Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Bibliapica ¿imatata yachajuni?

 CAPÍTULO 102

¿Juanga imatata muscuipi shina ricurca?

¿Juanga imatata muscuipi shina ricurca?

Jesusca apóstol Juanmanga Patmos shuti islapi prezo cajpimi, jipa punlla ima tucunata muscuipi shina 16 viajecunata ricuchirca. Chai muscui shinaca Jehová Diospa shuti santificado cashcata, Diospa Reino mandanata, jahua cielopi shina cai alpapipash Diospa munai pactarinatapashmi ricurca.

Juanga, Jehová Dios jahua cielopi paipa mandana pushtupi tiajujtami ricurca. Chaipica ‘ishcai chunga chuscu rucucuna, yuraj churajushcacuna, umapipash oro coronata churajushcacuna tianajujtapashmi’ ricurca. Chai ‘mandangapaj tiarinamandaca, punchapamba shitamujpash, culun nijcunapashmi uyarirca’. Chai ishcai chunga chuscu rucucuna Jehová Diospa ñaupajpi cungurishpa adoranajujtami ricurca. Cutin shuj muscuipi shinami Juanga ‘cai pachapi causajcuna, tucui llactacunapi causajcuna, shuj rimaita parlajcuna, shuj shuj gentecunapash’ Jehová Diosta adoranajujta ricurca. Shinallata shuj llamagutami ricurca. Chai llamaguca Jesús cashcatami ricuchin. Jesús gentecunata cuidashpa, causaita caraj yacu pugyuman pushajtapashmi ricurca. Cutin shuj muscuipi shinaca, Jesús rey shina jahua cielopi ishcai chunga chuscu rucucunahuan mandajujtapashmi ricurca. Chai jipallami jahua pachapi Jesús, paipa angelcunandi, dragonhuan paipa angelcunandi macanajujta ricurca. Diablota, paipa ayacunatapash Jesús cai alpaman shitamujtapashmi ricurca.

 Chaita ricushca jipami, Sion shuti urcu jahuapi Llama shayajujta ñapash ricurca. Paihuanga, 144​milcunami chaipi carca. Shinallata cai alpapi causajcunaman shuj ángel cashna nijtapashmi uyarca, ‘Taita Diosta alicachishpami, punchapambagu cangui nina canguichi’ nijujtapash.

Cutin jipaca Armagedón macanajuipi Jesús, 144 mil agllashcacunahuan, Diablopa nali mundota tucuchijtapashmi ricurca. Ña ultimopica Juanga jahua cielopi, cai alpapi tucuicuna casilla, cushilla causanajujtami ricurca. Shinallata Diablo, paita catijcunapash tucuchi tucushcatami ricurca. Chaimi cielopi, cai alpapi tucui gentecuna Jehová Diospa shutita santificajta, Jehová Diostalla adoranajujtapash ricurca.

“Canhuan, huarmihuanga fiñanajushpa causachunmi churagrini. Shinallata cambaj miraihuambash, huarmipaj miraihuambash fiñanajuchunmi churasha. Paipaj miraimi, candaca umapi chugrichinga. Canga, chaqui talonbimi chugrichingui” (Génesis 3:15).