Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

Notacuna

Notacuna

1 JEHOVÁ

Diospa shutica Jehovami can. Jehová shutica, “ima tucuna cashpapash tucunalla cashcata o paipa munaita imashinapash pactachina cashcatami” nijun. Jehová Tucui Ushaita charij, Tucuita Ruraj Dios caimandami tucuita rurangapaj poderta charin.

Hebreo shimipica Diospa shutitaca chuscu letracunapimi escribin carca. Chai letracunaca caicunami can (YHWH). Hebreo shimipi escribishca Bibliapa librocunapica casi 7 mil viajemi Jehová shutica ricurin. Jehová shutitaca mundo enteropimi shuj shuj idiomacunapi rijsin.

Cap. 1, párr. 15

2 BIBLIACA ‘DIOS ESCRIBICHISHCAMI’ CAN

Bibliaca Taita Dios escribichishcami can. Bibliata escribichunga gentecunatami agllarca. Yuyapai, shuj abogado paipa secretariata shuj cartata escribichun mandajpica, secretariaca abogadopa yuyaitami escribin. Shinallatami, Taita Diosca Bibliapi paipa yuyaicunata escribichunga paipa espíritu santohuan ayudarca. Espíritu santomi Bibliata escribijcunataca shuj muscuipi cuenda imata escribinata ricuchirca.

Cap. 2, párr. 5

3 CONSEJOCUNA

Bibliapi consejocunaca ali decisiongunata agllachunmi ayudan. Shuj ejemplota ricushun, 1 Corintios 15:33 Mushuj Testamento Quichua Imbabura [MTQI] Bibliapica ninmi: “Nalicunahuan tandanajujpica, canguna ali causajujtapash pandachishpami chingachinga” nishpa. Cai consejoca alipa, nalipa cashpapash ñucanchi picunahuan llevarinata ali ricuchunmi yachachin. Shinallata, “maijan imata tarpushpapash, chaitallatami japinga” nishca consejoca, ñucanchillata alita o nalita rurashpaca chaitallata japina cashcatami yachachin (Gálatas 6:7).

Cap. 2, párr. 12

  4 PROFECIACUNA

Ima pasanata Taita Dios villashcatami Bibliapica profecía nin. Profeciacunaca Dios imata rurachun munashcata villangapaj, ima ali o nali cashcata yachachingapaj, imatapash rurachun mandangapaj, gentecunata juzgangapami can. Shinallata shamuj punllacunapi ima tucugrijujta villangapami can. Bibliapa ashtaca profeciacunaca ñami pactarishca.

Cap. 2, párr. 13

5 MESIASMANDA PROFECIACUNA

Bibliapi nishca shinaca Jesuspimi ashtaca profeciacuna pactarishca. Chaita ashtahuan ali intindingapaca “ Mesiaspi pactarishca profeciacuna” nishca recuadrota ricungui.

Cap. 2, párr. 17, notatapash ricupai

6 CAI ALPA ¿IMASHINA CACHUNDA DIOSCA MUNARCA?

Callaripica Jehová Diosca cai Alpataca shuj juyailla paraísotami rurarca. Paita juyaj gentecuna chaipi causachunmi munarca. Jehovapa munaica na cambiashcachu. Ñallami llaquicunata tucuchishpa, paita sirvijcunamanga para siempre causaita cunga.

Cap. 3, párr. 1

7 SATANAS, DIABLO

Diabloca Diosta na cazunata callarichishca shuj nali angelmi can. Paitaca Satanas nishpami rijsin. Satanás nishpaca “Taita Diospa contra” nijunmi. Paica Jehovataca na cazungapaj munanllu. Diablo nishpaca “llullashpa juchachij” nijunmi. Diosmanda llullacunata nishpa gentecunata umachijpimi shina nin.

Cap. 3, párr. 4

8 ANGELCUNA

Jehová Diosca cai Alpata nara rurashpallatami jahua cielopi causachun angelcunata rurarca. Ashtaca ashtaca huaranga angelcunami tian (Daniel 7:10). Angelcunaca shutita, shuj  shuj cualidadcunatami charin. Jehovata tucui shunguhuan sirvij angelcunaca humildecuna caimandami gentecuna paicunata adorachunga na munan. Paicunaca shuj shuj responsabilidadcunatami charin. Huaquingunaca Jehovapa ñaupajpi sirvin, Jehovapa mandashcacunata villan, cai Alpapi Jehovata sirvijcunata cuidashpa ñaupaman catichun ayudan. Shinallata Diospa Reinomanda gentecunaman villachichun ayudan. Shujcunaca Diospa munaitami pactachin (Salmo 34:7; Apocalipsis 14:6; 22:8, 9). Shinallata shamuj punllacunapica cai angelcunami Armagedón nishca guerrapi Jesuspa lado tucushpa macanajunga (Apocalipsis 16:14, 16; 19:14, 15).

Cap. 3, párr. 5; Cap. 10, párr. 1

9 JUCHACA ¿IMATA CAN?

Jehovapa mandashcacunata na cazushpa imapash nali munaicuna, nali yuyaicuna, nali ruraicunami jucha can. Jehovapa munaita ñana pactachishpami juchapi urmaita ushanchi. Jehová Diosca paita ali sirvishpa catichun, juchapi ama urmachunmi consejocunata, mandashcacunata cushca. Jehová Diosca callaripica tucuitami ali, jucha illajta rurarca. Shinapash Adanbash, Evapash Diablotara cazushpami juchayu tucushpa, rucuyashpa huañurca. Shinallata ñucanchipash Adanba, Evapa huahuacuna caimandami juchayucuna nacirishca caimanda huañunchi.

Cap. 3, párr. 7; Cap. 5, párr. 3

10 ARMAGEDÓN

Armagedonga Taita Diospa jatun macanajuimi can. Chaipimi Diablopa nali mundota, nali ruraicunatapash tucuchinga.

Cap. 3, párr. 13; Cap. 8, párr. 18

11 DIOSPA REINO

Diospa Reinoca jahua cielopi mandachun churashca Diospa gobiernomi can. Chai Reinopica Jesusmi Rey shina mandajun. Shamuj punllacunapica Diospa Reino mandajpimi Jehová Diosca cai Alpamanda tucui llaquicunata tucuchinga. Chai Reinoca mundo enterotami mandanga.

Cap. 3, párr. 14

 12 JESUCRISTO

Imatapash nara rurashpallatami Diosca Jesusta rurarca. Tucui gentecunamanda huañuchunmi Jesustaca cai Alpaman cachamurca. Contracuna Jesusta huañuchishca jipaca Jehová Diosca Jesusta causachircami. Cunanga jahua cielopimi Jesusca Diospa Reinopi Rey shina mandajun.

Cap. 4, párr. 2

13 70 SEMANAMANDA PROFECÍA

Bibliapica Mesías ima hora shamunataca ñami escribishca carca. Mesiasca 69 semanacunamanda profecía pactarishpa tucurijujpimi shamuna carca. Chaica, 455 a.e.c. * huatacunapi callarishpa 29 e.c. huatapimi tucurirca.

¿Imashinata 29 e.c. huatapi pactarishcata yachanchi? 455 a.e.c. huatapi Nehemías Jerusalenman chayashpa chai llactata shayachi callarijpimi 69 semanacunamanda profeciaca callarirca (Daniel 9:25; Nehemías 2:1, 5-8) Semana nishpaca ¿mashna tiempomandata parlajun? Cai profeciapica 7 punllata charij semanacunamandallaca na parlajunllu. Cada semana 7 huatacuna cashcatami nijun. Bibliapi huaquin profeciacunamanda parlashpaca ninmi: ‘Cada punlla shuj huatami’ yalina can nishpa (Números 14:34; Ezequiel 4:6). Shinaca 69 semanacunamanda profeciaca, semanamanda cada punlla shuj huata cashcatami nijun. Chaita cuentajpica 483 huatacunami can (69 x 7). Shinallata 455 a.e.c. huatamanda 483 huatacunata cuentajpica 29 e.c. huatami tucun. Chai huatapimi Jesusca bautizarishpa Mesías tucurca (Lucas 3:1, 2, 21, 22).

 Chai profeciallatami shuj semanapash yalina cashcata ricuchijurca. Shinaca 7 huatacuna ashtahuan yalinarami carca. Chai 7 huatacuna yalijujpi 33 e.c. huatapimi Mesiastaca huañuchirca. Chai jipaca 36 e.c. huatapi callarishpami, Diospa Reinomanda ali villaicunataca judiocunaman, na judiocunamanbash villachina carca (Daniel 9:24-27).

Cap. 4, párr. 7

 14 TRINIDADMANDA PANDA YACHACHISHCA

Bibliapica yachachinmi, Jehová Diosca tucuita Rurajmi can. Paimi imatapash nara rurashpallata Jesustaca rurarca nishpa (Colosenses 1:15, 16). Jesusca, Tucui Ushaita Charij Diosca na canllu. Jesusca, ñucaca Taita Dioshuan igualmi cani nishpaca nunca na nircachu. Chaipa randica Jesusca nircami: “Ñuca Taitaca, ñucata yali ushaitami charin” nishpa (Juan 14:28; 1 Corintios 15:28). Shina cajpipash ashtaca iglesiacunaca Trinidad nishcatami yachachin. Chaimandami gentecunaca nin Taitapash, Churipash, jucha illaj espiritupash shujlla Diosman tigran nishpa. Shinapash Trinidad shimica Bibliapica ni maipi na ricurinllu. Trinidadca panda yachachishcami can.

Diospa jucha illaj espirituca Diospa podermi can. Chai podertami paipa munaita pactachingapaj utilizan. Diospa jucha illaj espirituca na shuj gente cuenda canllu. Shuj ejemplota ricushun, punda tiempopi Jesusta catijcunamanda parlashpaca Bibliapica ninmi: ‘Diospa jucha illaj espíritu junda tucurca’ nishpa. Shinallata Jehovapash nircami: ‘tucuicunamanmi ñuca espiritutaca talinshna cachamusha’ nishpa (Hechos 2:1-4, 17).

Cap. 4, párr. 12; Cap. 15, párr. 17

15 CRUZ

Diosta ali adorajcunaca cruztaca na utilizanllu. ¿Imashpata na cruzta utilizan?

  1.  Panda religiongunaca ashtaca tiempotami Diosta adorangapaj nishpa cruzta utilizashca. Punda tiempocunapica animalcunata, plantacunata, tucui ima tiashcacunata adorangapami cruztaca charin carca. Shinallata, yanga dioscunata adorangapami jarihuan huarmihuan pinganai cosascunata rurana pushtucunapi cruztaca charirca. Shinapash, Jesús huañushcamanda 300 huata yalijpipash Jesusta ali catijcunaca cruztaca na utilizanllu carca. Ashtaca huatacuna jipami Roma llactata mandaj Constantino shuti runaca Jesusta catinchi nij tucushca religión rijsishca cachun, ashtahuan gentecuna mirachunmi cruzta utilizanata callarichirca. Shinapash Jesusca cruzpica na huañurcachu. Shuj enciclopedia libroca ninmi: “Jesús nara shamujpillatami gentecunaca cruzta utilizan carca. Jesús shamushca jipapash cruzta utilizashpa catishcarami” nishpa (The New Catholic Encyclopedia).

  2.    Jesusca na cruzpi huañurcachu. Griego shimimanda traducishca cruz shimica shuj “racu caspi” o shuj “jatun caspita shayachishcatami” nijun. Shuj Bibliapica ninmi: “Mushuj Testamentota escribishca tiempomanda griego shimipi cruz shimita ricujpica, ishcai caspita crusashcamandaca imatapash na nijunllu” nishpa. (The Companion Bible). Jesusca shuj racu caspita shayachishcapimi huañurca.

  3.  Jehová Diosca paita adorangapaj santocunata, cruzcunata, rosariocunata charichunga na munanllu (Éxodo 20:4, 5; 1 Corintios 10:14).

Cap. 5, párr. 12

16 JESÚS HUAÑUSHCATA YARINA PUNLLA

Jesusca paipa catijcunataca pai Huañushca Punllata Yarichunmi mandarca. Chaimandami, Jesusta ali catijcunaca cada huata 14 de nisán fecha chayajpica chai punllata yaringapaj tandanajun. Punda tiempopica israelitacunami chai fechapillata Pascua punllata yarin carca. Cunanbica Jesús Huañushcata Yarina tandanajuipica tandata, vinotami yalichin. Tandaca Jesuspa jucha illaj cuerpotami ricuchin. Vinoca Jesuspa jucha illaj yahuartami ricuchin. Shinapash jahua cielopi Jesushuan mandangapaj rina esperanzata charijcunallami tandata micuna, vinota ufiana can. Cutin cai Alpapi para siempre causana esperanzata charijcunaca Jesús Huañushcata Yarina tandanajuiman rishpapash, paicunaca tandataca na micunllu, vinotapash na ufianllu. Shinami Jesús mandashcata respetashcata ricuchin.

Cap. 5, párr. 21

17 ALMACA ¿IMATA CAN?

Inglés shimipi 2013 huatapi llujchishca Traducción del Nuevo Mundo Bibliapica 1) gentecunamanda, 2) animalcunamanda, 3) gentecunapa, animalcunapa causaimanda parlangapaca “alma” nishpami churashca. Huaquin ejemplocunata ricushun.

  • Gentecuna. ‘Noé villajui punllacunapica, huambuj huasita yacu huambuchijpimi pusaj puracunalla [“almacunalla”, NM] chaipica quishpirirca’ (1 Pedro 3:20). Cai textopi pusaj puracunalla o pusaj  almacuna nishpaca, Noemanda, paipa huarmimanda, quimsa churicunamanda, jachungunamandapashmi parlajun.

  • Animalcuna. “Diosca nircami: ‘Yacupi causana animalcunapash [“almacunapash”, NM] alpa jahua huairata rij alasyu animalcunapash tiachun. Chai alasyu animalcunaca, jahua pachata shinllipacha shicanyachijuj chushaj pushtutami rinajunga’” nircami. Shinallata Diosca nircami: “Alpapi causana animalcunaca [“almacuna”, NM] ima animalcuna cashpapash, chai puralla tiachun. Tucui animalcunapash, alpata llucashpa purij animalcuna, sachacunapi causana animalcunapash, cai alpapi animalcunaca chai puralla miranajuchun nircami. Shina nijpica, chashnami tucurca” (Génesis 1:20, 24).

  • Gentecunapa, animalcunapa causai. Jehová Diosca Moisestaca nircami: “Canda [o canba “almata”, NM] huañuchingapaj munajcunaca tucuillami huañushca” nishpa (Éxodo 4:19) Jesús cai Alpapi cashpaca nircami: ‘Ñucami aliguta michij cani. Aliguta michij cashpami, ñucapa llamacunamandaca huañushpa’, ñuca causaita o almata cusha nishpa (Juan 10:11).

    Imatapash “tucui almahuan” rurashca nishpaca gentecuna paicuna munashpa imatapash ali ali rurashcatami shina nin (Mateo 22:37; Deuteronomio 6:5). Shinallata Bibliapi “alma” nishpaca gentecuna ña huañujujta o ña huañushca cajta ningapami “alma” nishpa churan (Job 33:22).

Cap. 6, párr. 5; Cap. 15, párr. 17

18 ESPIRITUCA ¿IMATA CAN?

Hebreo shimimanda, griego shimimanda “espíritu” shimita traducishpaca Bibliapica shuj shuj yuyaimandami parlan. Gentecunaca huairataca na ricuita ushanllu. Shinallatami gentecunapa samaimanda, animalcunapa samaimanda parlashpaca espíritu nishpa churashca. Ashtahuanbash, espiritualmente ali gentecunamanda, Diospa jucha illaj espiritumanda o Diospa podermanda parlangapapash espíritu nishpallatami churashca. Imashinami ricunchi Bibliapica, gentecuna huañujpi imapash causashpa catinmi nishpaca na yachachinllu (Éxodo 35:21; Salmo 104:29; Mateo 12:43; Lucas 11:13).

Cap. 6, párr. 5; Cap. 15, párr. 17

 19 GEHENACA ¿IMATA CAN?

Griego shimimanda Gehena shimitaca Biblia en quichua de Imbaburapica ucu pacha nishpami churashca. Punda tiempopica Jerusalén llacta ladomanmi basurata rupachina pushtu tiarca. Chai pushtutami Gehena nin carca. Jesús cai Alpapi cashca tiempopica Gehena pushtupi gentecunata, causaj animalcunata rupachishpa sufrichishcataca na maipipash nijunllu. Shinaca Gehena nishca pushtuca huañushca gentecunata sufrichingapaj, rupachingapaca na canllu. Jesús yachachijushpa ucu pachaman o Gehenamanmi shitai tucunga nishpaca para siempre tucuchi tucuna cashcatami nijurca (Mateo 5:22; 10:28).

Cap. 7, párr. 20

20 PADRENUESTRO ORACIÓN

Jesusca paipa catijcuna imashina Diosta mañana cashcatami yachachirca. Chai oraciondami padrenuestro oración nishpa rijsinchi. Ñucanchipash cashna mañachunmi yachachishca:

  • ‘Canba shutica alicachi tucushca cachun’

    Diospa shutita imapash llullacunahuan mapayachishcata Taita Diosllata paipa shutita alicachichun nishpami mañanchi. Shinami jahua cielopipash, cai Alpapipash Diospa shutita respetashpa alicachinga.

  • ‘Canba mandanaca ucha chayamuchun’

    Diospa mandana o Diospa Reino ucha mandai callarishpa, Diablopa nali ruraicunata ucha tucuchishpa cai Alpata shuj paraisota rurachunmi mañanchi.

  • ‘Cai pachapipash canba munashca’ pactarichun

    Cai Alpapi Diospa munai pactarichun Diosta cazuj, jucha illaj gentecuna Paraisopi para siempre causachunmi mañanchi. Shinallata, Jehová callaripi gentecunata rurashpa imashina causachun munashcapash tucui pactarichunmi mañanchi.

Cap. 8, párr. 2

 21 ¿PITA ÑUCANCHITACA SALVASHCA?

Jehová Diosca gentecunata juchamanda, huañuimanda salvangapaca ¿imatata rurarca? Jehová Diosca paipa juyashca Churitami cai Alpaman ñucanchi juchacunamanda huañuchun cachamurca. Adán jucha illaj causaita ñana charishcamanda, Taita Dioshuan ñana ali cashcamandami Jesuspa causaita cuna minishtirirca. Chaimandami Taita Dioshuan cutin ali caita ushanchi. Jesús ñucanchicunata salvangapaj huañushcamandami tucuicuna jucha illaj tucushpa para siempre causana oportunidadta charinchi.

Cap. 8, párr. 21; Cap. 9, párr. 13

22 1914 HUATACA ¿IMAMANDATA IMPORTANTE CAN?

Daniel capítulo 4​pi profeciami 1914 huatapi Diospa Reino mandai callarina cashcata yachachin.

Profecía: Daniel capítulo 4​pica rey Nabucodonosor imata muscushcatami parlajun. Chai muscuipica shuj jatun jatun quiruta cuchushpa ama tronco viñachun jirru cadenahuan, bronce cadenahuan huatashcatami ricurca. Chai quiruca ‘canchis huatacaman chashnami cana’ carca. Chai huatacuna yalishca jipami chai quiruca cutin viñana carca (Daniel 4:1, 10-16).

Chai profeciataca ali intindishunchi: Chai racu quiruca Jehová mandana cashcatami ricuchijurca. Ashtaca huatacunatami Jehová Diosca Jerusalenbi mandaj reycunata utilizashpa Israelpi tucui llactacunata mandarca (1 Crónicas 29:23). Shinapash Jehovata chai reycuna ñana cazushcamandami chai reycunaca ñana mandashpa catita usharca. Shinami Jerusalén llactataca 607 a.e.c. huatapi tucuchirca. Chaipimi ‘canchis huatacuna’ yalina nishca profecía pactari callarirca (2 Reyes 25:1, 8-10; Ezequiel 21:25-27). Jesusca nircami: “Jerusalendaca na israelcuna tucuchinajuchun Dios paicunaman saquijpimi, chai punllacuna pactangacaman mandashpa tianajunga” nishpa. Jesús cai shimicunata nishpaca ‘canchis huatacuna’ yalina nishca profeciamandami parlajurca (Lucas 21:24). Imashinami ricunchi ‘canchis huatacunamanda’ profeciaca Jesús cai Alpapi cajpica na tucui pactarircachu. Jehová Diosca nircami, ‘canchis huatacuna’ yalina profecía tucui pactarijpica shuj Reytami agllasha nishpa. Jehová agllashca Rey Jesús causaita causaicaman mandajushpaca mundo enteropi Jehovata sirvijcunatami bendicianga (Lucas 1:30-33).

 ‘Canchis huatacunami’ yalina carca: ‘Canchis huatacuna’ nishca profeciaca 2.520 huatacunatami pararca. ¿Imashinata chaitaca yachanchi? 607 a.e.c. huatamanda, 1914 huatacaman cuentajpica 2.520 huatacunami yalin. Chai huatapimi Jehová Diosca paipa Reinopi rey cachun Jesusta churarca.

¿Imashinata 2.520 huatacuna yalishcata yachai ushanchi? Bibliapi ‘quimsa huata chaupi’ nishpaca 1.260 punllacuna yalinatami nijun (Apocalipsis 12:6, 14). Shinallata Bibliapi ‘canchis huatacuna’ yalina nishpaca 2.520 punllacuna yalinatami nijun. Shinapash Bibliapi profeciacunamanda parlashpaca ‘cada punllamanda shuj huata’ yalina cashcatami nijun. Chaimandami ‘canchis huatacuna’ yalina profeciaca 2.520 huatacuna yalijpimi pactarina carca (Números 14:34; Ezequiel 4:6).

Cap. 8, párr. 23

23 ANGELCUNATA MANDAJ ANGELCA ¿PITA CAN?

Bibliapica ninmi, “angelcunata mandaj angelca” shujllami tian nishpa. Chai angelca Miguel shutimi can (Daniel 12:1; Judas 9).

Miguel shuti angelmi Jehovata cazuj angelcunataca ñaupaman pushan. Apocalipsis 12:7​pica ninmi: “Miguel shuti angelca, paipaj angelcunandimi, dragonhuan macanajurca. Shinallatami dragonbash, paipaj angelcunandi macanajurca” nishpa. Apocalipsis libropica ninmi, Jehovapa angelcunata mandaj angelca Jesusmi can nishpa. Jesustami Miguel nishpapash rijsin (Apocalipsis 19:14-16).

Cap. 9, párr. 4

 24 TUCURIMUI PUNLLACUNA

Tucurimui punllacunaca imapash llaquicuna mirana punllacunami can. Chai punllacunaca Diospa Reino Diablopa nali ruraicunata nara tucuchijpillatami canga. Chai punllacunatami Bibliapica tucurimui punllacuna nin. Shinallata ‘cai pacha tucurina’ punllacuna, ‘runa aichayu tucushca shamuna punllacuna’ nishpaca chai tucurimui punllamandallatami parlajun (Mateo 24:3, 27, 37). Huata 1914​pi Diospa Reino cielopi mandai callarijpimi “tucurimui punllacunaca” callarirca (2 Timoteo 3:1; 2 Pedro 3:3).

Cap. 9, párr. 5

25 HUAÑUSHCACUNA CAUSARINA

Jehová Diosca huañushcacunata causachingami. Bibliapica 9 viajemi huañushcacunata causachishcamanda parlajun. Huaquin huañushcacunataca Elías, Eliseo, Jesús, Pedro, Pablopashmi causachirca. Cai milagrocunataca Dios poderta cujpillami rurai usharca. Jehová Diosca shuj punllaca “imatapash cashcatapacha rurajcuna, imatapash cashcatapacha na rurajcuna huañushcatapash” cai Alpapi causachunmi causachinga (Hechos 24:15). Shinallata Bibliapica, jahua cieloman ringapaj causarinamandapashmi parlan. Chaica Jesushuan mandangapaj Taita Dios agllashcacuna o ungidocuna huañushpa causarijpimi pactarin (Juan 5:28, 29; 11:25; Filipenses 3:11; Apocalipsis 20:5, 6).

Cap. 9, párr. 13

26 DIABLOPA RURAICUNA (ESPIRITISMO)

Diablopa ruraicuna o espiritismoca nimamanda na alichu can. Chai panda yachachishcacunata catishpami gentecunaca huañushcacunahuan parlangapaj nishpa brujocunapaman, yumbucunapaman rin. Espiritismopi crij gentecunaca ninmi, pipash huañujpica paicunapa espíritu causashpa catinrami, gentecunata llaquichingapaj poderta charinmi nishpa. Ayacunaca, gentecuna Diosta ama cazuchunmi pandachin. ¿Ima ruraicunahuanda pandachin? Horoscopota liinahuan, maquita liichinahuan, jipa punlla ima pasanata yachana munaihuan, magia nishcahuan, brujocunapaman rinahuanmi ayacunaca pandachin. Cai ruraicunata rurangapaca  huaquin gentecunaca drogacunata, tragota, tabacota, coloniatapashmi utilizan. Shinallata librocunahuan, revistacunahuan, peliculacunahuan, propaganda cartelcunahuan, musicacunahuanbashmi ayacunaca pandachingapaj munan. Ashtahuanbash pipash huañujpica responsota churan, rezachin, quilla misata huata misata pagan. Chai ruraicunahuanmi ayacunapash, Diablopash pandachin (Gálatas 5:20; Apocalipsis 21:8).

Cap. 10, párr. 10; Cap. 16, párr. 4

27 JEHOVALLAMI MANDANA CAN

Jehová Diosca Tucui Ushaita Charij, Tucuita Ruraj Diosmi can (Apocalipsis 15:3). Tucuita rurashcamanda, pai dueño caimandami Jehová Diosca mandana derechota charin (Salmo 24:1; Isaías 40:21-23; Apocalipsis 4:11). Chaimandami Jehová Diosca imatalla ruranata mandashca. Shinallata Jehovami picunalla mandana cashcatapash agllaita ushan. Jehovata juyashpa, cazushpami pai mandana derechota charishcata apoyanchi (1 Crónicas 29:11).

Cap. 11, párr. 10

28 ABORTANA

Huarmicuna paicunapa munai nara nacirishca huahuaguta huañuchishpaca abortomi can. Mamapa vijsa ucupi ña causai callarishpallatami huahuaguca ña shuj causaj gentegu can.

Cap. 13, párr. 5

29 ¿YAHUARTA CHURARINACHU CAN?

Yahuarta churarina tratamientoca ¿imata can? Alichishpa charishca yahuarta o shuj gentemanda shuj gentepa cuerpopi yahuarta o fracciones de sangre nishcata churanatami shina nin. Yahuarpa fracciones de sangre nishcacunaca chuscumi: Plasma, glóbulos rojos, glóbulos blancos, plaquetas nishcacunami can.

Cap. 13, párr. 13

 30 DISCIPLINA

Bibliapi “disciplina” nishpaca castiganamandallaca na parlanllu. Ñucanchi nali ruraicunata saquichun, imatapash ali yachajuchunmi Jehová Diosca disciplinan. Paica maipash cachun culiramandallaca na disciplinanllu (Proverbios 4:1, 2). Jehová Diosca taitamamacunapaca alipacha ejemplomi can. Jehová Dios disciplinajpi, disciplinata chasquijcunaca disciplinata alicachita ushan (Proverbios 12:1). Jehová Diosca paita sirvijcunata ninanda juyaimandami ali ali yachachin. Imapash panda yachachishcacunata saquichun, ali pensarichun, imatapash ali rurashpa paita cushichichunmi ayudan. Taitamamacuna, huahuacunata disciplinashpaca imamanda cazuna cashcatami ali intindichina can. Shinallata Jehovata juyachun, Bibliamanda ali yachajuchun, Bibliapi consejocunata cazuchunmi yachachina can.

Cap. 14, párr. 13

31 DEMONIOCUNA

Ayacunataca na ricui ushanchichu. Paicunaca poderta charinmi. Ayacunaca nali angelcunami can. Jehovata na cazuimandami chai angelcunaca nalicuna tucurca (Génesis 6:2; Judas 6). Demoniocunaca Diablopa lado tucushpami Jehovapa contracuna tucurca (Deuteronomio 32:17; Lucas 8:30; Hechos 16:16-18; Santiago 2:19).

Cap. 16, párr. 4

[Nota]

^ par. 40 a.e.c. nishpaca Jesús Alpaman nara shamushca huatacunamandami parlajun. Shinallata e.c. nishpaca Jesús Alpaman shamushca jipa huatacunamandami parlajun.