushipajpimi saquigrirca. Faraonba ushica chai huahuataca Moisés shutita churashpami, paipa propio huahuatashna viñachirca. Moisesca jipa mandaj shina viñashpami tucui ima munashcatapash chari usharca. Shinapash Moisesca Jehovataca nunca na cungarcachu. Paica israelita cashcataca alimi yacharca. Chaimi Jehovata sirvinata agllarca.

Moisés ña 40 huatacunata charishpami israelitacunata ayudangapaj munarca. Shuj punllaca Egiptomanda runa shuj israelita esclavota macajujtami ricurca. Chaita ricushpami Moisesca shinllita huactashpa chai egipcio runata huañuchishpa alpapi pambashpa saquirca. Faraón chaita yachaj chayashpaca Moisestaca huañuchingapami munarca. Chaimandami Moisesca pacajushpa Madián llactaman rirca. Chaipipash Jehová Diosca Moisesta cuidarcami.

“Moisespash crishpallami: “Faraonbaj ushipaj churimi cangui” ni tucungapaca na munashca. Ashtahuangarin Taita Diospaj gentecunahuan ninanda llaquichi tucunatami ashtahuan munashca” (Hebreos 11:24, 25).