Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Pachak watañan Diospa Gobiernon kamachikushan

Pachak watañan Diospa Gobiernon kamachikushan

“Diosniyku, ancha hatun musphanan lliw ruwasqaykikunaqa. Llapa suyukunaq Reynin” (APO. 15:3)

1, 2. a) ¿Imatan Jehová Dios Gobiernonwan ruwanqa? b) ¿Imaraykun chay Gobierno chayamunanpi confianchis?

CAPERNAÚM llaqtaq qayllanpi kaq orqo patapin Jesús qatikuqninkunaman yachachirqan kay hinata mañakunankupaq: “Qhapaqsuyuyki [otaq Gobiernoyki] hamuchun”, nispa. Chaytaqa yachachirqan 31 watapin (Mat. 6:10). Kay tiempopin askha runakuna iskayanku chay mañakuyman Diospa kutichimunanpi. Ñoqanchismi ichaqa confianchis Diospa Gobiernon hamunanpi.

2 Chay Gobiernowanmi Diosqa hanaq pachapipas kay pachapipas kaq wawankunata huk familialla kanankupaq hukllachanqa. ¡Chay yuyaykusqanqa hunt’akunqapunin! (Is. 55:10, 11.) Kay pachak wata pasasqanpi Diospa llaqtanpi imaymana ruwakusqanmi rikuchin kunanpas Diosqa Reyninchis kapusqanta. Payqa waranqanpi hunt’aq kamachinkunaraykun imaymana musphanakunata ruwashan (Zac. 14:9; Apo. 15:3). Ichaqa Jehová Dios Reyninchis kapusqanmanta rimaspaqa, manan Yayaykupi Diospa Gobiernonta mañakunapaq Jesuspa yachachisqanmantachu rimashanchis. ¿Imaraykun chayta ninchis? ¿Imaynatan chayta yachasqanchis yanapawasunman?

DIOSPA AKLLASQAN REY LLANK’AYTA QALLARIN

3. a) ¿Hayk’aqmi Jesús hanaq pachapi kamachikuyta qallarirqan? b) ¿Imaynapin yachanchis Jesús 1914 watapi kamachikuyta qallarisqanta? (Uranpi willakuyta qhaway.)

3 1800 watakuna tukuytan astawan sut’inchakurqan 2.500  wata ñawpaqta Danielpa willasqan profecía, nirqanmi: “Chay reykuna kamachikushaqtinmi, Hanaq Pacha Diosqa mana hayk’aq thunikuq suyuta [“Gobiernota”, NM] sayarichinqa”, nispa (Dan. 2:44). Biblia Estudiaqkunan ñawpaq watakunamantaña willarqanku 1914 wata hatun wata kananmanta. Yaqa llapa runakunan hamuq watakunata sumaq kananpaq qhawarisharqanku. Huk qelqa nisqan hina, runakunas yuyaykusharqanku 1914 watamanta wichayman allinkuna sucedenanta. Ichaqa chay watapin Primera Guerra Mundial qallarirqan. Chay qhepata yarqay, pacha chhaphchiy, onqoykuna ima kasqanmi rikuchin, 1914 watapi Jesuspa kamachikuy qallarisqanta. * ¡Chhaynapin Bibliapi profeciakuna hunt’akurqan! Churinta kamachikuqta churasqanpin Dios rikuchillarqantaq kunanpas Reyninchis kapusqanta.

4. a) ¿Imatan Jesús ruwarqan hanaq pachapi kamachikuyta qallarispa hina? b) ¿Imatan ruwarqan Saqrata wikch’uykamusqan qhepata?

4 Kamachikuyta qallarispa hinan Jesusqa angelninkunapiwan Saqrata supayninkunatawan kay pachaman wikch’uykamurqan. Hinan hanaq pachapi ancha kusikuy karqan kay pachapitaq sinchi sasachakuykuna qallarirqan (leey Apocalipsis 12:7-9, 12). Chay qhepatan Jesusqa kay pachapi qatikuqninkunata qhawarimurqan. ¿Imapaq? Ch’uyanchananpaq, yachachinanpaq, pusarinanpaq ima, chhaynapi Diospa munayninta hunt’anankupaq. ¿Imatan yachasunman chay yanapaykuna chaskikusqankumanta?

QATIKUQNINKUNATA CH’UYANCHAN

5. ¿Imatan Jesús ch’uyancharqan 1914 watamanta 1919 qallariy watakama?

5 Hanaq pachata Saqramanta supayninkunamantawan ch’uyanchasqan qhepatan Diosqa, Jesusta kamachirqan kay pachapi qatikuqninkunata qhawariq hamuspa ch’uyanchananpaq. Profeta Malaquiaspas chay ch’uyanchaymantan willarqan (Mal. 3:1-3). Chaytan Jesús ruwarqan 1914 watamanta 1919 wata qallariykama. * Chhaynaqa Diospa familianmanta kayta munanchis chayqa, iñiyninchispin ch’uya kananchis (1 Ped. 1:15, 16). Manapunin chhaqrukunanchischu pantasqa religionkunawan política nisqawanpas.

6. a) ¿Pitan Dios churarqan espiritual mikhunata qowananchispaq? b) ¿Imaraykun espiritual mikhunata chaskikunanchis?

6 Kamachikuq kapusqan qhepamanmi Jesusqa ‘allin yuyayniyoq hunt’aq kamachita’ churarqan, ovejankunaman espiritual mikhunata tiempollanpi qonanpaq (Mat. 24:45-47; Juan 10:16). 1919 watamantapachan allin yuyayniyoq hunt’aq kamachi ‘wasipi kaqkunaman’ espiritual mikhunata askhanpi qoshan. Chay mikhuna chaskisqanchismi iñiyninchispi kallpachawanchis, yanapawanchistaq kawsayninchispi, yuyayninchispi, cuerponchispipas ch’uya kananchispaq. Hinaspapas tukuy necesitasqanchistan qowanchis allin willakuykunata predicananchispaq. ¿Tukuy sonqowanchu chaskikushanchis chay espiritual mikhunata?

QATIKUQNINKUNATA YACHACHIN PREDICANANKUPAQ

7. a) ¿Ima llank’aytan Jesús qallarirqan kay pachapi kashaspa? b) ¿Hayk’aqkaman chay llank’ayta aparikunan karqan?

7 Kay pachapi predicayta qallarishaspan Jesús nirqan: “Allin willakuykunataqa willamunaymi, chaypaqmi Diosqa kachamuwarqan”, nispa (Luc. 4:43). Jesusqa kinsa wata kuskantan tukuy tiemponwan predicarqan, chayta ruwanankupaqmi qatikuqninkunatapas kamachirqan, nirqanmi: “Rispataq willamuychis: Hanaq pacha qhapaqsuyun  sispaykamun”, nispa (Mat. 10:7). Kawsarimpusqan qhepamanmi Jesusqa willarqan qatikuqninkuna “kay pachaq k’uchunkunakamaraq” predicanankuta (Hech. 1:8). Chaymantapas prometerqanmi kay pachaq p’uchukanankama chay llank’aypi yanapananta (Mat. 28:19, 20).

8. ¿Imaynatan Jesús qatikuqninkunata kallpacharqan predicanankupaq?

8 1919 watapin Diospa ‘Qhapaqsuyunmanta allin willakuykuna’ hukniray kapurqan (Mat. 24:14). ¿Imarayku? Chay watapaqqa Jesusmi hanaq pachapi kamachikusharqanña, kay pachapitaq ch’uyanchasqan pisi t’aqa qatikuqninkunata huñurqan. Chay pisi t’aqa runakunatan Jesús kamachirqan Diospa Gobiernonmanta pachantinman willamunankupaq, paykunataq sonqomanta kasukurqanku (Hech. 10:42). Chay llank’ayta aparisqankuraykun, 1922 watapi Cedar Point (Ohio, Estados Unidos) llaqtapi askha nacionkunamanta hatun huñunakuy aparikurqan. Chaypin yaqa 20 waranqa runakuna huñukurqanku. Chay huñunakuypin Rutherford iñiqmasi huk discursopi nirqan: “¡Reyqa kamachikushanñan! Qankunan paymanta willaq kankichis. Chhaynaqa, Reymanta Gobiernonmantawan willaychis, willaychis, willaychis”, nispa. ¡Maytachá kusikurqanku chayta uyarispaqa! Hinan huñunakuyman riqkunamanta qhepa p’unchayta iskay waranqa iñiqkuna predicaq lloqsirqanku, wakintaq 70 kilómetro karuta viajarqanku. Huk iñiqmasin nirqan: “¡Manapunin hayk’aqpas qonqasaqchu Diospa Gobiernonmanta willamunapaq mink’awasqankuta, llapa iñiqmasikuna kusisqa sonqowan predicasqankutapas!”, nispa. Arí, askha iñiqmasikunan chay hinata sientekurqanku.

9, 10. a) ¿Ima escuelakunan yanapawanchis allinta predicanapaq yachachinapaqpas? b) ¿Imaynapin allinniykipaq karqan chay escuelakunapi yanapay chaskisqayki?

9 1922 watapaqqa 58 nacionkunapin 17 waranqa predicaqkunaña kasharqan, ichaqa manaraqmi allin preparasqachu kasharqanku. Jesusmi kay pachapi kashaspa qatikuqninkunaman yachachirqan imaynata, imamanta, maypi predicanankupaqpas (Mat. 10:5-7; Luc. 9:1-6; 10:1-11). Jesusqa chay hinatan kunanpas llapanchista yachachiwanchis, tukuy necesitasqanchistataq qowanchis allinta predicananchispaq (2 Tim. 3:17). Chay yanapaykunataqa huñunakuykunapin chaskinchis. Pachantinpi 111 waranqa iñiq t’aqakunapin aparikun Bibliamanta Allin Yachachiq Kanapaq Escuela. Chay escuelapin qanchis millón más predicaqkuna yachachisqa kashanchis, ‘lliw runaman’ allinta predicananchispaq yachachinanchispaq ima (leey 1 Corintios 9:20-23).

10 Chaymantapas kanmi escuelakuna umallikunapaq, precursorkunapaq, soltero qharikunapaq, casarasqa cristianokunapaq,  Sucursalmanta Encargakuqkunapaq esposankupaqwan, watukuq umallikunapaq esposankupaqwan, misionerokunapaq ima. * Huk escuelaman riq casarasqa cristianokunan agradecekuspa nirqanku: “Sumaq yachachikuykunata chaskisqaykun yanapawarqanku Jehová Diosta astawan munakunaykupaq, hukkunata aswan allinta yanapanaykupaqpas”, nispa.

11. ¿Imaraykun predicashallanchis Saqraña llank’ayninchista sayachiyta munan chaypas?

11 Saqraqa rikushanmi Diospa Gobiernonmanta willanapaq tukuy kallpachakusqanchista. Chayraykun imaymanata ruwashan llank’ayninchista sayachinanpaq. Ichaqa manan atinqachu. ¿Imarayku? Jehová Diosmi Jesusta “churarqan llapa kamachikuypa, atiypa, munaychakuypa, llapa atiq-kaypa [...] qollanan kananpaq” (Efes. 1:20-22). Chay atiy chaskisqanwanmi Jesusqa qatikuqninkunata pakaykushan pusarishan ima, chay hinapi Taytanpa munaynin hunt’akunanpaq. * Diospa Gobiernonmantaqa predicakushallanmi, chaymi millonninpi sumaq sonqo runakuna Diosta reqsishanku. ¡May sumaqmi chay llank’aypi yanapakuyqa!

QATIKUQNINKUNATA PUSARIN

12. ¿Imakunan 1914 watamantapacha Diospa llaqtanpi cambiakurqan?

12 Jesusqa 1914 watapi kamachikuyta qallarisqanmantapachan, kay pachapi qatikuqninkunata pusarishan Diospa munayninta allinta hunt’anankupaq (leey Isaías 60:17 *). 1919 watamantan huk iñiqmasita churakurqan director de servicio kananpaq, paymi iñiq t’aqapi predicacionta umalliq. 1927 watamantan domingo p’unchaykunapi wasin-wasinta predicayta qallarikurqan. 1931 watapin Bibliaq nisqanman hina, “Jehová Diospa testigonkuna” nisqa sutita chaskirqanchis. ¡May kusikunapaqchá chayqa karqan! (Is. 43:10-12.) 1938 watamantapachan iñiq t’aqapi umallikunata Bibliaq nisqanman hina churakurqan. 1972 watamantan huk t’aqa umallikuna iñiq t’aqata pusarirqan, manañan huk umallillachu. Chaymantapachan llapan umallikuna yanapakuq qharikunapas kallpachakurqanku ‘Diospa ovejankunata allinta michiypi’ yanapakunankupaq (1 Ped. 5:2). 1976 watapin Umalliq T’aqa, soqta t’aqa encargadokunata churarqan pachantinpi llank’ay aparikusqanta qhawarinankupaq. Tukuy  chaykunan rikuchin akllasqa Reyqa Diospa munasqanman hina ñawparinankupaq qatikuqninkuna pusarisqanta.

13. ¿Imaynatan yanaparqasunki Jesuspa pachak wata kamachikusqanpi imaymanakuna ruwasqan?

13 Yuyaymanasun Jesuspa pachak wata kamachikusqan ukhupi imaymanakuna ruwasqanpi. Payqa huk t’aqa runakunatan ch’uyancharqan Diospa sutinta apaq llaqta kanankupaq. Hinaspapas 239 nacionkunapiñan predicakushan, chay hinapin millonninpi runakunata yanapashan Jehová Diosta reqsinankupaq. Chaymantapas qanchis millón más runakunatañan huñushan, paykunan tukuy sonqowan ofrecekushanku Diospa munayninta ruwanankupaq (Sal. 110:3). Arí, Diosqa churin Jesucristowanmi tukuy chay hatun musphana ruwaykunata ruwashan. Ichaqa hamuq tiempopin astawanraq ruwanqa.

AKLLASQA REYMI SAMINCHAYKUNATA APAMUNQA

14. a) ¿Imatan mañakushanchis Gobiernoyki hamuchun nispa? b) ¿Ima texton 2014 watapaq akllakun? c) ¿Imaraykun chay textoq akllakusqan allinpuni?

14 1914 watapin Diosqa Churinta hanaq pachapi kamachikuqta churarqan, chaywanpas Gobiernoyki hamuchun nisqa mañakuymanqa manan llapantaraqchu kutichikurqan (Mat. 6:10). Bibliaqa willarqanñan Jesusqa enemigonkuna ukhupi kamachikunanta (Sal. 110:2). Chay enemigokunan Diospa Gobiernon contra kashanku. Chaymi Diosta mañakushanchis ‘Gobiernoyki hamuchun’ nispa. Chaypin mañakushanchis Jesucristo 144.000 akllasqakunapiwan chay enemigokunata kay pachapi kamachikuqkunatawan tukuchinanpaq. Chay hinapin hunt’akunqa Daniel 2:44 textoq nisqan, chaypin nin: “Llapa suyukunatan ñut’uspa tukunqa”, nispa. Chaypin llapa kamachikuqkunata tukuchipunqa (Apo. 6:1, 2; 13:1-18; 19:11-21). Chaykuna sucedenanpaqqa pisi tiempollañan kashan. Chaymi kay watapaq texto nin: “Gobiernoyki hamuchun” nispa, chayqa Mateo 6:10 textomantan horqosqa kashan. ¿Imarayku? Jesuspa pachak wata kamachikusqan 2014 watapi hunt’akusqanrayku.

2014 watapaq texto: Gobiernoyki hamuchun (Mateo 6:10)

15, 16. a) ¿Imakunan sucedenqa Jesuspa waranqa wata kamachikuyninpi? b) ¿Imatan Jesús ruwanqa kamachikuynin tukupuqtin? c) ¿Imaynatan Diospa munaynin hunt’akunqa llapa kamasqakunapaq?

15 Jesusqa Diospa contranpi hatariqkunata thunisqan qhepamanmi Saqrata supayninkunatawan chinkay-chinkay ukhuman waranqa watapaq wikch’uykunqa (Apo. 20:1-3). Chay enemigokunata tukuchispan Jesusqa sacrificio ruwasqanta llapa runakunaq allinninpaq mast’arimunqa. Hinaspapas Adanpa huchallikusqanwan tukuy mana allinkuna kasqantan chinkachinqa. Chay qhepatan Jesusqa mana yupay atina runakunata kawsarichimpunqa, hinan Diosta reqsinankupaq yachachikuyta mast’arinqa (Apo. 20:12, 13). Kay pachaqa Edén huerta hinan huk sumaq paraisoman tukupunqa, llapa runakunataq huchankumanta ch’uyanchasqa kapunqaku.

16 Waranqa wata kamachikuynin tukupusqan qhepamanmi Jesusqa kay pachapaq Diospa munasqanta hunt’anqa. Hinan kamachikuyninta Taytanman entregapunqa (leey 1 Corintios 15:24-28). Manañan necesitasunchu pipas Dioswan allipunachiwananchista. ¿Imarayku? Angelkunapas runakunapas hanaq pacha Taytankuwan huk familia hinalla hukllachasqa kapusqankurayku.

17. ¿Ima ruwananchispaqmi decidisqa kashanchis?

17 Jesuspa pachak wata kamachikusqanpi imaymana sucedesqanmi rikuchin Jehová Dios kamachikushasqanta, kay pachapaq munasqan hunt’akunantapas. Chayrayku kallpachakushallasun hunt’aq sonqowan Diosta servinapaq, Reymanta Gobiernonmantawan willananchispaqpas. Pisi tiempollamantan Diosqa kutichimunqa, Gobiernoyki hamuchun nispa mañakusqanchista.

^ par. 5 Astawan yachanaykipaq qhaway 2013 wata 15 julio Qhawaq revistata 22, 23 paginakunapi 12 parrafopi.

^ par. 10 Qhaway 2012 wata 15 setiembre Qhawaq revistata 13-17 paginakunapi, “Diospa llaqtanpi escuelakuna: Munakuyninta rikuchin” nisqa temata.

^ par. 11 Atipasqanchis juiciokunamanta astawan yachanaykipaq, qhaway 2013 wata 15 agosto Qhawaq revistapi 30 paginata.

^ par. 12 Isaías 60:17 (Chuya Qellqa): “Qoritam qosqayki broncepa rantinpi. Qollqetam qosqayki fierropa rantinpi. Kullupa rantinpim qosqayki bronceta. Rumipa rantinpim qosqayki fierrota. Gobiernaqnikikunam hawkayaypi [thak kaypi] gobiernasunki. Kamachisuqnikikunam allinkunata ruraspa kamachisunki”.