Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Esposay Tabithawan predicashayku

 BIBLIAQ YANAPAYNINWAN CAMBIANKU

Manan Diospi creeranichu

Manan Diospi creeranichu
  • NACESQAN WATA: 1974

  • NACIÓN: REPÚBLICA DEMOCRÁTICA ALEMANA

  • ÑAUPAQ KARAN: ATEO

ÑAUPA VIDAY

Sajonia estadoq jujnin llaqtachanpin nacerani, chay tiempopiqa República Democrática Alemana (RDA) nisqamanmi perteneceran. Wasiypiqa sumaqtan kausaq kayku, allinta vidayta apanaypaqmi tayta-mamaykunaqa yachachiwaranku. RDA nisqaqa comunista nacionmi karan, chaymi Sajoniapiqa askha runakuna mana importantepaqchu religionkunata qhawariqku. 18 wataykaman ateo otaq Diospi mana creeq karani, jinallataq comunistakunaq yachachisqanman jina kausarani.

Comunismo nisqan gustawaran, chaypiqa “llapanchispas igualmi kanchis” nispan ninku. Chaymantapas ninkun: “Pobre kayta qhapaq kayta chinkachinapaqqa llapamanmi igualta imatapas repartinanchis”, nispa. Chaypin yanapallaranitaq organización juvenil comunista nisqa grupota. 14 wataypi kashaspan trabajayta qallarirani proyecto medioambiental nisqapi, papelta reciclaspa. Aue llaqtamanta autoridadkunan anchata agradecekuranku, jinaspa juj premiota qowaranku. Nishu waynallaraqmi karani ichaqa chay nacionpi allin reqsisqa politicokunawanmi reqsinakurani. Noqaqa piensaranin allinta imatapas ruwashanaypaq, jamuq tiempopi vidaypas allinpuni kananpi.

Ichaqa piensasqayqa manan cumplikuranchu. 1989 watapin muro de Berlín urmaykuran, chaypitaq comunismo de Europa del Este nisqapas urmaykullarantaq. Chaymantapas pisi tiempollamantan yacharurani nishu mana allinkuna ruwasqankuta. Ejemplopaq, comunismo nisqata mana apoyaqkunataqa “segunda clase runakuna” nispa trataqku. ¿Imaynataq chhaynari kanman? ¿Manachu paykunaqa “llapapas igualmi kanchis” nispa yachachiranku? ¿Yanqallachu chay nisqanku karan? Tukuy chaykunan llakichiwaran.

Piensasqayqa cambiapuranmi, chaymi música yachayta pintayta ima qallarirani. Juj institutopin musicapaq estudiayta qallarirani, chhaynapi universidadman jaykunaypaq; nishutan música tocayta munarani pintaytapas. Manañan piensaraniñachu wawa kaspa allinta comportakuna kasqanta yachasqaypi. Divertikuyllapin piensaq kani; askhan enamoradaykunapas karan. Ichaqa manan musicapas, pintaypas ni libre kausaypas cheqaqtaqa kusichiwaranchu, chaymi rikukuq pintasqay cuadrokunapi.  ¿Imaynan kanman kausay jamuq tiempopi? ¿Imapaqmi runa kausan?

Tapukuyniykunaq respuestanta yachaspaymi admirakurani. Institutopi kashaspaymi askha estudiantekunawan grupopi jamuq tiempomanta rimasharayku. Chaypin kasharan Mandy, * payqa Jehová Diospa testigonmi kasqa. Paymi niwaran: “Andreas, sichus tapukuyniykikunaq respuestanta tariyta munanki chayqa, Bibliata estudiay”, nispa.

Iskayasharanin ichaqa curioso kaspan yachayta munarani. Mandyqa Daniel libropin iskay capitulota rikuchiwaran, chayta leespan admirakurani. Kay profeciaqa askha potencia mundial otaq gobiernokunamantan rimashan, chaykunaqa kay tiemponchiskamaraqmi kashan. Chaymantapas jamuq tiempopi kausaymantan juj profeciakunatawan rikuchiwaran. ¡Tariranin tapukuyniykunaq respuestanta! Ichaqa, ¿pin kay profeciakunata qelqaran? ¿Pin jamuq tiempomanta k’apajta profetizaran? ¿Chaykuna probaranchu Dios existisqanta?

BIBLIAQ YANAPAYNINWAN CAMBIAPUNI

Mandy presentawaran juj parejata, paykunaqa Testigon kasqaku Horst Angelikapiwan, paykunan yanapawaranku Bibliata allinta entiendenaypaq. Chaypin cuentata qokurani Jehová Diospa testigonkunalla Diospa sutinta jujkunaman willasqankuta (Romanos 10:13; Mateo 6:9). Yachallaranitaqmi Jehová Diosqa kay pachapi sumaq paraisota wiñay kausayta ima runakunaman qonanta. Salmos 37: 9 textopin nin: “Señor Diosta suyakuqkunan ichaqa kay allpata chaskinqaku”, nispa. Nishutan kusikurani Diosta kasukuq llapa runakuna chay kausayman aypanankuta yachaspay.

Noqapaqqa manan facilchu karan cambiay jinaspa Bibliaq nisqanman jina kausay. Allin tocaq allin pintaq kaspaymi jatunchakuq runaman tukupurani, chaymi humilde kayta yachanay karan. Jinaspapas mana allin vidaytan saqepunay karan. Anchatan agradecekuni Jehová Diosta, palabranta kasukuq runakunawan paciente, comprendeq, cariñoso kasqanmanta.

18 wataykaman comunismo, ateismo creenciaman jina kausarani. Biblian ichaqa chaymantapacha vidayta cambiawaran, jamuq tiempomanta llakikusqaytapas thasnuran. 1993 watapi bautizakuspan Jehová Diospa testigon kapurani, 2000 watapitaq Tabithawan casarakurani, payqa kusisqa Diosta serviqmi karan. Iskayniykun tukuy tiempoykuta dedicayku runakunaman Bibliamanta yachachispa. Noqa jinan askha runakuna comunismoq ateismoq yachachisqanman jina kausaranku. ¡Anchatan kusichiwan Jehová Diosta reqsinankupaq runakunata yanapasqay!

BENDICIONKUNA CHASKISQAY

Tayta-mamaykunaqa mancharikurankun Jehová Diospa testigonkunawan juñukusqaymanta. Tiempowanmi ichaqa repararanku vidaypi yanapawashasqankuta. Kunanqa anchatan kusikuni paykunapas Bibliata estudiashasqankumanta, testigokunaq juñunakuyninmanpas rishasqankumanta.

Esposay Tabithawanqa kasukuykun casadokunapaq Bibliaq nisqanta chaytaq anchata kusichiwanku. Ejemplopaq, Bibliaq nisqanman jina mana engañanakuspa kausasqaykun astawanraq jujllachan matrimonioykuta (Hebreos 13:4).

Kunanqa manañan llakikunichu vidaymanta ni jamuq tiempomantapas. Mundontinpin Jehová Diospa testigonkuna familiay, paykunaqa juj nisqallan kusisqa thajpi kausanku. Chay familiapiqa llapaykun igualta qhawarinakuyku, chaypipunin noqaqa creerani, chaytataqmi tukuy tiempo vidaypi maskharanipas.

^ párr. 12 Sutinqa cambiasqan kashan.