Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Jujkuna-jujkunawan sumaqta chaskinakusun

Jujkuna-jujkunawan sumaqta chaskinakusun

“Ama rimapakuspalla jujkuna-jujkunawan sumaqta chaskiykunakuychis” (1 PED. 4:9)

100, 87 TAKIKUNA

1. ¿Imakunapin tarikusharanku apóstol Pedroq tiemponpi iñiqmasikuna?

JAQAY 62, 64 watakunapi jinan apóstol Pedro juj cartata qelqaran “Ponto, Galacia, Capadocia, Asia, Bitinia ladokunapi ch’eqerisqa kaqkunaman” (1 Ped. 1:1). Chay iñiqmasikunaqa qatikachasqa kasqankuraykun chay llaqtakunaman ayqekuranku. Kallpachanata yanapanata iman paykunaqa munasharanku. Sinchi sasan chay tiempokunaqa kasharan. Chaymantapas ‘tukuy imaymanaq tukukunan cercapiñan’ kasharanku. Chayqa pisi watakunallapin Jerusalén llaqtaman chayamuran. ¿Iman chay iñiqmasikunata yanapanman karan chay sasa tiempokunapi? (1 Ped. 4:4, 7, 12.)

2, 3. ¿Imaraykun Pedro niran “jujkuna-jujkunawan sumaqta chaskinakuychis” nispa? (Kay paginapi dibujota qhaway.)

2 Apóstol Pedroqa ‘jujkuna-jujkunawanmi sumaqta chaskiykunakuychis’, nispan niran (1 Ped. 4:9). Arí, chay hermanokunaqa tukuy sonqowanmi sumaqta chaskinakunanku karan. Chaymantapas, paykunaqa reqsinakurankutaq  chayqa astawanraqmi chhaynata chaskinakunanku karan. ¿Imaynatan paykunata yanaparan chhayna sumaq sonqo kasqanku?

3 Astawanmi jujllachanakuranku. Yaqapaschá jayk’aqllapas chay pasarasunki. Pipas wasinman invitawaqtinchisqa sumaqtan chaypi pasarinchis ¿riki? Noqanchis juj hermanokunata invitaqtinchispas astawanmi paykunawan reqsinakunchis ¿riki? Rikusqanchis jina, jujkunawan sumaqta invitarinakuyqa jujllamanmi tukuchiwanchis. Apóstol Pedroq tiemponpipas astawanraqmi chayta ruwananku karan. Noqanchispas ‘tukukuy p’unchaykunapitaq’ kashanchis chayqa, astawanraqmi jujllachanakunanchis (2 Tim. 3:1).

4. ¿Imakunamantan kay estudiopi yachasun?

4 ¿Imakunata ruwaspan rikuchisunman jujkunata sumaqta chaskiq kasqanchista? ¿Imatan ruwasunman jujkunata invitanapaq ama imawanpas jark’achikunanchispaq? ¿Imaynatan qhawarinanchis jujkunaq invitawasqanchista? Chaykunamantan kaypi yachasun.

JUJKUNATA SUMAQTA CHASKISUN

5. ¿Imaynatan juñunakuykunapi rikuchisunman sumaq chaskikuq kasqanchista?

5 Juñunakuykunapi kaspa. Jehová Diosmi juñunakuykunamanqa invitawanchis. Chaymi pipas wasinman jamuqtinqa sumaqta chaskinanchis chay runata (Rom. 15:7). Astawanqa chayllaraq jamuqkunatan chhaynata chaskinanchis. Chaymantapas, Diospa invitasqantaq jamushanku chayqa, manan qhawashananchischu imayna kasqankuta ni imayna p’achakusqankutapas (Sant. 2:1-4). Aswanmi pipas mana atiendeshanchu chayqa, noqanchis payta invitananchis ladonchispi tiyanankupaq. Yanaparinanchismi textokunata maskhaypipas. Chaykunata ruwasun chayqa kusisqan chay runaqa kanqa. Chhaynapitaqmi rikuchisun ‘jujkunata sumaqta chaskiq’ kasqanchista (Rom. 12:13).

6. ¿Pikunatan invitananchis wasinchisman?

6 Mijunapaq pitapas invitaspa. Ñaupaq tiempopiqa costumbren karan jujkunata invitay; chaypin invitaqkunaqa invitasqanku runakunawan sumaqta pasariqku mijuqku ima (Gén. 18:1-8; Juec. 13:15; Luc. 24:28-30). Noqanchispas chhaynan kananchis. Ichaqa, ¿pikunatan invitasunman? Iñiqmasinchiskunatan. Paykunawanmi allinta apanakunanchis, allin amigontintaqmi kananchispas. Chhayna kasun chayqa sasa tiempokuna chayamuqtinmi sumaqta yanapanakusun. Yachasun 2011 watapi Estados Unidospi kaq Betelpi imachus pasasqanta. Ñaupaqqa 6:45 tardentan Qhawaq revistata estudiayta qallarikuq, chaymantan ichaqa umalliq t’aqa cambiaran 6:15 kananpaq. ¿Imapaqmi chayta ruwankuman karan? Betelpi llank’aqkuna astawan reqsinakunankupaqmi. Chhaynatan juj sucursalkunapipas ruwaranku. Chayta ruwakusqanwanmi Betelpi llank’aqkunaqa aswan jujllachasqa kashanku.

7, 8. ¿Imatan ruwasunman discurso qoq iñiqmasikuna jamuqtin?

7 Maytachá kusikunchis congregacionninchista juj iñiqmasikuna discurso qoq jamuqtinqa. Paykunamanta wakinmi kanman juj congregacionmanta iñiqmasikuna, watukuq umalliqkuna, sucursalmanta jamuq iñiqmasikuna ima. ¿Imatan ruwasunman paykuna jamuqtin? (Leey 3 Juan  5-8.) Yaqapaschá wasiman invitaspa imallatapas jaywarisunman. Chhaynapin rikuchisun sumaqta chaskikuq runa kasqanchista.

8 Estados Unidosmanta juj hermanan nin: “Noqaykuqa sapa kutillanmi qosaywan kuska congregacionniykupi discurso qonankupaq jamuq hermanokunata esposankutawan invitayku; unayñan chayta ruwashayku. Kusikunapaqmi paykunawan kayqa. Imaymana experienciakunatan willakunku. Allin kallpachasqapunin chay p’unchaykunaqa kayku”, nispa.

9, 10. a) ¿Pikunatan alojananchis? b) ¿Atinkumanchu juch’uy wasiyoqkuna jujkunata alojayta? Juj ejemplota willay.

9 Wasinchispi alojaspa. Ñaupa tiempopiqa costumbren kallarantaq reqsisqa runakunata wasipi alojay (Job 31:32; Filem. 22). Kunanpas kaqtan ruwanallanchistaq. Ñaupaqtaqa watukuq umalliqkunatan alojananchis. Chaymantapas wakinqa karu llaqtakunamantan jamunku precursorkunapaq escuelaman, umalliqkunapaq escuelaman, juñunakunapaq wasikunata ruwaypi yanapakuq ima. Paykunatapas alojayunanchismi. Wakinqa ima desgraciapas pasasqanraykun mana wasiyoq ima qhepakapunku. Paykunatan alojayunallanchistaq. Manan jayk’aqpas ninanchischu “jatun wasiyoqkunayá alojashachunku” nispaqa. Juch’uyña wasinchis chaypas atillasunmanmi alojaytaqa.

10 Corea del Sur nisqa ladomanta hermanon nin: “Congregacionniykumanmi escuelaman invitasqa hermanokuna chayamunan karan. Noqaykuqa chayraqmi casarakurayku, juch’uyllan wasiykupas karan. Chaymi nisharayku ‘alojasunchu icha manachu kanpas’ nispa. Ichaqa alojaraykun wakin hermanokunata. Casarasqakunapas Diosta tukuy sonqowan servisqanku, kuskamanta llank’asqanku iman noqaykutaqa allinta kallpachawaranku”, nispa.

11. ¿Imaraykun congregacionninchisman jamuq hermanokunata sumaqta chaskiyunanchis?

11 Congregacionninchisman juj hermanokuna jamuqtin. Yaqapaschá mayninpiqa congregacionninchisman hermanokuna jamunqaku yanapakuq. Paykunamanta wakintaqa sucursalmantapaschá kachamunqaku. Paykunapaqqa manapaschá qallariypiqa facilchu kanqa imapas. Imaymanamanpaschá yachakunanku kanqa. ¿Imaynatan noqanchis paykunata yanapasunman? Yaqapaschá wasinchisman invitaspa imallatapas jaywarisunman. Mayta rinanchis kaqtinpas yaqapaschá paykunatawan pusarikusunman. Chaykunata ruwasun chayqa faciltan imamanpas yachakunqaku.

12. ¿Imaymanakunataraqchu preparana pitapas sumaqta chaskinapaq? Juj experienciata willay.

12 Pitapas sumaqta chaskinapaqqa manan imaymanataraqchu preparana (leey Lucas 10:41, 42). Juj casado warmi-qharimanta yachasun. Paykunaqa misioneron karanku, jovenkunallaraqmi karankupas. Paykunaqa nishutas llaqtankuta extrañashasqaku. Hermanonchismi nin: “Juj kutinmi esposayqa nishu triste kasharan, manan imayna yanapayta atisharanichu. Jinallamanmi 7:30 ch’isinta jina punkuykuta takayrakamunku. Kichanaypaqqa juj estudianten chaypi sayashasqa kinsa naranjachantin. Noqaykutas sumaqta chaskiykuyta munawashasqaku. Jinan wasiman  pasaykachispa unuchata jaywarirayku. Chaymantataq q’oñishaq chocolateta invitayurayku. Noqaykuqa manaraqmi yacharaykuchu suajili simi rimayta. Paypas manan yachasqachu rimasqayku simi rimayta. Chay p’unchaymantapachan jujkunawan reqsinakuyta qallarirayku. ¡May kusikunapaqmi chayqa karan!”, nispa.

MANAN IMAWANPAS JARK’ACHIKUNANCHISCHU

13. ¿Imaraykun jujkunata invitananchis?

13 Wakinpaqqa manapaschá facilchu jujkunata invitay. Ichaqa manachus pitapas invitasun chayqa manan juj iñiqmasikunata reqsisunchu. Chaymantapas jujkunata invitasun chayqa manan sapanchischu tarikusun. ¿Imakunan jark’awashasunman jujkuna invitananchista? Chaykunamantan qatimuq parrafokunapi yachasun.

14. ¿Imatan ruwasunman mana tiemponchis ni kallpanchispas kaqtin?

14 Tiempo. Testigokunaqa imaymana ruwanayoqtaq kanchis chayqa, manapaschá wakinpaqqa tiemponchis ni kallpanchispas kanqachu jujkunata invitananchispaq. Chhayna kashan chayqa yaqapaschá ima ruwananchistapas cambiananchis kanqa. Chayta ruwasun chayqa kanqan tiemponchis jujkunata invitanapaq, jujkuna invitawaqtinchis chayman rinapaqpas. Bibliaq nisqan jina yachanapunin jujkuna-jujkunawan sumaqta chaskinakuytaqa (Heb. 13:2). Chaypaqqa yaqapaschá mayninpiqa mana valeq ruwaykunata saqenanchis kanqa.

15. ¿Imanaqtinmi mayninpi manchakusunman jujkuna invitayta?

15 ¿Imaynatan qhawarikunchis? Mayninpiqa p’enqakunchispaschá pitapas invitayta. Yaqapaschá nisunman: “¿Imatataq invitasaqri? ¿Imamantataq rimapayasaqri? Aburrikunqaku chayri”, nispa. Wakinqa pisi qolqenchis kasqanraykupaschá nisunman: “Manan juj hermanokuna jinaqa atiendeymanchu”, nispa. Ichaqa manan chaykunapiqa piensananchischu. Hermanokunata invitaspaqa manan allin wasimanraqchu invitananchis. Imaynaña wasinchis chaypas allin allichasqa limpio kanqa chayqa, chaypin hermanokunaqa gustowan kanqaku.

16, 17. Pitapas invitayta manchakushanchis chayqa, ¿imakunapin piensananchis?

16 Pitapas invitaranchis chayqa, yaqapaschá manchan-manchan chay p’unchayqa karanchis. Chayqa chhaynapunin; Gran Bretaña ladomanta juj umalliq hermanon nin: “Pitapas invitanki chayqa manchan-manchanmi chay p’unchayqa imatapas ruwanki. Ichaqa hermanokunawan sumaqta pasaymi ima manchakuymantapas aswan allinqa. Gustawanmi hermanokunawan juj rato cafeyllatapas tomariy”, nispa. (Filip. 2:4). Yaqa llapa runamanmi gustan experienciankuta willakuy. Chaymi tiempotaqa t’aqananchispuni paykunawan parlarinanchispaq. Juj hermanon nillantaq: “Hermanokunata wasiyman invitaspaymi astawan paykunata reqsini. Chaypin yachanki imaynachus kanku, imaynatas Diostapas reqsiranku chayta”, nispa. Chhaynaqa kallpachakusun jujkunata invitarinanchispaq, sumaqtataq paykunataqa qhawarisunpas, chayta ruwasun chayqa sumaqtan pasarisunchis.

17 Escuelaman invitasqa hermanokunata  alojaq precursoran nin: “Noqaq wasiyqa juch’uyllan, muebleykunapas mauk’akunañan. Chaymi noqaqa mana munasharanichu pitapas alojayta. Ichaqa watukuq umalliqpa esposanmi yanapawaran. Paykunaqa, congregacionkunata visitaspaqa Diosta munakuq hermanokunawansi sumaqta pasanku. Manaña askhachu imanku chaypas chay hermanokunaqa tukuy sonqowansi Diosta munakunku. Chhayna hermanokunawansi paykunaqa confianzapi kanku. Chaykuna niwasqanmi yuyarichiwaran imatachus mamay niwaqku chayta. Paymi erqellaraq kashaqtiyku niwaqku: ‘Aswan allinqa munakuypa kasqanpi yuyu mijuymi’, nispa (Prov. 15:17). Chayraykun noqaqa alojallarani escuelaman jamuq wakin hermanokunata”, nispa.

18, 19. ¿Yanapawasunmanchu invitakuq kay jujkunawan allinta apanakunanchispaq? Explicay chayta.

18 ¿Imaynatan jujkunata qhawarinchis? Yaqapaschá mayqen iñiqmasiwanpas mana allintachu apanakunchis. Yaqapaschá pi iñiqmasipas ima ruwasqanwanpas otaq ima rimasqanwanpas nishuta sonqonchista nanachiwaranchis. Chhayna kaqtinqa manapaschá paykunataqa invitayta munasunchu. Ichaqa, ¿chaywanchu imapas allin kanqa?

19 Bibliaq nisqan jina jujkunata invitasun chayqa allintan paykunawan apanakusun. Hasta enemigonchiskunawanpas chhaynan kanqa (leey Romanos 12:20). Chayrayku, piwanña mana allinpichu kashanchis chaypas invitasun payta. Chayta ruwasun chayqa astawanmi paywan  reqsinakusun. Payta allinta reqsisun chayqa allintan reparasun imaraykus Dios llaqtanman pusamuran chayta (Juan 6:44). Chaymantapas, pitapas invitaspaqa sonqomantan invitananchis manan jawa sonqollachu. ¿Iman chaypi yanapawasunman? Filipenses 2:3 texton. Chaypin nin: “K’umuykuywan jujkunata qankunamanta aswan allinpaq qhawariychis”, nispa. Chhaynaqa, hermanokunaqa noqanchismanta aswan allinpunin imallapipas kanku. Wakinqa yaqapaschá noqanchismanta aswan iñiyniyoq kanku, wakinqa yaqapaschá mana manchakuq kanku, wakinqa yaqapaschá juj ruwaykunapi aswan allin kanku. Chaykunatan qhawarinanchis; chayta ruwasun chayqa, astawanmi paykunata munakusun gustowantaqmi invitasunpas.

¿IMATAN RUWANANCHIS PIPAS INVITAWAQTINCHIS?

Hermanokunaqa kallpachakunkun invitasqankunata allinta atiendenankupaq (20 parrafota qhaway)

20. Pipas invitawaranchis chayqa, ¿imatan ruwananchis? ¿Imaraykun chay allin?

20 Davidmi Diosta tapuran: “Diosníy, ¿pitaq wasiykipi tiyanqa?”, nispa (Sal. 15:1). Chaymantataq niran: “Sasaña kashaqtinpas simi rimarisqanta junt’aqmi”, nispa (Sal. 15:4). Chaymi pipas invitawaranchis chayqa imaña kaqtinpas rinallanchis chayman. Manan yanqapas qasiqa mana atiqman tukunanchischu. Mana chayqa yanqapaqmi kanqa invitawaqninchis hermanoq imapas ruwasqan (Mat. 5:37). Wakinqa juj allin invitacionta chaskinankuraykun ñaupaq invitaqninta ninku “manañan jamusaqchu” nispa. Ichaqa, ¿allinchu kanman chay ruway? ¿Munakuqchu kashasunman? Manan ¿riki? Chaymi noqanchisqa piña imataña invitawanchis chaypas “gracias” nispa chaskiyukunanchis (Luc. 10:7). Mayninpiqa kanqapaschá motivo mana rinanchispaq, chhayna kaqtinqa ñaupaqmantapachan chayta willakunanchis.

21. Pipas invitawasun chayqa, ¿imakunatan respetananchis?

21 Respetananchismi runakunaq costumbrentapas. Wakin llaqtakunapiqa chaskillankun wasinkuman qonqay chayaqkunata, wakin llaqtakunapin ichaqa willanaraq piqpa wasinta rinapaqpas. Wakin llaqtakunapiqa invitasqa runamanmi allinta imatapas servinku, familiamantaq mana; wakin llaqtakunapin ichaqa invitasqapas familiapas igual-llata mijunku. Juj ladokunapiqa q’ara makillan invitaqninkuq wasinta rinku, juj ladokunapin ichaqa mana allinchu chayqa. Wakin partekunapiqa jujta otaq iskayta wijch’uykuspañan piqpa invitasqantapas chaskikunku, wakin partekunapin ichaqa mana allinchu chayqa. Imaynaña tiyasqayki llaqtapi costumbre kanman chaypas kallpachakuy invitaqniyki runa qanwan kusisqa kananpaq.

22. ¿Imaraykun kallpachakunanchis jujkuna-jujkunawan sumaqta chaskinakunanchispaq?

22 Apóstol Pedroq nisqan jina, ‘ñan tukuy imaymanaq tukukunan cercapiña kashanchis’ (1 Ped. 4:7). Chaymi kunan tiempokunaqa astawanraq imaymana sasachakuykuna yapakamushan. Chhaynataq kashan chayqa astawanraqmi jujllachanakunanchis. Arí, kallpachakunanchismi ‘jujkuna-jujkunawan sumaqta chaskinakunanchispaq’ (1 Ped. 4:9). Chayta ruwasun chayqa may munaymi vidanchis kanqa kunanpas wiñay-wiñaypaqpas.