Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

 Capítulo 11

¿Imamandata ashtaca llaquicuna tian?

¿Imamandata ashtaca llaquicuna tian?

1, 2. ¿Imatata ashtaca gentecunaca tapurin?

CADA PUNLLAMI mundo enteropi shuj shuj llaquicuna tiajta uyanchi. Por ejemplo, marpi yacu jatarishpa shuj pueblota tucuchishcata, shuj nali runa shuj iglesiaman yaicushpa caita chaita disparashpa huaquingunata chugrichishpa, shujcunataca huañuchishcatami uyanchi. Shinallata huarmi cáncer ungüihuan huañujpimi paipa picha huahuacunaca paicunalla quedajtami uyanchi.

2 Chashna llaquicuna tiajpimi ashtaca gentecunaca tapurin ¿imashpashi shinapacha llaquicunaca tian? ¿Imamandashi cai mundopica ashtaca na ricunayachijcuna, nanaicuna tian? nishpa. ¿Quiquinbash nachu shina tapurishcangui?

3, 4. a) Habacuc profetaca ¿imatata Jehovataca tapurca? b) Shina tapujpica ¿imashinata Jehová Diosca tigrachirca?

3 Bibliata liishpaca Taita Diospi feta charijcunapash shina tapurishcatami yachajunchi. Shuj ejemplota ricushun. Habacuc profetaca Jehová Diosta cashnami tapurca: “¿Imashpata nalicunatara ricuchishpa, llaquicunata ricuchun saquihuangui? Ñuca ñavipica tucuchijcuna, ninandapacha llaquichijcunami ricurin. Fiñanajushpa rimajcuna, maitapash rimarijcunami jatarinajun” nishpa (Habacuc 1:3).

4 Habacuc shina tapujpica, Jehová Diosca Habacuc 2:2, 3​pimi paipa tapuita tigrachishpa chai llaquicunata tucuchinata villarca. Jehová Diosca tucui gentecunatami ninanda juyan. Bibliapica ninmi: “Diosmi cangunataca cuidajun” nishpa (1 Pedro 5:7). Taita Diosca gentecuna sufrichunga na  munanllu (Isaías 55:8, 9). Shinaca, mundo enteropi ashtaca llaquicuna imamanda tiashcata yachajushunchi.

¿IMAMANDATA ASHTACA LLAQUICUNA TIAN?

5. a) Religiongunata ñaupaman pushajcunaca ¿imatata llaquicunamandaca nin? b) ¿Imatata Bibliapica yachachin?

5 Pastorcuna, curacuna, religiongunata ñaupaman pushajcunaca ninmi, Taita Diospa munai cajpimi gentecunaca sufrin nishpa. Shujcunacarin ninmi, ima llaqui japijpipash ñucanchica na intindita ushanchichu, Taita Diosmi shina destinashcanga nishpa. Cutin shujcunaca ninmi, Taita Dioshuan jahua cielopi causachunmi huahuacunataca huañuchun saquin nishpa. Shinapash chaicunaca na ciertochu can. Jehová Diosca nunca na pitapash llaquichinllu. Bibliapica ninmi: ‘Taita Diosmanda nalita ruranaca, Tucui Ushaita Charij Diosmanda carupi cachun’ nishpa (Job 34:10).

6. Gentecunaca ¿imashpata llaquicunamandaca Diostara juchachin?

6 Ashtaca gentecunaca Taita Dios cai Alpata mandajun yashpami llaquicunamandaca Taita Diostara juchachin. Imashinami capítulo 3​pi ña yachajurcanchi cai mundotaca Satanás Diablomi mandajun.

7, 8. ¿Imamandata cai Alpapica ashtaca llaquicuna mirashca?

7 Bibliapica ninmi: ‘Cai pachataca Diablomi tucuita mandajun’ nishpa (1 Juan 5:19). Cai mundota mandaj Diabloca millaipachami can. Paica ‘tucui cai pachapi causajcunatami umachijun’ (Apocalipsis 12:9). Ashtaca gentecunaca Diablopa munaitami ruran. Chaimandami mundo enteropi nalicuna, na ricunayachijcuna, llulla gentecuna mirashca.

8 Imamanda shina causai tiashcata ricushun. Adán y Evaca Jehovata na cazuimandami juchayu tucurca. Chaimandami paicunapa huahuacunapash juchayucuna nacirirca. Juchayucuna caimandami gentecunaca shujcunata llaquichin. Shinallata shujcunamanda ashtahuan yali canata mascan. Chaimandami paicunapura macanajun,  guerracunaman rin, imacunatapash nishpa shujcunata llaquichin (Eclesiastés 4:1; 8:9). Cutin huaquinbica, gentecunaca ‘ima punlla ima tucunata na yachaimandami’ llaqui japijpi sufrin (Eclesiastés 9:12). Huaquinbica na yashcapimi ima llaquicunapash japin.

9. ¿Imamandata Jehová Diosca llaquicunataca na tucuchishca?

9 Jehová Diosca llaquicunataca na cachamunllu. Paica guerramanda, huañuimanda, shuj llaquicunamandapash na culpata charinllu. Shinallata terremotohuan, acapanahuan, ninan tamiacunahuanga Diosca na llaquichinllu. Shinaca, Jehová Tucui Poderta Charij Dios cashpaca ¿imamandata llaquicunataca na tucuchin? ninguipashchari. Imamanda llaquicuna tiachun saquishcataca Jehová Diosca alimi yachan. Paica ñucanchitaca ninandami juyan (1 Juan 4:8).

¿IMAMANDATA DIOSCA LLAQUICUNA TIACHUN SAQUISHCA?

10. Diabloca ¿ima llullacunatata Jehovamandaca nirca?

10 Jardín de Edenbimi Diabloca Adanda, Evatapash umachirca. Shinami Diabloca Jehovataca nali mandajmi can nishpa juchachirca. Diabloca Adanman, Evamanga Taita Diosca na tucuita cabal nijunllu nishpami crichirca. Shinallata Diabloca Jehovatapash yali pai ali mandaj cashcata, gentecuna Diosta na minishtishcata crichunmi munarca (Génesis 3:2-5, página 222​pi nota 27​ta ricupangui).

11. ¿Ima tapuitata yachajuna capanchi?

11 Adanbash, Evapash na cazushpaca Jehovapa contrami tucurca. Paicunaca yarcami ñucanchillatami ima ali cajta, ima nali cajtapash agllai ushanchi nishpa. Shinaca Adán y Eva pandarijushcata, Jehovalla mandana derechota charishcata ricuchingapaca ¿imatata Diosca ruragrijurca?

12, 13. a) ¿Imamandata Jehová Diosca Adandapash Evatapash na chai rato tucuchirca? b) Jehová Diosca ¿imamandata Diablopash, gentecunapash paicunallata mandachun saquirca?

12 Jehová Diosca Adán y Eva paita na cazujpipash na chai  ratoca tucuchircachu. Chaipa randica huahuacunata charichunmi saquirca. Shinallata, Adanba huahuacuna paicunallata pi mandachun munashcata agllachunmi saquirca. Jehová Diosca mundo enteropi jucha illaj gentecuna causachunmi munarca. Diablo jarcangapaj munajpipash Jehovapa munaica pactaringapachami (Génesis 1:28; Isaías 55:10, 11).

13 Diabloca ashtaca millón angelcunapa ñaupajpimi Diostaca yangata juchachirca (Job 38:7; Daniel 7:10). Chaimandami, Jehová Diosca Diablopa nishcacuna cierto o na cierto cashcata ricuchichun saquirca. Shinallata gentecunapash Diablopa ruraicunata catishpa paicunallata mandashpa ali o nali causanata ricuchunmi Jehová Diosca saquirca.

14. Ashtaca huatacuna yalijpipash ¿imatata ricushcanchi?

14 Ashtaca ashtaca huatacunatami gentecunaca paicunallata mandashpa ali causangapaj munashpapash na ushashca. Shinami, Diablo llulla cashcata ricushcanchi. Gentecunaca Dios paicunata ayudachun minishtinbachami. Chaimandami profeta Jeremiasca nirca: “Mandaj Dioslla, runapaj causaica na paipajchu. Pipash quiquin causaitaca, na mandai ushanllu. Chaitaca yachapanimi” nishpa (Jeremías 10:23).

JEHOVÁ DIOSCA ¿IMAMANDATA LLAQUICUNATACA NA TUCUCHISHCA?

15, 16. a) Diosca ¿imamandata llaquicuna tiachun saquishca? b) ¿Imamandata Jehová Diosca Diablopa ruraicunataca na tucuchishca?

15 Jehová Diosca ¿imamandata llaquicuna tiachun saquishca? ¿Imashpata nali cosascunataca Jehová Diosca na tucuchishca? Diablo nali mandaj cashcata ricuchingapami Jehová Diosca tiempo yalichun saquishca. Shinallata, gentecunaca ashtaca ashtaca huatacunatami shuj shuj gobiernocuna  mandachun churashca. Shinapash, ali mandaitaca pipash na ushashcachu. Imacunatapash ninanda estudiajpi, investigajpi, imacunata rurajpipash nali gentecuna, nali ruraicuna, pobrecuna, guerracuna, huañuchijcunaca ashtahuanmi mirashpa catishca. Imashinami ricunchi, Dios na ayudajpica gentecunaca na ali causai ushashcachu.

16 Shinapash, Jehová Diosca ¿imamandata Diablopa ruraicunataca na tucuchishca? Diablopa ruraicunata tucuchishpaca, Diablota apoyajushca shinami Jehová Diosca ricurinman carca. Shinapash, Jehová Diosca nunca na Diablotaca apoyangachu. Shina rurajpica gentecunapash ñucanchillata mandashpa alimi causanchi ninmanmi carca. Chaipash llulla cajpimi Jehová Diosca na apoyashca. Taita Diosca nunca na llullanllu (Hebreos 6:18).

17, 18. ¿Jehová Diosca llaquicunata tucuchingacha?

17 Diablopash, gentecunapash Diosta na cazushcamandami ashtaca llaquicuna tian. Llaquicunataca Jehová Diosca ¿ima horapash tucuchingacha? Ari, tucuchingami. Ima hora llaquicunata tucuchinataca paica alimi yachan. Llaquicunata tucuchishpami Jehová Diosca paipa munaita pactachishpa, cai Alpataca shuj juyailla paraisota ruranga. Chaipimi, ‘huañushpa pambai tucushcacunapash tucuilla’ causaringa (Juan 5:28, 29). Ungüicunapash ñana tiangachu, pipash ñana huañungachu. Diablopa culpamanda llaquicuna tiashcataca Jesusmi tucuchinga. Jehová Diosca Jesustami ‘Diablo imata rurajujta tucuchichun’ agllashca (1 Juan 3:8). Jehová Dios ñucanchicuna paimanda yachajushpa, paipa lado tucungacaman shuyajushcamandaca ninandami agradicina canchi (1 Timoteo 2:3, 4 liipangui). Ñucanchicuna ima llaquihuan sufrijujpipash Jehová Diosmi aguantachun ayudanga (Juan 4:23; 1 Corintios 10:13, liipangui).

18 Jehová Diosca paipa lado tucuchunga pitapash na obliganllu.  Gentecuna paicunallata alita o na alita agllachunmi saquirca. Shinaca ima ali cashcata, ima nali cashcata agllana ima cajta yachajushun.

QUIQUINGA ¿IMATATA RURAGRINGUI?

19. a) Jehová Diosca ñucanchi ¿imata rurachunda saquishca? b) Ñucanchica ¿imamandata agradicina capanchi?

19 Jehová Diosca ñucanchillata alita o nalita agllachunmi saquishca. Ñucanchica animalcunahuanga na igual canchichu. Animalcunaca ima ali cashcata, ima nali cashcataca na agllai ushanllu. Shinapash ñucanchica imashina causanata, imata ruranata, Jehovata sirvinata o na sirvinatapash agllai ushanchimi (Proverbios 30:24, NM). Jehová Diosca ñucanchitaca shuj maquinata shinaca na rurashcachu. Ñucanchillata imagutapash pensarishpa rurachunmi rurashca. Ñucanchillata amigocunata agllachun, ñucanchi causaihuan imata ruranatapash cada uno agllachunmi rurashca. Jehová Diosca ñucanchi cushilla causachunmi munan.

20, 21. ¿Imatata cunanllata rurana capangui?

20 Jehová Diosca paita juyachunmi munan (Mateo 22:37, 38). Imashinami shuj taitaca paipa huahuagu juyanimi nijta uyashpa ninanda cushijun, shinallatami Jehovapash cushijun. Paita sirvinata o na sirvinataca cada uno agllachunmi saquishca. Diablopash, Adanbash, Evapash Jehovata sirvinataca na agllarcachu. Quiquinga ¿imatata ruragringui?

21 Ima ali cashcata agllashpa Jehová Diosta cunanmandallata sirvipai. Ashtaca millón gentecunami Jehovapa lado tucushpa, Diablopa ruraicunamanda caruyashca (Proverbios 27:11). Jehová Dios cai Alpata shuj juyailla paraisota rurajpi quiquinbash chaipi cangapaca ¿imatata cunanmandallata rurana cangui? Shamuj capitulopimi chaimanda ashtahuan yachajushun.