Kichay leenaykipaq

Índice nisqaman riy

¿Kallpachakushankichu Diospa llaqtanpi astawan llank’anaykipaq?

¿Kallpachakushankichu Diospa llaqtanpi astawan llank’anaykipaq?

“Leeshallaypuni jujkunaman Diospa simin qelqata, kallpachashallaypuni allin kaqta ruwanankupaqpas, yachachishallaypunitaq paykunataqa” (1 TIM. 4:13)

45, 70 TAKIKUNA

1, 2. a) ¿Imaynatan Isaías 60:22 kay tiempopi junt’akushan? b) ¿Imatan Diospa llaqtanpi kunan necesitakushan?

ÑAUPAQ tiempopiraqmi Bibliapi willakuran: “Aswan juch’uymi jatun aylluman tukupunqa, aswan pisipaq qhawarisqan mentasqa suyuman tukupunqa”, nispa (Is. 60:22). Chay profeciaqa kay tiempopin junt’akushan, chaymi Jehová Diospa testigonkunaqa 8.220.105 runaña 2015 watapi karanchis. Chhayna yapakunanchismantan Jehová Diosqa niran: “Tiempollanpin chayta usqhaylla junt’achisaq”, nispa. Chayraykun Diospa llaqtanpiqa aswan askha ruwanakuna kashan. Llapanchistaqmi tukuy atisqanchista chaypi yanapakunanchis. Wakin iñiqmasinchiskunaqa precursor regular otaq precursor auxiliarmi kanku, wakintaq predicaqkunata astawan necesitakusqan llaqtakunaman astakushanku, otaq juñunakuy wasikuna ruwaypi yanapakushanku.

2 Chaymantapas sapa watanmi 2.000 jina iñiq t’aqakuna yapakushan, chaymi waranqanpi necesitakushan  umalliqkunata, yanapaq kamachikunatawan (siervo ministerialkunata). Bibliaq nisqan jina, qharikunapaqpas warmikunapaqpas ‘imaymana ruwanakunan’ kan Señorpa llank’ananpiqa (1 Cor. 15:58).

¿IMAYNATAN DIOSPA LLAQTANPI ASTAWAN YANAPAKUSUNMAN?

3, 4. ¿Ima ruwaykunapin Diospa llaqtanpi yanapakusunman?

3 Leey 1 Timoteo 3:1. Apóstol Pabloqa “allinmi” niranmi ‘iñiqkuna qhawariq kayta munaqkunata’. Pipas chayman aypayta munaqqa imapas altopi kaqman aypapakushanman jinan tukuy atisqanta kallpachakunan. ¿Imatan ruwanan yanapakuq kamachi kayta munaq hermano? Kallpachakunanmi requisitokunata junt’ananpaq, nombrasqa kaspataq umalliq kananpaqñataq kallpachakunan.

4 Wakin iñiqmasinchiskunapas imaymanatan ruwashanku Diospa llaqtanpi astawan yanapakunankupaq. Wakinqa precursor kaytan munanku, wakintaq Betelpi yanapakuyta munanku, wakintaq juñunakuy wasikuna ruwaypi yanapakuyta munanku. ¿Imaynatan Biblia yanapawasunman chay ruwaykunapi yanapakunanchispaq? Chaymantan qatimuq parrafokunapi yachasunchis.

KALLPACHAKUSHALLASUN DIOSPA LLAQTANPI LLANK’ANAPAQ

5. ¿Imaynatan wayna-sipaskuna Diospa llaqtanpi yanapakunkuman?

5 Wayna-sipaskunaqa kallpankupi kasqankuraykun imaymanata Diospa llaqtanpi ruwankuman (leey Proverbios 20:29). Paykunamanta wakinmi Betel wasipi llank’ashanku Bibliakunata juj qelqakunatawan ruwaspa. Wakintaq juñunakuy wasikuna ruwaypi allichaypi ima yanapakushanku. Wakintaq terremotokuna otaq chay jina desgraciakuna kaqtin maypichus yanapanata necesitakushan chayman usqhaylla rinku. Wakintaq precursor kaspa juj simikunata yachashanku, otaq juj llaqtakunaman ripushanku predicaq.

6-8. a) ¿Imatan Aaron ruwaran Diosta kusisqa servinanpaq? b) ¿Imaynapin rikusunman may sumaqchus Jehová Dios kasqanta?

6 Noqanchisqa munakunchisña Jehová Diosta chaypas, mayninpiqa iñiqmasinchis Aaron jinan sientekusunman. Payqa juch’uychanmantapachaña juñunakuyman riq, predicacionmanpas lloqsiq chaypas, aburrikuqmi chaykunata ruwaspa.

7 Chaymi Aaronqa kallpachakuran sapa p’unchay Bibliata leenanpaq, juñunakuykunaman allin preparasqa rinanpaq, chaypi comentananpaqwan. Chaymantapas astawanmi Jehová Diosmanta mañakuran. Chhaynapin payqa iñiyninpi allinta kallpachakuran, astawantaq Jehová Diostapas reqsiran munakuran ima. Chaymi kusikuywan Diosta serviran, precursor imaraqmi kapuran, jujkunatapas yanaparanmi desgraciakuna kaqtin, juj lado llaqtamanraq predicaqpas ripuran. Kunanqa umalliqmi payqa, Betel wasipitaqmi llank’ashanpas. Paymi nin: “Chayraqmi rikuni may sumaq sonqochus Jehová Dios kasqanta. Payman manu jinan kani imaymana bendicionkunata qowasqanmanta, chaymi payta munakuspa  kallpachakushani llaqtanpi yanapakunaypaq”, nispa.

8 Salmo takita qelqaqpas niranmi: ‘Rikuychis may sumaqchus Señor Diosqa kasqanta. Payta manchakuqkunapaqqa manan imapas pisinchu’, nispa (leey Salmo 34:8-10). Jehová Diospaq imatapas ruwaspanchisqa paypa sonqontan kusichisunchis, chhaynapitaq ancha kusisqa kasunchis. Paytaq sumaqta cuidawasunchis.

AMA PISIPASUNCHU

9, 10. ¿Imanaqtinmi yachananchis suyakuyta?

9 Wakinqa unayñan Diospa llaqtanpi yanapakuyta munashanku, ichaqa manan ima nombramientotapas chaskinkuchu, otaq imaymana sasachakuyninkuna mana dejanchu chayman aypanankuta (Miq. 7:7). Chaymantapas Jehová Diosqa manaña chinkachinmanchu chay sasachakuykunata chaypas, payqa yanapawasunmi aguantananchispaq. Chaypaq yuyarisunchis Jehová Dios Abrahanman wawayoq kananpaq prometesqanta. Abrahanqa askha watan suyanan karan chay promesa junt’akunanpaq, chaywanpas payqa pacienciawanmi suyakuran, manataqmi iñiyninpi pisiparanchu (Gén. 15:3, 4; 21:5; Heb. 6:12-15).

10 Yachasqanchis jina, imatapas suyakuyqa manan facilchu (Prov. 13:12). Chaymantapas sichus nishuta sasachakuyninchiskunapi piensasunman chayqa, pisiparusunmanmi. Chayraykun tukuy yuyayninchista churananchis Dios serviyninchispi, imayna cristiano kasqanchispi ima, chhaynapin junt’asunchis nombrasqa kananchispaq kamachikuykunata.

Yachayniyoq kanapaq, allin yuyaywan imatapas ruwanapaqpas Bibliatan leenanchis, allintataq chaypi piensananchis

11. ¿Imata ruwananchispaqmi kallpachakunanchis? ¿Imapaqmi chay ruway yanapawasunchis?

11 Kallpachakusun allin cristiano kananchispaq. Chaypaqmi Bibliata leenanchis, allintataq chay leesqanchispi piensananchis. Chhaynapin allin yachayniyoq kasun, allinta imatapas reparasun, allin yuyaywantaq imatapas ruwasun. Chayta ruwaq hermanokunaqa iñiq t’aqata cuidanankupaqmi preparakushankuña (Prov. 1:1-4; Tito 1:7-9). Bibliata estudiaspaqa allintan yachasun imaynatas Jehová Dios imatapas qhawarin chayta. Chayta yachaspataq paypaq jina imatapas ruwasunchis. Arí, sumaqtan jujkunata qhawarisunchis, allin yuyaywanmi qolqetapas utilizasunchis, imawan kusirikuytapas imayna p’achakuytapas allintan decidisunchis.

12. ¿Imaynapin llapanchis iñiq t’aqapi kaqkuna junt’aq kasunman?

12 Allintan junt’ananchis chaskisqanchis llank’anata. Diospa templonta wajmanta jatarichikunanpaqmi Nehemiasqa askha runakunata necesitaran. ¿Pikunatan ajllaran chaypaq? Diosta manchakuq junt’aq runakunatan. Paykunaqa tukuy sonqon llank’ananku karan ima llank’ay  chaskisqankupipas (Neh. 7:2; 13:12, 13). Kay tiempopipas chhayna hermanokunatan necesitakun iñiq t’aqata cuidanankupaq (1 Cor. 4:2). Chhaynaqa qharikunapas warmikunapas llapanchismi tukuy sonqowan junt’ananchis ima llank’ay chaskisqanchistapas (leey 1 Timoteo 5:25).

13. ¿Imaynatan Josepa ejemplonta qatikusunman?

13 Jehová Diosmanmi jap’ipakunanchis. ¿Imatan ruwananchis pipas mana allinta imatapas ruwawaqtinchis? ¿Imapas kasunman jinaraqchu defiendekunanchis? Manan. Mana chayqa aswan mana allinmanmi chayasunman. Chhaynaqa, ¿imatan ruwananchis? Josepa ejemplontan qatikunanchis. Paytaqa wayqenkunan sinchi mana allinta ruwaranku. Juj runakunapas yanqamantan payta tumparanku, jinaspa carcelman wisq’achiranku. Chhaynapi tarikuspaqa Jehová Diosmanmi Joseqa jap’ipakuran. Arí, payqa Jehová Diospa promesankunapin yuyayninta churaran, chhaynapitaq Dios sonqollapuni karan (Sal. 105:19). Chhayna sasachakuykunapi tarikusqanmi Josetaqa prepararan qhepaman importante llank’anata junt’ananpaq (Gén. 41:37-44; 45:4-8). Chhaynaqa jujkuna mana allinta ruwawaqtinchisqa Jehová Diosmantan yachayta mañakunanchis. Payqa thaj kaytan qowasunchis, chhaynapi sumaq sonqollawan chay mana allin ruwawaqninchiskunata rimapayananchispaq (leey 1 Pedro 5:10).

 KALLPACHAKUSUN ASWAN ALLINTA PREDICANANCHISPAQ

14, 15. a) ¿Imanaqtinmi ‘allinta qhawarikunanchis’ imaynatachus predicashanchis chayta? b) ¿Imatan ruwasunman wakin runakunaman chayananchispaq? (15 paginapi fotota qhaway, qhawallaytaq “ ¿predicasunmanchu jujniraymanta?” nisqa recuadrotapas.)

14 Apóstol Pablon Timoteota kallpacharan aswan allinta yachachinanpaq. Niranmi: “Allinta qhawarikuy imaynatachus kausashanki chayta, imaynatachus yachachishanki chaytapas”, nispa (1 Tim. 4:13, 16). Runakunaqa cambiankun tiempoq pasasqanman jinaqa, imaynapi tarikusqankupas cambianmi, chaymi Timoteoqa unay wataña predicasharan chaypas, kallpachakunan karan aswan allinta yachachinanpaq. Noqanchispas kaqllatataqmi ruwananchis.

15 Wakin partekunapiqa manañan runakunaqa wasinkupi kankuñachu, wakin partekunapitaq wisq’asqa barriokunapi tiyanku. Chhayna partekuna llaqtanchispi kan chayqa, kallpachakunanchismi jujniraymanta paykunata predicananchispaq.

16. ¿Imaynatan predicasunman askha runakunaq kasqanpi?

16 Wakin iñiqmasinchiskunaqa askha runakunaq kasqanpin predicanku. Predicankun paraderokunapi, mercadokunapi, parquekunapi ima. ¿Imaynatan paykuna chaykunapi predicanku? Wakinqa chayllaraq uyarisqanku noticiamantan rimayta qallarinku, wakintaq rimapayasqanku runaq wawankunamanta imatapas allinta rimanku, otaq llank’ananmanta imatapas tapunku. Chay runa allinta uyarikuqtintaq Bibliamanta juj textota leenku, jinaspa tapunku ima ninsi pay chaymanta chayta. Chhaynapin askha runakuna Biblia estudiayta qallarishanku.

17, 18. a) ¿Iman yanapawasun askha runakunaq kasqanpi mana manchakuspa predicananchispaq? b) ¿Imaynatan Davidpa imachus nisqan yanapawasunman predicananchispaq?

17 Wakinninchisqa manchakunchispaschá callekunapi predicayta. Chhaynatan Nueva York llaqtapi Eddie sutiyoq precursor iñiqmasinchispas sientekuq. ¿Iman payta yanaparan mana manchakunanpaq? Chaymantan pay niran: “Diosta adorasqayku ch’isipin señoraywan kuska estudiaq kayku imaynatas runakunaq tapukuyninman kutichiykuman chayta. Chaykunamantan juj hermanokunatapas tapuq kayku”, nispa. Kunanqa Eddiemanqa gustanmi askha runakunaq kasqanpi predicay.

18 Sichus aswan allinta predicasunchis, kusikuywantaq chayta ruwasunpas chayqa, alayritan jujkuna reparanqaku iñiyninchispi wiñashasqanchista (leey 1 Timoteo 4:15). Yaqapaschá pillatapas yanapasunman Jehová Diosta servinanpaqpas. Chaymantan rey Davidpas niran: “Señor Diostaqa tukuy tiempon saminchallasaqpuni, simiyqa paytan yupaychashallanqapuni. Noqaqa Señor Dioswanmi anchata kusikuni, ¡sarunchasqakuna, chayta uyarispa kusikuychis!”, nispa (Sal. 34:1, 2).

JEHOVÁ DIOSTA ALABASUN LLAQTANPI ASTAWAN YANAPAKUSPA

19. ¿Iman Jehová Dios serviqkunata anchata kusichiwanchis sasachakuykunapiña tarikuqtinchispas?

19 Davidqa nillarantaqmi: “Señor Diosníy, llapa ruwasqaykikunan yupaychasunkiku, qan sonqo runakunan saminchasunkiku.  Kamachikusqaykiq qhapaq-atiyninmantan rimanqaku, atiyniykitan willakunqaku, atiywan ruwasqaykikunata llapa runa yachanankupaq, kamachikusqaykiq ancha sumaq qhapaq-atiynintapas yachanankupaq”, nispa (Sal. 145:10-12). Dios sonqo runakunaqa maytan Diosmanta jujkunaman willayta munanchis ¿riki? Ichaqa wakinninchisqa onqosqa kasqanchisraykun otaq edadniyoqña kasqanchisrayku manaña askhatachu predicayta atinchis. Chhaynapi tarikushanki chayqa, ¿imaynatan Jehová Diosta alabawaq? Atisqaykiman jina paymanta willaspan. Willawaqmi jampisuqniyki doctorkunaman otaq enfermerakunamanpas. Sichus iñiyniykirayku carcelpi kashanki chaypas, kallpachakuwaqmi chaypi predicanaykipaq, chhaynapin Jehová Diospa sonqonta kusichinki (Prov. 27:11). Payqa anchatan kusikunqa familiaykikuna mana iñiqkunaña kashaqtinkupas payta serviqtiyki (1 Pedro 3:1-4). Sinchi sasachakuykunapiña tarikuspapas atisunmanmi Jehová Dios alabayta, payman astawan achhuykuyta, llaqtanpi astawan yanapakuytapas.

20, 21. ¿Iman kanqa Diosta tukuy sonqowan serviqtinchis, paypa llaqtanpipas astawan yanapakuqtinchis?

20 Sichus Jehová Diosman astawan k’askakusun, tukuy sonqowantaq payta servisunchis chayqa, anchatan payqa bendeciwasunchis. Chaypaqmi wakin cambiokunata ruwasunman, chhaynapi aswan askha runakunata yachachinanchispaq. Chaymantapas kallpachakusunmanmi iñiqmasinchiskunata astawan yanapananchispaq. Iñiq t’aqapi tukuy sonqo llank’asqanchista rikuspankuqa iñiqmasinchiskunaqa astawanmi munakuwasunchis.

21 Rikusqanchis jina, Jehová Diosta unayña serviqkunapas chayllaraq servishaqkunapas llapanchismi astawan payman k’askakusunman, llaqtanpipas astawan yanapakusunman. Ichaqa, ¿imaynatan jujkunata yanapasunman Dios serviyninkupi wiñanankupaq? Chaymantan qatimuq estudiopi yachasunchis.