¡MAY KUSIKUNAPAQMI CHAYQA! Kamaqninchismi prometewaranchis kay pachapi wiñaypaq kausananchista. Ichaqa askha runan mana creenkuchu. Piensankun runaqa wañunankupaq kamasqa kasqankuta. Jujkunataq piensanku wañuspa janaq pachaman rispa chaypi wiñaypaq kausanankuta. Qanri, ¿ima niwaqtaq?

Biblian kay tapuykunata kutichin: ¿Jayk’a tiempo kausananchispaqmi kamasqa karanchis? ¿Imaraykun Dios kay pachata runakunatapas kamaran? ¿Imanaqtinmi wañunchis?

MANAN RUNA JINAQA IMAPAS KANCHU

Runaqa manan animalkuna jinachu kamasqa karan, aswanpas animalkunamanta aswan allin kamasqan kanchis. ¿Imaynapin chayta reparasunman? Biblian willan runaqa Diosman rijch’akusqanchista, chhaynatan pay kamawaranchis (Génesis 1:26, 27). ¿Imaynataq chayri? Diosmi kamawaranchis pay jina munakuq kananchispaq, allinkunata ruwananchispaqpas.

Piensaykuqtan ruwawaranchis, allin kaqta mana allin kaqmanta reparaqta, payta reqsiy munananchispaq, amigon kananchispaqwan. Chaymi imaymana kamasqanta qhawarispa mayta kusikunchis, kusikunchismi sumaq kaqkunata qhawaspa, musicata uyarispa otaq poesiakunata uyarispapas. Astawanqa kamaqninchista adorananchispaqmi ruwasqa karanchis, animalkunan ichaqa mana chayta ruwayta atinkuchu. Chaymi animalkunamanta jujniray kanchis.

Kaypi piensay: Sichus Dios kamawaranchis 70 otaq 80 watakunalla kausananchispaq chayqa, manan chhayna allinkuna ruwananchispaqchu kamawasunman karan. Aswanpas payqa allin-allinta kamawaranchis, kay pachapi wiñay-wiñaypaq kausakunanchispaq.

¿IMATAN DIOS MUNARAN RUNAPAQ?

Wakin runakunan ninku: “Diosqa manan wiñaypaq kay pachapi kausananchispaqchu kamawaranchis. Aswanpas kay pachapiqa kashanchis probasqa kanallanchispaqmi, chhaynapin Diosqa ajllan pichus paywan janaq pachapi wiñay kausananta”, nispa. Sichus chhayna kanman chayqa, Dioschá juchayoq kanman imaymana ñak’ariykunamanta. Chayqa manan Diospa imaynachus kasqanwanqa tupanchu. Biblian paymanta nin: “Chaninmi ruwasqankunaqa, junt’aq Diosmi payqa,  mana waqlliqmi payqa, chanintaq cheqaqtaqmi payqa”, nispa (Deuteronomio 32:4).

Biblian willan imaraykuchus Dios kay pachata kamasqanta, ninmi: “Janaq pachaqa Señor Diospa kaqninmi, kay pachatataqmi runaman qoran”, nispa (Salmos 115:16). Arí, Diosmi kay pachata kamaran runakuna chaypi tiyananchispaq, tukuy necesitasqanchistataq kaypi kamaran wiñaypaq kusisqa kausakunanchispaq (Génesis 2:8, 9).

“Janaq pachaqa Señor Diospa kaqninmi, kay pachatataqmi runaman qoran” (Salmos 115:16)

Bibliaqa willallantaqmi imapaq Dios runata kamasqanmanta. Adán Evatan kayta kamachiran: “Askhata miraychis, kay pachamanpas junt’aykuychis, chaypi munayniyoq kaychis, kamachiychistaq [...] llapa animalkunatapas”, nispa (Génesis 1:28). Kay pachata paraisoman tukuchiyqa ¡May munaymi karan! Adanwan Evawanqa manan janaq pachapi kausanankupaqchu kamasqa karanku, aswanpas kay pachapi wawankunawan kuska wiñaypaq kausanankupaqmi kamasqa karanku.

¿IMANAQTINMI WAÑUNCHIS?

Biblian willawanchis Diospa kamasqan juj ángel pay contra jatarisqanta, chaymantan Diosqa payta suticharan Satanás nispa. ¿Imatan Satanás ruwaran?

Adanta Evatawanmi Saqra convenceran Diosta mana kasukunankupaq. Niranmi allin kaqta mana allin kaqtawan paykunallamanta reparanankuta Dios jark’ashasqanta. Paykunataq chayta creespa Diosta mana kasukurankuchu. ¿Imapin chay jawa tarikuranku? Diospa nisqanman jinan tiempowan wañupuranku, chhaynapin paraisopi wiñay kausayta pierdepuranku (Génesis 2:17; 3:1-6; 5:5).

Chaymantapachan runakunaqa ñak’arinchis. Biblian nin: “Juj runallawanmi [Adanwanmi] juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku”, nispa (Romanos 5:12). Adán Evan juchata wañuytawan herenciata jina saqewaranchis, chaymi wañunchis manan Diospa kausanpichu.

WIÑAYPAQMI KAY PACHAPI KAUSAWAQ

Edén huertapi Dios contra jatarisqankuqa manan chinkachiranchu kay pachapaq runakunapaqwan Diospa yuyaykusqantaqa. Diosqa munakuq kasqanraykun justiciatapas ruwaq kasqanraykun tukuyta ruwaran juchamanta wañuymantawan librawananchispaq. Apóstol Pablon niran: “Juchaq pagayninqa wañuymi, Diospa qokuyninmi ichaqa wiñay kausay, chay qokuyqa Señorninchis Cristo Jesusraykun”, nispa (Romanos 6:23). Munakuwasqanchisraykun Diosqa “sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq” (Juan 3:16). Jesuspas munaranmi kausaynin qoyta, chaywanmi Adanpa pierdesqan sumaq kausayta kutichipuwasun. *

Diosmi prometewanchis pisillamanta kay pacha paraisoman tukupunanta. Chay sumaq promesamanta beneficiakunaykipaqqa Bibliaq kay nisqanta kasukuy. Ninmi: “K’illku punkunta jaykuychis, ama jatun punkuntaqa; chayninta jaykuq anchollaña jatun ñanqa wañuymanmi apan, askhataqmi chaynintaqa rishanku; k’illku punkunta jaykuq ñañu ñanmi ichaqa kausayman apan, pisillataqmi chaytaqa tarinku”, nispa (Mateo 7:13, 14). Chhaynaqa, qanllan decidinki jamuq tiempopi imapichus tarikunaykitaqa. ¿Imatan decidinki?

^ párr. 17 Jesuspa sacrificakusqanmanta astawan yachayta munaspaqa qhaway ¿Imatan Biblia yachachin? librota, 5 capitulota, chaytaqa Jehová Diospa testigonkunan ruwamunku. Tarillawaqtaqmi jw.org nisqapipas.