Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

¿Imatata Bibliaca yachachin?

 Capítulo 1

Diosca ¿pita can?

Diosca ¿pita can?

1, 2. ¿Imacunatata gentecunaca tapurin?

HUAHUACUNACA imacunatapash tapunajunllami. Paicunaman imata intindichijpipash ¿imapata can? nishpa cutin cutinmi tapunajunlla.

2 Joven o mayorlla cashpapash tucuicunami tapuicunata charinchi. Chaimandami imata micunata, imata churajunata, imata randinatapash tapurinchi. Shamuj punllacunapica ñucanchi causaica imashi tucunga nishpapashmi tapurinchi. Cai tapuicunata nali intindimandami ñana ashtahuan yachangapaj munanchi.

3. Huaquin gentecunaca ¿imatata nin?

3 Ñucanchi causaipi tapuicunamandaca Bibliapimi yachajuita ushanchi. Shinapash huaquingunaca ninmi, Bibliata intindinaca na facilchu profesorcuna, curacuna, pastorcunallami chai tapuicunataca yachana can nishpa. Cutin shujcunaca chai tapuicunata na intindimandami pingai tucun. ¿Quiquinga shinallatachu yuyangui?

4, 5. a) ¿Imacunatata tapuripashcangui? b) ¿Imamandata yachajushpa catina capangui?

4 Quiquinga nachu cashna tapurishcangui, ñuca causaica ¿imashi tucunga? Huañushca jipaca ¿imata tucun? ¿Imamandata ali gentecunaca sufrin? nishpa. Jesusca nircami: “Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami” nishpa (Mateo 7:7). Shinaca, ima tapuita charishpapash ali intindingacamanmi yachajuna cangui.

5 Chaipaca Bibliatami imatapash mascashpa cuenda yachajushpa catina cangui (Proverbios 2:1-5).  Bibliamanda yachajunaca na shinllichu can. Ali yachajushpaca cunanbillata cushilla, shamuj punllacunapipash alimi causangui. Cunanga ashtaca gentecuna imata yachangapaj munashcata yachajushun.

TAITA DIOSCA ¿ÑUCANCHITA LLAQUINLLU?

6. Gentecunaca ¿imatata Taita Diosmandaca nin?

6 Ashtaca gentecunaca ninmi, Diosca gentecunataca na llaquinllu. Llaquishpaca cai Alpapi causaica na shinapacha canmanllu nishpa. Tucui ladocunapimi millai gentecuna, pobrecuna, guerracunapash tian. Shinallata ungüicuna japijpimi gentecunaca sufrishpa huañunajun. Chaimandami cashna nin, “Taita Dios ñucanchita llaquishpaca ¿imamandata cai llaquicunataca na tucuchin?” nishpa.

7. a) Iglesiacunata ñaupaman pushajcunaca ¿imatata Diosmandaca nin? b) ¿Taita Dioschu llaquicunata cachamun?

7 Iglesiacunata ñaupaman pushajcunaca Diosca gentecunata na llaquinllu nishpami crichin. Chaimandami imapash llaquicuna japijpica Diospa munaimi can nin. Shina nishpaca Taita Diostami llaquicunamandaca juchachinajun. Bibliapica ninmi, Diosca llaquicunamandaca na culpata charinllu nishpa. Habacuc 1:13​pica ninbashmi: Taita Diosca ‘jucha illaj cashpami, nalitaca napacha ricunayachin. Ima nalitapash napacha ricui ushanllu’ nishpa. Nali cosascuna tiachun saquishpapash, Taita Diosca llaquicunataca na cachamunllu (Job 34:10-12, liipangui). Shuj ejemplota ricushun.

8, 9. ¿Llaquicunamandaca Taita Diostachu juchachina canchi? Shuj ejemplota nipai.

8 Yuyapai, shuj jovenga paipa taitamamacunahuanmi huasipi causan. Jovenba taitaca ninanda juyaimandami imata ruragrijushpapash ali rurachun yachachin.  Shinapash, chai jovenga taitamamata na cazushpami huasimanda llujshishpa rin. Jipamanga nalicunata rurashpami llaqui apan. Richun saquishcamanda ¿taitami culpata charin ninguimanllu? na, taitaca na culpata charinllu (Lucas 15:11-13). Imashinami chai jovenba taitaca churi huasimanda richun na jarcarca. Shinallatami Jehová Diospash callaripi gentecuna na cazushpa, nalicunata rurachun saquirca. Chaimandami llaquicuna tiajpica Taita Diostaca na juchachinachu canchi. Paica llaquicunataca na cachamunllu, chaitaca na cunganachu canchi.

9 Diosca na yangamanda llaquicuna tiachun saquishcachu. Capítulo 11​pimi cai temamanda Biblia ima nijta ashtahuan yachajushun. Taita Diosca ñucanchitaca ninandami juyan. Chaimandami, ima llaqui japijpipash Diostaca na juchachinachu canchi. Shuj punllaca paica llaquicunata tucuchingami (Isaías 33:2).

10. Nali ruraicunata Dios tucuchinataca ¿imamandata crinchi?

10 Taita Diosca jucha illajmi can (Isaías 6:3). Pai rurashcacunaca tucuimi jucha illaj, limpio, ali can. Chaimandami tucui shunguhuan Diospi confiaita ushanchi. Cutin gentecunaca na shinachu, huaquinbica nalicunata ruranllami. Honrado, ali gobierno cashpapash nali ruraicunataca na tucuchi ushanllu. Taita Dios charishca podertaca pipash na charinllu. Paillami gentecunapa nali ruraicunata, nali cosascunata tucuchitapacha tucuchinga (Salmo 37:9-11, liipangui).

GENTECUNA SUFRIJUJPICA TAITA DIOSCA LLAQUIRINMI

11. Gentecuna sufrijujpica ¿imashinata Taita Diosca sintirin?

11 Mundo enteropi ima pasajujta ricushpa, quiquin llaquicunahuan  cajta ricushpaca ¿imashinashi Taita Diosca sintirin? Bibliapica ninmi: ‘Mandaj Diosca alita ruranatami juyan’ nishpa (Salmo 37:28). Taita Diosca ima ali cajta o nali cajtaca tucuitami ricujun. Gentecuna sufrijujta ricushpaca ninandami llaquirin. Bibliapica ninmi, punda tiempopi gentecuna millai, nalicuna tucujpica, Taita Diosca ‘paipa shungupi nanachinshnami llaquirirca’ nishpa (Génesis 6:5, 6). Diosca na cambiashcachu (Malaquías 3:6). Bibliapica ninmi, ñucanchi imashina sintirijtaca Taita Diosca yachanmi nishpa (1 Pedro 5:7, liipangui).

Bibliaca yachachinmi Jehová Diosca juyaj, Tucuita Ruraj Dios cashcata

12, 13. a) ¿Imamandata gentecunataca juyanchi? b) Llaquicunata ricushpaca ¿imashinata sintirinchi? c) Taita Diosca llaquicunata, nali cosascunataca ¿imamandata tucuchinga?

12 Bibliapica ninmi, Taita Diosca gentecunataca paiman rijchajtami rurarca nishpa (Génesis 1:26). Paiman rijcha caimandami ñucanchipash juyanchi, llaquinchi. Quiquinga ali gentecuna sufrijujta ricushpaca llaquiringuimi. Taita Dioscarin ashtahuanmi llaquirin. ¿Imashinata chaitaca yachanchi?

13 Bibliapica yachachinmi: “Taita Diosca, ninandapacha juyajmi” can nishpa (1 Juan 4:8). Taita Diosca juyaimandami tucuita ruran. Pai ñucanchita juyashcamandami, ñucanchipash juyanchi. Yuyapai, quiquin poderta charishpaca ¿nacha gentecunapa llaquicunata, nali ruraicunata tucuchinguiman? Gentecunata juyaimandaca tucuchinguimanmi. Diosca poderta charimanda, ñucanchita juyaimandami tucui llaquicunata, nali cosascunatapash tucuchinga. Cai libropa callari paginacunapica Taita Dios imatalla ruranatami ricurcanchi. Chaicunataca tucuitami pactachinga. Shinapash, tucui shunguhuan confiangapaca Taita Diostami ashtahuan rijsina canchi.

 TAITA DIOSCA PAITA RIJSICHUNMI MUNAN

Pipash quiquinba ali amigo cachun munashpaca ¿nachu quiquinba shutitara villangui? Taita Diosca Bibliapimi paipa shutita villan

14. a) Taita Diosca ¿ima shutita can? b) ¿Imamandata Diospa shutipi parlana capanchi?

14 Pipash quiquinba ali amigo cachun munashpaca ¿imatata rurangui? ¿Nachu shutitara villangui? Diosca ¿shutita charinllu? Ashtaca religiongunaca Diospa shutica “Taita Dios” o “Mandaj Dios” can nishpami yachachin. Shinapash cai shimicunaca na shuticuna canllu. Cashna nishpaca “presidente” o “alcalde” nishpa parlajui cuendallami can. Bibliapica Diospa shutica Jehovami can ninmi. Chaimandami, Salmo 83:18​pi Traducción del Nuevo Mundo Bibliapica nin: “Gentecuna yachachun, canba shuti Jehová cajta, canllami tucui Alpamanda Ashtahuan Jatun Dios cangui” nishpa. Bibliata escribijcunaca 7 mil yalimi Diospa shutitaca Bibliapi churashca. Jehová Diosca paipa shutita yachachun, paipa shutipi parlachunmi munan. Paipa ali amigo tucuchunmi ñucanchimanga paipa shutita villashca.

15. Diospa shutica ¿imata ningapaj munan?

15 Diospa shutica Jehovami can. ¿Imata ningapaj munan? Tucui paipa nishcacunata, paipa munaita tucuita pactachina cashcatami ningapaj munan. Chaitaca imapash na  jarcai ushanllu. Chaimandami Jehová Dioslla chai shutitaca charina can. *

16, 17. Jehová Diostaca ¿imamandata: a) “Tucui Ushaita Charij Dios” nin? b) “Causaita causaicaman Jatun Mandaj” nin? c) “Tucuita Ruraj Dios” nin?

16 Imashinami ricurcanchi Salmo 83:18​pica [NM] ninmi: “Canllami tucui Alpamanda Ashtahuan Jatun  Dios cangui” nishpa. Apocalipsis 15:3​pipash ninmi: ‘Tucui Ushaita Charij, Mandaj Taita Dios, can rurashcacunaca juyailla ricunayaimi. Imatapash cashcatapacha ruraj, na llullami cangui. Canllami, canballa causajcunataca, Jatun Mandaj cangui’ nishpa. “Tucui Ushaita charij” nishpaca ¿imatata ningapaj munan? Paihuan igual ushaitaca ni pipash na charishcatami ningapaj munan. 1 Timoteo 1:17​pica ninmi: “Causaita causaicaman Jatun Mandaj” Diosmi cangui nishpa. Imashinami ricunchi Jehová Diosca siempremi tiashca. Salmo 90:2​pipash ninmi: “Na tucurina causaita causaicamanbash, canmi Taita Dios cangui” nishpa. Chaita yachashpaca ninandami cushijunchi.

17 Jehovallami Tucuita Ruraj Dios can. Apocalipsis 4:11​pica ninmi: ‘Jatun Dioslla, canmi tucui imatapash  rurashcangui. Can munashcamanda rurashcami tucui tian. Chaimandami canga, ninan punchapamba tiajunata, ninanda alicachi tucunata, ninan ushaihuan tiajunata chasquinapacha cangui’ nishpa. Jehovami angelcunata, estrellacunata, frutacunata, pescadocunatapash rurashca.

¿JEHOVAPA AMIGO TUCUITA USHANGUICHU?

18. Huaquingunaca ¿imatata Taita Diosmandaca nin? ¿Imatata Bibliapica yachachin?

18 Huaquingunaca Dios imashina cajta liishpaca cashnami nin: “Taita Diosca tucui ushaita charij, tucuita yali cashcamanda, caru carupi caimandaca ñucanchitaca na llaquingachu” nishpa. Shina pensachunga Taita Diosca na munanllu. Chaipa randica ñucanchita ayudangapami munan. Bibliapica ninmi: “Paica, ñucanchimandaca na carupi canllu” nishpa (Hechos 17:27). Jehová Diosca paiman quimirichunmi munan. Shinami paipash ñucanchiman quimiringa (Santiago 4:8).

19. a) Jehovapa amigo cangapaca ¿imatata rurana capangui? b) Jehovamandaca ¿imatata ashtahuan alicachipangui?

19 Jehovapa amigo cangapaca ¿imatata rurana cangui? Jesusca nircami: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nishpa (Juan 17:3). Bibliata yachajushpallami Jehovata ashtahuan rijsita ushangui. Caicamanga “Taita Diosca juyajpacha” cashcatami yachajushcanchi (1 Juan 4:16). Bibliapica ninmi: Jehová Diosca ali, ‘na ñapash fiñarij, ninanda llaquij, na llullaj’ juyaj Diosmi can nishpa (Salmo 86:15). Jehová Diosca ‘ali Dios, nalita rurashcatapash cungaj Diosmi’ can (Salmo 86:5). Jehová Diosca tucuita pactachij Diosmi can (Éxodo 34:6). Bibliata liishpaca Jehová imashina cajtami ashtahuan ali rijsita ushangui.

20, 21. Jehovata na ricushpapash ¿imashinata rijsi ushanchi?

 20 Jehovata na ricushpapash ¿imashinata rijsi ushangui? (Juan 1:18; 4:24; 1 Timoteo 1:17.) Bibliata liishpami Jehovata ashtahuan ali rijsi ushangui (Salmo 27:4; Romanos 1:20). Jehovamanda yachajushpaca paita ashtahuan juyashpami paiman quimirita ushangui.

Shuj taitaca paipa huahuacunataca ninandami juyan. Jehová Dioscarin ashtahuanmi ñucanchitaca juyan

21 Jehovami ñucanchi Taita can (Mateo 6:9). Paimi ñucanchiman causaita cushca. Imashinami shuj taitaca paipa huahuacuna ali causachun munan. Shinallatami Jehovapash ñucanchi ali causachun munan (Salmo 36:9). Bibliapica ninmi, tucuicunami Jehovapa amigo tucuita ushan nishpa (Santiago 2:23). Imashinami ricunchi, Tucuita Ruraj Jehová Diosmi paipa amigo tucuchun munan.

22. Bibliata ama yachajuchun pipash jarcajpica ¿imatata rurana capangui?

22 Huaquin gentecunaca Bibliamanda yachajushpaca religionda cambianga nishpami ama yachajuchun jarcanga. Shinapash, Jehovapa amigo tucunataca ni pi na jarcachun saquinachu cangui. Jehová Diosca tucuicunamanda yali ali amigomi can.

23, 24. a) ¿Imamandata tapunalla capangui? b) ¿Imatata caishuj capitulopica yachajushun?

23 Bibliata yachajujushpaca huaquin cosascunataca na ñapash intindinguichu. Shinapash, pingaita saquishpami intindingapaj tapunalla cangui. Jesusca nircami, huahuacuna cuendami humildecuna cana canguichi nishpa. Huahuacunaca cutin cutinmi tapunajunlla (Mateo 18:2-4). Taita Diosca tucuita ali intindichunmi munan. Shinaca, ima cierto cashcata yachajungapaca Bibliatami yachajushpa catina cangui (Hechos 17:11, liipangui).

24 Jehovata ali rijsingapaca Bibliatami yachajushpa catina cangui. Caishuj capitulopica, Biblia imamanda na shuj librocunashna cajtami yachajushun.

^ par. 15 Quiquinba Bibliapi Diospa shuti na tiajpi o Diospa shuti imata ningapaj munashcata yachangapaca, página 207​pi nota 1​ta ricupangui.