Agllashca temata ricungapaj

Temacunata ricungapaj

 CAPÍTULO 98

Shuj shuj llactacunapimi villachirca

Shuj shuj llactacunapimi villachirca

Apostolcunaca Diosmanda ali villaicunata tucui gentecunaman villachinami canguichi nishpa Jesús mandashcataca alimi pactachirca. Apostolcunapa punllacunapi huata 47​pica ‘Antioquía pueblopi tandanajushca crijcunami Pablota, Bernabetapash shuj llactapi villachichun cacharca’. Paicunaca cushijushpami Asia Menor, Derbe, Listra, Iconio shuti llactacunaman rinajushpa villachinajurca.

Pablopash, Bernabepash tucuicunamanmi villachinajurca: charijcunaman, pobrecunaman, jovengunaman, mayorllacunamanbash. Ashtacacunami Jesusmanda cabalta yachachishcataca chasquirca. Shinallata paicunaca, Chipre llactata mandaj Sergio Paulo runamanbashmi Diospa Shimimanda villachirca. Pablo y Bernabé villashcata, Sergio Paulo ama crichunmi, shuj brujoca jarcangapaj munarca. Shinapash chai brujomanga apóstol Pabloca nircami: Jehová Diosca ‘fiñashpa canda llaquichigrinmi’ nishpa. Shina nijpimi brujo runaca chai rato ñausa quedarca. Chaita ricushpami Chipre llactata mandaj Sergio Paulo runaca Jesusta cati callarirca.

Pablopash Bernabepash tucui ladocunapimi villachinajurca: huasin huasin, mercadocunapi, ñangunapi, tandanajui huasicunapipashmi villachinajurca. Shuj viajeca, Listra llactapimi shuj suchu runaguta jambirca. Chaita ricushpami gentecunaca apostolcunaca dioscunami yashpa paicunata adorangapaj munarca. Chaimi Pablopash, Bernabepash ama shina rurachun gentecunataca nirca: Taita Diostallami adorana canchi. “Ñucanchipash, cangunashnallata runami canchi” nishpa. Judío gentecuna chaiman chayashpaca gentecuna Pablota contrachunmi imacunatapash nirca. Chaimi gentecunaca Pablota rumicunahuan pigashpa, ña huañushca yashpami chai llactamanda aisashpa llujchirca. Shinapash Pabloca causarami carca. Chaimi shuj huauquicuna uchalla shamushpa cutin chai llactaman pusharca. Jipamanga Pabloca Antioquía llactamanmi tigrarca.

Apostolcunapa punllacunapi huata 49​pica, Pabloca cutinmi villachingapaj rirca. Chaipica Asia Menor llactapi huauquipanicunata ricungapami rirca. Chai jipaca Diosmanda ali villaicunataca Europaman rishpa Atenas, Éfeso, Filipos, Tesalónica,  shuj llactacunapipashmi villachirca. Chaimanga Silas, Lucas, Timoteo jovenbashmi cumbarca. Chaipica gulpillatami mushuj congregacionguna tiachun, chai congregacionguna shinlli cachunbash ninanda ayudanajurca. Apóstol Pabloca Corinto llactapi huauquicunata shinlliyachingapami huata chaupita paicunahuan quedarca. Chaipimi Pabloca villachirca, yachachirca, ashtaca congregaciongunamanbash cartacunata escribirca. Shinallata carpa huasicunata rurashpami trabajan carca. Tiempo yalijpica Pabloca Antioquía llactamanmi tigrarca.

Pabloca huata 52​pica último viajetaca Asia Menor llactamanmi villachingapaj rirca. Chaimandaca Filipos llactaman, jipaca Corinto llactamanmi rirca. Pabloca, tauca huatacunatami Éfeso llactapi yachachishpa, ungushcacunata jambishpa, congregaciongunata ayudashpa yalirca. Shinallata yachachij huasi ucucunapimi Pabloca cada punlla Diospa Shimimanda yachachijurca. Chaita uyashpami ashtaca gentecunaca cazushpa paicunapa causaita cambiarca. Chai tucui llactacunapi Diosmanda ali villaicunata villachishca jipaca, Pabloca Jerusalén llactamanmi rirca.

‘Ñucapa yachajujcuna tucuchunmi cai pachapi villachina canguichi. Paicunataca Taitapa, Churipa, espíritu [santopa] shutipimi bautizana canguichi’ (Mateo 28:19).