Kichay leenaykipaq

Índice nisqaman riy

Ama misk’asunchu jujkunaq pantasqanwan

Ama misk’asunchu jujkunaq pantasqanwan

“Qankunapura [...] pampachaykunakuychis” (COL. 3:13)

121, 75 TAKIKUNA

1, 2. ¿Imatan Jehová Dios ñaupaqmantaña willachiran?

KAY pachapin kan Diospa ajllakusqan llaqta, paykunan kanku Jehová Diospa testigonkuna. Paykunaqa Jehová Diostan munakunku payllatan servinkupas. Pantaq runakunaña kanku chaypas, Diosmi paykunata santo espiritunwan pusashan. Qhawarisun imaynatan pusarishan chayta.

2 1914 watapaqqa pisillan karanku. Ichaqa Diospa yanapayninwanmi qhepa watakunaman astawan yapakuranku. Waranqanpi runakunan Bibliata estudiaranku chay qhepamantaq bautizakuranku. Diosqa willachiranñan: “Aswan juch’uymi jatun aylluman tukupunqa, aswan pisipaq qhawarisqan mentasqa suyuman tukupunqa. Noqan Señor Diosqa kani, tiempollanpin chayta usqhaylla junt’achisaq”, nispa (Is. 60:22). Chay rimasqantan Jehová Dios junt’ashan. Kunanqa wakin nacionkunapi runakunamanta aswan askharaqmi Diospa llaqtanpi kashanchis.

3. ¿Imaynatan Diospa llaqtan rikuchishan munakuq kasqanta?

3 Jehová ‘Diosninchisqa munakuymi’, chaymi llaqtanta  yanapawashanchis iñiqmasinchiskunawan munanakunanchispaq (1 Juan 4:8) Jesuspas taytan jina munakuqmi, chaymi discipulonkunata kamachiran: “Mosoq kamachikuytan churapuykichis: Qankunapura munanakuychis [...]. Chhaynapin noqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:34, 35). Jujkuna-jujkunawan munanakusqanchismi kay tukukuy tiempopi mana allinkunamanta pakaykuwashanchis. Segunda guerra mundial nisqapin 55 millón runakuna jina wañuchisqa karanku, ichaqa manan juj Testigollapas chay guerraman riranchu (leey Miqueas 4:1, 3). Diospa llaqtanqa ‘manan juchayoqchu’ karan juj runallapas guerrapi wañusqanmanta (Hech. 20:26).

4. ¿Imaraykun admirakunchis Diospa llaqtan wiñasqanmanta?

4 Diospa llaqtanqa sapa watanmi astawan wiñashan. Ichaqa ‘kay pachapi kamachiq diosmi’ imaymanata ruwashan predicasqanchista qolluchinanpaq (2 Cor. 4:4). Satanasqa politicawan, radiowan, televisionwan, internetwan yanapachikuspan Diospa llaqtan contra imaymanata ruwashan. Pisillaña tiempon kasqanta yachaspan Diosmanta karunchayta munawanchis. ¿Imatan chaypaq ruwashan? (Apo. 12:12.)

JUJKUNA SONQONCHISTA K’IRIWAQTINCHIS

5. ¿Imaraykun mayninpi mayqen iñiqmasinchispas sonqonchista k’iriwasunman? (21 paginapi fotota qhaway.)

5 Cristianokunapaqqa Jehová Diosta runamasinchistawan munakuymi aswan importante. Jesuspunin niran: “[Jehová] Diosniykitan munakunki tukuy sonqoykiwan, tukuy almaykiwan, tukuy yuyayniykipiwan. Chaymi aswan chaniyoq ñaupaqkaq kamachikuyqa. Iskaykaq aswan chaniyoqqa kaymi: Runamasiykitan qan kikiykita jina munakunki”, nispa (Mat. 22:35-39). Ichaqa Adanpa miraynin kasqanchisraykun llapallanchis pantaq runakuna kanchis (leey Romanos 5:12, 19). Chaymi mayninpi mayqen iñiqmasipas rimasqanwan otaq ima ruwasqanwanpas sonqonchista k’iriwasunman. Chaykuna kaqtin, ¿imatan ruwasun? ¿Karunchakusunchu Diosmanta llaqtanmantapas icha qaqatachu iñiyninchispi sayasun? Biblian willashan ñaupa tiempopi Diosta serviqkuna iñiqmasinkuq sonqonta k’irisqankuta. Wakinmanta yachasun.

¿Imatan ruwawaq karan Elipa tiemponpi kausaspa? (6 parrafota qhaway)

6. ¿Imapin Elí pantaran?

6 Elimanta yachasun. Elipa iskay wawankunamantan Biblia nin: ‘Elipa churinkunaqa Diosta mana manchakuq millay karanku’, nispa (1 Sam. 2:12). Eliqa uma sacerdoten karan yacharantaqmi wawankuna Diospa kamachikuyninkuna p’akisqankuta, jatun juchakunapi purisqankutapas. Ichaqa manan paykunata wanachiranchu, chaymi Jehová Dios paytapas wawankunatapas castigaran (1 Sam. 3:10-14). Qhepamanqa manañan Elipa mirayninmanta pipas uma sacerdoteqa karanchu. ¿Imatan qan ruwawaq karan Elipa ruwasqanta rikuspa? ¿Mana allinkuna ruwasqanta qhawarispachu Diosmanta karunchakapuwaq karan?

7. a) ¿Ima juchakunapin David urmaran? b) ¿Imatan Dios ruwaran Davidwan?

 7 Davidmantañataq yachasun. Davidqa Diospa ‘sonqonpaq jina’ sumaq runan karan, chaymi Diosqa munakuran (1 Sam. 13:13, 14; Hech. 13:22). Ichaqa jatun juchakunapin urmaran. Juj kutinmi Uriaspa warminwan puñuran Urías guerrapi maqanakushanankama, jinan chay warmiqa wijsallikuran. Chayta yacharuspan Davidqa Uriasta wajachimuran warminwan puñunanpaq, chhaynapi “Uriaspa wawanmi” nispa ninankupaq. Warminwan mana puñuyta munaqtinmi Davidqa Uriasta guerraman kacharan chaypi wañuchimunankupaq. Chaykuna ruwasqanmantan Davidpas familianpas imaymana llakikunapi tarikuranku (2 Sam. 12:9-12). Ichaqa Jehová Diosmi khuyapayaspa juchanta perdonaran, qhepamantaq chanin runata jina qhawariran (1 Rey. 9:4). ¿Imatan qan ruwawaq karan Davidpa juchallikusqanta rikuspa? ¿Diosmantachu karunchakuwaq karan?

8. a) ¿Ima nispan Pedro Jesusta prometeran? b) ¿Imaraykun Jehová Dios Pedrota mana wijch’upuranchu?

8 Kunanqa Pedromanta yachasun. Paypas Jesuspa ajllakusqan apostolmi karan. Chaywanpas mana allinkunatan ruwaran. Juj kutinmi Jesusta prometeran: “Llapaña saqerparisunki chaypas, noqaqa manan saqesaykichu”, nispa (Mar. 14:27-31, 50). Ichaqa chay qhepallaman soldadokuna Jesusta jap’iqtinkun, Pedropas llapa apostolkunapas saqerpariranku.  Chaymantapas juj runakuna tapuqtinmi kinsa kutita niran: “Manan [Jesustaqa] reqsinichu”, nispa (Mar. 14:53, 54, 66-72). Ichaqa chaykuna ruwasqanmantan tukuy sonqowan pesapakuran, chaymi apóstol kasqanmanta mana wijch’usqachu karan. Sichus Jesuspa jujnin discipulon kawaq karan chayri, ¿Pedroq ruwasqanta rikuspachu manaña Diosta serviwaq karan?

¿Confianchischu Jehová Dios tukuy imatapas chanillanta ruwananpi?

9. ¿Imaraykun confianki Jehová Dios tiempollanpi imatapas chaninta ruwananpi?

9 Kunanpas wakin iñiqmasikunan rimasqankuwan otaq ima ruwasqankuwanpas iñiqmasikunata k’irinku. Chaymi sapankanchis tapukunanchis: “¿Imatan ruwayman juj iñiqmasi sonqoyta k’iriwaqtin? ¿Saqepusaqchu juñunakuykunata? ¿Karunchakapusaqchu Jehová Diosmanta llaqtanmantapas? Icha, ¿Jehová Dios pacienciayoq kasqanta yuyarispachu paypa makinpi imatapas saqesaq?”, nispa. Wakinqa manan pesapakunkuchu jatun juchakunapi purisqankumanta, ¿confianchischu Jehová Dios tukuytapas rikumushasqanta, tiempollanpi wanachinanta otaq llaqtanmanta qarqopunanta? ¿Confianchischu Jehová Dios tukuy imatapas chanillanta ruwananpi?

JUNT’AQ SONQOWAN DIOSTA SERVISUN

10. ¿Imatan Jesús ruwaran Judaspas Pedropas sonqonta k’iriqtinku?

10 Bibliaqa willallantaqmi junt’aq sonqowan Diosta serviq runakunamanta. Jujkunaq mana allinkuna ruwasqantaña rikuranku otaq sonqonkupi k’irisqaña rikukuranku chaypas, manapunin Diosmanta karunchakurankuchu. Jujninmi karan Jesús. Juj kutinmi Jesusqa tutantin taytanmanta mañakuran 12 apostolninkunata ajllananpaq. Ichaqa qhepamanmi Judás Iscariote traicionaran, Pedropas negaranmi (Luc. 6:12-16; 22:2-6, 31, 32). Chaywanpas Jesusqa manan Diostachu nitaq juj apostolninkunatachu tumparan chaykuna pasasqanmanta. Aswanmi taytanman astawan jap’ipakuspa tukuy sonqonwan serviran. Chaymi Jehová Diosqa wañusqanmanta kausarichiran qhepamantaq janaq pachapi rey kananpaq churaran (Mat. 28:7, 18-20).

11. ¿Ima nispan Biblia willaranña Diospa llaqtanmanta?

11 ¿Imatan yachanchis Jesuspa ejemplonmanta? Noqanchispas Jesús jinan Jehová Diospi llaqtanpi ima confiananchis. Diospa llaqtallanmi pachantinpi allin willakuykunata willashan, juj jinallataqmi kausashanchis. Chaymi rikuchin Jehová Dios llaqtanta santo espiritunwan pusarisqanta. ¡Manan mayqen religionpas chay yanapaytaqa chaskinchu! Biblian niranña: “Kamachiykunan kusisqa sonqontin takinqa”, nispa (Is. 65:14).

Manan allinchu kanman Diospa llaqtanpi pipas pantarusqanrayku Diosmanta llaqtanmantapas karunchakuyqa

12. ¿Imaynatan qhawarinanchis jujkunaq pantasqanta?

12 Diospa llaqtanpi kaqkunaqa kusisqan  kashanchis Diosninchis pusawasqanchismanta allinkuna ruwanapaq yanapawasqanchismantapas. Satanaspa makinpi kaq runakunan ichaqa mana kusisqachu kausanku manataqmi ima suyakuyninkupas kanchu. Manan allinchu kanman Diospa llaqtanpi pipas pantarusqanrayku Diosmanta llaqtanmantapas karunchakuyqa. Noqanchisqa Diostan junt’aq sonqowan servinanchis, paywanmi pusachikunanchis. Piña sonqonchista k’iriwasunman otaq mana allinkunataña ruwanman chaypas, manan chaykunawanqa misk’ananchischu.

¿IMATAN RUWANANCHIS?

13, 14. a) ¿Imaraykun llapa iñiqmasikunapaq pacienciayoq kananchis? b) ¿Ima promesatan yuyarinanchis?

13 ¿Imatan ruwananchis juj iñiqmasi rimasqanwan otaq ima ruwasqanwanpas sonqonchista k’iriwaqtinchis? Biblian niwanchis: “Ama sonqoykipi usqhaylla phiñakuychu, phiñakuyqa mana yuyayniyoqkunaqmi”, nispa (Ecl. 7:9). Llapanchispas pantaq runakunan kanchis, chaymi pantasunpuni rimaypi otaq ruwaypi. Sichus jujkunaq mana allinkuna ruwasqanpi piensashallasun chayqa manan kusisqachu Diosta servisun. Jinaspapas iñiyninchispin chiriyapusunman qhepamantaq Diospa llaqtanmanta karunchakapusunman. Sichus chaykuna pasawasunman chayqa, manañan Diosta servisunmanchu nitaq sumaq kausayta suyakusunmanchu.

14 ¿Imatan ruwasunman jujkunaña k’iriwaqtinchispas kusisqa sonqowan Diosta servinapaq? Diospa promesantan sonqonchispi jap’ikunanchis, Diosmi nin: “Noqaqa mosoq janaq pachatan mosoq allpa pachatawanmi kamasaq, ñaupaq sucedesqankunaqa qonqasqan kapunqa, manañan yuyarisqapasñachu kanqa”, nispa (Is. 65:17; 2 Ped. 3:13). Jehová Diospaq junt’aqllapuni kasun chayqa, chay bendicionkunatan chaskisun.

15. Jesuspa nisqan jina, ¿imatan ruwananchis sonqonchista pipas k’iriqtin?

15 Ichaqa chay p’unchay chayamunankaman kallpachakushanallanchis pipas k’iriwaqtinchis Diospa nisqanman jina imatapas ruwananchispaq. Jesusmi niran: “Runakunatachus contraykichispi juchallikusqankuta pampachankichis chayqa, qankunatapas janaq pachapi kaq Yayaykichisqa pampachallasunkichistaqmi. Ichaqa contraykichispi runakunaq juchallikusqankuta mana pampachankichischu chayqa, manallataqmi Yayaykichispas juchallikusqaykichiskunata pampachasunkichischu”, nispa. Jayk’a kutita perdonana kasqanmanta Pedro tapuqtinmi Jesús niran: “Qanchis chunka  kuti qanchiskaman”, nispa. Chaytaqa nisharan sapa kutilla perdonanapaq listo kanamantan (Mat. 6:14, 15; 18:21, 22).

16. ¿Imaynapin José allin ejemplo llapanchispaqpas?

16 Josemanta yachasun. Payqa maman Raquelmantan juj wayqellayoq karan papanmantataq 10 wayqeyoq. Jacob papankuqa Josetan astawanqa munakuran. Chayta rikuspan wayqenkuna Joseta cheqnikuranku, chaymi qhepaman esclavota jina vendepuranku. Watakuna qhepamanmi Joseqa allinkunata ruwasqanrayku Egipto llaqtapi importante runa kapuran. Muchuy tiempo chayamuqtinmi wayqenkuna Egiptota riranku mijuyta rantikuq. Jinan Joseqa wayqenkunata reqsiruran, paykunan ichaqa mana reqsirankuchu. Chaypin Joseqa paykunamanta vengakunman karan, ichaqa manan chaytachu ruwaran. Aswanmi pruebaman churaran imayna sonqoyoq kasqankuta yachananpaq. Cambiasqankuta reparaspan Joseqa willaran pi kasqanta, qhepamantaq niran: “Ama manchapakuychischu, noqan uywasqaykichis qankunatapas wawaykichistapas”, nispa (Gén. 50:21).

17. ¿Imatan ruwanki pipas pantaruqtin?

17 Llapallanchis pantaq runakuna kasqanchisraykun pitapas k’irisunman. ¿Imatan ruwananchis pitapas k’irispa? Bibliaq nisqan jina, usqhayllan paywan parlananchis allipunakapunapaq (leey Mateo 5:23, 24). Llapanchispas munasunmanmi jujkunaq perdonawananchista, chaytan noqanchispas ruwananchis. Biblian nin: “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas. Imaynan Jehová Diospas tukuy sonqowan perdonarasunkichis chhaynallatataq qankunapas ruwaychis”, nispa (Col. 3:13, NM). Iñiqmasinchiskunata munakuspaqa qonqapusunmi imapipas pantasqankuta (1 Cor. 13:5). Sichus jujkunata perdonasun chayqa Jehová Diosninchisqa noqanchistapas perdonawasun. Chayta ruwaspan Jehová Diosninchis jina khuyapayakuq kayta yachasun (leey Salmo 103:12-14).