Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

¿Imaynatan wañuyta atipasunman?

¿Imaynatan wañuyta atipasunman?

ADANWAN Evawan juchallikusqanraykun noqanchispas juchayoq kaspa wañunchis, chaywanpas Jehová Diospa munasqanqa kaqllan kashan. Unay watakunañan Dios qelqanpi willachiran chaypas kaqllan runakunapaq ruway munasqanqa kashan.

  • “Chanin runakunaqa kay allpatan jap’ikapunqaku, chaypin wiñaypaq tiyanqaku” (Salmos 37:29).

  • “Señor Diosqa wiñaypaqmi wañuytapas chinkachinqa, llapaq ñawinmantan waqaytapas ch’akichinqa” (Isaías 25:8).

  • “Último kaq enemigonchis wañuypas ch’usaqyachisqan kapunqa” (1 Corintios 15:26).

  • “Manan wañuypas kanqañachu, manañataqmi llakikuypas, waqaypas, ni nanaypas kanqañachu” (Apocalipsis 21:4).

Jehová Diosmi wañuyta “chinkachinqa”. ¿Imaynatan chayta ruwanqa? Bibliapi yachasqanchisman jinaqa kay allpapin “chanin runakuna [...] wiñaypaq tiyanqaku”. Chaymantapas nillantaqmi: “Kay pachapiqa manan allinkaqllatapuni ruwaq runaqa kanchu, mana jayk’aq juchallikuq chanin runapas manan kanchu”, nispa (Eclesiastés 7:20). Dios wiñay kausayta qowananchispaq promesanta, ¿cambianmanchu? Manapunin. Jehová Diosqa manan chaytaqa ruwanmanchu, chaymi Biblia nin: “Mana jayk’aq llullakuq”, nispa (Tito 1:2). Chhaynaqa, ¿imatan Dios ruwanqa runakunaman prometesqanta cumplinanpaq?

DIOSQA WIÑAYPAQMI WAÑUYTAPAS CHINKACHINQA(ISAÍAS 25:8)

WAÑUYTA CHINKACHINAPAQMI PAGAKUN

Jehová Diosqa munakuwasqanchisraykun wañuymanta librawananchispaq pagaran. Chaytaqa pagaran jayk’achus valesqanman otaq daño ruwakusqanman jinan. Llapanchispas juchayoq kasqanchisraykun wañuyman vendesqa kanchis, chaymi Biblia nin: “Manan mayqenninkupas wayqenta kacharichiyta atinqachu, manan kausayninta qespichinanpaq Diosman pagayta atinqachu. Runaq kausaynin rantiyqa sinchi chaniyoqmi, manan ima qolqepas aypanmanchu”, nispa (Salmos 49:7, 8).

Runaqa wañuspaqa juchallanmantan pagakun, payqa manan salvakuyta atinmanchu nitaq jujkunatapas (Romanos 6:7). Chaymi necesitaranchis mana juchayoq runata noqanchisrayku wañunanpaq (Hebreos 10:1-4).

Chayraykun Jehová Diosqa janaq pachamanta wawanta kachamuran, paymi karan Jesús, payqa mana juchayoq ch’uyan karan (1 Pedro 2:22). Jesusmi jamuran ‘vidanwan pagaspa askha runakunata kacharichinanpaq’ (Marcos 10:45). Payqa wañuyta atipananpaqmi wañuran, chhaynapi wiñay kausayman aypananchispaq (Juan 3:16).

¿JAYK’AQMI WAÑUYTA ATIPAKUNQA?

Kay tiempopin cumplikushan Diospa willachisqankuna. Sasa tiempokunapin tiyashanchis, chaykunaqa ‘tukukuy p’unchaykunapin’ pasanan karan (2 Timoteo 3:1). Tukukuy p’unchayqa “Diosta mana manchakuq runakunapaq juicio p’unchay chayamunankamataqmi kanqapas, chay p’unchaypin chay runakunaqa chinkachisqa kanqaku” (2 Pedro 3:3, 7). Diosta kasukuqkunan ichaqa ‘wiñay kausayta’ chaskinqaku (Mateo 25:46).

Jesusqa jamuran ‘vidanwan pagaspa askha runakunata kacharichinanpaqmi’ (Marcos 10:45)

Millonninpi wañusqa runakuna kausarimpuspaqa atinkumanmi wiñay kausayman aypayta. Jesusqa Naín llaqtanta pasashaspan juj waynata wañusqanmanta  kausarichiran. Chay waynaqa juj viudaq sapallan wawanmi karan, chaymi Jesusqa khuyapayaspa kausarichiran (Lucas 7:11-15). Chayraykun apóstol Pabloqa niran: “Noqapas Diospi suyakuni allin runakunatapas mana allin runakunatapas wañusqa kasqankumanta kausarichimpunanta”, nispa. Chay suyakuywanmi Jehová Diosqa munakuyninta rikuchiwanchis (Hechos 24:15).

Waranqanpi kausarimpuq runakunaqa Diosta servispaqa wiñaypaqmi kausanqaku. Biblian nin: “Chanin runakunaqa kay allpatan jap’ikapunqaku, chaypin wiñaypaq tiyanqaku”, nispa (Salmos 37:29). Chaypin ninqaku apóstol Pabloq nisqanta, paymi niran: “Wañuy, ¿maytaq atipasqayki? Wañuy, ¿maytaq wañuchiq picanayki?”, nispa (1 Corintios 15:55). Chaypin runakunaq wañuy enemigonqa atipasqa kanqa.