Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

 CAPÍTULO 67

Jerusalén llactapa jatun pircacuna

Jerusalén llactapa jatun pircacuna

Esdras causajuj punllacunapimi Nehemías shuti israelita causarca. Nehemiasca Artajerjes shuti reyta sirvishpami Susa shuti pueblopi causarca. Shuj punllaca Nehemiaspa huauqui Judá llactamanda shamushpami cashna nirca, Jerusalenman tigrashca israelitacunaca jatun llaquita apashpami causanajun. Babiloniocuna llaquichishpa Jerusalenba muyundi pircacunata urmachishcata, chai pueblopa pungucunata rupachishcatapash na arreglashcachu nishpa. Chaita uyashpaca Nehemiasca llaqui llaquimi tucurca. Paicunata ayudangapaj munashpami, rey paita Jerusalenman cachachun Jehová Diosta mañarca.

Shuj punllaca Nehemías llaquilla cajta cuenda japishpami reyca cashna tapurca: “¿Imashpata canga, llaquilla ñavi cangui?” nishpa. Chaimi Nehemiasca nirca: Ñuca llacta Jerusalenmi tucuchi tucushca. Chaimi llaquilla cani nishpa. Shina nijpimi reyca tapurca: ¿Imata rurashpata ayudai ushani? nishpa. Shina nijpimi Nehemiasca shugu ucupilla Diosta mañashpa cashna nirca: ‘Can jatun mandajpa yuyaipi ali cajpica, Jerusalenba pircacunata cutin alichigringapaj cachahuai’ nishpa. Chaimi rey Artajerjesca Nehemiastaca richun saquirca. Jerusalenman tigrana ñangunapi Nehemiasta ama imapash pasachunmi reyca paipa soldadocunata cacharca. Shinallata Judá llactapa gobernador cachunmi churarca. Jerusalenba pungucunata rurachunbash caspicunatami cacharca.

Ña Jerusalenman chayashpaca Nehemiasca chai llactapa pircacunatami ricungapaj rirca. Chai jipaca sacerdotecunata, mandajcunata tandachishpami nirca: Caica nimamanda nalichu can. Uchallami imatapash rurana canchi nishpa. Shina nijpimi israelitacunaca Nehemías nishca shina pircacunata cutin shayachi callarirca.

Israelitacunapa huaquin contracunaca burlarishpami cashna ninajurca: Canguna ‘shayachishca pircacunataca, shuj atuj vitsiashpallatami urmachinga’ nishpa. Shina nijpipash israelitacunaca na desanimarishpami ashtahuan jatun, shinlli pircacunata shayachishpa catirca.

Shinapash shuj shuj llactacunamanda israelitacunapa contracunaca paicunapura tandanajushpami Jerusalenda llaquichinata decidirca. Chaita yachaj chayashpami israelitacunaca ninanda manllarinajurca. Chaimi Nehemiasca nirca: ‘Paicunapa ñaupajpica, na manllanachu canguichi’, Jehová Diosmi ñucanchihuan can nishpa. Chai jipaca trabajadorcunata cuidachunmi huaquin jaricunata churarca. Shinami israelitacunapa contracunaca paicunata llaquichitaca na usharca.

Jerusalenba jatun pircacunata, pungucunatapash 52 punllacunapillami shayachirca. Chaimi candanata yachaj  levitacunata Jerusalenman pushashpa ishcai grupopi separarca. Shinami shuj grupotaca Esdras pusharca. Cutin chaishuj grupotaca Nehemiasmi pusharca. Shinami Pugyuman llujshina pungupi gradascunata vitsiashpa shujcunaca shuj ladota, caishujcuna chaishuj ladota rishpami Jerusalenba jatun pirca jahuata muyunajurca. Paicunaca trompetacunahuan, arpacunahuan, címbalo nishcacunahuanmi templo huasiman chayangacaman Jehová Diosta alicachishpa candanajurca. Chai punllacunapica ashtaca huarmicuna, jaricuna, huahuacunapashmi animalcunata Diosman cushpa huañuchinajurca. Shinami ninanda cushijunajurca. ‘Jerusalenbi chashna ninan cushijuica caru llactacamanmi uyarijurca’.

‘Maijan shinlli macanajunahuan shayarishpapash candaca pipash na mishangachu’ (Isaías 54:17).