Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 1 ESTUDIO

“Ama pisipaychu, noqaqa Diosniykin kani”

“Ama pisipaychu, noqaqa Diosniykin kani”

“Ama manchakuychu, qanwanmi noqaqa kashani, ama pisipaychu, noqaqa Diosniykin kani, noqan kallpachasqaykipas yanapasqaykipas” (IS. 41:10)

7 TAKI Qanmi kallpachaqniyku kanki

KAYKUNAMANTA YACHASUN *

1, 2. a) ¿Imaynatan Yoshiko hermananchista yanaparan Isaías 41:10 texto? b) ¿Pikunatawanmi chay textopi nisqan yanapanman?

YOSHIKO sutiyoq hermananchismanmi doctora willaran pisi killakunallaña kausananpaq. ¿Imatan hermananchis ruwaran chayta yachaspa? Chay ratopin yuyarisqa Isaías 41:10 (leey) textota, chayqa anchatan payman gustaran. Chaymi doctorata niran: “Manan manchakunichu, Jehová Diosmi noqawan kashan”, nispa. * Chay textoq nisqanmi sonqonta tiyaykachiran, yanaparantaq Diospi tukuy sonqonwan confiananpaq. Chay textoqa noqanchistapas yanapawasunmanmi ima llakipiña tarikuqtinchispas. ¿Imaraykun Jehová Dios Isaiaswan chayta qelqachiran?

2 Judío runakunan Babiloniaman apasqa kananku karan, paykunata consolananpaqmi Jehová Diosqa Isaiaswan qelqachiran. Ichaqa manan paykunallapaqchu chaytaqa qelqachiran, aswanpas llapa Diosta serviqkunapaqwanmi (Is. 40:8; Rom. 15:4). Noqanchisqa ‘sinchi sasa tiempopin’ tiyashanchis, chaymi llapanchispas necesitanchis Isaiaspa qelqasqanwan kallpachasqa kayta (2 Tim. 3:1).

3. a) ¿Ima promesakunatan 2019 watapaq textopi tarinchis? b) ¿Imanaqtinmi necesitanchis chay promesakunata?

3 Kay estudiopin yachasun Jehová Diospa kinsa promesankunamanta iñiyninchispi kallpachasqa kanapaq:  1) Jehová Diosmi noqanchiswan kashan. 2) Paymi Diosninchis. 3) Jehová Diosmi yanapawasun. Chay promesakunan tarikun Isaías 41:10 textopi. ¿Imanaqtinmi necesitanchis chay promesakunata? * Yoshiko jinan noqanchispas imaymana problemakunapi tarikunchis. Wakinninchisqa gobiernokunaq qatikachasqanmi kashanchis.

“QANWANMI NOQAQA KASHANI”

4. a) ¿Mayqenmi Diospa ñaupaq kaq promesan? (Willakuyta qhaway.) b) ¿Ima nispan Jehová Dios rikuchin munakuwasqanchista? c) ¿Imaynan sientekunki Jehová Diospa nisqanwan?

4 Jehová Diosmi sonqonchista tiyaykachin kayta niwaspanchis: “Ama manchakuychu, qanwanmi noqaqa kashani”, nispa. * Chaymi ñaupaq kaq promesan. Chaypin rikuchin anchata munakuwasqanchista noqanchismanta preocupakusqantapas. Chaymi niwanchis: “Noqapaqqa ancha chaniyoqmi kanki, noqan munakuyki jatunchaykuyki”, nispa (Is. 43:4). Manan pipas ni imapas Jehová Diosmantaqa t’aqawasunchu (Is. 54:10). Chayta yachayqa anchatan kallpachawanchis. Jehová Diosqa Abram (Abrahán) jinan noqanchistapas cuidawasun. Paytan niran: “Abram, ama manchakuychu, noqan waqaychaqniyki kani”, nispa (Gén. 15:1).

Jehová Diospa yanapayninwanqa mayu jina nina jina problemanchiskunatapas atipasunmi (5, 6 parrafokunata qhaway) *

5, 6. a) Jehová Diosqa yanapawasunmi ima problemapipas tarikuqtinchis, ¿imaynapin chayta yachanchis? b) ¿Imatan yachanchis Yoshiko hermananchismanta?

5 Jehová Diosqa yanapawasunmi ima problemapipas tarikuqtinchis, chaymi prometewanchis: “Unuta chimpaqtiykipas, noqaqa qanwanmi kasaq, mayunta chimpaqtiykipas, manan mayuqa millp’usunkichu. Nina ukhunta puriqtiykipas, manan ruphasunkichu, ninaqa manan imanasunkipaschu”, nispa (Is. 43:2). ¿Imatan chaywan nisharan?

6 Diosqa manan prometewanchischu kay tiempopi problemanchista chinkachinanpaq. Ichaqa mayu jinaña otaq nina jinaña problemanchiskuna kanqa chaypas,  Jehová Diosqa yanapawasunmi aguantananchispaq. Wañunanchisña kaqtinpas yanapawasunmi ama llakikunanchispaq, paypaq junt’aq kananchispaqpas (Is. 41:13). Chaymi pasaran Yoshiko hermananchiswan. Ususinmi niran: “Jehová Diosmi mamaymanqa thaj kayta qoran, chaymi payqa thaj sientekuran, chayta rikuspan admirakurayku. Chaymi wañupunan p’unchaykamapas enfermerakunaman juj pacientekunamanpas Jehová Diosmanta, promesankunamantawan rimashallaran”, nispa. ¿Imatan yachanchis Yoshiko hermananchismanta? Jehová Diospa yanapayninpi confiasun chayqa, mana manchakuspan imatapas aguantasun.

“NOQAQA DIOSNIYKIN KANI”

7, 8. a) ¿Mayqenmi iskay kaq promesa, imatan significan? b) ¿Imaraykun Jehová Dios Babiloniapi kaq judiokunata niran ama pisipanankupaq? c) ¿Imatan Jehová Dios Isaías 46:3, 4 textopi niran llaqtanta tranquilizananpaq?

7 Jehová Diosqa iskay kaq promesanpin niwanchis: “Ama pisipaychu, noqaqa Diosniykin kani”, nispa. ¿Ima ninanmi hebreo rimaypi “ama pisipaychu” nisqa rimay? Chayqa kay ninantan nin: Imapas pasanasuykimanta qhepaykita qhawa-qhawarikuspa puriymi otaq manchakuymanta tukuy ladota qhawakachakuymi.

8 ¿Imaraykun Jehová Dios Babiloniaman apasqa judiokunata niran ama llakikunankupaq? Payqa yacharanmi medopersa ejército Babilonia llaqtata atacaqtinku chaypi tiyaq runakuna mancharikunankuta. Chayqa pasanan karan 70 watakuna jinaña judiokuna Babiloniapi kashaqtinku. Jehová Diosmi medopersa ejercitota utilizanan karan llaqtanta librananpaq (Is. 41:2-4). Chay ejército Babilonia llaqtaman jamushaqtinmi chaypi tiyaq runakunaqa mana mancharikunankupaq paykunapura ninakuranku: “Kallpachakusun”, nispa. Askha idolokunatataq ruwaranku librasqa kanankupaq (Is. 41:5-7). Jehová Diosmi ichaqa llaqtanta tranquilizaran kayta nispa: “Israel-lláy, qanmi kamachiy kanki”, nispa. Mana manchakunankupaqtaq niran: “Noqaqa Diosniykin kani”, nispa (Is. 41:8-10). Chay nisqanwanmi llaqtanta nisharan paykunata mana qonqasqanta, yanaparantaq ama manchakunankupaq. Jinaspapas willaranmi paykunata cuidananpaq librananpaqpas. Jehová Diospa nisqanqa anchatachá kallpacharan Babiloniapi tarikuq judiokunata (leey Isaías 46:3, 4).

9, 10. ¿Imaraykun mana sinchita llakikunanchischu? Juj ejemplota willay.

9 Kunan tiempopipas runakunaqa sinchi llakisqan kashanku kay mundopi imaymana mana allinkuna pasasqanwan. Noqanchistapas chayqa afectawanchismi, chaywanpas manan nishutaqa llakikunanchischu. ¿Imarayku? Jehová Diosmi niwanchis: “Noqaqa Diosniykin kani”, nispa. ¿Imarayku chayta nisqan tranquilizawanchis? Chayta entiendenapaq juj ejemplota qhawarisun.

10 Juj avionpin Juanwan Brunowan viajashanku. Qonqayllamantan avionqa chhafchirikun sinchita wayramusqanwan. Jinan pilotoqa altavozpi rimamun: “Sinchi wayrasqan ladotan pasashanchis, cinturonta churakuychis. Ama manchakuychischu, manan imapas pasanqachu”, nispa. Chayta uyarispan Juanqa sinchita mancharikun.  Brunon ichaqa mana manchakunchu. Jinan Juanqa tapun: “¿Imaraykun tranquilo kashanki?”, nispa. Brunotaq chhikanta asirikuspa nin: “Allintan reqsini avión manejaqta, payqa papaymi. Willasayki allin piloto kasqanmanta, chayta yachaspaqa qanpas manan manchakunkichu”, nispa.

11. ¿Imatan yachanchis ñaupaq ejemplomanta?

11 ¿Imatan chay ejemplomanta yachanchis? Bruno jinan noqanchispas tranquilo sientekunchis papanchis Jehová Diosta allinta reqsisqanchisrayku. Manan iskayanchischu sasa problemakunata aguantanapaq yanapawananchismantaqa (Is. 35:4). Sinchi llakisqaña runakuna kashanku chaypas, noqanchisqa tranquilon kashanchis Jehová Diospi confiasqanchisrayku (Is. 30:15). Jinaspapas juj runakunamanmi willanchis imarayku Diospi confiasqanchista. Uyarikuqtinkuqa paykunapas manan nishutachu llakikunqaku ima llakipiña tarikuqtinkupas. ¿Imarayku? Jehová Dios paykunata yanapasqanrayku.

“NOQAN KALLPACHASQAYKIPAS YANAPASQAYKIPAS”

12. a) ¿Mayqenmi Jehová Diospa kinsa kaq promesan? b) “Diosqa atiyninwanmi lliupi kamachikushan” nisqan, ¿imatan yuyarichiwanchis?

12 Jehová Diospa kinsa kaq promesanqa kaymi: “Noqan kallpachasqaykipas yanapasqaykipas”. Isaiasqa willaranmi imaynatachus Diosqa llaqtanta kallpachananta, niranmi: “Señor Diosqa atiyniyoqmi chayamushan, atiyninwanmi lliupi munaychakushan [otaq kamachikushan]”, nispa (Is. 40:10). Chaypi nisqanmi yuyarichiwanchis Jehová Dios atiyniyoq rey kasqanta. Ñaupaq tiempopin Diosqa atiyninta utilizaran serviqninkunata yanapananpaq defiendenanpaqwan. Kunanpas paypi  confiaq serviqninkunatan kallpachashan cuidashan ima (Deut. 1:30, 31; Is. 43:10).

Manan ima ruwasqa armapas Jehová Diospa marq’ayninmantaqa t’aqawasunmanchu (12-16 parrafokunata qhaway) *

13. a) ¿Imaynapi tarikuqtinchismi Jehová Dios astawan kallpata qowasun? b) ¿Jehová Diospa ima nisqanmi kallpachawanchis?

13 Enemigonchiskuna qatikachawaqtinchismi Jehová Diosqa astawan kallpata qowanchis aguantananchispaq. Wakin nacionkunapi enemigonchiskunaqa imaymanatan ruwashanku hermanonchiskuna ama predicanankupaq ama juñunakunankupaq. Chhaynaña kaqtinpas manan nishutaqa llakikunanchischu. Jehová Diosmi prometewanchis kallpachawananchispaq, paymi nin: “Manan ima ruwasqa armapas imanasunkipaschu”, nispa (Is. 54:17). Chay promesaqa kinsa cosaskuna pasanantan yuyarichiwanchis.

14. ¿Imanaqtinmi mana admirakunchischu Diospa enemigonkuna atacawasqanchismanta?

14 Ñaupaq kaq: Runakuna cheqnikuwananchis karan (Mat. 10:22). Jesusqa willaranñan tukukuy p’unchaykunapi discipulonkuna sinchi qatikachasqa kanankuta (Mat. 24:9; Juan 15:20). Iskay kaq: Isaiasmi willaranña enemigonchiskuna imaymana formamanta atacawananchista. Mayninqa mana reparayllatan otaq mana p’enqakuspan noqanchismanta llullakunanku karan, otaq mana khuyapayaspa atacawananchis karan (Mat. 5:11). Diosqa permitinmi chhaynata atacawananchista (Efes. 6:12; Apo. 12:17). Ichaqa, ¿imaraykun mana manchakunanchischu?

15, 16. a) ¿Imatan yachallanchistaq? ¿Imaynatan Isaías 25:4, 5 texto chayta apoyan? b) Isaías 41:11,12 textopi nisqan jina, ¿iman pasanqa Diospa llaqtanwan maqanakuqkunata?

15 Kinsa kaq: Jehová Diosmi niwanchis: “Manan ima ruwasqa armapas imanasunkipaschu”, nispa. Imaynan jatun perqaqa sinchi wayramanta jark’awanchis, chhaynatan Jehová Diospas enemigonchiskunamanta jark’awanchis (leey Isaías 25:4, 5).  Enemigonchiskuna imataña ruwawasunman chaypas, manan wiñaypaqchu kanqa (Is. 65:17).

16 Jehová Diosqa willanmi imachus pasanqa noqanchis contra k’arajta phiñakuqkunawan. Chayta yachaspan astawan paypi confianchis (leey Isaías 41:11, 12). Enemigonchiskuna jayk’ataña kallpachakunqaku Diospa llaqtan contra imatapas ruwanankupaq chaypas, llapallankun “manapas kankumanchu karan jina kanqaku”.

¿IMATAN RUWANANCHIS DIOSPI ASTAWAN CONFIANAPAQ?

Sichus sapa p’unchay Bibliata leesun chayqa aswan allintan Diosta reqsisun, astawantaq paypi confiasun (17, 18 parrafokunata qhaway) *

17, 18. a) ¿Imanaqtinmi Bibliata leey yanapawanchis Diospi astawan confiananchispaq? Juj ejemplota willay. b) ¿Imarayku umanchispi jap’inanchis 2019 watapaq textota?

17 Jehová Diosninchispi astawan confianapaqqa paytan allinta reqsinanchis. Chaytaqa ruwanchis tukuy yuyaywan Bibliata leespa, yachasqanchispi piensaspa ima. Bibliapin willashan imaynatas Jehová Diosqa ñaupaq tiempopi llaqtanta cuidaran chayta. Chayta yachaspan seguro kashanchis kay tiempopipas Jehová Dios llaqtanta cuidananmanta.

18 Jehová Dios imayna cuidawasqanchista entiendenapaqmi Isaiasqa juj rijch’anachiyta willaran. Chaypin Jehová Diosta compararan oveja michiqwan noqanchistataq ovejakunawan. Isaiasmi niran: “Uywa michiq jinan llaqtanta michin, uñakunatan marq’an”, nispa (Is. 40:11). Sichus reparanchis Jehová Dios marq’ayninpi apawasqanchista chayqa, cuidasqa, thaj iman sientekunchis. Allin yuyayniyoq junt’aq kamachiqa munanmi ima llakipiña tarikuqtinchispas thaj sientekunanchista, chaymi 2019 watapaq Ama pisipaychu, noqaqa Diosniykin kani” nisqa textota ajllaran, chayqa Isaías 41:10 textopin tarikun. Chay textoq nisqanta umanchispi jap’isun chayqa, kallpatan qowasun ima problematapas aguantananchispaq.

38 TAKI Paymi kallpachasunki

^ párr. 5 2019 watapaq texton willashan kinsa razonkunamanta, chaykunan yanapawasun imapiña tarikuqtinchispas ama nishuta llakikunapaq. Chay razonkunamantan kay estudiopi yachasun, chaymi yanapawasun Jehová Diospi astawan confianapaq. Kay watapaq textopin allinta piensananchis, atispaqa umanchispin jap’inanchis. Chaymi kallpata qowasun ima problematapas aguantananchispaq.

^ párr. 3 ASTAWAN YACHANAPAQ: Diospa promesanqa garantizawanchismi Jehová Diospa rimasqan cumplikunanta. Yanapawanchistaq ima problemapipas tarikuspa ama nishuta llakikunapaq.

^ párr. 4 Willakuy: “Ama manchakuychu” nisqa rimaymi kinsa kutita rijurin Isaías 41:10, 13, 14 textokunapi. Chay textokunapin nillantaq: “Qanwanmi noqaqa kashani”; “Noqaqa Diosniyki Señor Diosmi kani”; “Noqan yanapasayki”, nispa. Chay textokunapi nisqanmi kayta entiendechiwanchis: Jehová Diospi confiaspaqa manan nishutachu llakikusun.

^ párr. 52 DIBUJOMANTA WILLAKUY: Juj familia imaymana problemakunapi tarikun: llank’ananpi, predicacionpi, escuelapi, saludninwan ima.

^ párr. 54 DIBUJOMANTA WILLAKUY: Hermanokunaq juñunakusqanku salonmanmi policiakuna jaykushanku, hermanokunan ichaqa mana manchakunkuchu.

^ párr. 56 DIBUJOMANTA WILLAKUY: Jehová Diosta familiantin adorasqanchismi kallpata qowasun aguantanapaq.