1. ¿Imamandata angelcunamanda yachajuna capanchi?

JEHOVÁ DIOSCA jahua cielopi paipa familiata rijsichunmi munan. Jehovapa familiaca angelcunapashmi can. Angelcunatami Bibliapica “Diospaj churicuna” nin (Job 38:7). ¿Imatata angelcunaca ruranajun? ¿Imashinata angelcunaca punda tiempopi gentecunata ayudashca? ¿Imashinata ñucanchitapash ayudan? (Página 208​pi nota 8​ta ricupangui.)

2. Angelcunataca ¿pita rurarca? ¿Mashna angelcunata tian?

2 Angelcunataca ¿pita rurarca? Colosenses 1:16​pica ninmi: Diosca paipa Churi Jesusta rurashca jipami, ‘jahua pachapi, cai pachapi ima tiashcacunatapash rurarca’ nishpa. Shinaca, angelcunataca Jehovami rurarca. ¿Mashna angelcunata tian? Bibliapi nishca shinaca, ashtaca millón angelcunami tian (Salmo 103:20; Apocalipsis 5:11).

3. Job 38:4-7​pica ¿imatata angelcunamandaca yachachin?

3 Bibliapica ninmi, Jehová Diosca cai Alpata nara rurashpallatami angelcunata rurarca nishpa. Cai Alpata Jehová rurajpica ¿imashinashi angelcunaca sintirishcanga? Job libropica, angelcunaca ninanda cushijushpami shujlla familia shina Jehovata sirvinajurca ninmi (Job 38:4-7).

ALI ANGELCUNACA JEHOVATA SIRVIJCUNATA CUIDANMI

4. Ali angelcunaca ¿imatata ruranajun?

4 Angelcunaca Jehovapa munai cai Alpapi pactarichun, gentecuna ali cachunmi ricunajushca (Proverbios 8:30, 31; 1 Pedro 1:11, 12). Adanbash, Evapash Diosta na cazujpica angelcunaca ninandami llaquirishcanga. Cunanbi casi tucui  gentecuna Diosta na cazujpicarin angelcunaca ashtahuanmi llaquirin. Shinapash, pipash arripintirishpa Diosman tigrajpica ninandami cushijun (Lucas 15:10). Ali angelcunaca Jehovata sirvijcuna cushilla, ali cachunmi munan. Chaimandami, Jehová Diosca paipa sirvijcunata cuidachun, ricuriachun paipa ali angelcunata churashca (Hebreos 1:7, 14). Huaquin ejemplocunata ricushun.

“Ñuca Taita Diosca, paipaj angeltami cachamurca. Paimi, leonguna ñucata ama imatapash rurachunga, shimita vicharca” (Daniel 6:22).

5. Angelcunaca ¿picunatallata punda tiempopica ayudarca?

 5 Jehová Diosca Sodoma, Gomorra llactacunata tucuchigrijushpaca, Lotta paipa familiatapash salvachunmi ishcai angelcunata cacharca (Génesis 19:15, 16). Ashtaca huatacuna jipaca, profeta Danielta leonguna tiaj utujupi shitajpipash leongunaca na imatapash rurarcachu. ‘Taita Diosca paipa angeltami cacharca. Paimi leonguna ama imatapash rurachun shimita vicharca’ (Daniel 6:22). Jipa huatacunamanga carcelmanda apóstol Pedrota llujchichunmi Jehová Diosca shuj angelta cacharca (Hechos 12:6-11). Angelcunaca Jesustapashmi cai Alpapi cajpica ayudarca. Jesús bautizarishca jipaca ‘angelcunami Jesustaca sirvinajurca’ (Marcos 1:13). Shinallata, Jesuspa huañuna punlla ña chayamujujpipash “jahua pachamanda shuj ángel ricurishpami shinllichirca” (Lucas 22:43).

6. a) Jehovata sirvijcunataca ¿imashinata cunanbipash ali angelcunaca cuidajun? b) ¿Ima tapuicunatata yachajugrinchi?

6 Cunanbica angelcunataca na ricui ushanchichu. Shinapash, cunangamanmi Jehová Diosca angelcunahuan paita sirvijcunataca ayudan. Bibliapica ninmi: “Mandaj Diosta manllajcunataca, paipaj angelmi muyundipi cuidashpa mitsajun” nishpa (Salmo 34:7). ¿Imamandata cuidachun minishtinchi? Nali, millai contracunatami charinchi. Chai contracunaca ¿picunata can? ¿Maimandata shamun? ¿Imashinata ñucanchita llaquichin? Caicunata yachangapaca Adanda, Evata rurashca jipa ima tucushcata ricushun.

NALI ANGELCUNACA ÑUCANCHITA LLAQUICHINMI

7. Diabloca ¿imatata pundamandapacha rurajushca?

7 Capítulo 3​pica, shuj ángel Diospa contra tucushpa, pai mandangapaj munashcatami yachajurcanchi. Chai angeltami Bibliapica Satanás Diablo nin (Apocalipsis 12:9). Diabloca shujcunapash Jehovapa contra tucuchunmi  munarca. Pundapica Evata, jipaca ashtaca gentecunatami pandachishpa catishca. Shinapash Abel, Enoc, Noeca tucui shunguhuanmi Jehovata sirvirca (Hebreos 11:4, 5, 7).

8. a) Huaquin angelcunaca ¿imata rurashpata ayacuna tucurca? b) Manllanai tamiapica ¿imashinata ayacunaca salvarirca?

8 Noepa punllacunapipash huaquin angelcunaca Taita Diospa contrami tucurca. Paicunaca cielopi causanata saquishpami aichayu, tulluyu tucushpa cai Alpaman shamurca. ¿Imapata shamurca? Cai Alpapi huarmicunahuan cazarangapaj munashpami shamurca (Génesis 6:2, liipangui). Chaica jatun nalimi carca (Judas 6). Chai nali angelcuna shinami chai tiempopi gentecunaca nali, millaicuna tucurca. Chaimandami, Jehová Diosca manllanaita tamiachishpa chai nali gentecunata tucuchirca. Shinapash, paita sirvijcunataca salvarcami (Génesis 7:17, 23). Cutin nali angelcunaca aichayu, tulluyu cuerpota saquishpami cieloman tigrashpa salvarirca. Paicunatami Bibliapica ayacuna o demoniocuna nin. Shinami, Diablopa lado tucujpi paicunataca Diablo mandai callarirca (Mateo 9:34).

9. a) Nali angelcuna cieloman tigrajpica ¿imata tucurca? b) ¿Imatata ashtahuan yachajugrinchi?

9 Nali angelcuna Jehovapa contra tucushcamandami caishuj ali angelcunahuan familia cuenda causachunga Diosca ñana saquirca (2 Pedro 2:4, NM). Cunanbica chai nali angelcunaca aichayu, tulluyu cuerpotaca ñana chari ushanllu. Shinapash, chai nali angelcunaca ‘tucui cai alpapi causajcunata umachinajunrami’ (Apocalipsis 12:9; 1 Juan 5:19). Chai nali angelcuna o ayacuna ashtaca gentecunata imashina umachinajujta yachajushun (2 Corintios 2:11, liipangui).

AYACUNACA ¿IMASHINATA UMACHINAJUN?

10. Ayacunaca ¿imahuanda gentecunataca umachin?

10 Ayacunaca imacunahuanda gentecunataca umachin.  Gentecunaca paicunallatami brujocunapaman, yumbucunapaman rishpa ayacunapa ayudata mascan. Ayacunapa ayudata mascanaca espiritismo nishcami can. Bibliapica ninmi, ayacunapa ruraicunamandaca caruyanapachami canguichi nishpa (Gálatas 5:19-21). ¿Imamandata ayacunapa ruraicunamandaca caruyana canchi? Imashinami gentecunaca animalcunata japingapaj shuj shuj trampacunata churan, shinallatami ayacunaca ñucanchita imacunahuanbash umachin. (Página 221​pi nota 26​ta ricupangui.)

11. a) Jipa punlla ima pasanata yachangapaca ¿imatata gentecunaca ruran? b) ¿Imamandata chai ruraicunamanda caruyana capanchi?

11 Ayacunaca ¿ima ruraicunahuanda gentecunataca umachin? Ashtaca gentecunaca jipa punllacuna ima pasanata yachangapami munan. Chaimandami cuyicunapi ricuchin, maquipi ricuchin, barajacunapi, espermapi ricuchin. Cai ruraicunataca ashtaca gentecunaca alicachishpami ricun. Shinapash chai ruraicunaca napacha ali canllu. Bibliapi nishca shinaca, brujocuna jipa punlla ima pasanata yachachunga ayacunami ayudan. Shuj ejemplota ricushun. Hechos 16:16-18​pica shuj cuitsamandami parlan. Chai cuitsaca ‘imatapash yachaj aya’ ayudajpimi ima pasanata gentecunamanga villajurca. Apóstol Pablo chai cuitsamanda ayata llujchijpica, chai cuitsaca jipa punllacunapi ima pasanataca ñana villai usharcachu.

12. a) ¿Imamandata huañushcacunahuan parlanaca nali can? b) Jesusta ali catijcunaca ¿imacunapita ñana chapurin?

12 ¿Imashinata ayacunaca gentecunata ashtahuan umachin? Ayacunaca huañushcacuna maipipash causashpa catijta, paicuna parlajta o ñucanchita llaquichijta crichunmi munan. Chaimandami, huaquin gentecunaca shuj amigo o shuj familia huañujpica, paicuna imashina cajta yachangapaj brujopaman rin. Brujocunaca ayacuna ayudajpimi huañushca amigomanda, familiamandaca imacunatapash  nin. Shinallata huañushcacunashnapacha parlashpami gentecunataca umachin (1 Samuel 28:3-19). Cutin, ashtaca gentecunaca huañushcacuna maipipash causashpa catijtami crin. Chaimandami, pipash huañujpica veloriocunapi yanga costumbrecunata catishpa imacunatapash ruran. Ofrendacunata churan, misachin, rezachin, responsota saquingapaj rin, micunacunata apan. Jesusta ali catijcuna chai costumbrecunata na catijpica, familiacuna o comunidadpi gentecunaca huasha riman, plitun, huaquinbicarin parlangapallapash na munanllu. Shinapash, Jesusta ali catijcunaca huañushcacuna maipipash causashpa catijtaca na crinllu. Huañushcacunaca imatapash ñana rurai ushanllu (Salmo 115:17). Chai panda crishcacunamandaca cuidarinapachami canchi. Huañushcacunahuanga na parlaita ushanchichu. Ayacunapa ruraicunapica nimamanda na chapurinachu canchi (Deuteronomio 18:10, 11, liipangui; Isaías 8:19).

13. Ayacunata manllashpa causashcacunaca ¿imatata rurashca?

13 Ayacunaca gentecunata umachin, imacunahuanbash manllachinmi. Diablopash, paipa ayacunapash Jehová Dios paicunata tucuchina “punllacuna tucurijujta yachashpami”, ninanda culirashpa cunanbica imacunahuanbash ashtahuan llaquichijun (Apocalipsis 12:12, 17). Shinapash, ashtaca gentecunaca ayacunata manllashpa causashca cashpapash, chai manllaita mishai ushashcami. Chaipaca ¿imatata rurashca?

AYACUNA AMA UMACHICHUNGA ¿IMATATA RURANA CANCHI?

14. Éfeso llactapi Jesusta ali catijcunamandaca ¿imata yachajunchi?

14 Bibliapica yachachinmi, ayacunapa ruraicunamanda imashina cuidarinata, imashina caruyanatapash. Éfeso llactamanda huaquin gentecunaca Jesusta nara catishpaca, ayacunapa cosascunata rurashpami causanajurca. Chai ruraicunata  saquingapaca ¿imatata rurarca? Bibliapica ninmi: “Taucacunami, yumbu [o, brujo] tucungapaj yachajuna librocunata apamushpa, tucuicunapaj ñaupajpi rupachinajurca” nishpa (Hechos 19:19). Paicunaca Jesusta ali catingapami brujo tucungapaj librocunataca tucuillata rupachirca. Cunanbipash paicunapa ejemplota catishpami Jehovata sirvingapaca, ayacunapa ruraicunataca tucuita saquina canchi. Ayacunamanda o brujeriamanda parlaj librocunata, revistacunata, horóscopo nishcacunata, peliculacunata, musicacunata, pugllaicunata, brujeriata, magiata alicachishpa ricuchij cartelcunata o shuj cosascunatapash ñana charinachu canchi. Shinallata nalicunamanda cuidachun nishpa imacunatapash charinaca na alichu can (1 Corintios 10:21NM).

15. Diablo ama umachichunga ¿imatata rurana capanchi?

15 Éfeso llactamanda Jesusta catijcuna brujería librocunata rupachishca huaquin huatacuna jipaca, apóstol Pabloca nircami, paicunaca ‘nalita rurachij, ushaita charij ayacunahuanmi macanajushpa’ catinara can nishpa (Efesios 6:12). Éfeso llactamanda Jesusta catijcuna brujería librocunata rupachishca cajpipash ayacunaca paicunata llaquichingapaj munarcarami. Shinaca, Jesusta catijcunaca ¿imatata rurana carca? Apóstol Pabloca nircami: “Alipacha crinatami jarcarina escudotashna japina canguichi. Chaihuanmi, nalicunata yarichij diablo flecha pundapi ninata japichishpa shitamushcataca huañuchi ushanguichi” nishpa (Efesios 6:16). Imashinami shuj soldado ama huañuchichun paipa escudopi pacajun, shinallatami ñucanchi fepash ayudan. Ñucanchicuna Jehová Diospi tucui shunguhuan confiashpaca Diablopash, ayacunapash umachichunga na saquishunllu (Mateo 17:20).

16. Jehovapi ashtahuan feta charingapaca ¿imatata rurana capanchi?

16 Jehová Diospi ashtahuan feta charingapaca ¿imatata rurana canchi? Bibliatami cada punlla liina canchi. Jehová  ñucanchita cuidanatapash confianami canchi. Chaica Diablopash, ayacunapash na llaquichita ushangachu (1 Juan 5:5).

17. Ayacunamanda Jehová cuidachunga ¿imatata rurana canchi?

17 Éfeso llactamanda Jesusta catijcunaca ¿imatata ashtahuan rurana carca? Éfeso llactaca ayacunapa ruraicunahuan jundami carca. Chaimandami apóstol Pabloca nirca: ‘Diosta mañanataca na samashpami tucuipi mañajunalla’ canguichi nishpa (Efesios 6:18). Paicunata Jehová cuidachunmi siempre mañajunalla carca. Shinaca ¿imatata ñucanchipash rurana canchi? Cunanbipash ayacunapa nali ruraicunaca ashtahuanmi mirashca. Chaimandami, chai ruraicunapi ama urmangapaj Jehová Diosta mañariana canchi. Mañanajushpaca Diospa shutitami nina canchi (Proverbios 18:10, liipangui). Diablo ñucanchita ama pandachichun Jehová Diosta mañariajpica paica ayudangami (Salmo 145:19).

18, 19. a) ¿Imashinata Diablota, ayacunatapash mishai ushashun? b) Shamuj capitulopica ¿imatata yachajushun?

18 Ayacunapa ruraicunamanda caruyashpa Jehová Diospi ashtahuan confiajpica Diablopash, ayacunapash ñucanchicunataca ñana umachingachu. Paicunataca na manllanachu canchi (Santiago 4:7, 8, liipangui). Jehová Diosca ayacunata yali podertami charin. Noepa punllacunapica ayacunata castigarcami. Shamuj punllacunapicarin ayacunataca tucuchishpami saquinga (Judas 6). Shinaca Jehová paipa ali angelcunahuan ñucanchita cuidajujtaca na cunganachu canchi (2 Reyes 6:15-17). Jehovapa ayudahuanga Diablota, ayacunatapash mishai ushashunmi (1 Pedro 5:6, 7; 2 Pedro 2:9).

19 Shinaca Diablopash, ayacunapash gentecunata sufrichijujpica ¿imamandata Jehová Diosca paicunataca nara tucuchishca? Cai tapuitaca shamuj capitulopimi yachajushun.