Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Jehová Diosman graciasta qosun

Jehová Diosman graciasta qosun

“Jehová Diosman graciasta qoychis, payqa sumaq sonqo Diosmi” (SAL. 106:1, NM)

1. ¿Imaraykun Jehová Diosta agradecekunanchis?

“TUKUY allin kaqkunatapas, tukuy chanin kaqkunatapas” Jehová Diosmantan chaskinchis (Sant. 1:17). Payqa munakuq michiqninchis kaspan cuidawanchis imaymana necesitasqanchistataq qowanchis (Sal. 23:1-3). Astawanqa llaki phutiypi tarikushaqtinchismi ‘pakaykuwanchis kallpachaykuwanchispas’ (Sal. 46:1). Chaymi paytaqa sonqomanta agradecekunanchis. Salmista hinan nisunman: “Jehová Diosman graciasta qoychis, payqa sumaq sonqo Diosmi, munakuyninqa wiñaypaqmi”, nispa (Sal. 106:1, NM).

2015 watapaq texto: Jehová Diosman graciasta qoychis, payqa sumaq sonqo Diosmi (Salmo 106:1)

2, 3. a) ¿Imapin tarikusunman mana agradecekuq kaspa? b) ¿Ima tapuykunatan kay estudiopi kutichisun?

2 Biblian willarqanña tukukuy p’unchaykunapi runakuna mana agradecekuq kanankumanta (2 Tim. 3:2). Chaymi bendicionkuna chaskisqankumanta mana gracias ninkuchu. Hinaspapas vendeqkuna imaymanata munachisqankuraykun chaykunata rantinankupaq tukuy  imata ruwanku, manataq ima kaqninkuwanpas contentakunkuchu. Chaykunawanmi ñoqanchispas samaykachikusunman, chaymi t’aqwikunanchis agradecekuqchus kanchis icha manachus chayta. Mana cuidakuspaqa Israel runakuna hinan Dioswan amigontin kasqanchista mana valorasunmanchu, bendicionkuna chaskisqanchismantapas mana gracias nisunmanchu (Sal. 106:7, 11-13).

3 Hinaspapas sasachakuykunapi tarikuspan bendicionkuna chaskisqanchista mana yuyarisunmanchu (Sal. 116:3). Chhaynaqa, ¿imatan ruwasunman agradecekuq kananchispaq? ¿Iman yanapawasun sasachakuykunapi tarikuspapas kusisqalla kananchispaq? Kay estudiopin chaykunata yachasun.

JEHOVÁ DIOSQA IMAYMANATAN RUWARQAN

4. ¿Imatan ruwananchis agradecekuq kananchispaq?

4 Agradecekuq kanapaqqa Jehová Diosmanta chaskisqanchis bendicionkunapin yuyaykunanchis. Hinamantaq yuyaykunanchis imaynata chay bendicionkuna Diospa munakuyninta rikuchiwanchis chayta. Salmistapas chay hinatan yuyaymanarqan, chaymi sinchitapuni admirakurqan payrayku Diospa musphana ruwasqankunamanta (leey Salmo 40:5; 107:43).

5. ¿Imakunatan ruwananchis apóstol Pablo hina agradecekuq kananchispaq?

5 Apóstol Pabloq ruwasqanmantan yachasunman agradecido kayta. Payqa bendicionkuna chaskisqanpi yuyaymanaspan tukuy sonqonwan Diosman graciasta qorqan. Manaraq cristiano kashaspan ‘Jesucristota pisichaspa millaytapuni k’amirqan, paypi iñiqkunatapas ñak’arichispa qatiykacharqan’. Chaywanpas Jehová Diospa Jesuspa khuyapayasqanraykun huk sumaq llank’anayoq karqan, chaymi anchatapuni agradecekurqan (leey 1 Timoteo 1:12-14). Hinaspapas Pabloqa anchatapunin iñiqmasinkunata munakurqan, chaymi Jehová Diosman graciasta qorqan sumaq sonqoyoq kasqankumanta sumaqta  llank’asqankumantawan (Filip. 1:3-5, 7; 1 Tes. 1:2, 3). Chaymantapas sasachakuykunapi tarikuqtinmi iñiqmasinkuna yanaparqan, chaykunamantan Jehová Diosta agradecekurqan (Hech. 28:15; 2 Cor. 7:5-7). Chaymi iñiqmasinkunata kallpacharqan: ‘Salmokunata, yupaychana espiritual takikunata takiychis, Diosman tukuy sonqo graciasta qoychis’, nispa (Col. 3:15-17).

MAÑAKUYWAN YUYAYMANAYWANMI YANAPAWASUN

6. ¿Ima bendicionkunamantan Jehová Diosman graciasta qonki?

6 ¿Imaynatan Pablo hina agradecekuq kasunman? Ñoqanchisrayku imakunatachus Jehová Dios ruwasqanpi yuyaymanaspan (Sal. 116:12). Sichus pipas tapusunkiman bendicionkuna chaskisqaykimanta, ¿imakunatan niwaq? Yaqapaschá niwaq Jehová Dioswan amigontin kasqaykimanta, huchaykikuna pampachasqa kananpaq Cristoq sacrificakusqanmanta, sasachakuypi tarikushaqtiyki iñiqmasiykikunaq yanapasqasuykimanta, wawaykikunamanta, esposaykimanta otaq qosaykimanta. Rikusqanchis hina Diosmanta bendicionkuna chaskisqanchisqa mana tukurikuqmi. Chaymi tiempota hap’inanchis chaykunapi yuyaymanananchispaq. Chay hinapin sapa p’unchay Jehová Diosman graciasta qosun (leey Salmo 92:1, 2).

Ana hina Ezequías hina ñoqanchispas Jehová Diosman graciasta qosun, tukuy imaymanata ñoqanchisrayku ruwasqanmanta

7. a) ¿Imaraykun Diosta gracias ninanchis? b) ¿Imapin yanapawanchis Diosman graciasta qosqanchis?

7 Llapa bendicionninchiskunapi yuyaymanaspaqa Jehová Diosmanmi graciasta qosun mañakuyninchispi (Sal. 95:2; 100:4, 5). Askha runakunan Diosmanta yuyarikunku imatapas mañakunallankupaq, ñoqanchismi ichaqa imapas qowasqanchismanta gracias ninanchispaq paywan parlarinchis, chhaynapi payta kusichinanchisrayku. Biblian willan sonqoman chayaq mañakuykunamanta. Chaykunan Anaq mañakusqan, Ezequiaspa mañakusqanpas, paykunaqa tukuy sonqomantan Jehová Diosta agradecekurqanku (1 Sam. 2:1-10; Is. 38:9-20). Paykuna hina ñoqanchispas Jehová Diosman graciasta qosun tukuy imaymanata ñoqanchisrayku ruwasqanmanta (1 Tes. 5:17, 18). Chhaynapin kallpachasqa kasun, Diosta astawan munakusun astawantaq payman asuykusun (Sant. 4:8).

¿Ima bendicionkunamantan Jehová Diosta agradecekunki? (6, 7 parrafokunata qhaway)

8. ¿Imaynapin mana agradecekuq runaman tukupusunman?

8 Mayninpiqa yaqapaschá ñoqanchisrayku Jehová Diospa ruwasqankunata mana valorasunmanchu, hinaspa mana agradecekuq runaman tukupusunman. ¿Imaynapin chay pasawasunman? Pantaq runakuna kasqanchisraykun.  Ñawpa taytanchiskunaqa munay paraisopin tiyarqanku mana ima sasachakuyniyoq, wiñaypaqtaq kawsananku karqan (Gén. 1:28). Ichaqa manan chaykunata valorarqankuchu, astawan munaspankutaq mana imayoq qhepakapurqanku (Gén. 3:6, 7, 17-19). Kunan tiempopi runakunapas mana agradecekuqmi kanku, chaykunan samaykuwasunman hinaspa ñoqanchisrayku Diospa ruwasqankunata mana valorasunmanchu. Yaqapaschá mana valorasunmanchu Dioswan amigontin kasqanchista otaq Diospa llaqtanmanta kasqanchista, hinaspa kay pacha runakuna hina kapusunman (1 Juan 2:15-17). Chaykunapi ama urmanapaqqa bendicionninchiskunapin yuyaymanananchis Jehová Diosmantaq graciasta qonanchis paypa llaqtanpi kasqanchismanta (leey Salmo 27:4).

SASACHAKUYKUNAPI TARIKUSPA

9. ¿Imaraykun llakipi tarikuspa bendicionkuna chaskisqanchispi yuyaymanananchis?

9 Agradecekuq kayqa sasachakuykunata aguantanapaqmi yanapawasun. Sinchi llakisqan tarikusunman casado kawsaypi wasanchay kaqtin, onqosqa kaspa, munakusqanchis runa wañupuqtin otaq pacha chhaphchiy kaqtin. Chay hinapi tarikuspaqa bendicionkuna chaskisqanchispi yuyaymanaymi sonqochawasun kallpachawasunpas. Yachasun wakin iñiqmasikunaq chay hinapi tarikusqankumanta.

10. ¿Imaynatan Irinata yanaparqan bendicionkuna chaskisqanpi sapa p’unchay yuyaymanasqan?

10 Irina * iñiqmasin Estados Unidos nacionmanta precursora. Qosanmi iñiq t’aqapi umalli kashaspa huk warmiwan pantarqan, hinan 3 wawantinta wikch’urparirqan. ¿Iman yanaparqan tukuy sonqonwan Jehová Diosta servishanallanpaq? Paymi nin: “Anchatan Jehová Diosta agradecekuni cuidawasqanmanta. Sapa p’unchaymi yuyaymanani bendicionkuna chaskisqaypi, chaypin rikuni munakuq taytayoq kasqayta, payqa manan hayk’aqpas wikch’urpariwanqachu”, nispa. Sinchi llakipiña tarikuspapas Irina iñiqmasiqa bendicionkuna chaskisqanpi yuyaymanaspan kusisqalla kashan. Chaymi yanapan sasachakuyninta aguantananpaq hukkunata kallpachananpaqpas.

11. ¿Iman Kyung-sook iñiqmasita yanaparqan onqoyninta aguantananpaq?

11 Asia ladomanta Kyung-sook iñiqmasin qosanwan kuska 20 wata precursora karqan. Huk p’unchaymi ichaqa yacharqorqan pulmonninpi cáncer hap’isqanta hinaspa 3 otaq 6 killamanta wañupunanta. Manan hayk’aqpas chhayna llakipiqa tarikurqanchu. Paymi nin: “Sinchi llakisqa, manchasqan kasharqani. Yanqapaqñapas kawsashayman hinan sientekurqani”, nispa.  ¿Iman yanaparqan ama pisipananpaq? Paymi nin: “Sapa tutanmi Diosmanta mañakuni. Chaypin kunkawan agradecekuni chay p’unchaypi 5 allinkuna pasawasqanmanta. Chaymi thak-kayta qowan astawantaq Diosta munakuni”, nispa. ¿Imaynatan chay hina ruwasqan yanapan? Paymi nillantaq: “Kunanraqmi reparani kawsayninchispiqa mana sasachakuykunallachu kasqanta, aswanpas askha bendicionkuna kasqanta. Jehová Diosqa sasachakuykuna aguantananchispaqmi yanapawasun”, nispa.

Sheryl turachan Johnwan (13 parrafota qhaway)

12. ¿Iman Jason iñiqmasita yanapan esposanpa wañukapusqanmanta ama llakisqalla kananpaq?

12 Jason iñiqmasin África sucursalpi llank’an 30 watataq tukuy tiemponwan Diosta servishan. Paymi willakun: “Esposaypa wañukapusqanmantaqa 7 watañan pasarqon. Cáncer onqoywan ñak’arisqanmi sinchita llakichiwarqan”, nispa. ¿Iman yanaparqan ama llakisqalla kananpaq? Paymi nin: “Huk kutinmi yuyarirqani esposaywan sumaq pasasqaykuta. Chaymi Diosta agradecekurqani hinaspan thak sientekurqani. Chaymantapachan esposaywan kusisqa kawsasqaykuta yuyarispa Diosman graciasta qoni. Llakikuniraqmi esposaypa wañupusqanmanta ichaqa manañan ñawpaqpi hinañachu. Casarasqa kashaspayqa kusisqan kawsarqani, Diosta munakuq esposayoqmi karqani, chaykunamantan Diosta agradecekuni”, nispa.

“Maytan agradecekuni Jehová Dios ñoqawan kasqanmanta” (Sheryl)

13. ¿Iman Sheryl sipaschata yanaparqan mana familiayoq rikukapuqtin?

13 2013 watapin sinchi wayra lamar-qochamanta Filipinas nacionman unuta apaykurqan. Chaymi Sheryl sipascha 13 watallanpiraq mana imayoq rikukapurqan. Paymi nin: “Mana wasiyoq mana familiayoqmi rikukapurqani”, nispa. Chaypin tayta-maman, 2 ñañachankuna huknin turachanpiwan wañupurqanku. ¿Iman chay sipaschata yanapan llakikuyninta atipananpaq?  Bendicionkuna chaskisqanmanta agradecekusqanmi. Paymi nin: “Jehová Diospa llaqtanmi tukuy imata ruwarqan yanapawanankupaq kallpachawanankupaqpas. Tukuyneqpi iñiqmasikunan ñoqarayku Diosmanta mañakusharqanku”, nispa. Nillantaqmi: “Maytan agradecekuni Jehová Dios ñoqawan kasqanmanta. Payqa tukuy necesitasqanchistan qowanchis”, nispa. Paypa nisqan hina, bendicionkuna chaskisqanchismanta agradecekuymi yanapawasun sinchi llakipi tarikuspa ama pisikallpayanapaq (Efes. 5:20; leey Filipenses 4:6, 7).

JEHOVÁ “DIOSWANMI KUSIKUSAQ”

14. ¿Ima sumaq bendicionkunan ñoqanchispaq kashan? (3 paginapi dibujota qhaway.)

14 Jehová Diosqa ñawpa tiempomantapachan llaqtanta bendecirqan, paykunataq agradecekurqanku. Hukninmi karqan Israel llaqtata Puka lamar-qochapi faraonmanta soldadonkunamantawan salvaqtin. Chaymi Israel llaqtaqa agradecekuspa takikunata Diospaq kusisqa takipurqanku (Éx. 15:1-21). Kunan tiempopipas Jehová Diosqa askha bendicionkunatan qowanchis, hukninmi pisi tiempollamanta llakikuyninchiskunaq tukukapunanta yachasqanchis (Sal. 37:9-11; Is. 25:8; 33:24). May munaychá kanqa Jehová Dios lliw enemigonkunata tukuchispa mosoq pachapi chaskiwaqtinchisqa. Chaypiqa chanin kay, thak-kaymi kanqa. ¡Maytaraqchá Diosninchistaqa gracias nisunchis! (Apo. 20:1-3; 21:3, 4.)

Pisi tiempollamanta llakikuyninchiskunaq tukukapunanta yachayqa huk bendicionmi

15. ¿Imatan ruwananchis 2015 watapi?

15 2015 watapipas sumaq bendicionkunatachá chaskikusun ichaqa kanqachá sasachakuykunapas. Ichaqa Jehová Diosmi yanapawasunchis, payqa manan saqerpariwasunchu, tukuy necesitasqanchistan qowasun hunt’aq sonqowan servishanallanchispaq (Deut. 31:8; Sal. 9:9, 10). Chaymi ñoqanchispas profeta Habacuc hina kananchis. Paymi nirqan pisi mikhunayoqña kaspapas, hatun sasachakuykunapiña tarikuspapas Jehová Diospa yanapananta suyakuspa kusisqalla kananta (Hab. 3:17, 18). Chhaynaqa bendicionkuna chaskisqanchispi yuyaymanasun, kay 2015 watapaq textoq nisqantataq kasukusun: Jehová Diosman graciasta qoychis, payqa sumaq sonqo Diosmi (Sal. 106:1).

^ par. 10 Wakin sutikunaqa cambiasqan kashan.