Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

 CAPÍTULO 6

Ochopuracunami salvarirca

Ochopuracunami salvarirca

Noepash, paipa familiapash, ashtaca animalcunapashmi arcaman yaicurca. Jehová Dios arcapa punguta vichashca jipami tamiai callarirca. Shina ushashcata tamiajpimi arcaca yacupi huambui callarirca. Asha ashami alpa enterota yacuca quilparca. Arcaman na yaicushca gentecunaca tucuillami huañurca. Shinapash Noé, paipa familiapash arca ucupi caimandami salvarirca. Pensaripai, Jehová Diosta cazushcamanda salvarishpaca ¿imashinashi paicunaca sintirirca?

Ushashcata 40 punllacunata, 40 tutacunata tamiashca jipa, tamia yalijpimi yacuca asha asha chaquirirca. Shinami chai arcaca shuj jatun urcu jahuapi asintarishpa quedarca. Shinapash ashtaca yacu tiarcarami. Chaimi Noepash, paipa familiapash arcamandaca nara llujshi usharca.

Punllacuna yalijpimi yacuca asha asha chaquirishpa catirca. Noepash, paipa familiapash shuj huata yalitami arca ucupi carca. Chai jipami Jehová Diosca arcamanda llujshichilla nirca. Tucuimi juyailla ali, mushuj causai carca. Shina salvashcamanda paicuna ninanda agradicishpami, Jehová Diosman shuj animalta rupachishpa cararca.

Noé shina rurashcataca Jehová Diosca ninandami alicachirca. Chaimi cashna nirca, cai alpapi ima tiashcataca ñana Jatun Manllanai Tamiahuan tucuchishachu nishpa. Chaita yarichunmi cielopi shuj cuichita ricuchirca. ¿Ima horapash shuj cuichita ricushcanguichu?

Shinallata Jehová Diosca Noeta, paipa familiataca huahuacunata charishpa cai alpata jundachichunmi mandarca.

‘Jatun huambuna huasiman [o arcaman] Noé yaicungacamanmi, gentecunaca chashna causashpa, yacuhuan tucuilla tucuchina punlla chayamungacaman imatapash na cazurca’ (Mateo 24:38, 39).