Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Leeqkunaq tapukusqan

Leeqkunaq tapukusqan

¿Imaraykun Mateo jujnirayta willan Jesuspa wawa kasqan tiempomanta Lucastaq jujnirayta?

Mateopas Lucaspas sapankankuq imachus rikusqankuman uyarisqankuman jinan qelqaranku, chaymi mana igualtachu willaranku Jesusmanta.

Mateoqa Josemantan willan. Mateon willashan María onqoq kasqanta yachaspa Josepa imachus ruwasqanta, imaynapi María onqoq kasqanta yachasqantapas. Paymi willashan imaynas Joseqa juj angelpa kamachisqanman jina imatapas ruwaran chayta (Mat. 1:19-25). Mateon willashan imaynapis Joseqa familiantin Egipto nacionman ripuran chaytapas. Paymi willallantaq Israel llaqtaman kutimpunankupaq juj angelpa kamachisqanmantapas. Chayta kasukuspan Joseqa familiantin kutimpuran jinaspa Nazaret llaqtapi tiyaranku (Mat. 2:13, 14, 19-23). Mateo 1, 2 capitulokunapiqa Josepa sutinmi chunka kutita rijurin, Mariaq sutintaq qanchis kutillata.

Lucastaq willashan Mariamanta. Paymi willan ángel Gabriel Mariata visitasqanmanta. Chay angelpa visitasqan qhepamanmi Mariaqa Elisabet-ta visitasqa, chaypitaq Mariaqa Jehová Diosta jatunchasqa (Luc. 1:26-56). Lucasmi willan Simeonwan Mariawan rimasqanmantapas, chaypin Simeonqa Mariaman willaran imakunawanchus Jesús ñak’arinan karan chayta. Willanmi Jesús 12 watanpi kashaspa familianwan Jerusalenpi temploman riqtinku imachus pasasqantapas. Lucasqa Mariaq rimasqallantan willan manan Josepa ima nisqantapas willanchu. Llapa chaykuna pasasqantan Mariaqa sonqonpi jap’ikuq (Luc. 2:19, 34, 35, 48, 51). Chaymantapas Lucas 1, 2 capitulokunapiqa Mariaq sutinmi 19 kutita rijurin Josepa sutintaq tawa kutillata. Kaypi rikusqanchis jina, Mateoqa Josepa imachus ruwasqanmanta piensasqanmanta iman qelqaran, Lucastaq Mariaq imakunachus ruwasqanmanta piensasqanmanta ima.

Jesuspa ñaupa taytankunamanta willaspapas Mateowan Lucaswanqa manan igualtachu willanku. Mateon willashan pikunachus Josepa ñaupa taytankuna karan chayta. Mateoq willasqanman jina, Jesusqa Josepa adoptasqantaq karan chayqa paymi derechonpi kasharan Davidpa trononpi tiyananpaq, ¿imarayku? José Davidpa wawan Salomonpa mirayninmanta kasqanrayku (Mat. 1:6, 16). Lucastaq ichaqa willan Mariaq ñaupa taytankunamanta. Mariapas Davidpa wawan Natanpa mirayninmantan karan (Luc. 3:31). Chhaynapin chay partemantapas Jesusqa derechonpi kasharan Davidpa trononpi tiyananpaq, paypa mirayninmanta nacesqanrayku (Rom. 1:3). Ichaqa, Mariataq Elipa wawan karan chayqa, ¿imaraykutaq Lucasri nin: “Joseqa Elipa wawanmi karan”, nispa? Chay tiempopiqa qharikunaq sutillanmi listakunapiqa rijuriq. Chhaynaqa, “José” nispaqa nishan, José Elipa qataynin kasqanraykun (Luc. 3:23).

Mateopas Lucaspas pikunachus Jesuspa ñaupa taytanku karan chayta qelqasqanku listan sut’ita rikuchin Jesuspuni Mesías kasqanta. Chaytaqa manan pipas ni fariseokunapas ni saduceokunapas negayta atirankuchu. Chay miraymanta yachaymi iñiyninchispi kallpachawanchis, chaymantapas Jehová Dios promesankuna junt’ananpin confianzata qowanchis.