Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Bibliapica ¿imatata yachajuni?

 CAPÍTULO 78

Jesusca Diospa Reinomandami villachirca

Jesusca Diospa Reinomandami villachirca

Bautizarishca jipallami Jesusca villachi callarirca. “Jahua pachamanda shamuj mandanaca, ñami pactamushca” nishpa. Jesús Galilea llactaman, Judea llactaman rijpica paipa catijcunapashmi paihuan rirca. Jesús Nazaret puebloman tigrashpaca tandanajui huasipimi, Isaías escribishca rollocunata pascashpa cashna liirca: ‘Diospa jucha illaj espiritupa ushaita cujpimi’, ‘Taita Diosmanda ali villaicunata villajuni’ nishpa. ¿Imatata ningapaj munarca? Gentecunaca Jesús milagrocunata rurajtami ricungapaj munarca. Shinapash Jesusca milagrocunata rurangapallaca na espíritu santotaca chasquircachu. Ashtahuanbachaca Diospa Reinomanda ali villaicunata villachingapami espíritu santotaca chasquirca. Chaimandami Jesusca nirca: ‘Chai punllacunaca ña pactamushcami’ nishpa.

Jesusca mar de Galileaman rishpami chaipi chuscu jaricuna pescadocunata japinajujta ricurca. Paicunaca jipamanga Jesusta catijcunami tucurca. Paicunataca Jesusca nircami: ‘Ñucata catihuaichi cangunataca pijita japishpa tandachinshnami gentecunata’ tandachinata yachachisha nishpa. Chai jaricunaca Pedro, Andrés, Santiago, Juanmi carca. Paicunaca pescadota japishpa trabajanata saquishpami Jesusta catishpa rirca. Shinami Jehová Diospa Reinomanda tucuilla Galilea llactapi villachingapaj rirca. Tandanajuna huasicunapi, mercadocunapi, callecunapipashmi villachirca. Maiman rijpipash ashtaca gentecunami catinajurca. Jesús villachijushcataca tucui ladocunapimi yachaj chayarca. Siria llacta carupi cajpipash, chaipipashmi yachaj chayarca.

Jipamanga Jesusca paipa catijcunamanmi, ungushcacunata jambichun, ayacunata llujchichunbash poderta curca. Shujcunaca shuj shuj llactacunapi, pueblocunapi villachingapami cumbarca. Shinallata Diosta sirvij huarmicunapashmi Jesusta, paipa catijcunatapash ayudanajurca. Paicunapurapica María Magdalena, Juana, Susana, shuj huarmicunapashmi carca.

Jesusca paipa catijcunaman yachachishca jipami villachichun cacharca. Galilea llactapi villachinajujpimi, ashtacacuna Jesuspa catijcuna tucushpa bautizarinajurca. Ashtaca gentecunami Jesusta catijcuna tucungapaj munarca. Chaimandami Jesusca cosechangapaj listo pambahuan paicunata chimbapurashpa cashna nirca: “Granocunata tandachijcunata cachamuchunga, granocunapaj Dueñota ninanda mañana canguichi” nishpa. Chai jipaca, paipa catijcunamanda 70puracunata agllashpami ishcai ishcai villachichun Judea llactaman cacharca. Paicunaca tucuicunamanmi Diospa Reinomanda villachinajurca. Jesuspaman  tigrashpaca tucui ima pasashcatami paiman parlangapaj munanajurca. Shina villachinajushcataca Diabloca na jarcaita usharcachu.

Jesusca pai cieloman tigrashca jipapash paipa catijcuna villachishpa catichunmi tucuita listo saquirca. Jesusca cashnami nirca: Diospa Reinomanda ali villaicunataca tucuicunaman villachinguichi. Diospa Shimimanda yachachishpa bautizanguichi nishpa.

“Taita Dios mandajujmanda ali villaitaca, shuj pueblocunapipash villanapachami cani. Shina villachunmi, ñucataca cachamuhuarca” (Lucas 4:43).