Jesusca paipa apostolcunahuan último Pascua micuita micunajushpami, paicunataca cashna nirca: Cai tutaca tucuillami ñucatalla saquigrihuanguichi nishpa. Chaimi Pedroca nirca: Caishujcuna canda saquijpipash ñucaca napacha candaca saquishachu nishpa. Shina nijpimi Jesusca Pedrotaca cashna nirca: ‘Cunan tutallatami gallo nara candajpillata, quimsacaman ñucataca na rijsinichu’ nigrihuangui nishpa.

Soldadocuna ‘Jesusta prezu japishpaca, sacerdotecunata mandaj Caifás runapamanmi aparca’. Chaicamanga casi gulpi apostolcunami pacajugrishca carca. Shinapash ishcai apostolcunaca chai gentecunahuanmi catinajurca. Shujca Pedromi carca. Paica, Caifás sacerdotepa huasi patiocaman yaicushpami, ninapi cunushpa tiajurca. Chaipi Pedrota ricushpami shuj sirvij cuitsaca cashna nirca: ‘Canbashmari Jesushuan purijurcangui’ nishpa.

Chaimi Pedroca nirca: “Can imata nijujtapash na yachanichu” nishpa. Shina nishpa ñan punguman chayajujpimi shuj cuitsapash Pedrota ricushpaca shujcunaman cashna nijurca: ‘Cai runapashmi Jesushuan purijurca’ nishpa. Pedroca nircami: Jesustaca “rijsitapash na rijsinichu” nishpa. Chai jipallami, shuj runapash Pedrota ricushpaca nirca: “Cambashmi, chai runata catijpurallata cangui”. Jesús shina “Galilea llactamanda cashpami, chai llacta rimaitapacha rimajungui” nishpa. Cutinmi Pedroca ‘chai runataca rijsitapash na rijsinichu nishpa juramenturca’.

‘Shina nijhuanmi gallo candarca’. ‘Shina candajhuanmi Jesusca, Pedrota tigrarishpa ricurca. Shina ricujpimi, Jesús villashca shimicunata yarirca’. “Chaita yarishpami Pedroca, canllaman llujshishpa ninandapacha llaquirishpa huacarca”.

Chaicamanga judiocunata mandaj sacerdotecuna tandanajushpami Jesusta huañuchingapaj nishpa Caifás runapa huasipi parlarinajurca. Paicunaca imamandapash juchachishpa Jesusta huañuchinatami decidishca carca. Shinapash Jesús ima nalita rurashcatapash na tarircachu. Cutinmi Caifasca Jesusta cashna tapurca: ‘Canga, ¿Taita Diospa Churichu cangui?’ nishpa. Chaimi Jesusca nirca: “Ari, ñucapachami capani” nishpa. Shina nijpimi, curacunata mandaj Caifasca nirca: ‘Diostami nali shimicunata rimashca. Shujcuna paimanda villachunga, ¿pitapash tapunarachu canchi?’ nishpa. Chai sacerdotecunaca nircami: ‘Chai runaca  huañunapachami’ can nishpa. “Chashna nishpallami Jesustaca, ñavipi tucashpa huactanajurca”. “Jesuspaj ñavita finduhuan huatashpami: ¿Pita huactarcanchi?”, quishpichij Cristo cashpaca villayari ninajurca.

Ña punllayajpimi, Judiocunata mandajcunapa ñaupajman Jesustaca apanajurca. Chaipimi cutin cashna tapunajurca: ¿Canga Taita Diospa Churipachachu cangui? nishpa. Shina nijpimi Jesusca cashna tigrachirca: “Ñuca chaipacha cajtaca, cangunallatami ninajunguichi” nishpa. Shina nijpica Diostami nali shimicunahuan rimashca nishpami Jesustaca, Roma llactata mandaj Poncio Pilatopaman apanajurca. Chai jipa ima pasashcataca cati capitulopimi yachajupashun.

‘Cangunataca ñallami calpachigrin. Chaica ñamari pactamushca. Shina calpachijpimi ñucatalla saquishpa, caita chaita ringuichi. Shina rijpipash, na ñucallachu cani. Ñuca Taitaca ñucahuanmi’ (Juan 16:32).