Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 22 ESTUDIO

Kallpachakusun aswan allinta estudianapaq

Kallpachakusun aswan allinta estudianapaq

‘Aswan allin kaqkunatan allinta reparananchis’ (FILIP. 1:10)

35 TAKI ‘Aswan allin kaqkunata reparasun’

KAYKUNAMANTA YACHASUN *

1. ¿Imaraykun wakin hermanonchiskunapaq sasa estudiay?

KAY tiempopi runakunaqa askha horatan llank’ananku mantenekunankupaq. Askha hermanonchiskunan ch’isiyaqta llank’ananku familiankuta mantenenankupaq. Wakinqa llank’anankuman rinankupaqpas askha horatan viajananku. Wakin hermanonchiskunataq jump’isparaq llank’anku. Chaymi sayk’usqa kaspa manaña kallpanku kanchu estudianankupaq.

2. ¿Ima ratopin estudianki?

2 Llapanchismi tiempota orqonanchis Diospa palabranta qelqanchiskunatapas allintapuni estudianapaq. Chaymantan kanqa Jehová Dioswan allinpi kasqanchis, wiñay kausayniyoq kananchispaqpas (1 Tim. 4:15, 16). Wakin hermanokunaqa tutamantan estudianku, chay ratopiqa manan pipas bullata ruwanchu, allin rijch’asqataq kashanku samasqankurayku. Jujkunataq puñunankupaqña kashaqtinku juj rato estudiaspa imachus yachasqankupi piensanku, chay ratopiqa manan pipas paykunata distraenchu.

3, 4. ¿Iman pasaran qelqanchiskunawan? ¿Imaraykun chay cambiokunata ruwakuran?

3 Qanpas ninkichá: “Orqonanchismi tiempota estudianapaqqa”, nispa. Ichaqa, ¿imatan estudiananchis? Yaqapaschá ninchis: “Imaymanan kashan estudianapaqqa, ichaqa sasan llapanta estudiayqa”, nispa. Wakinqa atinkun llapanta estudiayta, askha hermanonchiskunan ichaqa mana atinkuchu. Chayta reparaspan umalliq t’aqaqa decidiran internetpi papelpi lloqsimuq qelqanchiskunata pisiyachinanpaq.

4 Ejemplopaq, manañan Anuario de los testigos de Jehová nisqa libroqa lloqsimunñachu. Chaypa rantinpin sumaq experienciakuna lloqsimushan jw.org® nisqapi, JW Broadcasting® nisqa canalpipas. Chaymantapas kunanqa watapin  kinsa kutillataña Qhawaq ¡Despertad! revistanchiskuna llapa runakunapaq lloqsimushan. Chaytaqa ruwakuran ‘aswan allin kaqkunaman’ tiemponchista qonanchispaqmi (Filip. 1:10). ¿Imamanmi tiemponchista masta qonanchis? ¿Imakunatan ruwananchis Bibliata estudiaspa allinta beneficiakunanchispaq? Chaymanta kunan yachasun.

¿IMAKUNATAN ASTAWAN ESTUDIANANCHIS?

5, 6. ¿Imakunatan allinta estudiananchis?

5 ¿Imakunatan astawan estudiananchis? Astawanqa Diospa palabranta estudianapaqmi tiempota orqonanchis. Semanapi Bibliata estudianapaq capitulokunataqa pisiyachikuranmi. Chhaynapin tiemponchis kan yachasqanchispi piensanapaq astawan investiganapaqpas. Asignasqa capitulokunataqa manan leeyllachu leenanchis, aswanpas sonqonchisman chayananpaq, Diosta astawan munakunanchispaq jinan estudiananchis (Sal. 19:14).

6 ¿Imakunatawanmi allinta estudiananchis? Juñunakuypi estudianapaq Qhawaq revistapi lloqsimuq yachachikuykunata, Biblia estudianapaq juñunakuypi yachachikuykunata, chaupi semana juñunakuypi juj yachachikuykunatawan. Chaymantapas Qhawaq ¡Despertad! revistanchiskunapi lloqsimuq yachachikuykunatapas leenanchismi.

7. ¿Imaraykun mana llakikunanchischu internetpi, JW Broadcasting canalpipas llapanta mana estudiasqanchismanta mana qhawasqanchismantapas?

7 Ichaqa tapukushankipaschá: “Jw.org paginanchispi, JW Broadcasting canalpipas lloqsimuq qelqakunata videokunatapas, ¿llapantachu estudianay?”, nispa. Llapantaqa manan estudiayta atisunmanchu. Kay ejemplopi piensasun: Juj restaurantepiqa imaymana clase mijunakuna kan, manan llapantaqa mijuyta atisunmanchu riki, aswanpas atisqallanchistan mijusunman. Chay jinallataqmi internetpi lloqsimuq qelqanchiskunatapas atisqanchisman jinalla leenanchis qhawananchis estudiananchispas. Kunanqa kay tapuykunata kutichisun: ¿Imataq estudiayri? ¿Imaynatan aswan allinta estudiasqaykimanta beneficiakuwaq?

ESTUDIANAPAQQA KALLPACHAKUNANCHISMI

8. a) ¿Imakunatan ruwananchis Qhawaq revistanchista estudiashaspa? b) ¿Imaynatan yanapawanchis chhaynata estudiasqanchis?

8 Estudiayqa manan yanqallata leespa tapuykunata marcaychu. Aswanpas tukuy yuyaywanmi leenanchis imallatapas yachanapaq. Chayta entiendenapaq qhawarisun imaynatas Qhawaq revistanchista estudiasunman chayta. Ñaupaqtaqa “Kaykunamanta yachasun” nisqatan leenanchis imamantas chay estudiopi rimakunqa chayta yachanapaq. Chaymantataq título, subtítulo, tukuyninpi kaq tapuykunatawan leenanchis, piensananchistaq leesqanchispi. Chay qhepamantaq susigollawan leenanchis llapa parrafokunata. Sapanka parrafoq qallariyninpin willashan imamantas chay párrafo rimanqa chayta, chaymi chayta allinta entiendenanchis. Chaymantapas parrafokunata leespaqa piensananchismi imaynatas chaypi nisqan apoyashan subtítulo nisqapi yachachikuyta estudiasqanchis yachachikuytapas. Wakin palabrakunamanta otaq ima yachachikuymantapas astawan yachayta munaspaykiqa anotay astawan investiganaykipaq.

9. a) ¿Imaraykun Qhawaq revistanchispi kaq textokunata entiendenanchis, imaynatan chayta ruwasunman? b) Josué 1:8 textopi nisqanman jina, ¿imatawanmi ruwananchis textokunata leesqanchis qhepaman?

9 Qhawaq revistanchista juñunakuypi  estudiaspaqa Bibliatan estudiashanchis. Chaymi revistanchispi kaq textokunataqa leenanchis entiendenanchis ima, astawanqa ruwananchis juñunakuypi leenapaq marcasqa textokunatan. Chaymantapas reparananchismi imaynatas chay textopi yachachikuy parrafoq yachachisqanta apoyasqanta. Chaymantapas tiempotan orqonanchis textokunaq yachachisqanpi piensananchispaq, imaynatas chayman jina ruwasunman chaypipas (leey Josué 1:8).

Tayta-mamakuna, wawaykichista yachachiychis estudiayta (10 parrafota qhaway) *

10. Hebreos 5:14 textopi nisqanman jina, ¿imaraykun tayta-mamakuna familiantin Diosta adorasqankupi wawankuta yachachinanku imayna estudiayta imayna investigaytapas?

10 Kunanqa rimasun familiantin Diosta adorasqanchismanta. Tayta-mamakunaqa munankun chay juñunakuyninku sapa semana sumaqta aparikunanta. Paykunaqa yachanankun imatachus estudianankuta. Qhawankumanmi sapa killa JW Broadcasting canalpi lloqsimusqanta mayninpitaq sumaq proyectokunata ruwankuman, ejemplopaq juch’uyllapi Noepa arcanta ruwankuman. Ichaqa astawanqa wawankutan yachachinanku estudiayta. Wawakunaqa yachananku juñunakuykunapaq preparakuyta, yachanankutaqmi escuelankupi imamantapas tapuqtinku kutichinankupaq imayna investigaytapas (leey Hebreos 5:14). Sichus tiempota orqonqaku Bibliapi juj yachachikuymanta investiganankupaq chayqa, aswan faciltan juñunakuykunapi asambleakunapi discursokunata uyarispa mana distraekunqakuchu, manaña videokuna kaqtinpas. Ichaqa wawanchiskunawan jayk’a tiempota estudianapaqqa qhawarinanchismi edadninta, ratollachus distraekun manachus chaytapas.

11. ¿Imaraykun estudiantenchiskunata yachachinanchis investigayta?

11 Bibliamanta yachachisqanchis runakunapas yachanankun estudiayta. Paykunawan estudiayta qallarishaspaqa kusikuranchismi estudiananchispaq otaq juñunakuykunapaq preparakushaspa tapuykunata marcasqankuwan. Ichaqa yachachinanchismi investigayta estudiaytapas. Chay ruwayta yachaqtinqa ima problemapipas tarikuspaqa manan hermanokunataraqchu tapukunqa, aswanpas pay kikinmi qelqanchiskunata estudiaspa yachanqa imachus ruwananta.

YACHANANCHISMI IMARAYKU ESTUDIASQANCHISTA

12. ¿Imaraykun estudiananchis?

12 Sichus estudiay mana gustasunkichu chayqa, yaqapaschá ninki: “Manan jayk’aqpas  estudiaspaqa kusikusaqchu”, nispa. Ichaqa atiwaqmi estudiaspa kusikuytaqa. Qallariypiqa pisi tiempollatan estudiawaq, jinaspa pisi-pisimanta astawan estudiawaq. Chaymantapas yachananchismi imaraykuchus estudiasqanchista. Astawanqa estudianchis Diospa sonqonpaq jina kausananchispaqmi. Chaymantapas estudiasunmanmi pipas ima tapuyta ruwawasqanchista kutichinapaq, otaq ima problemapipas tarikusqanchista imayna allichayta yachananchispaq.

13. a) ¿Imakunatan juj wayna ruwanan Bibliaq yachachisqanta escuelanpi defiendenanpaq? b) Colosenses 4:6 textopi nisqanman jina, ¿imaynatan rimananchis?

13 Juj ejemplota qhawarisun, juj waynaq escuelanpin llapa compañeronkuna evolución yachachikuypi creenku. Payqa munanmi Bibliaq yachachisqanta defiendeyta, ichaqa mana atinanpaqmi qhawarikun. Chaymi chay waynaqa ñaupaqta investiganan. Kay yuyaywanmi investiganan: 1) Jehová Dios tukuyta kamasqanmanta astawan convencekunanpaq. 2) Bibliaq yachachisqanta aswan allinta defiendenanpaqwan (Rom. 1:20; 1 Ped. 3:15). Chaypaqqa ñaupaqtan tapukunan: “¿Imaraykun compañeroykuna evolucionpi creenku?”, nispa. Wakin profesionniyoq runakunan ninku: “Evolución yachachikuyqa cheqaqmi”, nispa; chayta uyarispallan askha evolucionpi creenku. Chaymi chay waynaqa allinta qelqanchiskunata investiganan evolucionmanta imata nisqanta. Jinaspa juj otaq iskay yachachikuykuna investigasqanta willanman chaymanta yachayta munaqman. Chayta ruwaspan reparanqa Bibliaq yachachisqanta defiendeyqa mana sasachu kasqanta (leey Colosenses 4:6).

¿IMAKUNATAN RUWANANCHIS ESTUDIAY GUSTAWANANCHISPAQ?

14-16. a) ¿Imatan ruwasunman Bibliapi wakin librokunamanta mana allinta yachaspa? b) ¿Imaynatan 2 Reyes, 2 Crónicas, Oseas librokuna yanapawasunman Amós librota aswan allinta entiendenapaq? (Qhaway “ Bibliaq willasqan runakunata aswan allinta reqsisun” nisqa recuadrota.)

14 Sichus jamuq semana juñunakuyninchispi yachasunman Oseas libromanta Malaquías librokama jujnin kaq libromanta, pisillatataq chay libromanta yachasunman chayqa, ¿imatan ruwasunman astawan yachananchispaq?

15 Ñaupaqtaqa tapukunanchismi: “¿Pin chay librota qelqaran? ¿Maypin tiyaran? ¿Ima ruwanayoqmi karan?”, nispa. Chaykunata yachaspan entiendesun imaraykuchus qelqasqanpi wakin palabrakunata otaq wakin ejemplokunata utilizasqanta. Chay librota leeshaspan piensananchis qelqasqan libropi ima palabrakunata utilizasqanpi, chaymi yanapawasun imayna runa kasqanta yachanapaq.

16 Jayk’aqmi chay libro qelqakuran chaytapas yachananchismi. Chaypaqqa Traducción del Nuevo Mundo de las Santas Escrituras (con referencias) nisqapin qhawasunman “Tabla de los libros de la Biblia” nisqata. Chaymantapas Bibliata estudianapaq yanapaykuna nisqapin qhawarisunman reykunamanta profetakunamanta recuadrota, chayqa 3 t’aqapi tarikun. Sichus estudiasqanchis libro profeciakunamanta willashan chayqa, investigasunmanmi imaynachus chay tiempopi runakuna karanku chayta. Tapukusunmanmi: “¿Ima millay ruwaykunata saqenankupaqmi chay profeta willaran? ¿Pikunan chay tiempopi tiyaranku?”, nispa. Chaymantapas astawan yachanapaqmi Bibliapi tarikuq  juj librokunatawan estudiasunman. Ejemplopaq, Amós 1:1 textopin dirigiwashanchis 2 Reyes, 2 Crónicas librokunapi kaq versiculokunaman, chaypin willashan imaynatas Amospa tiemponpi runakuna kausaranku chayta. Chaymantapas leellasunmantaqmi Oseas librota, yaqachus Oseasqa Amospa tiemponpin kausallarantaq. Chaykunatawan estudiaspan aswan allinta entiendesunman imaynachus Amospa tiemponpi runakuna karanku chayta (2 Rey. 14:25-28; 2 Crón. 26:1-15; Os. 1:1-11; Amós 1:1).

MANA REPARAY WILLAKUYKUNATA QHAWARIY

17, 18. Bibliata estudiashaspa mana reparay willakuykunamanta astawan yachaspaqa kusikunchismi, ¿imaraykun chayta ninchis? Kaypi kaq ejemplokunata willay otaq qanpa investigasqaykita.

17 Bibliata leespaqa qhawarinanchismi mana reparay willakuykunatapas. Ejemplopaq, Zacarías 12 capitulopin willashan Mesiaspa wañunanmanta (Zac. 12:10). 12 versiculopin nishan ‘Natanpa miraynin’ Mesiaspa wañusqanmanta khuyayta waqanankuta. Jinan tapukusunman: “¿Imaynapitaq Mesiasri Natanpa mirayninmanta jamuran? ¿Maypin chaymanta masta yachayman?”, nispa. Investigaspan reparanchis Zacarías 12:12 textoqa, 2 Samuel 5:13, 14 textoman dirigiwasqanchista. Chay textopin willashan Natanqa Davidpa churin kasqanta. Chaymantapas Lucas 3:23, 31 textomanmi dirigiwallanchistaq. Chaypitaq willashan Jesusqa Natanpa mirayninmanta jamusqanta, ichaqa Mariaq partenmanta (qhaway 2017 wata agosto killa Qhawaq revistapi 32 paginapi 4 parrafota). ¡Chaykunata yachaspaqa kusikunchismi riki! Noqanchisqa yacharanchismi Jesusqa Davidpa mirayninmanta jamunanta, Davidmi ichaqa 20 qhari wawakunayoq karan (Mat. 22:42). Natanpa mirayninmanta  Jesús jamusqanta entiendespan reparanchis imaraykuchus mirayninqa Jesuspa wañusqanmanta khuyayta waqasqankuta.

18 Juj ejemplotawan qhawarisun. Lucas 1 capitulopin ángel Gabriel Mariaman willaran qhari wawanmanta, niranmi: “Payqa jatunmi kanqa, ‘ancha jatun Diospa Churin’ nisqataqmi kanqapas. Jehová Diosmi paytaqa ñaupa taytan Davidpa trononpi reyta churanqa. Jinan Jacobpa mirayninta wiñaypaq kamachinqa”, nispa (Luc. 1:32, 33). Yaqapaschá chay textota leespa masta qhawarinchis Diospa churinmi kanqa nisqa yachachikuyta. Ángel Gabrielmi ichaqa willallarantaq Jesús rey kananta. Chaymi tapukusunman: ¿Imapin María piensaran chayta uyarispa? Niranchu, ¿rey Herodes rantinpichu waway Israelpi kamachikunqa? Chhayna kaqtinqa mamantaq kasaq chayqa, ¡reynachá kasaq, familiaypas palaciopichá tiyanqa! nispachu niran. Mariaqa manan chaykunataqa angelta tapuranchu. Manataqmi mañakuranchu Diospa gobiernonpi juj puestota qonanpaq. Jesuspa iskay discipulonkunan ichaqa chayta mañakuranku (Mat. 20:20-23). Chaykunata qhawarispan sut’ita yachanchis k’umuykukuq warmipuni kasqanta.

19, 20. Santiago 1:22-25; 4:8 textokunapi nisqanman jina, ¿imaraykun estudiananchis?

19 Manan qonqananchischu: Bibliatapas qelqanchiskunatapas estudianchis Jehová Diosta astawan munakunanchispaqmi. Imayna kasqanchista qhawarikunanchispaq, imakunapi cambiananchis kasqanta yachananchispaqpas, chhaynapin Diospaq jina kausasun (leey Santiago 1:22-25; 4:8). Chay jinaqa sapa kuti estudiaspan Jehová Diosmanta santo espiritunta mañakunanchis. Rogakunanchistaq sonqonchisman chayananpaq, imakunapi cambiananchistapas sut’ita reparachiwananchispaqwan.

20 Chay jinaqa kallpachakusun Salmos 1:2, 3 textopi Diosta serviq runa jina kananchispaq, chaypin nin: “Payqa Señor Diospa kamachikuy siminwanmi kusikun, chaytan tutapas p’unchaypas yuyaymanan [...]. ¡Imapas ruwasqanqa allillanpunin!”, nispa.

88 TAKI Yachachiway ñanniykikunata

^ párr. 5 Sumaq sonqo Jehová Diosninchisqa imaymanatan qowanchis leenapaq, estudianapaq, qhawanapaqpas. ¿Imakunatan estudiananchis? ¿Imakunatan ruwananchis aswan allinta estudiananchispaq? Chaykunamantan kay estudiopi yachasunchis.

^ párr. 61 FOTOMANTA WILLAKUY: Juj tayta-maman wawankunaman yachachishanku Qhawaq revistanchista preparakuyta.

^ párr. 63 DIBUJOMANTA WILLAKUY: Juj hermanonchismi Amós libro qelqaqmanta astawan investigashan. Qhepanpi kaq dibujokunapin rikushanchis Bibliamanta textokunata leespa imakunapichus hermanonchis piensasqanta.