Judiocunaca 14 de nisán punllapimi cada huata Pascua fiestata yarin carca. Shina rurashpami Jehová Dios paicunata Egipto llactapi esclavo cashcamanda salvashpa, carasha nishca alpaguman pushashcata yarinajurca. Huata 33​pica Jesusca paipa apostolcunahuanmi Jerusalén llactapi shuj altibajo huasi jahuapi Pascua punllata yarirca. Pascua micuita tucuchishca jipami Jesusca nirca: “Canguna purapi tiajujllatami, ñucataca huañuchijcunaman japichigrihuan” nishpa. Shina nijpimi apostolcunaca manllarishpa cashna tapurca: “¿Ñucachu candaca japichina capani?” nishpa. Chaimi Jesusca cashna nirca: ‘Shuj runamanmi, tandata chaupishpa caragrini. Chaita japij runami, chai canga’ nishpa. Shina nishca jipallami Jesusca ‘Judas Iscariote runaman tandata cararca’. Chaimi Judasca jatarishpa Ilujshishpa rirca.

Chai jipallami Jesusca shuj mañaita rurashpa, paihuan quedashca apostolcunaman tandata chaupishpa cararca. Jesusca nircami: ‘Chai tandata japishpa micuichi’, “caica cangunapaj ali cachun chaupirina ñuca cuerpomi” can nishpa. Chai jipaca copatapash japishpami, Taita Diosta mañashpa cashna nirca: “Cai copamandaca, tucuicuna ufiachi. Caica, ashtaca gentecunapaj juchacunata anchuchingapaj jicharina ñuca yahuarmi”. Cangunami ñucahuan jahua pachapi mandagringuichi. Caitaca cada huatami rurashpa catina canguichi nishpa. Jesusta ali catijcunaca cada huatami cunanbipash Indi huashajushca jipa Jesús Huañushca Punllata yaringapaj tandanajun.

 Pascuata fiestata yarishca jipaca apostolcunaca ‘¿maijanshi ashtahuan alicachi tucushpa causanchi? nishpami, paicunapura nirinajurca’. Chaimi Jesusca nirca: “Cangunapurapi maijambash punda cashpaca, jipa huambrashnalla imatapash rurachun” nishpa.

Jesusca caitapashmi nirca: ‘Ñuca Taita ñucaman imata villashcatapash tucuitami cangunaman ña villarcani. Cangunaca ñuca juyashca cumbacunami canguichi’. Ñucaca ñallami ñuca Taitapaman tigrasha. Cangunaca cai alpapimi quedanguichi. Ñuca imashnami cangunata juyarcani, chashnallata cangunapash caishujhuan chaishujhuan juyarishpa causajta ricushpami, gentecunaca canguna ñucata catijcuna cashcata cuenta japinga nishpa.

Ultimopica Jesusca paipa catijcunata cuidachunmi Jehovata mañarca. Shinallata paicunapura ayudarishpa, casilla ali cachun, Diospa shutipash alicachishca cachun nishpami mañarca. Chai jipaca Jesuspash, paipa apostolcunapash Jehová Diosman candashpami llujshirca. Jesusta japinaca ñami chayamujurca.

‘Ñuca llamagucuna ashalla cashpapash, na manllanachu canguichi. Cangunapa Taitaca, mandanata cangunaman carashapacha nijunmi’ (Lucas 12:32).