María huarmiguca Galilea llactapa Nazaret pueblopimi causarca. Mariaca Elisabetpa familiami carca. Paica José shuti carpinterohuanmi cazaragrijurca. Elisabetca ñami sucta quillacunata vijsayu carca. Chai punllami ángel Gabrielca Mariapa ñaupajpi ricurishpa nirca: Ali punllata charipai, ‘Diosmi candaca ninanda juyajun. Canga, huarmipuracunapica bendiciai tucushcami cangui’ nishpa. Imata ningapaj munashcataca Mariaca na intindircachu. Chaimi chai angelca nirca: ‘Vijsayu tucushpami shuj jari huahuaguta ungugringui. Chai huahuagutaca Jesús shutita shutichingui’. Paica rey tucushpami mandajunga. Pai mandanaca, napacha tucuringachu nishpa.

Shina nijpimi Mariaca nirca: “¿Imashnata chashnaca cangayari? Nara cusayu canica” nishpa. Chaimi ángel Gabrielca nirca: “Taita Diospaca, imata na rurai ushanallapash na tianllu”. ‘Diospa jucha illaj espíritu canbaman shamujpimi shuj huahuaguta ungungui’. ‘Ricui canba familiapura Elisabetpashmi, shuj jari huahuaguta vijsayu tucushca’ nishpa. Chaita uyashpaca Mariaca cashnami nirca: Jehovata ‘sirvijca caipimi capani. Can villashcashna Diosca ñucaman carahuachun’ nishpa.

 Mariaca Judá llacta urcupi tiaj pueblomanmi Elisabet huarmiguta visitangapaj rirca. Chaiman chayashpaca ‘¿alillachu tiajupangui?’ nishpami saludarca. Chaimi ‘Elisabetpa vijsa ucupi huahuaguca cuyurirca. Elisabetca, Diospa espíritu jundashpami Mariataca cashna nirca: Candaca, tucui huarmicunatapash yalitami, Diosca bendiciashca. Canga ñucata Mandajpaj mamami capangui. ¿Imashpata ñucatara ricungapaj shamuhuangui?’ nishpa. Shina nijpimi Mariaca nirca: Ñucaca tucui shunguhuanmi Diostaca ninanda jatunyachijuni nishpa. ‘Mariaca quimsa quillacunata Elisabetpa huasipi causajushpami paipa huasiman tigrarca’.

Maria vijsayu cashcata yachaj chayashpaca Joseca ñana paihuan cazarangapaj munarcachu. Chaimi muscuipi shuj ángel ricurishpa Josetaca cashna nirca: Mariahuan cazaranataca ama manllaichu. Paica ima nalitapash na rurashcachu nishpa. Shina nijpimi Joseca Mariahuan cazarashpa paipa huasiman pusharca.

Jehová ‘Diosca jahua pachapi, cai pachapipash imata rurangapaj munashcatami rurajun’ (Salmo 135:6).