Kichay leenaykipaq

Índice nisqaman riy

Honrado kayqa ancha valorniyoqmi

Honrado kayqa ancha valorniyoqmi

Ñaupa tiempomantaraqmi sumaq rumikunata ancha valorniyoqpaq qhawarikun. Wakin sumaq rumikunaqa sinchitan valen. Ichaqa, ¿iman Jehová Diospaq aswan valorniyoq?

 Armenia nacionmanta Haykanush sutiyoq mana bautizasqa publicadoran wasin qayllapi tariruran pasaporte nisqata, tarjetakunata, askha qolqetawan. Chaytan qosanman willaran, qosanpas mana bautizasqa publicadormi karan.

Paykunaqa mana qolqeyoqmi kasharanku manutaqmi karanku. Chaywanpas qolqeta llapa tarisqankutawanmi dueñonman kutichipuranku. Qolqenta chinkachiq runapas familianpas anchatan admirakuranku kutichipusqankumanta. Chay publicadorkunan niranku: “Bibliapin yachayku honrado kayqa ancha importante kasqanta, chaymi kutichipushaykiku”, nispa. Jinaspapas willarankun imapichus Testigokuna creesqankuta qelqanchiskunatapas saqeranku.

Chay familiaqa Haykanush publicadoramanmi pagayta munaranku qolqeta kutichipusqanmanta, ichaqa manan chaskikuranchu. Paqaristinmi chay runaq esposan Haykanushta visitaran sumaq rumiyoq anillota regalananpaq chaywan agradecido kasqanta rikuchinanpaq.

Askha runakunachá admirasqa kankuman Haykanushpas qosanpas honrado kasqankumanta. Jehová Diosri, ¿admirakuranchu? ¿Imaynatan qhawariran paykunaq ruwasqanta? ¿Allinpaqchu karan honrado kasqanku?

¿IMAKUNAN ASWAN VALORNIYOQ?

Jehová Diosqa payman rijch’akuq runakunatan ancha valorniyoqpaq qhawarin. Arí, qorimantapas, qolqemantapas, imamantapas Diosman rijch’akuymi aswan valorniyoqqa. Jehová Diosqa manan runakuna jinachu imatapas qhawarin (Is. 55:8, 9). Diosqa payman rijch’akuq runakunatan aswan valorniyoqpaq qhawarin.

Chayta allinta entiendenapaq yachasun yachaymanta allin yuyaymantawan. Biblian nin: “Kusisamiyoqmi yachayta tariq runaqa, allin yuyaytapas tariq runaqa. Yachayqa qolqeq interesninmantapas aswanraqmi, qorimantapas aswantaraqmi qhapaqyachin. Umiñakunamantapas aswan chaniyoqmi yachayqa, manan ima munasqaykipas yachaymanqa aypanmanchu”, nispa (Prov. 3:13-15). Jehová Diosqa chay sumaq kaykunatan aswan valorniyoqpaq qhawarin.

¿Ima nisunmanmi honrado kaymanta?

Jehová Diosqa honradon, ‘mana llullakuq Diosmi’ (Tito 1:2). Paymi apóstol Pablota yuyaycharan hebreo cristianokunaman kayta ninanpaq: “Noqaykupaq Diosmanta mañapuwayku, allintan yachayku allin concienciayoq kasqaykuta, tukuy imaymanapitaqmi allintapuni puriyta munayku”, nispa (Heb. 13:18).

Jesuspas tukuypi honrado kasqantan rikuchiran. Juj kutinmi uma sacerdote Caifás niran: “Kausaq Diospa sutinpin kamachiyki, sut’inta rimariy, ¿qanchu Diospa Churin Cristoqa kanki?”, nispa. “Dios contran riman”, “wañuchun” nispa ninankuta yachakuranña chaypas, payqa sut’illantan willaran Cristo kasqanta (Mat. 26:63-67).

Noqanchisri, ¿sut’illantachu imatapas rimasun? ¿Icha askha qolqeyoq kayta munaspachu yapaykuspa otaq pakaykuspa imatapas rimasun?

HONRADO KAYQA SASAN

Kay tukukuy p’unchakunapiqa sasan honrado kay. ¿Imarayku? Runakuna “paykuna kikinkuta munakuqkuna, qolqe sonqokuna” kasqankurayku (2 Tim. 3:2). Wakin runakunaqa llank’anata mana tarispa  otaq pisichikuypi tarikuspan allinllapaq qhawarinku suwakuyta, llullakuyta juj mana allin ruwaykunatapas. Chhaynata piensasqankuraykun wakinqa ninku: “Qolqeyoq kayta munaspaqa imallapipas llullakunaykipunin kanqa”, nispa. Wakin iñiqmasinchiskunan chhayna piensayman urmaranku. Chaymi ‘q’otuspa qolqeta tarisqankurayku’ mana allin qhawarisqa rikukuranku (1 Tim. 3:8; Tito 1:7).

Ichaqa askha iñiqmasinchiskunan Jesuspa ejemplonta qatikushanku. Paykunaqa yachankun qorimantapas qolqemantapas Diosman rijch’akuy aswan valorniyoq kasqanta. Chaymi wayna-sipas cristianokunapas honrado kanku examenta qospa (Prov. 20:23). Manapaschá honrado kasqanchismanta premiota chaskisunchu. Ichaqa chay ruwaytan Jehová Dios ancha allinpaq qhawarin. Jinaspapas honrado kayqa allin concienciayoq kananchispaqmi yanapawasun, chaymi aswan valorniyoqqa.

Gagik sutiyoq runamanta yachasun. Paymi nin: “Manaraq Testigo kashaspan juj jatun empresapi encargado karani.  Empresapi dueñoqa impuestota mana pagananraykun mana sut’intachu willakuran jayk’a ganasqanta. Encargado kasqayraykun noqa rimanay karan autoridadkunawan. Chaymi qolqeta lluk’iykuq kani mana multawanankupaq. Chay ruwasqaymantan mana allinpaq qhawariwaqku. Biblia estudiasqaymantan ichaqa manaña chayta ruwayta munaranichu. Allin sueldoyoqña karani chaypas chay llank’anatan saqepurani. Chaymi negocioyta kicharani, ichaqa qallariymantapachan licenciata orqorani llapa impuestokunatapas pagarani”, nispa (2 Cor. 8:21).

Gagik nillantaq: “Ñaupaqpi ganasqaymantaqa kuskallantan kunanqa negocioypi ganakuni. Chaymi mayninqa qolqeyku mana aypawankuchu. Chaywanpas kusisqan kani, ch’uya concienciawanmi Diostapas servini. Wawaykunapaqpas allin ejemplon kani, iñiq t’aqapipas imaymana privilegiokunatan qowanku. Kunanpas autoridadkunaqa jamullankun negocioyta qhawaq, honrado runapaqtaqmi qhawariwanku”, nispa.

JEHOVÁ DIOSMI YANAPAWANCHIS

Jehová Diosqa anchatan munakun honrado kasqankuwan payta jatunchaq runakunata (Tito 2:10). Chaymi rey Davidta yuyaycharan kayta qelqananpaq: “Waynallan karani, kunantaq machuyapuniña, manan jayk’aqpas rikuranichu chanin runata Señor Diospa saqerparisqanta, manan jayk’aqpas rikuranichu wawankunatapas mijuna mañapakushaqta”, nispa (Sal. 37:25).

Chaytan Jehová Dios rikuchiran Noemiman Rutmanwan. Rutqa manan saqerpariranchu yuyaq suegranta. Aswanmi suegranwan kuska Israel llaqtaman astakuran chaypitaqmi Diosta adoraran (Rut 1:16, 17). Chay llaqtaman chayaspan Rutqa honrada, k’uchi llank’aq kasqanta rikuchiran. Payqa kamachikuy simi nisqanman jinan campopi cosechaqkunaq saqesqanta qhellapakuran. Jehová Diosqa manan Rut-tapas Noemitapas saqerpariranchu (Rut 2:2-18). Ichaqa manan mijuyllatachu paykunaman qoran, aswanmi Rut-ta ajllaran paypa mirayninmanta rey David jamunanpaq, Davidpa mirayninmantataq Mesías jamuran (Rut 4:13-17; Mat. 1:5, 16).

Wakin cristianokunapaqqa sasan familiankuta uywanankupaq qolqeta tariy. Ichaqa manan chayraykuchu llullakuspa otaq mana allinkunata ruwaspa qolqeta gananku. Aswanmi kallpachakunku honrado kanankupaq allin llank’aq kanankupaqpas. Chayta ruwaspan rikuchinku Jehová Diosman rijch’akusqankuta, chaytan paykunaqa aswan valorniyoqpaq qhawarinku (Prov. 12:24; Efes. 4:28).

Rut jinan askha cristianokuna Jehová Diospa promesanpi confianku. Diosmi kayta prometewanchis: “Manan jayk’aqpas saqesaykichu, manan jayk’aqpas qonqasaykichu”, nispa (Heb. 13:5). Jehová Diosqa manan jayk’aqpas honrado runakunataqa saqerparinqachu. Honrado kasqankurayku pisichikuypi tarikuqtinkuqa yanapanqan. Prometesqanman jinan payqa imachus necesitasqankuta qonqa (Mat. 6:33).

Runakunaqa qolqeta, qorita, ancha sumaq rumikunatan aswan valorniyoqpaq qhawarinku. Jehová Diosmi ichaqa honrado runakunata, payman rijch’akuq runakunata aswan valorniyoqpaq qhawarin.

Honrado kasun chayqa, ch’uya concienciawanmi runakunaman predicasun