Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

 CAPÍTULO 19

Egiptota llaquichishca quimsa plagacuna

Egiptota llaquichishca quimsa plagacuna

Israelitacuna esclavocuna cajpimi, egipciocunaca shinllita trabajachun obligan carca. Chaimi Jehová Diosca Moisesta, Aarondaca faraonman cashna nichun cacharca: ‘Ñuca agllashcacunata jichushca pambapi’ ñucata adorachun richun saquipai nishpa. Shinapash, faraonga jatun tucushca caimandami cashna nishpa tigrachirca, Jehová Dioshuan ima ricunatapash na charinichu. ‘Israelitacuna richunbash na saquishachu’ nishpa. Chai jipaca faraonga israelitacunataca ashtahuan shinllita trabajachunmi obligarca. Chaimandami Jehová Diosca faraonda llaquichigrijurca. ¿Imashinashi llaquichigrijurca? 10 plagacunata cachashpami llaquichigrijurca. Chaimi Jehová Diosca Moisestaca nirca: “Faraonbaj shunguca shinlliyashcapachami”. ‘Canga, tutamandata Faraonbaman ringui. Paica, Nilo yacumanmi Ilujshijunga’. ‘Ñuca agllashcacunata jichushca pambapi ñucata sirvingapaj richun na saquishcamandami’, ‘yacuca yahuarman tigranga’ nishpa. Moisesca Jehovata cazushpami faraonbaman rirca. Chaipica, Aarón Nilo yacuta paipa vara caspihuan huactajpi yacuca yahuarman tigrajtami faraonga ricurca. Shinallata Nilo yacupi tiashca pescadocunapashmi huañurca. Yacupash ashnajujpimi Egipto llactapi causajcunaca na ufiai usharca. Shinata ricushpapash faraonga israelitacuna richunga na saquircachu.

 Siete punllacuna jipaca Jehová Diosca Moisestaca cutinmi faraonman cashna nichun cacharca: “Paicuna richun can na saquingapaj munajpica, ricui cambaj tucuilla llactatami, sapocunahuan llaquichisha” nishpa. Shina nijpipash faraón runaca na cazurcachu. Chaimi Aarón paipa vara caspita jahuaman alzajpi Egipto llactaca sapocunahuan jundarca. Tucuicunapa huasi ucupi, camacunapi, micuna platocunapi tucui ladocunapimi sapocunaca tiarca. Chaita ricushpami faraonga Moisesman cashna nirca: ‘Sapocunata anchuchichun Diosta mañapai’. Chai jipaca israelitacunata richun saquishallami nishpa. Chaimi Jehová Diosca sapocunata huañuchirca. Egipciocunaca “huañushca sapocunataca, caipi chaipimi mundunanajurca”. Chai llactaca ninandami ashnajurca. Shinapash faraonga israelitacunataca na richun saquircachu.

Jipamanga Jehová Diosca Moisesmanga nircami: ‘Aarondaca cashna ni, tucuilla Egipto llactapi, [jamzi chuspicuna] jundachun, canba vara caspita ñutu alpapi huactai’ nishpa. Shinami chai jamzi chuspicunaca tucui gentecunata picanajurca. Chaimi huaquin egipciocunaca faraonda cashna ninajurca: ‘Taita Diosmari cashna rurajun’ nishpa. Shina nijpipash faraonga israelitacuna richunga na saquircachu.

‘Ñuca maquitapash, ñuca ushaitapash paicunaman rijsichigrini. Shina rurajpimi ñucataca, [“Jehová”, NM] shuti cajta yachanajunga’ (Jeremías 16:21).