Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Allintan reqsinanchis enemigonchistaqa

Allintan reqsinanchis enemigonchistaqa

“Noqanchisqa allintan yachanchis imakunatachus Satanás piensashan chaykunataqa” (2 COR. 2:11)

150, 32 TAKIKUNA

1. ¿Imakunatan Dios Satanasmanta willaran Adán Evaq juchallikusqan qhepaman?

EVAQA willaranpunichá Adanmanqa mach’aqwaywan rimasqanta. Chayta uyarispaqa Adanqa niranchá: “Imaynapitaq mach’aqwayri rimapayanman karan, juj angelchá rimapayaran”, nispa (Gén. 3:1-6). Chhaynaña kaqtinpas; manaña chay angelta reqsirankuchu chaypas paytan Adanwan Evapiwanqa kasukuranku. Chhaynapin Diosta traicionaranku (1 Tim. 2:14). Chayta rikuspan Diosqa apuraylla chay enemigonmanta willayta qallariran. Chaymantapas chinkachinanmi karan. Manaraq chinkachisqa kashaqtinmi ichaqa juj tiempo kausananraq karan. Diosta kasukuqkunatapas pruebamanmi churanan karan (Gén. 3:15).

2, 3. Manaraq Mesías jamushaqtinqa pisillatan Diosqa willachiran Satanasmanta, ¿imaraykun chayta ruwaran?

2 Diosqa manan jayk’aqpas willaranchu chay traicionero angelpa sutintaqa. * 2500 wata qhepata jinañan willachiran pichus  karan chaytapas (Job 1:6). Paypa willasqanman jinaqa, chay angeltan nikun “Satanás” nispa. Chayqa “contrapi churakuq” ninantan nin. Chaymantapas hebreo qelqakuna nisqapiqa otaq ñaupa testamento nisqapiqa 1 Crónicas libropi, Job libropi, Zacarías libropi imallan rijurin chay palabraqa. ¿Imaraykun ñaupa librokunapi mana nishutachu Dios qelqachinman karan Satanasmanta?

3 Nishuta qelqachinman karan chayqa Satanaspaqchá nishuta propagandata ruwashanman karan. Chaymantapas ñaupa tiempo hebreo qelqakunaqa runakuna Mesiasmanta yachanankupaqmi qelqasqa karan, manan Satanasmanta yachanankupaqchu. Chay qelqakunan llapa runakunata Mesiasman pusanan karan (Luc. 24:44; Gál. 3:24). Chay Mesías otaq Jesús chayamuqtinmi ichaqa paywan discipulokunawan ima imaymanata Diosqa willachiran Satanasmanta, mana kasukuq angelkunamantawan. * Paykunatan Diosqa churaran chay enemigokunata chinkachinankupaqpas (Rom. 16:20; Apo. 17:14; 20:10).

4. ¿Imaraykun mana manchakunanchischu Satanasta?

4 Apóstol Pedroq nisqan jina Satanasqa “qaparishaq león jinaraqmi purishan”, chaymantapas paytan apóstol Juan nillantaq “mach’aqway” “dragón” nispa (1 Ped. 5:8; Apo. 12:9). Chhaynaña Satanás chaypas manan nishutaqa manchakunanchischu. ¿Imarayku? Pisilla kallpan kasqanrayku (leey Santiago 4:7). Chaymantapas noqanchiswanmi kashanku Jehová Diospas Jesuspas angelkunapas. Paykunaq yanapayninwanqa vencellasunmi chay enemigotaqa. Ichaqa, ¿maykaman Satanás munaychakushan kay pachata? ¿Imaynatan runakunawan munayninta ruwachin? ¿Tukuy atiyniyoqchu kanman? Chay kinsantin tapuykunamantan kaypi yachasun.

¿MAYKAMAN SATANÁS MUNAYCHAKUSHAN?

5, 6. ¿Imaraykun gobiernokuna mana kay pachapi imatapas cambiayta atinkuchu?

5 Manaraq kay pachata unu millp’ushaqtinmi Satanasqa wakin angelkunata tentaran, jinan chay angelkunaqa kay pacha warmikunawan qhelli ruwaykunata ruwaranku. Chay angelkunawanmi Satanasqa munayninta ruwachishan (Gén. 6:1-4). Chay pasasqanmantan Biblia nin: “Chupanwanmi chay dragonqa llapa ch’askakunamanta kinsa kaq parteta aysaran”, nispa (Apo. 12:3, 4; Jud. 6). Chhaynapin chay angelkunaqa Satanasta kasukuspanku paykunapas Diospa contranpi churakuranku. Ichaqa, ¿Diospa contranpi churakuq común angelkunallachu paykuna kanku? Manan. Chay angelkunaqa allin organizasqan kashanku. Satanasmi paykunataqa Diospa gobiernonta copiakuspa organizan. Chaypin Satanasllataq rey jina kashan, supaykunataq kay mundota gobiernashanku (Efes. 6:12).

6 Chay organizacionwanmi paykunaqa kay pacha gobiernokunatapas dominashanku. ¿Imaynapin chayta yachanchis? Satanás kikinmi Jesusman kay pacha gobiernokunata qhawachispa niran: “Qanmanmi qopusayki llapa kay nacionkunata qhapaq kayninkunatawan, noqamanmi qosqa karan llapa kaykunaqa, chaymi noqaqa pichus munasqayman qoyta atiyman”, nispa (Luc. 4:5, 6). Satanasña lliuta munaychakushan  chaypas gobiernokunaqa atisqankuman jinan llaqtankupaq imaymanata ruwashanku. Wakinqa allintaña ruwashanku chaypas manan chinkachiyta atinkuchu onqoytapas ni ima mana allintapas (Sal. 146:3, 4; Apo. 12:12).

7. ¿Imakunawanmi Satanás runakunata engañashan? ¿Imaynatan chayta ruwashan? (15 paginapi dibujokunata qhaway.)

7 Satanasqa falso religionkunawan negociantekunawan iman engañashallantaq yaqa llapa runakunata (Apo. 12:9). ¿Imaynata? Falso religionkunawanmi Diosmanta imaymana cuentokunata mast’arichishan; sutintapas chinkachiytan munashan (Jer. 23:26, 27). Chay religionkunata kasuspan yaqa llapa runakunaqa Diostapas adorankuman jina kashanku, ichaqa Satanastan adorashanku (1 Cor. 10:20; 2 Cor. 11:13-15). Negociantekunawantaq qolqe sonqoman runakunata tukuchishan. Chay negociantekunaq nisqanman jinaqa, qolqeyoq kaspa imaymana cosasnikunayoq kaspallas runakunaqa kusisqa kankuman (Prov. 18:11). Chayta kasuspankun runakunaqa Diosta maskhanankumantaqa qolqe maskhayllamanña qokushanku (Mat. 6:24). Arí, qolqeta munakuspankun paykunaqa manaña Diostaqa reparankupaschu (Mat. 13:22; 1 Juan 2:15, 16).

Piqpa ladonmantan kasun, ¿Satanaspa ladonmantachu icha Diospa ladonmantachu?

8, 9. a) ¿Imakunatan yachasunman Adán Evaq imachus ruwasqanmanta wakin angelkunaq imachus ruwasqanmantapas? b) Satanaspa makinpin lliu imapas kashan, ¿imapin allinninchispaq chayta yachay?

8 ¿Imakunatan yachasunman Adán Evaq imachus ruwasqankumanta wakin angelkuna imachus ruwasqanmantawan? Ñaupaqta: Manan Dioswan kashaspaqa Satanaswan kayta atisunmanchu ni Satanaswan kashaspapas Dioswan kayta atisunmanchu, jujnillankutan ajllakunanchis (Mat. 7:13). Iskaypi: Satanaspa ladonman risun chayqa manan unaypaqchu imapas kanqa. Adán Evaqa yaqapaschá paykunallamanta imatapas ruwayta atiranku. Supaykunapas yaqapaschá kay pacha gobiernokunata dominashanku (Gén. 3:22). Ichaqa Satanaspa partenmanta kayqa tristen. ¡Yanqallan imapas! (Job 21:7-17; Gál. 6:7, 8.)

9 Kaypi yachasqanchis jina, Satanaspa makinpin lliu imapas kashan. ¿Imapin yanapawanchis chayta yachay? Ñaupaqtaqa, autoridadkunata allin yuyaywan qhawarinanchispaqmi yanapawanchis. Arí, autoridadkunataqa respetananchismi, chaytan Diosqa munan (1 Ped. 2:17). Leykuna orqomusqankutapas kasukunanchismi. Ichaqa manan ruwananchischu imatapas Diospa kamachikusqan contrapi orqomusqankutaqa (Rom. 13:1-4). Manan kay pachapi politicamanpas ni imamanpas chaqrukunanchischu (Juan 17:15, 16; 18:36). Iskaypi: Chayta yachaymi yanapawallanchistaq astawan predicananchispaq. Kaypi yachasqanchis jina Satanasqa chinkachiytan munashan Diospa sutinta, manan munanchu runakuna respetanankutapas. Chaymi noqanchisqa rimashanallanchis Diosmantaqa. Chaymantapas Diospa sutinta apayqa payta munakuypas manan imawanpas  comparakunmanchu chaymi kusisqa llank’ananchis Diospaqqa (Is. 43:10; 1 Tim. 6:6-10).

¿IMAYNATAN SATANÁS RUNAKUNAWAN MUNAYNINTA RUWACHIN?

10-12. a) ¿Imatan Satanás ruwanman karan angelkunata urmachinanpaq? b) ¿Imatan yachasunman chay angelkunata imachus pasasqanmanta?

10 Satanasqa imaymanatan ruwan runakunawan munayninta ruwachinanpaq. Mayninpiqa munayllatan imaymana trampakunata churawanchis, mayninpitaq manchachikuq jina imatapas ruwan.

11 Angelkunata imaynatachus tentasqanmanta yachasun. Paykunataqa warmikunawanmi tentaran. Manaraq chayta ruwashaspaqa allintaraqchá piensaran imaynatas tentanman imawansi tentanman chaypi. Chaymantañachá warmikunata munachiyta qallariran. Chhaynapin askha angelkuna chay trampaman urmaranku. Arí, warmikunawanmi qhelli juchaman urmaranku (Gén. 6:1-4). Ichaqa manapaschá Satanasqa warmikunallatachu munachiran, “runakunatawanmi gobiernankichis” nispapaschá niran. Payqa manapaschá munasharanchu Diospa prometesqan warmiq miraynin chayamunanta (Gén. 3:15). Chhayna karan chayqa, unu kay pachata millp’usqanwanchá Diosqa qolluchiran Satanaspa chay munasqanta.

Satanasmi tentawanchis qhelli kausaywan, orgulloso kaywan, demoniokunawan ima (12, 13 parrafokunata qhaway)

12 ¿Imatan chaymanta yachasunman? Allintan cuidakunanchis qhelli ruwaykunamanta egoista kaymantapas. Satanaspa engañasqan angelkunaqa unayñan Diospa ñaupanpi servisharanku. Chaywanpas mana allin ruwaykunatan munapayayta qallariranku, chay munapayasqankun juchaman aparan. Noqanchispas yaqapaschá unayña Diosta servishanchis, imaymanakunapipaschá sumaqta llank’ashanchis. Chhaynaña kaqtinpas yaqapaschá mana allin piensaykuna sonqonchisman jaykunman (1 Cor. 10:12). Chaymi sapa kutillan sonqonchistaqa qhawarikunanchis. Mana allin piensaykuna kashan chayqa, egoista kaypas kashan chayqa apuraymi chaykunata wijch’upunanchis (Gál. 5:26; leey Colosenses 3:5).

13. a) ¿Imawanmi Satanás runakunata engañallantaq? b) ¿Imatan ruwasunman ama engañachikunanchispaq?

 13 Satanasqa supaykunawanmi runakunataqa engañallantaq. Chaypaqmi usashan falso religionkunata, peliculakunata pujllanapaq videokunata ima. Demonismo nisqa peliculakunaqa mana imanakuq jinapaschá kanman ichaqa manan allinchu kanman chaykunata qhawayqa. ¿Imatan ruwasunman chaykunamanta cuidakunapaq? Manan ima peliculas allin imataqsi mana allin chaymanta juj lista lloqsimunantaraqchu suyananchis. Aswanmi sapankanchis Diospa munayninman jina conciencianchista allinta educananchis (Heb. 5:14). Apóstol Pabloq nisqan jina, tukuy sonqon Diosta munakunanchis. Tukuy sonqo munakusun chayqa paypa munayninman jinan imatapas ruwasun (Rom. 12:9). Chaymantapas sapankan tapukunanchis: “Juj estudiachisqay runa, predicasqay runapas kay qhawasqayta qhawanman chayri, ¿ima ninmanmi noqamanta? ¿‘Predicasqanman jinan kay runaqa kausan’ ninmanchu? Icha ¿‘iskay uyan kay runaqa’ ninmanchu?”, nispa. Predicasqanchisman jina kausasun chayqa manan Satanaspa trampankunaman urmasunchu (1 Juan 3:18).

Satanasmi manchachiwanchis gobiernokunawan, compañerokunawan, familiawan ima (14 parrafota qhaway)

14. a) ¿Imatan Satanás ruwanman Diosta mana kasukunanchispaq? b) ¿Imatan ruwasunman Satanaswan mana vencechikunanchispaq?

14 ¿Imatan Satanás mayninpi ruwanman Diosta mana kasukunanchispaq? Yaqapaschá manchachiwasunman, ¿imaynata? Yaqapaschá autoridadkunawan predicayninchista prohibichinman. Diospa munayninman jina imatapas ruwasqanchisraykupaschá llank’anapi compañerokuna o escuelapi compañerokunapas noqanchismanta burlakunkuman (1 Ped. 4:4). Chaymantapas yaqapaschá familianchiswan jark’achiwasunman juñunakuykunaman asambleakunaman rinanchista (Mat. 10:36). ¿Imatan ruwasunman chaykunapi tarikuspa? Ñaupaqta: Satanaswantaq guerrapi kashanchis chayqa, pasanqapunin chaykunaqa, chaytan umanchispi sonqonchispi allinta jap’inanchis (Apo. 2:10; 12:17). Iskaypi: Satanaspa nisqanman jinaqa interesraykullas  noqanchisqa Diosta servinchis, ¿cheqaqchu chay? Manan ¿riki? Chaymi Satanasmanqa mana gustota qonanchischu chhaynapi ama yanqa imatapas rimananpaq (Job 1:9-11; 2:4, 5). Kinsapi: Diosninchisqa manan jayk’aqpas qonqawasunchu. Paymantan kallpata mañakunanchis tukuy imatapas aguantananchispaq (Heb. 13:5).

¿TUKUY ATIYNIYOQCHU KANMAN?

15. ¿Obligawasunmanchu Satanás mana allinkunata ruwananchispaq? Explicay chayta.

15 Satanasqa manan atinmanchu pitapas mana allinta ruwananpaq obligaytaqa (Sant. 1:14). Yaqapaschá runakunaqa mana reparakunkuchu Satanaspa partenmanta kashasqankuta. Cheqaq yachachikuyta yachaspankun ichaqa ajllakunanku kanqa Diostachus icha Satanastachus servinqaku chayta (Hech. 3:17; 17:30). Tukuy sonqowanchus Diosta servisun chayqa manan Satanasqa jark’ayta atiwasunmanchu (Job 2:3; 27:5).

16, 17. a) ¿Ima ruwaytan mana atinkumanchu Satanaspas supaykunapas? b) ¿Imaraykun mana manchakunanchischu Dioswan rimayta?

16 Bibliaq nisqan jina Jehová Diospas Jesuspas yachankun runaq sonqonpi imachus kasqanta, imachus piensasqankutapas (1 Sam. 16:7; Mar. 2:8). Satanaswan supaykunawanri, ¿yachankuchu? Manan. Imapas rimasqanchistan ichaqa uyarinku. Ichaqa, ¿uyarinankuta manchakuspachu sonqollanchispi Diosmanta imatapas mañakunanchis? Manan. Imaynan mana manchakuspa Diostaqa servinchis chhaynatan mana manchakuspa normalta paywanqa rimananchis. Ñaupa tiempo runakunapas mana manchakuspan Dioswanqa rimaqku. Arí, manan paykunaqa manchakuqkuchu Satanaspa uyarinanta (1 Rey. 8:22, 23; Juan 11:41, 42; Hech. 4:23, 24). Diosqa manapunin dejanqachu Satanás imatapas ruwawananchistaqa. Chaypaqmi ichaqa Dioswan rimashanallanchis, kallpachakunanchistaqmi paypa munayninta ruwananchispaqpas (leey Salmos 34:7).

17 Kaypi yachasqanchis jina allintan reqsinanchis enemigonchistaqa, ichaqa manan nishutaqa manchakunanchischu. Runaña kanchis chaypas Diospa yanapayninwanqa vencellasunmi paytaqa (1 Juan 2:14). Bibliaq nisqan jina, sichus Satanás contra kasun chayqa ripullanqan payqa (Sant. 4:7; 1 Ped. 5:9). Satanasqa wayna-sipaskunatan astawanqa urmachiyta munashan. ¿Imakunatan paykuna ruwankuman chay enemigo contra qaqata sayanankupaq? Chaymantan qatimuq estudiopi yachasun.

^ párr. 2 Diosninchisqa ch’askakunamanpas sutita churantaq chayqa, sutiyoqpunichá angelkunapas kanku (Sal. 147:4). Chaymantapas Bibliapiqa willanmi wakin angelkunaq sutinta (Juec. 13:18; Dan. 8:16; Luc. 1:19; Apo. 12:7). Chhaynataq chayqa Satanasmanpas churaranpunichá sutitaqa.

^ párr. 3 Ñaupa tiempo hebreo rimay qelqakunapiqa 18 kutillatan rijurin “Satanás” sutiqa, griego rimay qelqakunapin ichaqa 30 kutita.