Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 31 ESTUDIO

“Ama pisipasunchu”

“Ama pisipasunchu”

“Chayrayku, ama pisipasunchu” (2 COR. 4:16)

128 TAKI Tukukuykama aguantasun

KAYKUNAMANTA YACHASUN *

1. ¿Imatan cristianokuna ruwananchis?

CRISTIANOKUNAQA carrerapipas kashasunman jinan phawashanchis wiñay kausay premiota chaskinanchispaq. Unayña otaq chayllaraq phawashanchis chaypas tukunanchiskaman phawananchis. Apóstol Pablon Filipos llaqtapi cristianokunaman sumaq consejokunata qoran. Chay cristianokunamanta wakinqa unayñan Jehová Diosta servisharanku, allintaña Diosta servisharanku chaypas Pablon yuyarichiran ama pisipaspa phawashanallankupaq. Munaranmi pay jina ‘ñaupaqman qhawaspa phawashanallankuta’ (Filip. 3:14).

2. ¿Imaraykun allinpuni karan Filipos llaqtapi cristianokunaman apóstol Pabloq consejo qosqan?

2 Pabloq consejonkunaqa allintan yanaparan Filipos llaqtapi cristianokunata. Paykunaqa qallariymantapachan qatikachasqa karanku. 50 watapi jinan Pablowan Silaswan Filipos llaqtata riranku Jehová Dios Macedonia llaqtaman rinankupaq niqtin (Hech. 16:9). Chaypin tariranku Lidia sutiyoq warmita, Jehová Diosmi chay warmiq sonqonta kichariran tukuy yuyaywan allin willakuykunata uyarinanpaq (Hech. 16:14). Pisi tiempomantataq paypas llapa wasinpi tiyaqkunapas bautizakuranku. Satanasmi ichaqa paykuna contra jatariran, chaymi wakin runakuna Pablota Silastawan jap’ispa autoridadkunaman aparanku, llullakuspataq niranku: “Llaqtanchistan ch’aqwachishanku”, nispa. Jinan Pablota Silastawan waqtaranku, carcelpi wisq’aranku, qhepamantaq niranku llaqtankumanta ripunankupaq (Hech. 16:16-40). Paykunan ichaqa mana pisiparankuchu. Filipos llaqtamanta chayllaraq bautizakuq cristianokunapas mana  pisipaspan qatikachayta aguantaranku Pablota Silastawan qatikuspa.

3. ¿Imatan Pablo yacharan? ¿Ima tapuykunamantan kay estudiopi yachasun?

3 Pabloqa decidisqan kasharan aguantashanallanpaq (2 Cor. 4:16). Payqa yacharanmi premionta chaskinanpaqqa mana pisipaspa phawashanallan kasqanta. ¿Imatan paypa ejemplonmanta yachanchis? ¿Kay tiempopi ima ejemplokunan yanapawasunman sasachakuykunapiña tarikuspapas aguantananchispaq? ¿Imaynatan sumaq kausayta suyakusqanchis yanapawanchis mana pisipaspa phawashanallanchispaq?

¿IMAYNATAN YANAPAWANCHIS PABLOQ EJEMPLON?

4. ¿Imatan Pablo ruwaran wasinpi preso jina tarikuqtin?

4 ¿Imaynapin Pablo tarikusharan Filipos llaqtapi cristianokunaman cartata qelqashaspa? Payqa Roma llaqtapin wasinpi preso jina tarikuran, chaymi predicananpaqqa mana lloqsiyta atiranchu. Chaywanpas visitaqninkunamanmi predicashallaran, iñiq t’aqakunamantaq cartakunata qelqaran. Kay tiempopipas wasinkumanta mana lloqsiyta atiq hermanonchiskunan kallpachakunku visitaqninkunaman predicanankupaq, cartakunatapas qelqanku wasin-wasinta predicashaspa mana tarisqanchis runakunaman.

5. Filipenses 3:12-14 textopi nisqanman jina, ¿iman Pablota yanaparan mana pisipaspa Diosta servishanallanpaq?

5 Pablotaqa manan jark’aranchu allinkuna ruwasqan mana allinkuna ruwasqanpas Diosta tukuy sonqonwan servishanallanpaq. Chaymi niran: “Tukuy imaymanata qhepapi qonqampuspaymi imakunachus ñaupaqpi kashan chayman phawashani”, nispa (leey Filipenses 3:12-14). ¿Imakunan Pablota jark’anman karan tukuy yuyaywan Dios servinanta? Ñaupaq kaq, judío religionpi allin reqsisqa kasqan. Paymi ichaqa chaykunata “mana valeq q’opata” jina qhawariran (Filip. 3:3-8). Iskay kaq, llakikuranña cristianokunata qatikachasqanmanta chaypas, manan chayraykuqa Jehová Dios serviyninta pisiyachiranchu. Kinsa kaq, apóstol Pablo Diosta servispa qatikachasqaña, maqasqaña, carcelpi wisq’asqaña, yarqaypiña tarikuran chaypas manan niranchu: “Askhatañan ruwaruni”, nispaqa (2 Cor. 11:23-27). Chhaynapiña tarikuran chaypas yacharanmi Jehová Diosta servishanallan kasqanta, chaytan noqanchispas ruwananchis.

6. ¿Imakunata ruwaspan Pabloq ejemplonta qatikusunman?

6 ¿Imakunata ruwaspan Pabloq ejemplonta qatikusunman? Yaqapaschá wakinninchisqa nishuta llakikushanchis ñaupaqpi jatun juchakunata ruwasqanchismanta. Chhayna kaqtinqa, estudiasunmanmi noqanchisrayku Jesuspa sacrificakusqanta, chhaynapin manaña juchachakusunchu. Chaymantapas wakin hermanonchiskunan llank’anankuta saqeranku Jehová Diosta astawan servinankurayku. Chayta ruwaq cristianoqa manan munapayananchu ñaupaqpi saqesqanta (Núm. 11:4-6; Ecl. 7:10). Chaymantapas wakin hermanonchiskunaqa imaymanatañan ruwaranku Jehová Diosta servisqankurayku otaq askha pruebakunata aguantaranku. Chaykunata yuyariyqa yanapawanchismi Jehová Diosta astawan munakunanchispaq, ichaqa manan ninanchischu: “Askhatañan ruwaruni, kunanqa samarisaq” nispaqa (1 Cor. 15:58).

Diosta servishaspaqa manan imawanpas distraekunachu, premionchista chaskinanchis yuyaywantaq phawananchis (7 parrafota qhaway)

7. 1 Corintios 9:24-27 textopi nisqanman jina, ¿ima yuyaywanmi cristianokuna phawananku? Juj ejemplota willay.

 7 Pabloqa entienderanmi Jesuspa “tukuy atisqaykichista kallpachakuychis” nisqanta (Luc. 13:23, 24). Payqa yacharanmi premiota chaskinankama kallpachakunan kasqanta. Chaymi Dios serviyta compararan carrerapi phawaywan (leey 1 Corintios 9:24-27). Carrerapi phawaqkunaqa manan imawanpas distraekunkuchu, aswanpas ganay yuyaywan phawashallanku. Chay jinallataqmi noqanchispas Pablo jina premionchista chaskinanchis yuyaywan phawashanallanchis ama imawanpas distraekuspa.

AMA PISIPASUNCHU SASACHAYKUNAPI TARIKUSPA

8. ¿Imakunan jark’awasunman tukuy sonqowan Jehová Dios servinanchista?

8 ¿Imakunan jark’awasunman tukuy sonqowan Jehová Dios servinanchista? Suyakusqanchis mana usqhaylla junt’akuqtin, kallpanchis pisiyaqtin, unay tiempo sasachakuykunapi tarikuqtinchis ima. Wakin hermanokunan ichaqa chaykunata atiparanku, paykunamanta yachayqa yanapawasunmi (Filip. 3:17).

9. ¿Iman pasawasunman imachus suyasqanchis mana usqhaylla junt’akuqtin?

9 Suyakusqanchis mana usqhaylla junt’akuqtin. Maytan munanchis Jehová Diospa promesankuna junt’akunanta. Profeta Habacucpas maytan munaran Judá llaqtapi mana allin ruwaykuna chinkananta, Jehová Diospas niranmi chayta makilla suyakunanpaq (Hab. 2:3). Ichaqa imachus suyasqanchis mana usqhaylla junt’akuqtinqa pisikallpayasunmanmi (Prov. 13:12). Chaymi wakin hermanokunata pasaran 1914 watapi. Askhan piensaranku chay watapi janaq pachaman ripuyta. Ichaqa, ¿imatan ruwaranku mana junt’akuqtin?

Royal, Pearl matrimonioq suyakuyninqa manan 1914 watapi junt’akuranchu, chaywanpas wañupunankukaman junt’aq sonqowan Diosta serviranku (10 parrafota qhaway)

10. ¿Imatan juj matrimonio ruwaran suyakusqanku mana usqhaylla junt’akuqtin?

10 Royal, Pearl matrimoniomanta rimasun. Royal hermanonchisqa 1908 watapin  bautizakuran 20 watanpi. Payqa piensaranmi pisi tiempollamanta janaq pachaman ripuyta. Chaymi 1911 watapi Pearl hermanata niran: “Yachankin 1914 watapi imachus pasananta. Casarakunanchis kaqtinqa casarakullasunña”, nispa. Ichaqa 1914 watapi janaq pachaman ripunankupaq suyakusqanku mana junt’akuqtinpas Jehová Diostan servishallaranku. Paykunaqa Jehová Diospaq junt’aq kaypin masta preocupakuranku manan premionku chaskiypichu. Decidisqan kasharanku mana pisipaspa phawashanallankupaq, chaymi wañupunankukama Jehová Diosta serviranku. Maytan munanchis Diospa promesankuna junt’akunanta, sutin jatunchasqa kananta, allin kamachikuq kasqantapas sut’ita yachanankuta. Chaykunaqa Diospa señalasqan tiempopin junt’akunqa. Chaykaman ichaqa Dios serviypi ocupasqa kashananchis, manataqmi pisikallpayananchischu suyakusqanchis mana usqhaylla junt’akuqtinqa.

Sinchi kuraqña kashaspapas Arthur hermanonchisqa Diospaqmi llank’ashallaran (11 parrafota qhaway)

11, 12. ¿Imaraykun atinchis tukuy sonqowan Jehová Dios serviyta kallpanchis pisiyaqtinpas? Juj ejemplota willay.

11 Kallpanchis pisiyaqtin. Allin iñiyniyoq kananchispaqqa manan phawaqkuna jinachu allin kallpayoq kayta necesitanchis. Wakin hermanonchiskunaq kallpanña pisiyapushan chaypas kallpachakushallankun allin iñiyniyoq kanankupaq (2 Cor. 4:16). Yachasun Arthur Secord hermanomanta. * Payqa Betelpin 55 watakunaña llank’asharan. 88 watanpi kashaspan ichaqa onqopuran jinan juj hermananchis payta cuidaran. Juj p’unchaymi hermananchis payta niran: “Hermano Arthur, askha watakunañan Jehová Diosta serviranki”, nispa. Hermano Arthurmi ichaqa asikuspa niran: Arí cheqaqmi nisqaykiqa. Ichaqa manan ñaupaqpi ruwasqanchischu valen aswanpas kunan ruwasqanchismi”, nispa.

12 Manañapaschá ñaupaqpi jinañachu Jehová Diosta servishanki onqosqaykirayku, chhayna kaqtinqa ama pisipaychu. Jehová Diosqa manan qonqanchu payta servinanchispaq ñaupaqpi tukuy ruwasqanchista (Heb. 6:10). Manan may tukuyta Jehová Diospaq ruwasqanchiswanchu rikuchinchis anchata munakusqanchistaqa, aswanpas tukuy atisqanchisman jina kusisqa sonqowan payta servispan (Col. 3:23). Payqa yachanmi imaynapi tarikusqanchista chaymi mana mana atinanchistaqa mañawanchischu (Mar. 12:43, 44).

Anatoly, Lidiya matrimonion Diospaq junt’aq karanku sasachakuykunapiña tarikuspapas (13 parrafota qhaway)

13. ¿Imapin tarikuranku Anatoly, Lidiya hermanonchiskuna? ¿Imaynatan paykunaq ejemplon kallpachawanchis ima sasachakuypiña tarikuqtinchispas?

 13 Unay tiempo sasachakuykunapi tarikuqtinchis. Wakin hermanonchiskunan Jehová Diosta servisqankurayku askha watakuna qatikachasqa maqasqa ima karanku. Rimasun Moldavia nacionmanta Anatoly hermanomanta *. 12 watanpi kashaqtinmi autoridadkuna papanta carcelpi wisq’aranku, qhepamantaq Siberia ladoman aparanku, chayqa 7.000 kilómetros karupin tarikuran. Juj wata qhepamantaq payta, mamanta, abuelonkunatawan apallarankutaq Siberia ladoman. Tiempowanmi juñunakuykunaman riyta atiranku, chaypaqmi ichaqa 30 kilómetros jinata rit’ipi purinanku karan. Juj tiempon Anatoly hermanonchista juj ladoman aparanku, chaymi kinsa wata Lidiya esposanta juj watayoq ususintawan mana rikuyta atiranchu. Chhaynapiña tarikuranku chaypas junt’aq sonqowanmi Jehová Diosta servishallaranku. Kunanqa hermanonchisqa 82 watanpin kashan Asia Central sucursalmantataq jujnin encargakuq kashan. Paykuna jinan tukuy atisqanchista kallpachakunanchis Diosta servishanallanchispaq (Gál. 6:9).

PREMIONCHISTA CHASKIYPIN YUYAYNINCHIS KANAN

14. ¿Imatan apóstol Pablo ruwanan karan premionta chaskinanpaq?

14 Apóstol Pabloqa decidisqan kasharan premionta chaskinankama phawashanallanpaq. Janaq pachapaq ajllasqa kaspan suyakuran chayman riyta, ichaqa phawashanallanmi karan (Filip. 3:14). Filipos llaqtapi cristianokunata chayta entiendechinanpaqmi juj ejemplota willaran.

15. ¿Ima ejemplowanmi apóstol Pablo Filipos llaqtapi cristianokunata kallpacharan?

15 Apóstol Pablon Filipos llaqtapi cristianokunata yuyarichiran: “Janaq pachapin llaqtanchis kashan”, nispa (Filip. 3:20). ¿Imaraykun yuyarichiran? Chay tiempopiqa Roma llaqtayoq runakunallan imaymana beneficiokunata chaskiranku. * Janaq pachapaq ajllasqa cristianokunan ichaqa aswan askha beneficiokunata chaskinanku  karan. Roma llaqtayoq kayqa manan imapaschu karan janaq pacha llaqtayoq kaywanqa. Chaymi Pabloqa chay cristianokunata kallpacharan: “Cristomanta allin willakuykunaman jinapuni kausaychis”, nispa (Filip. 1:27). Kay tiempopi janaq pachapaq ajllasqa cristianokunaqa tukuy atisqankutan kallpachakunku janaq pachapi kausanankupaq, chaymi allin ejemplo noqanchispaq kanku.

16. Filipenses 4:6, 7 textopi nisqanman jina, ¿imatan ruwashanallanchis janaq pachapaqña otaq kay pachapaqña suyakuyniyoq kaspa?

16 Janaq pachapaqña otaq kay pachapaqña suyakuyninchis kashan chaypas phawashanallanchismi. Imaynapiña tarikuspapas manan saqesqanchiskunapiqa piensananchischu, nitaq imawanpas jark’achikusunchu iñiyninchis wiñananta (Filip. 3:16). Yaqapaschá unayña suyashanchis Diospa promesankuna junt’akunanta, otaq kallpanchis pisiyapushan. Unayñapaschá aguantashanchis sasachaykunata qatikachaykunatapas. Imaynaña kaqtinpas ama sinchita llakikusunchu aswanpas tukuy llakikuyninchista Diosman willakusun, jinan payqa runaq mana aypasqan thaj kayta qowasunchis (leey Filipenses 4:6, 7).

17. ¿Imamantan qatimuq estudiopi yachasun?

17 Carrerapi phawaqkunaqa metaman chayashaspaqa astawanmi phawanku mana juj ladokunata qhawaspa. Noqanchispas ñan carreranchista tukunanchis patapiña kashanchis, chaymi premionchista chaskiy yuyaywan phawashanallanchis. ¿Imatan ruwananchis ñaupaqllaman mana pisipaspa phawashanallanchispaq? Qatimuq estudiopin yachasun imakunatas ñaupaqman churananchis chayta, imaynatas ‘aswan allin kaqkunata allinta reparasunman’ chaytapas (Filip. 1:9, 10).

79 TAKI Paykunata iñiyninkupi kallpachay

^ párr. 5 Unayña otaq chayllaraq Jehová Diosta servishanchis chaypas, kallpachakushanallanchismi aswan allin cristiano kananchispaq. Apóstol Pablon Filipos llaqtapi cristianokunata niran ama jayk’aqpas pisipanankupaq. Chay qelqasqan cartaqa kallpachawanchismi noqanchistapas ama pisipaspa Dios serviyninchispi phawashanallanchispaq. Kay estudiopin yachasun imaynatas Pabloq nisqanman jina ruwasunman chayta.

^ párr. 11 Hermano Arthurpa vidanmanta astawan yachanaykipaq qhaway “Mi participación en adelantar la adoración correcta” nisqata, 1965 watamanta 1 noviembre killamanta La Atalaya revistapi.

^ párr. 13 Anatoly hermanomanta astawan yachanaykipaq qhaway, “Me enseñaron desde niño a amar a Dios” nisqata, 2004 watamanta 22 octubre killamanta ¡Despertad! revistapi.

^ párr. 15 Filipos llaqtapi tiyaq wakin runakunan chay beneficiokunata chaskiranku Roma llaqtayoq kasqankurayku. Chaymi Filipos llaqtamanta cristianokunaqa allinta entienderanku Pabloq rimasqanta.