Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

¿Imaynatan sapankaman allinta kutichisunman?

¿Imaynatan sapankaman allinta kutichisunman?

“Rimakuyniykichisqa ancha sumaqpuni kachun [...], ahinapin yachankichis imaynatachus sapankamanpas allinta kutichinaykichista” (COL. 4:6)

1, 2. a) ¿Imaynapin yachanchis allinta yuyaykuspa tapuyqa allin kasqanta? (Kay paginapi fotota qhaway.) b) ¿Imaraykun mana manchakunachu sasa entiendena yachachikuykunamanta rimayta?

HUK cristianan mana testigo qosanwan Bibliamanta parlasharqan, hinan qosanqa willarqan Trinidad nisqa yachachikuypi iñisqanta. Chaymi cristianaqa yuyaykurqan: “Manapaschá chay yachachikuyta allintachu entiendeshan”, nispa. Hinan sumaqllata nirqan: “Chhaynaqa, ¿Dioschu kankuman Jesuspas, santo espiritupas, Diospas? ¿Kinsantinkutaqchu huk dioslla kankuman?”, nispa. Chaymi qosanqa kutichirqan: “Manan ñoqaqa chay hinatachu yuyaykuni”, nispa. Chay tumpallan rimayta qallarirqanku pichus Dios kasqanmanta.

2 Kaypi rikusqanchis hina, allinta yuyaykuspa sumaqllata tapuyqa allinmi. Hinaspapas manan manchakunanchischu sasa entiendena yachachikuykunamanta rimayta, chaykunan kanman: Trinidad, infierno otaq kanchu manachu huk  Kamaq chaykuna. Sichus Jehová Diospi yachachiwasqanchispipas confiasun chayqa, sonqoman chayaqtan pimanpas kutichisun (Col. 4:6). Ichaqa, ¿iman yanapawasun runakunaman allinta yachachinapaq? Chaypaqqa: 1) runaq sonqonpi kasqanta yachanapaqmi tapuna. 2) Bibliawanmi yuyaymanachina. 3) Rikch’anachiykunawanmi sut’ita entiendechina. Kay estudiopin chaykunamanta yachasun.

SONQONPI KASQANTA YACHANAPAQ TAPUSUN

3, 4. ¿Imaraykun allinpuni imapichus runakunaq creesqanmanta yachanapaq tapuy?

3 Runakunata tapuspan yachasun imapichus creesqankuta. Biblian nin: “Manaraq allinta uyarishaspa simita kutichiqqa mana yuyayniyoqmi”, nispa (Prov. 18:13). Chayraykun ñawpaqta yachananchis willasqanchismanta imatachus yuyaykusqanta. Mana hinaqa yanqapaschá imatapas sut’inchayta munasunman (1 Cor. 9:26).

4 Infiernomanta rimasun. Wakin runakunan creenku infiernoqa runakunata ñak’arichinapaq rawrashaq nina kasqanta. Wakintaqmi Diosmanta t’aqasqa kayta infiernopaq hina qhawarinku. Chaymi kayta nisunman: “Runakunaqa imaymanatan yuyaykunku imachus infierno kasqanmanta. Qanpaqri, ¿imataq infiernori?”, nispa. Creesqanta yachaspaqa facil-llatan Bibliawan entiendechisunman.

5. ¿Imaynatan tapuykuna yanapawasunman runakunaq imapichus creesqanta yachanapaq?

5 Imapichus runakuna creesqanta yachanapaqqa sumaqllatan tapuykunanchis imarayku chaypi creesqanta. Sichus predicashaqtinchis huk runa niwasunman Diospi mana iñisqanta chayqa, yaqapaschá yuyaykusunman tukuy imapas kikillanmanta paqarimusqanpi creesqanta (Sal. 10:4). Wakinmi ichaqa sinchita ñak’arisqankurayku otaq hukkunaq ñak’arisqanta rikuspa manaña Diospi iñinkuchu. Ninkun: “Dios kanman chayqa, manachá hinallatachu qhawashanman ñak’ariykuna kasqanta”, nispa. Chhaynaqa, sichus pipas niwasunman Diospi mana iñisqanta chayqa, tapusunmanmi: “¿Chhaynatapunichu yuyaykurqanki?”, nispa. Sichus niwasunman “mana” nispa chayqa, tapullasunmantaqmi imarayku Diospi mana iñipusqanta. Arí, imatachus kutichiwasqanchispin yachasun imaynatachus chay runata yanapananchis kasqanta (leey Proverbios 20:5).

6. ¿Imatan ruwananchis tapusqanchis qhepaman?

6 Tapusqanchis qhepamanqa tukuy yuyaywanmi uyarinanchis rimasqanta, reparananchistaqmi imayna sientekusqanta. Yaqapaschá willawasunman sinchi llakipi tarikusqanrayku Diospi manaña iñipusqanta. Chayta uyarispa, ¿imatan nisunman? Ñawpaqtaqa khuyapayasqanchista rikuchispan sumaqta rimaykusunman. Hinamantaq nisunman: “Imarayku ñak’arisqanchista tapukuyqa manan huchachu”, nispa (Hab. 1:2, 3). Sichus pacienciawan uyarisun khuyapayasuntaq chayqa, yaqapaschá astawan yachayta munanqa.

BIBLIAWAN YUYAYMANACHISUN

¿Imatan ruwananchis allin yachachiq kanapaq? (7 parrafota qhaway)

7. ¿Imatan ruwananchis predicaspa allinta yachachinapaq?

7 Predicaspaqa Bibliawanpunin llapa runaman yachachinchis. Biblian yanapawanchis llapanchispas ‘allin yachachisqa kanapaq, tukuy allin kaqkunata ruwanapaq allin-allin wakichisqa’ kanapaqpas (2 Tim. 3:16, 17). Allinta yachachinapaqqa  manan askha textokunataraqchu qhawachinanchis, aswanpas leepusqanchis textollatan allinta sut’inchana, chaywantaq yuyaymanachina (leey Hechos 17:2, 3). ¿Imaynatan chayta ruwasunman? Chaypaq kinsa ejemplokunata qhawarisun.

8, 9. a) ¿Imaynatan yuyaymanachisunman pipas “Jesusmi Dios” nispa niqtin? b) ¿Imakuna nisqaykin allin karqan chhaynapi tarikuqtiyki?

8 “Jesusmi Diosqa” niqtinku. ¿Ima textokunawanmi yuyaymanachisunman? Yaqapaschá Juan 6:38 textota leechisunman, chaypin nin: “Hanaq pachamantaqa uraykamuni, manan munayniyta ruwanaypaqchu, aswanpas kachamuwaqniypa munayninta ruwanaypaqmi”, nispa. Chay textota sut’inchasqanchis qhepamanmi nisunman: “Jesuschus Dios kanman chayri, ¿pitaq hanaq pachamanta kachamunman karqan? ¿Manachu Jesusta kachamuq paymanta aswan kurak kanman?”, nispa.

9 Hinaspapas leellasunmantaqmi Filipenses 2:9 textota, chaypin apóstol Pablo willarqan imatas Jehová Dios ruwarqan Jesuspa kawsarimpusqan qhepaman chayta. Chaypin nin: “Diospas paytaqa anchatapuni hatunchaykurqan, hinaspan payman sutita churarqan lliw sutimantapas qollana kaqtapuni”, nispa. Chay textoq nisqanpi yuyaymanachinapaqmi nisunman: “Sichus Jesús Dios kanman karqan, wañupusqan qhepamantaq astawanraq Dios hatuncharqan chayqa, ¿manachu kikin Diosmantapas Jesús aswan kurak kapunman karqan? Ichaqa, ¿kanmanchu pipas Diosmanta aswan kurak?”, nispa. Bibliata respetaq runa kaspaqa, chay nisqanchiswanmi astawan yachayta munanqa (Hech. 17:11).

10. a) ¿Imaynatan yuyaymanachisunman infiernopi creeq runata? b) ¿Imakuna nisqaykin allin karqan chhaynapi tarikuqtiyki?

10 “Maypis millay runakuna mana rinkumanchu infiernoman” niqtinku. Chayta niqqa, yaqapaschá munashan millay runakuna muchuchisqa kanankuta. ¿Imaynatan chay hina yuyaykuq runakunata yanapasunman? Ñawpaqtaqa sut’inchananchismi millay runakunaqa cheqaqtapuni muchuchisqa kanankuta (Prov. 11:21). Chaymantataq leechisunman Génesis 2:16, 17 textota, chaypin willan Adán huchapakuqtinqa wañupunan kasqanta. Chaymanmi tapusunman: “¿Imaraykun Dios mana willanmanchu karqan wiñaypaq ñak’arichisqa kanankuta?”, nispa. Hinamanmi Génesis 3:19 textoq nisqanta leespa nisunman: “Chaypin Diosqa Adanta  Evatawan huchachashan mana kasukusqankumanta, ichaqa manan imatapas nirqanchu infiernomantaqa. Aswanmi nirqan hallp’aman tukupunankuta”, nispa. Chaymantan tapusunman: “¿Allinchu kanman karqan infiernoman rinanku kashaqtin ‘hallp’amanmi tukupunki’ nispalla nisqan?”, nispa. Sichus chay runa llamp’u sonqo kanqa chayqa, chhayna tapuykunan yuyaymanachinqa.

11. a) ¿Imaynatan yuyaymanachisunman “allin runakunaqa hanaq pachamanmi ripunku” niqtinku? b) ¿Imakuna nisqaykin allin karqan chhaynapi tarikuqtiyki?

11 “Allin runakunaqa hanaq pachamanmi ripunku” niqtinku. Chaykunapi creeq runaqa, creesqanman hinan Bibliaq nisqantapas entiendenqa. Yaqapaschá Apocalipsis 21:4 (leey) textota leepuqtinchis, pay yuyaykunqa chay sumaq bendicionkuna hanaq pachapi kananta. ¿Imaynatan yanapasunman allinta entiendenanpaq? Huk textokunata qhawachishanamantaqa, kaq textollapin qhawachisunman “manan wañuypas kanqañachu” nisqa simikunata. Hinamantaq tapusunman: “¿Kanchu wañuy hanaq pachapi?”, nispa. Yaqapaschá “manan” ninqa. Hinan nisunman: “Arí, hanaq pachapiqa manan wañuyqa kanchu, kay pachallapin runakunaqa wañunchis”, nispa. Chhaynapin allinta entiendenqa Apocalipsis 21:4 textoq nisqanqa kay Hallp’api hunt’akusqanta (Sal. 37:29).

RIKCH’ANACHIYKUNAWAN ENTIENDECHISUN

12. ¿Imaraykun rikch’anachiykunawan Jesús yachachiq?

12 Hinaspapas Jesusqa rikch’anachiykunawanmi runakunata yachachiq (leey Mateo 13:34, 35). Chaykunawanmi runakunaq sonqonpi imachus kasqanta yachaq (Mat. 13:10-15). Chaymantapas rikch’anachiykunawan yachachisqanraykun runakunaqa tukuy sonqowan uyarikuqku, manataqmi yachasqankuta qonqaqkuchu. ¿Imaynatan ñoqanchispas Jesús hina rikch’anachiykunawan yachachisunman?

13. ¿Ima rikch’anachiywanmi entiendechisunman Diosqa Jesusmanta kurak kasqanta?

13 Rikch’anachiykunaqa manan sasa entiendeychu kanan. ¿Ima rikch’anachiywanmi yachachisunman Diosqa Jesusmanta aswan kurak kasqanta? Yaqapaschá nisunman: “Diospas Jesuspas huk taytawan churiwan hina kasqankumantan rimarqanku. Diosmi Jesusmanta nirqan ‘Churiy’ nispa, Jesustaq Diosmanta nirqan ‘Yayay’ nispa”, nispa (Luc. 3:21, 22; Juan 14:28). Hinaspan tapusunman: “Iskay runakuna kikinkama kasqankuta pimanpas entiendechinaykipaq, ¿churiyoq taytamantachu rimawaq icha mellizo runakunamantachu?”, nispa. Yaqapaschá nisunki “mellizo runakunamantan” nispa. Hinan nillawaqtaq: “Arí chay rikch’anachiywanqa facil-llatan pimanpas entiendechisunman. Chhaynaqa, ¿imaraykutaq Jesusri allin yachachikuq kashaspa mana chay rikch’anachiywanchu yachachirqan Diosmanta paymantawan rimaspa? Diosqa paymanta aswan kurak, aswan atiyniyoq kasqanraykun”, nispa.

14. ¿Ima rikch’anachiywanmi yuyaymanachisunman “Diosmi Saqrata churan infiernopi millay runakunata ñak’arichinanpaq” niqtinku?

14 Hukmantañataq kunanqa yachasun. Wakin runakunan ninku: “Diosmi Saqrata churan infiernopi millay runakunata ñak’arichinanpaq”, nispa. Chay creesqanku mana cheqaqchu kasqanta entiendechinapaqqa, kaytan nisunman: “Sichus wawayki mana kasukuq millay runaman  tukupushanman chayri, ¿imatan ruwawaq?”, nispa. “Anyaymanyá riki”, ninqachá. Chaymantataq tapusunman: “¿Manapuni uyarikuqtinri?”, nispa. Yaqapaschá ninqa: “Wanachiymanchá riki”, nispa (Prov. 22:15). Hinamantaq tapusunman: “¿Imatan ruwawaq wawayki chhayna millay kananpaq huk runa yachachimushasqanta yacharqospa?”, nispa. “Sinchitachá chay runapaq phiñakuyman”, ninqachá. Chay rikch’anachiyta sut’inchanaykipaqmi niwaq: “¿Niwaqchu waqllichiq runata rantiykipi wawaykita wanachinanpaq?”, nispa. “Manapunin” ninqachá. Chaymanmi niwaq: “Diospas manapunin Saqrata ninmanchu waqllichisqan runakunallatataq castigananpaqqa”, nispa.

MANAN LLAPANKUPUNICHU UYARIKUNQAKU

15, 16. a) ¿Imaraykun mana llapankupunichu Diospa siminmanta uyarikunqaku? b) ¿Allin yachachiqraqchu kananchis Diospa siminmanta willanapaq? (Qhaway “ Allinta kutichinapaq yanapaykuna” nisqa recuadrota.)

15 Allinta yuyaykuspaña tapusun, allintaña Bibliawan yuyaymanachisun, fácil entiendey rikch’anachiykunawanña yachachisun chaypas, manan llapankupunichu Diosmanta willasqanchista uyarikunqaku (Mat. 10:11-14). Jesustapas pisi runakunallan yachachisqanta uyarikurqanku allin yachachiqña karqan chaypas (Juan 6:66; 7:45-48).

16 Manaña Jesús hinachu yachachisunman chaypas, allintan Diospa siminmanta yachachisunman (leey Hechos 4:13). Biblian willan “llapallan wiñay kawsaypaq” hina kaqkunaqa allin willakuykunata chaskikunankuta (Hech. 13:48). Chayrayku ama sinchitaqa llakikusunchu runakuna mana uyariwaqtinchis, nitaq pisipaqchu qhawarikusun. Sichus Jehová Diospi yachachiwasqanchispipas confiasun chayqa, allin yachachiqmi kasun. Chay hinapin uyariwaqninchispas ñoqanchispas qespichisqa kasun (1 Tim. 4:16). Arí, Jehová Diosmi yachachiwanchis ‘imaynatachus sapankaman allinta kutichinanchispaq’. Ichaqa, ¿imaynatan runakunata astawan yanapasunman? Jesuspa yuyaychasqanman hina ruwaspan. Chaytan qatimuq estudiopi yachasun.