Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 13 ESTUDIO

Predicasqanchis runakunapi interesakusun

Predicasqanchis runakunapi interesakusun

“Anchata paykunata khuyapayaran [...]. Chaymi imaymanata paykunaman yachachiyta qallariran” (MAR. 6:34)

70 TAKI Allin sonqoyoqkunata maskhasun

KAYKUNAMANTA YACHASUN *

1. ¿Jesuspa imayna kasqanmi astawan kusichiwanchis? Explicay.

JESUSQA entiendenmi runakunaq imayna sientekusqankuta, chayta yachayqa anchatan kusichiwanchis. Kay allpapi kashaspan ‘kusikuqkunawan kusikuran, waqaqkunawantaq waqaran’ (Rom. 12:15). Juj kutinmi 70 discipulonkuna predicasqankumanta kusisqa kutimpuqtinku ‘Jesuspas santo espirituq junt’aykusqan kaspa anchata kusikuran’ (Luc. 10:17-21). Amigon Lázaro wañupuqtinmi ichaqa rikuran jujkunaq khuyayta waqasqankuta, jinan paypas waqallarantaq (Juan 11:33).

2. ¿Imaraykun Jesús runakunata khuyapayaran?

2 Jesús perfecto runaña karan chaypas anchatan khuyapayaran juchasapa runakunata, ¿iman yanaparan chhayna khuyapayakuq kananpaq? Runakunata munakusqanmi. Ñaupaq estudiopi yachamusqanchis jina ‘anchatan runakunawan kusikuran’ (Prov. 8:31). Runakunata munakusqanraykun payqa allinta runata reqsiran, chaymi apóstol Juan niran: “Yacharanmi runaq sonqon imayna kasqanta”, nispa (Juan 2:25). Jesusqa khuyapayaqmi runakunata, chaymi runakunaqa munakuq kasqanta reparaspa Diospa gobiernonmanta willasqanta uyariqku. Sichus Jesús jina khuyapayakuq kasun chayqa, askha runakunan uyariwasun predicasqanchista (2 Tim. 4:5).

3, 4. a) ¿Imaynatan predicasun runakunapi interesakuqtinchis? b) ¿Imatan kay estudiopi yachasun?

3 Apóstol Pabloqa yacharanmi predicananpuni kasqanta, noqanchispas pay jinan predicayta qhawarinchis (1 Cor. 9:16). Ichaqa runakunapi interesakusun chayqa  sonqomantan predicayta munasun manan obligasqa jinachu. Yachasqanchis jina “qoypin aswan kusikuyqa kan, manan chaskiypichu” (Hech. 20:35). Chay yuyaywan predicasunchis chayqa kusisqan sientekusun.

4 Kay estudiopin yachasun imaynata predicasqanchis runakunapi interesakusunman chayta. Ñaupaqta yachasunchis imaynatas Jesús runakunata qhawariran chayta, yachallasuntaq imaynatas ejemplonta qatikusunman tawa ruwaykunapi chaytawan (1 Ped. 2:21).

JESUSQA INTERESAKURANMI PREDICASQAN RUNAKUNAPI

Runakunata khuyapayasqanmi Jesustaqa yanaparan predicananpaq (5, 6 parrafokunata qhaway)

5, 6. a) ¿Pikunatan Jesús khuyapayaran? b) Isaías 61:1, 2 textopi nisqanman jina, ¿imaraykun predicasqan runakunata khuyapayaran?

5 Juj kutinmi Jesusqa discipulonkunawan mana samaspa mana mijuspa predicaranku, chaymi Jesusqa paykunata niran: “Jaku ch’in ladoman chaypi juj chikanta samarimunaykichispaq”, nispa. Manaraq chayman chayaqtinkun ichaqa askha runakunaña chaypi kasharanku. Chayta rikuspa, ¿imatan Jesús ruwaran? Anchatan “paykunata khuyapayaran * mana michiqniyoq ovejakuna jina kasqankurayku. Chaymi imaymanata paykunaman yachachiyta qallariran” (Mar. 6:30-34).

6 ¿Imaraykun Jesús chay runakunata khuyapayaran? Mana michiqniyoq ovejakunata jina rikusqanrayku. Yaqapaschá repararan wakinqa wajcha kasqankurayku familiankuta mijuchinankupaq ch’isiyaqta llank’ananku kasqanta. Jujkunataq llakisqa kashankuman karan familianmanta pipas wañupusqanwan. Jesusqa entienderanchá paykunaq imayna sientekusqankuta. Ñaupaq estudiopi qhawarisqanchis jina paypas chay jina llakikuykunapin tarikuran. Runakunata khuyapayasqanmi  yanaparan sumaq willakuyta paykunaman willananpaq (leey Isaías 61:1, 2).

7. ¿Imaynatan Jesuspa ejemplonta qatikusunman?

7 ¿Imatan Jesuspa ejemplonmanta yachasunman? Kay tiempopipas runakunaqa mana michiqniyoq ovejakuna jinan tarikushanku imaymana problemakunapi. Chaymi necesitanku Diospa gobiernonmanta uyariyta (Apo. 14:6). Jesús jinan noqanchispas allin willakuykunata paykunaman willanchis, ‘mana piniyoqtawan wajchatawan khuyapayasqanchisrayku’ (Sal. 72:13). Runamasinchista khuyapayaspan yanapayta munanchis.

JUJKUNAPI INTERESAKUSQANCHISTA RIKUCHISUN

Sapanka runa imatachus necesitasqanpi piensay (8, 9 parrafokunata qhaway)

8. ¿Imata ruwaspan rikuchinchis predicasqanchis runakunapi interesakusqanchista? Juj ejemplota willay.

8 Predicasqanchis runakunapi interesakunapaqqa, reparananchismi imachus piensasqankuta imayna sientekusqankutapas, jinaspa sumaqta munakuywan paykunata tratananchis * (Mat. 7:12). Chaypaqmi tawa yanapaykunata qhawarisunchis. Ñaupaq kaq, imatas sapanka runapas necesitan chaypin piensananchis. Chaypaq qhawarisun juj ejemplota, juj doctorqa pacientenkunata yanapananpaqqa ñaupaqtan qhawarin imatachus sapanka paciente necesitan chayta. Chaypaqmi tapurin tukuy yuyaywantaq uyarin, chayman jinañan necesitasqanman jina medicamentokunata recetan. Chay jinallataqmi noqanchispas predicaspaqa manan juj temallamantachu rimananchis, aswanpas imatachus necesitasqankuman jina otaq imachus piensasqankuman jinan predicananchis.

9. ¿Imatan mana ninanchischu? Explicay.

9 Pitapas predicashaspaqa manan ninanchischu: “Yachaniñan imayna kausasqanta imapi creesqanta, imarayku chaypi creesqantapas”, nispaqa (Prov. 18:13). Chayta piensanamantaqa sumaqllatan tapurisunman llank’ananmanta, familianmanta, imachus piensasqanmanta, jujkunamantapas (Prov. 20:5). Chhaynapin reparasunchis imachus necesitasqankuta, chayman jinataqmi allinta yanapayta atisunchis (comparay 1 Corintios 9:19-23 textowan).

Predicasqanchis runakuna imayna tarikusqankupin piensananchis (10, 11 parrafokunata qhaway)

10, 11. 2 Corintios 4:7, 8 textopi nisqanman jina, ¿iman yanapawallasunmantaq runakunapi interesakunanchispaq? Juj ejemplota willay.

10 Iskay kaq, imaynas vidanku chaypin piensananchis. Noqanchispas juchayoq kasqanchisraykun paykuna jina problemakunapi tarikunchis chaymi reparayta atinchis imayna vidanku kasqanta  (1 Cor. 10:13). Kay tiempopi kausayqa sasan llapa runapaqpas, Jehová Diospa yanapaynillanwanmi noqanchispas aguantanchis (leey 2 Corintios 4:7, 8). Diospa yanapayninta mana chaskiq runakunapaqmi ichaqa aswan sasa kay pachapi kausayqa. Chaymi Jesús jina chay runakunata khuyapayaspa “allin willakuykunata” willananchis (Is. 52:7).

11 Sergey sutiyoq hermanomanta yachasun. Manaraq Jehová Diosta reqsishaspan payqa manchakuq jujkunawan parlayta. Tiempowanmi Bibliamanta estudiota qoranku. Paymi nin: “Bibliata estudiaspan entienderani cristianokunaqa yachasqankumanta jujkunaman willananku kasqanta. Ichaqa niranin: ‘Manan jayk’aqpas kaytaqa ruwayta atiymanchu’”, nispa. Ichaqa niranmi: “¡Imaynaraqchá Diosta mana reqsiq runakunaq vidanqa! Bibliamanta yachasqayqa thaj kaytan qowaran kusisqataqmi sientekurani. Chaymi nirani: ‘Jujkunamanpas willanaymi Bibliamanta yachasqayta’”, nispa. Chhaynata piensasqanmi yanaparan mana manchakuspa predicananpaq. Paymi nillarantaq: “Predicasqayqa yanapawaranmi manaña manchakunaypaq, astawantaqmi Diospi confiarani”, nispa. *

Wakin estudiantekunaqa manan ratollachu entiendenku Bibliamanta yachachisqanchista (12, 13 parrafokunata qhaway)

12, 13. ¿Imarayku estudiantenchiskunawan pacienciakunanchis? Willay juj ejemplota.

12 Kinsa kaq, pacienciakunanchismi estudiantenchiskunawan. Estudiantenchiskunaqa manapaschá jayk’aqpas Bibliamanta yachachisqanchistaqa uyarirankuchu, chaypin piensananchis. Chaymantapas askhan costumbrenkuman yachasqa kashanku. Ninkutaq: “Chay costumbrekunan familiata llaqtatapas jujllachan”, nispa. Chhaynaqa, ¿imaynatan paykunata yanapasunman?

13 Chaypaq kay ejemplopi piensasun. Juj  malograsqa otaq nishu thanta puenteta cambianankupaq, ¿imatan ruwanku? Manaraq chay puenteta thunishaspan, juj mosoq puenteta ruwanku. Chaykaman ichaqa thanta puentellantaraq runakunaqa purinku. Mosoq puenteta ruwayta tukuruspañan thanta puenteta thunipunku. Chay jinallataqmi estudiantekunawanpas pasan, manaraq ñaupaq creenciankuta otaq costumbrenkuta saqepunankupaq nishaqtinchisqa yanapananchismi Bibliamanta mosoq yachachikuykunata anchata valoranankupaq. Chaymi yanapanqa ñaupaq costumbrenkuta saqepunankupaq. Chaypaqqa tiempotan necesitakun (Rom. 12:2).

14, 15. ¿Imaynatan entiendechisunman wiñay kausaymanta mana yachaqkunaman? Juj ejemplota willay.

14 Runakunaqa manan juj kutillapiqa aceptanqakuchu Bibliamanta yachachisqanchista, chaymi pacienciakunanchis. Khuyapayakuq kaymi yanapawasun Bibliamanta yachachikuykunata pisi-pisimanta yachachinanchispaq. Ejemplopaq, ¿imaynatan entiendechisunman kay allpapi wiñaypaq kausananchismanta? Askha runakunan chay yachachikuymanta mana imatapas yachankuchu. Wakinqa ninkun: “Wañuq runaqa manañan kausarinmanñachu”, nispa. Jujkunataq ninku: “Allin runaqa cielomanmi ripun”, nispa. Chhaynaqa, ¿imaynatan paykunata yanapasunman?

15 Juj hermanon kay allpapi wiñaypaq kausananchismanta khaynata yachachin: Ñaupaqta Génesis 1:28 textota leespa tapun, ¿maypin Dios munaran runakuna tiyanankuta? ¿Imayna kausanankutan munaran? Yaqa llapallankun kutichinku: “Kay allpapi kusisqa tiyanankutan munaran”, nispa. Chay qhepamantaq Isaías 55:11 textota leespa tapun: “¿Diospa munasqan cambianchu?”, nispa. Llapankutaq kutichinku: “Manan”, nispa. Chay qhepamantaq Salmos 37:10, 11 textota leespa tapun: “¿Bibliapi leesqanchis jina maypin jamuq tiempopi runakuna tiyanqaku?”, nispa. Chhaynata yachachispan askha runaman entiendechiran wiñaypaq kay allpapi tiyananchista Jehová Dios munasqanta.

Jujkunaman cartata apachiy otaq imallatapas paykunapaq ruwayqa kallpachanmanmi (16, 17 parrafokunata qhaway)

16, 17. Proverbios 3:27 textopi nisqanman jina, ¿imakunata ruwaspan rikuchisunman runakunata khuyapayasqanchista? Juj ejemplota willay.

16 Tawa kaq, jujkunapi interesakusqanchistan rikuchinanchis. Ejemplopaq, yaqapaschá predicasqanchis runa ocupasqa kashan chayta reparanchis chayqa, disculpakuspan nisunman: “¿Juj p’unchayta visitamuykimanchu?”, nispa. Chaymantapas sichus imallapipas yanapanata necesitanku kuraq kasqankurayku otaq onqosqa kasqankurayku chayqa, atisqanchisman jinan yanapananchis (leey Proverbios 3:27).

 17 Juj mamaq wawanmi nacesqan p’unchaypi wañupuran, chayta yacharuspan juj hermananchis cartata qelqaran Bibliapi yachachikuykunawan consolananpaq. ¿Imaynan sientekuranku chay cartata leespa? Wawanta pierdeq maman hermananchista niran: “Wawaypa wañupusqan p’unchaypiqa sinchi llakisqan kasharani. Cartaykin ichaqa llapaykuta kallpachawaranku consolawaranku ima. Cartaykitaqa iskay chunka kutita jinaraqmi chay p’unchayqa leerani. ¡Anchatan agradecekuyki!”, nispa. Qhawarisqanchis jina runakunaq imayna sufrisqankupi piensasun chayqa, atisunmi paykuna yanapayta.

AMA PISIPAYCHU

18. 1 Corintios 3:6, 7 textopi nisqanman jina, ¿imatan yuyarinanchis predicashaspa? ¿Imaraykun chayta yuyarinanchis?

18 Tukuy atisqanchistaña kallpachakunchis runakunaman Diosmanta yachachinapaq chaypas, Jehová Diosmi runakunata llaqtanman pusamun (leey 1 Corintios 3:6, 7; Juan 6:44). Chaymantapas sapanka runan decidinan Diosta servinanpaq mana servinanpaqpas sonqonpi imachus kasqanman jina (Mat. 13:4-8). Jesús allin yachachiqña karan chaypas pisi runakunallan yachachisqantaqa uyariranku. Chaymi mana pisipananchischu predicasqanchista askha runakuna mana uyariqtinku.

19. ¿Ima bendicionkunatan chaskisun jujkunapi interesakuqtinchis?

19 Sichus predicasqanchis runakunapi interesakusun chayqa, aswan askha runakunatan yanapasun aswan kusisqataqmi predicasunpas. Rikusunmi qoypi kusikuy kasqanta, “wiñay kausayman apaq ñanninta llapa puriy” munaqkunatataq yanapasun (Hech. 13:48). “Chayrayku, atishaspaqa lliupaq imachus allin kaqta ruwapusun” (Gál. 6:10). Chayta ruwaspan janaq pachapi kaq Papanchista jatunchasun (Mat. 5:16).

64 TAKI Kusisqa yanapakusun cosechaypi

^ párr. 5 Predicasqanchis runakunapi interesakuqtinchisqa aswan kusisqan predicanchis, askha runakunataq predicasqanchista uyariwasunman. Kay estudiopin yachasunchis Jesuspa ejemplonmanta, yachallasuntaqmi tawa yanapaykunamanta, chaykunan yanapawasun predicasqanchis runakunaq imayna sientekusqankuta entiendenanchispaq.

^ párr. 5 ASTAWAN YACHANAPAQ: Khuyapayakuq runaqa reparanmi jujkunaq sufrisqanta otaq llakikusqanta, jinaspa tukuy atisqanta ruwan yanapananpaq.

^ párr. 8Jesuspa yuyaychasqanman hina runakunata yanapasun” nisqa temata leey, 2014 wata 15 mayo killamanta Qhawaq revistapi.

^ párr. 11 Qhaway 2011 watamanta 1 agosto killamanta La Atalaya revistata 21, 22 paginakunata.