PASCAL sutiyoq runaqa Costa de Marfil nacionpin nacerqan, payqa qolqeyoq kaytan munarqan. Pascalqa maqanakuq kasqanraykun huk nacionman ripuyta munarqan askha qolqeta ganananpaq. 25 watanpin yacharqan Europa ladopi chayta tarinanta. Ichaqa manan ima documentonpas karqanchu viajananpaq, chaymi yuyaykurqan mana autoridadkunaq yachasqallan Europaman haykunanpaq.

1998 watapin 27 watanpi kashaspa viajarqan. Ghana, Togo, Benín nacionkunata pasaspan chayarqan Níger nacionpi Birni Nkonni llaqtaman. Ichaqa Europaman chayananpaqqa Sahara nisqa ch’inneq pampantan huk camionetapi rinan karqan, Mediterráneo lamar-qochaman chayaspataq huk barcopi rinan karqan. Ichaqa Níger llaqtapi kashaqtinmi tukuy yuyaykusqankuna qollupurqan. ¿Imarayku?

Qolqenmi tukukapurqan. Hinaspapas Noé sutiyoq precursortan chaypi reqsirqan, paymi Bibliamanta yachachirqan. Chay yachasqanmi sonqonman chayarqan, chaymi Pascalqa manaña qhapaq kaytachu munarqan aswanpas Dios serviytan munarqan, 1999 watapitaqmi bautizakurqan. Agradecido kasqanta Jehová Diosman rikuchinanpaqtaqmi 2001 watapi precursor karqan Níger nacionpi. ¿Imaynan kashan chayta ruwasqanmanta? Ninmi: “Chayta ruwaspaqa manan tiempoytachu usuchishani”, nispa.

TIEMPOTA MANA USUCHISPA AFRICAPI PREDICANKU

Anne-Rakel

Diosta serviymi astawanqa kusichikun, chaytan repararqanku Pascalpas hukkunapas. Chayraykun predicaqkunaq necesitakusqanpi yanapakunankupaq yaqa 65 iñiqmasinchiskuna Europamanta África ladoman astakurqanku. Chaypi kaqkunaqa wakinmi 17 watayoq kanku wakintaq 70 watayoq, yanapakushankutaqmi Benín, Burkina Faso, Níger, Togo nacionkunapi. * ¿Iman kallpacharqan chayta ruwanankupaq? ¿Iman karqan chayta ruwasqankurayku?

Dinamarca nacionmanta Anne-Rakel nin: “Tayta-mamayqa Senegal nacionpin misionero karqanku. Kusikuywanmi rimaqku misionero kasqankumanta, chaymi ñoqapas paykuna hina ruwayta munarqani”, nispa. Payqa 20 watanpi kashaspa hinan Togo nacionman astakurqan makiwan rimaq iñiq t’aqapi yanapakunanpaq, chaypiqa 15 wata hinañan kashan. ¿Imaynatan hukkuna qhawarirqanku chay ruwasqanta? Paymi nin: “Chay qhepamanqa ñañaywan turaypiwanmi astakamullarqankutaq”, nispa.

Albert-Fayette, Aurele

 Francia nacionmanta 70 watayoq Aurele cristianon nin: “Iskay watañan jubilasqa kasharqani. Hinan tapukurqani, ‘¿hinallachu paraíso chayamunanta suyakusaq? Icha ¿astawanchu predicasaq?’ nispa”, nispa. Payqa kinsa watañan Albert-Fayette esposanwan Benín nacionpi predicashanku. Nillantaqmi: “Imamantapas aswan allin ruwasqaykuqa, Jehová Diosta servinaykupaq kay nacionman hamusqaykun”, nispa. Asirikuspan nillantaq: “Hinaspapas wakin predicasqayku llaqtakunaqa Paraíso hina ancha munaymi”, nispa.

Clodomir cristianon Lysiane esposanwan Franciamanta Benín nacionman ripurqanku. Qallariypiqa familiankuta amigonkunatan extrañaqku, niqkutaqmi “manachus kaypiqa yachakusunchu” nispa. Ichaqa chay llakikuyninkuqa chinkapurqanmi, kusisqataqmi chaypi karqanku. Clodomir nin: “16 watañan kaypi kashayku, sapa watantaqmi huk runata yanaparqayku bautizakunanpaq”, nispa.

Clodomir, Lysiane iñiqmasikuna wakin yachachisqan runakunawan

Johanna, Sébastien

2010 watapin Sébastien cristiano Johanna esposanwan Franciamanta Benín nacionman ripurqanku. Sébastien nin: “Iñiq t’aqapiqa imaymana ruwanan kashan. Chaymi usqhaylla imaymanata yachashayku”, nispa. ¿Uyarikunkuchu runakuna? Johanna nin: “Anchatan munanku Diosmanta yachayta. Callepi purishaqtiykupas runakunaqa asuykamuwankun Bibliamanta tapukuwanankupaq qelqakunata mañakuwanankupaqpas”, nispa. ¿Imaynan casado kawsayninku kashan? Sébastien nin: “Astawanmi hukllachakurqayku. Ancha kusisqan kashani sapa kuti esposaywan ch’isiyaq predicasqaymanta”, nispa.

Eric cristianoqa Katy esposanwanmi precursor kashanku Benín nacionpa wichay ladonpi, chaypiqa pisi runakunallan tiyanku. 10 wata ñawpaqtan Franciapi kashaspanku, predicaqkuna necesitakusqanmanta rimaq qelqakunata leerqanku, tapurqankutaqmi tukuy tiemponkuwan predicaqkunatapas. Chaymi 2005 watapi huk nacionman astakurqanku. Chaypin rikurqanku runakuna yapakusqanta. Eric nin: “Iskay wata ñawpaqtan Tanguiéta grupoykupi 9 predicaqkunalla karqan, kunanqa 30 predicaqkunañan kayku. Domingo p’unchaypi huñunakuymanqa 50 mayninpitaq 80 runakunan hamunku. Chayqa anchatan kusichiwanku”, nispa.

Katy, Eric

SASACHAKUYKUNATAN ATIPANKU

Benjamin

¿Ima sasachakuykunapin tarikunku huk nacionman astakuqkuna? 33 watayoq Benjamin cristianoqa Anne-Rakel cristianaq turanmi. Payqa 2000 watapin  Dinamarcapi kashaspa Togo nacionpi predicaq misionerowan rimarqan. Ninmi: “Precursor kay munasqaymanta willaqtiymi tapuwarqan: ‘¿Yuyaykurqankichu Togo nacionpi precursor kanaykipaq?’, nispa. Chay kutipiqa manaraqmi 20 wataypipasraqchu kasharqani, ichaqa iskay panaykunan Togo nacionpiña predicasharqanku, chaymi yanapawarqan chayman ripunaypaq”, nispa. Payqa astakurqanmi, ichaqa manan yacharqanchu francés simi rimayta. Nillantaqmi: “Qallariy soqta killakunaqa sasan ñoqapaq karqan, pisillatan hukkunawan rimarqani”, nispa. Ichaqa pisi-pisimantan atirqan, kunanqa Benín sucursalpin llank’ashan qelqakuna apachiypi computadorakunata allichaypi ima.

Marie-Agnès, Michel

Yuyarisun Ericmanta Katy esposanmantawan, paykunaqa Franciapi kashaspallaraqmi huk simita rimaq iñiq t’aqapi yanapakurqanku. ¿Imapin hukniray karqan Africapi yanapakusqanku? Katy nin: “Sasatan tarirqayku tiyanapaq hina wasita. Askha killakunan tiyasqayku wasipiqa mana karqanchu luzpas pila unupas”, nispa. Ericpas nillantaq: “Vecinokunaqa tutakaman nishu fuerteta musicata uyariqku. Pacienciayoqmi kanayki, yachakunaykitaqmi chhayna kawsayman”, nispa. Ichaqa paykunan ninku: “Chhaynaña kaqtinpas chay ladokunapi yanapakusqaykumanta bendicionkunata chaskisqaykun aswan allinqa”, nispa.

Franciamanta Michel cristianoqa Marie-Agnès esposanwanmi Benín nacionman astakurqanku, phisqa watañan chaypi kashanku, 60 watankupi hinataqmi kashankupas. Qallariypiqa manan yacharqankuchu imaynapi tarikunankuta. Michel nin: “Wakinqa niwarqankun ‘chayman astakuyqa waskha patanta carretillata tanqay hinan’ nispa. Ichaqa repararqaykun chay carretillata tanqaqqa Jehová Dios kasqanta, chaymi mana manchakurqaykuchu. Diosta astawan servinaykupaqmi astakurqayku, chaymi payqa mana saqerpariwarqankuchu”, nispa.

ÑAWPAQMANTAPACHA ALLICHAKUY

Huk ladokunapi yanapakuqkunaqa ninkun “ñawpaqmanta allichakuyqa allinpunin” nispa. Chaypaqqa tiempowanmi imatapas ruwana, imamanpas yachakuqmi kananchis, qolqetapas mat’iyukuytan yachananchis, Jehová Diospitaqmi confiananchis (Luc. 14:28-30).

Ñawpaqpi rimasqanchis Sébastien cristianon nin: “Manaraq huk nacionman rishaspaykun iskay wata qolqeta huñurqayku. Decidirqaykun kusirikuykunapi pisillata gastanaykupaq, necesitasqallaykuta rantinaykupaqpas”, nispa. Paykunaqa sapa watanmi  Europaman kutinku wakin killakuna llank’anankupaq, chayta ruwaspan Benín nacionpi yanapakunku.

Marie-Thérèse

África occidental ladopiqa 20 hina soltera cristianakunan yanapakushanku, Marie-Thérèse cristianapas chaypin yanapakushan. Payqa carrota manejaspan Franciapi llank’arqan, ichaqa 2006 watapin llank’ananmanta huk watapaq permisota mañakurqan Níger nacionpi yanapakunanpaq. Chaypin repararqan chay ruway anchata kusichisqanta. Paymi nin: “Franciaman kutipuspaymi jefeywan rimarqani manaña kaqtañachu llank’anaypaq, jefeyqa allinpaqmi qhawarirqan, chayraykun kunanqa mayo killamanta agosto killakama carrota manejaspa llank’ani, setiembre killamanta abril killakamataq Níger nacionpi precursora kani”, nispa.

Saphira

Diosta astawan serviqkunataqa Jehová Diosmi qonqapuni tukuy necesitasqankuta (Mat. 6:33). Yachasun Saphira soltera cristianamanta, payqa Franciamantan, 30 watanpi hinataqmi kashan, Benín nacionpin phisqa wataña precursora kashan. 2011 watapin Franciaman kutirqan llank’aq. Paymi nin: “Viernes p’unchaypin kasharqani, chay p’unchaytaqmi llank’anay tukupurqan. Ichaqa iskay semanatawanraqmi Franciapi qhepakunay karqan, 10 p’unchaytawantaqmi necesitarqani llank’ayta chhaynapi qolqeta aypachikamunaypaq. Jehová Diosmantan mañakurqani. Chay qhepallamanmi huk empresamanta waqyamuwarqanku hukpa rantinpi llank’anaypaq”, nispa. Saphiraqa lunes p’unchaytan chay llank’anaman rirqan imachus ruwananta yachachinankupaq. Paymi nillantaq: “Chaypin yacharqani huk cristianaq rantinpi llank’anay kasqanta, payqa Precursorkunapaq Escuelaman rinanpaqmi 10 p’unchayta permisota mañakusqa. Ichaqa jefenmi nisqa ‘rantiykipi llank’aqta tarillaqtiykun permisota qosqayki’ nispa. Chaymi paypas Jehová Diosmanta mañakullasqataq. ¡Diosqa iskayniykuq mañakusqaykumanmi kutichimurqan!”, nispa.

CHAYTA RUWASPAQA KUSISQAN KANKU

África occidental ladoman wakin ripuqkunaqa wasinkupi hinan kusisqa chaypi tiyashanku, hukkunan ichaqa huk tiempo chaypi kaspa nacionninkuman kutipurqanku. Chaywanpas yacharqankun Jehová Diosta servispalla cheqaq kusikuy tariyta.

^ par. 6 Benín nacionpi sucursalmi chay tawa nacionkunapi predicakusqantaqa qhawarin, chaykunapiqa francestan rimanku.