Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

¿Cambiawaqchu decidisqaykita?

¿Cambiawaqchu decidisqaykita?

COLEGIOPIN wayna-sipaskuna película qhawasqankumanta allinta rimashanku. Chaymi wayna-sipas testigokunapas qhawaq rinankupaq decidikurqanku. Cineman chayaspankun ichaqa letrerokunapi rikunku armakunata, pisi p’achallayoq warmikunata ima. ¿Imatan chay wayna-sipaskuna ruwananku? ¿Hinachu chay peliculata qhawananku?

Chaymi rikuchiwanchis sapa p’unchay decidinanchis kasqanta, decidisqanchisman hinataqmi Jehová Dioswan allinpi otaq mana allinpipas tarikusun. Yaqapaschá ima ruwanapaqpas decidirqanchis ichaqa allinta yuyaykuspa manaña ruwapurqanchischu. ¿Allinchu chay hinata cambiasqanchis icha manachu?

 ¿Ima decidisqaykitan mana cambianaykichu?

Jehová Diosta munakuspan payllapaqña kawsanapaq decidikurqanchis. Chaymi hunt’aq sonqowan servinanchispaq prometekuspa bautizakurqanchis, chayman hinataqmi kawsayta munanchis. Saqran ichaqa Diosman prometekusqanchista p’akiytapuni munan (Apo. 12:17). Jehová Diosta servinanchispaqmi decidikurqanchis, sichus cambiasunman chayqa wiñaypaqmi wañupusunman.

Ñawpa tiempopin Babilonia llaqtamanta rey Nabucodonosor, qorimanta hatun idolota ruwachirqan. Kamachirqantaq chay idolota yupaychanankupaq mana hinaqa rawrashaq hornoman wikch’uykusqa kanankuta. Diosta serviq kinsa waynakunan ichaqa reyta mana kasukurqankuchu, wañunankuña kaqtinpas paykunaqa Diospaq hunt’aqllapunin kayta munarqanku. Paykunan karqanku Sadrac, Mesac Abednego. Chaymi reyqa rawrashaq hornoman wikch’uychirqan, ichaqa Jehová Diosmi paykunata salvarqan (Dan. 3:1-27).

Danielpas manan cambiarqanchu Diosta yupaychananpaq decidisqanta. Payqa yacharqanmi Diosman mañakushaqta rikuqtinkuqa leonkunaq t’oqonman wikch’uykunanku kasqanta. Chaywanpas payqa manan saqerqanchu kinsa kutita p’unchaypi Diosman mañakuyninta. Chhayna hunt’aq sonqo kasqanraykun Diosqa “leonkunaq mikhunanmanta qespichirqan” (Dan. 6:1-27).

Kay tiempopi Diosta serviqkunapas manan cambiankuchu Jehová Diosman promesa ruwasqankuta. Chaymi rikukun África ladomanta wayna-sipas testigokunawan. Paykunan bandera napaykuyta mana munarqankuchu chayraykun escuelankumanta qarqosqa kananku karqan. Ministro de Educación chay llaqtata visitaqtinmi chay wayna-sipaskunaqa respetowan rimarqanku imarayku bandera mana napaykusqankumanta. Chaymantapachan escuelankupiqa manaña chay hina sasachakuykunapi tarikurqankuchu.

Joseph iñiqmasipas sinchi sasachakuypin tarikurqan qonqayllamanta esposan wañupuqtin. Paypa familianqa respetarqanmi iñiyninta, esposanpa familianmi ichaqa mana, chaymi costumbrenkuman hina p’ampanankuta munarqanku. Paymi nin: “Diosta phiñachiq ruwaykunatan ruwayta munarqanku mana munaqtiytaq wawaykunata mat’ipayarqanku, paykunapas ñoqa hinan mana munarqankuchu. Hinaspapas wasiypin velayta munarqanku ñoqan ichaqa nirqani: ‘Velaytapuni munaspaqa huk ladopi ruwamuychis wasiypiqa manan ruwankichischu’, nispa. Paykunaqa yacharqankun chay costumbrekunaqa mana iñisqayman hinachu kasqanta nitaq esposaypas chaypiqa iñirqanchu. Chaymi huk ladopi velamurqanku”, nispa.

Joseph nillantaq: “Jehová Diostan mañakurqani kallpata llapallaykuman qowanankupaq, chay hinapi kamachikuyninkunata ama p’akinaykupaq. Paytaqmi yanapawarqanku familiaykuña mat’ipayawashaqtinkupas hunt’aq sonqolla paypaq kanaykupaq”, nispa. Josephpas wawankunapas Diosta kasukunankupaq decidisqankutan manapuni cambiarqankuchu.

¿Ima decidisqaykitan cambiawaq?

32 watapin wak llaqtayoq warmi Jesusta rogakurqan ususinmanta supayta qarqonanpaq, Jesustaqmi mana kutichirqanchu askha kutitaña valekushaqtinpas. Apostolninkunamanmi nirqan: “Israel suyumanta chinkasqa ovejakunallamanmi Yayayqa kachamuwan”, nispa. Sinchita chay warmi rogakuqtintaq Jesusqa nirqan: “Manan allinchu wawakunaq t’antanta qechuspa alqokunaman qaraykuyqa”, nispa. Warmitaq paypi iñisqanrayku nirqan: “Arí, Señor. Chaywanpas alqokunaqa uywaqninkuq mesanmanta usuqkunataqa mikhunmi”, nispa. Chaymi Jesusqa chay warmiq ususinta qhaliyachirqan (Mat. 15:21-28).

Decidisqanta cambiaspan Jesusqa Jehová Dios hina ruwasharqan. Jehová Diospas Israel llaqta qori torillota yupaychaqtinkun llapankuta wañuchinanpaq yuyaykurqan. Moisés  rogakuqtinmi ichaqa chay yuyaykusqanta cambiarqan (Éx. 32:7-14). Jesuspas Jehová Diospas allinpaq kaqtinqa imachus ruwanankupaq yuyaykusqankutan cambianku.

Pablopas chay hinatan ruwarqan. Chayllaraq misionero hina viajashaqtinmi, paytawan Bernabetawan Marcosqa saqerparirqan, chaymi hukpiqa manaña pusayta munarqanchu. Qhepamanmi ichaqa chay yuyaykusqanta cambiarqan Marcospa allin ruwasqankunata qhawarispa. Chaymi Pabloqa Timoteota nirqan: “Marcosta maskhamuspayki pusamuway, payqa kusatan llank’anapi yanapawanqa”, nispa (2 Tim. 4:11).

¿Imatan chaykunamanta yachasunman? Jehová Diosqa mana pantaq Dios kashaspapas allinpaq kaqtinqa cambianmi yuyaykusqanta, chaypin rikuchin khuyapayakuq, pacienciakuq munakuq kasqanta. Ñoqanchisqa pantaq runakunallan kanchis manataqmi allintapunichu imatapas reparanchis. Chaymi pimantapas imachus yuyaykusqanchista cambiananchis kanqa imaynapi tarikusqanta astawan yachaspa.

Yaqapaschá Diospaq llank’ayninchista imayna qhawarisqanchista cambiananchis kanqa. Wakin estudiantekunaqa unayñan Bibliata estudiashanku huñunakuykunamanpas hamushanku ichaqa manan bautizakuyta decidikunkuraqchu. Wakin iñiqmasikunataq atishaspanku mana decidikunkuchu precursor kayta. Wakintaq mana kallpachakunkuchu astawan iñiq t’aqapi yanapakunankupaq (1 Tim. 3:1). Sichus qanpas chay hinapi tarikushanki chayqa, cambiawaqmi. Jehová Diosqa munanmi chay ruwaykunapi llank’aysikuspa kusisqa kanaykita.

Mayninqa imapas ruwananchispaq yuyaykusqanchista cambiayqa ancha allinpunin

África Betelpi llank’aq cristianan nin: “Chayllaraq Betelpi kashaspaqa manan yacharqanichu hayk’a tiempo qhepakunayta. Jehová Diosta tukuy atisqayta servinaypaqmi decidikurqani ichaqa familiaywan sinchi hukllachasqa kasqayraykun  llakikuq kani. Chaywanpas qhepakunaypaqmi decidikurqani compañeray kallpachawasqanrayku. 10 watañan Betelpi kashani decidisqataqmi kashani maykamapas qhepakunaypaq, chay hinapi iñiqmasiykunata servinaypaq”, nispa.

¿Ima decidisqaykitan cambianaykipuni?

Mayninqa imachus yuyaykusqanchista otaq decidisqanchistan cambiananchispuni kanqa. Yuyarisun Cainpa pasasqanta. Payqa wawqenta envidiakuspan sinchi phiñasqa kasharqan. Chaymi Diosqa nirqan: “Huchan suyapashasunki hap’irqonasuykipaq”, nispa. Ichaqa Diospa nisqanta mana uyarispan wawqenta wañuchirqan (Gén. 4:2-8).

¿Imaynan kanman karqan yuyaykusqanta Caín cambiaqtin?

Rey Uziasta sucedesqanmantapas yachallasunmantaqmi. Qallariypin Diosta kasukuq, qhepamanmi ichaqa hatunchakuqman tukupurqan. Huk kutinmi temploman haykurqan Diosman inciensota ruphachinanpaq, chaytaqa sacerdotekunallan ruwananku karqan. Sacerdotekunaqa hark’arqankun chayta ama ruwananpaq, paymi ichaqa imachus ruway munasqanta mana cambiayta munarqanchu. Hinan Uziasqa sinchita phiñakuspa mana kasukurqanchu, chaymi Jehová Diosqa lepra onqoywan castigarqan (2 Crón. 26:3-5, 16-20).

Chaykunan rikuchiwanchis mayninpiqa yuyaykusqanchista cambiananchispuni kasqanta. Chaymi sucederqan Joachim iñiqmasita. Payqa 1955 watapin bautizakurqan, 1978 watapitaq Diospa llaqtanmanta qarqosqa karqan. 20 wata qhepamanmi pesapakuspa kutimpurqan. Huk umallin tapurqan imarayku chhaytukuy watamanta kutimusqanta, chaymi payqa nirqan: “Yacharqaniña Jehová Diospa testigonkuna cheqaq kaqta yachachisqankuta chaypas, hatunchakuq kaspan sinchita phiñakurqani. ¡Maytan pesapakuni chhayna kasqayta mana usqhaylla cambiasqaymanta!”, nispa. Joachimqa repararqanmi yuyaykusqanta cambiananpuni kasqanta.

Yaqapaschá ñoqanchispas mayninpiqa imapas decidisqanchista otaq yuyaykusqanchista cambiananchis kanqa. Chayta ruwasun chayqa, Jehová Diosmi kusikunqa (Sal. 34:8).