Jesusca ungüihuan caj gentecunata jambita, huañushcacunatapashmi causachirca. Shinallata huairata, tamiatapashmi jarcaita usharca. Urcupi Diosta mañashca jipaca, Jesusca Galilea mar yacuta ricushpami ninan huairahuan tamiajujta ricurca. Shina ninanda tamiajujpimi apostolcunaca canoapi ritaca na ushanajurca. Chaimi Jesusca yacu jahuata purishpa canoaman quimirijurca. Apostolcunaca yacu jahuata shuj gente shamujujta ricushpami ninanda manllarinajurca. Chaimi Jesusca cashna nirca: ‘Ñucami shamujuni, ama manllarichichu’ nishpa.

Shina nijpimi Pedroca nirca: “Apunchi Jesús, can cashpaca yacu jahuata shamushpa, canda tuparichun cayahuayari” nishpa. Chaimi Jesusca nirca: “Shamuilla” nishpa. “Shina nijpimi canoamanda llujshishpa, Jesusta tuparingapaj Pedroca” yacu jahuata purijurca. Jesuspaman ña quimirijushpami, ‘ninan huaira jatarimujta ricushpa Pedroca manllarirca. Ña asha asha huashajui callarishpami: Apunchi Jesús, quishpichihuayari nishpa ninanda caparirca’. “Shina caparijhuanmi Jesusca, Pedrota maquimanda japishpa: Na tucui shunguhuan crij runa. ¿Imashpata na ali crircangui?” nirca.

Jesuspash, Pedropash canoapi vitsiajpimi huairapash chulunlla quedarca. Chaita ricushpaca apostolcunaca ¿imashinashi sintirirca? Paicunaca cashnami nirca: “Canga, Taita Diospaj Churipachami capangui” nishpa.

Jesusca na chai viajellaca huairata, tamiatapash jarcarcachu. Shuj punllaca paipa apostolcunandi mar yacuta canoapi rijushpami Jesusca puñushpa quedashcarca. Jesús puñujujpimi ninan huairahuan tamiai callarirca. Shina huairahuan ninanda tamiashpa canoata caiman chaiman apajujpimi, canoapi yacu jundai callarirca. Chaimi apostolcunaca Jesusta cashna caparishpa rijchachirca: “Ñucanchica, ñami huashajushpa huañugrinchi. Ñucanchitaca, ¿nachu llaquingui, Yachachij?” nishpa. Chaimi Jesusca jatarishpa mar yacutaca nirca: ‘Upallai casilla cai’ nishpa. Shina nijpimi huairapash, yacupash casilla quedarca. Chaimandami Jesusca paipa apostolcunataca cashna tapurca: “¿Imashpata ñucataca, na crihuanguichi?” nishpa. Shina nijpimi paicunapura ‘caishuj chaishuj cashna ninajurca: Paitaca ¿ima cajpita huairapash, mama cuchapash cazun?’ nishpa. Chaipimi apostolcunaca Jesuspi tucui shunguhuan confiashpaca, nimata na manllana cashcata yachajurca.

“Runacuna causanajuj cai pachapi, Mandaj Diospaj juyaita na crishpaca, huañuimanmi carcani” (Salmo 27:13).