Mayninpiqa problemanchiskunan unay tiempota duran, otaq tiempowan mana cuentata qokushallaqtinchis empeoranman. ¿Yanapawasunmanchu Biblia chay llakichiwaqninchis problemakunata allichanapaq? Qhawarisun wakin ejemplokunata.

AMA NISHUTA LLAKIKUNAPAQ

Rosi nin: “Noqaqa nishutan problemaykunapi piensaq kani, imapas pasananpaqmi piensaq kani”, nispa. ¿Ima textokunan payta yanaparan? Jujninmi karan Mateo 6:34, chaypin nin: “Aman jayk’aqpas paqarinmantaqa llakipakunkichischu, paqarinpas kanqan llakipakuykunaqa. Sapa p’unchay llakikuyqa chay p’unchayllapaq kachun”, nispa. Rositaqa Jesuspa chay rimasqan simikunas yanapasqa ama paqarinmanta llakikunanpaq. Paymi nin: “Askhañan problemaykunaqa kasharan chaywanpas manaraq sucedesqan problemakunapin llakikushallaranitaq, chaykunaqa manapaschá jayk’aqpas pasanqachu”, nispa.

Yasminqa imaymana llakikuykunawan nit’isqan sientekuq. Paymi nin: “Sapa semananmi waqaq kani, wakin tutakunataq mana puñuyta atiqchu kani. Mana allin piensaykunaq ñit’isqan jinan sientekuq kani”, nispa. ¿Ima versiculon yanaparan? 1 Pedro 5:7 nin: “Chaymantapas tukuy llakipakuyniykichista payman saqeychis, payqa qankunamantan llakikun”, nispa. Yasmín nillantaq: “Mañakushallaranin Jehová Diosmanta, chaymi tiempowanqa mañakusqayman kutichimuwaran. Nishu llasa q’epitapas orqowankuman karan jinan sientekurani. Mayninpiqa jamuwanraqmi umayman mana allin piensaykuna, ichaqa yachaniñan imayna controlayta”, nispa.

 AMA POSTERGANAPAQ

Isabella sipasmi nin: “Yaqachus jina imatapas postergayqa papaymanta herencia, paypas kaqllatataqmi ruwan. Mayninpiqa importante ruwaykunatan yanqalla postergaq kani, televisionta qhawanayrayku otaq samanayrayku. Chayqa mana allin costumbren, uma nanaytaq kanpas”, nispa. Paytaqa 2 Timoteo 2:15 nisqanmi yanaparan, nin: “Tukuy atisqaykita ruway Diospa allin qhawarisqan kanaykipaq, mana imamanta p’enqakuspa allin llank’aq kanaykipaq”, nispa. Isabella nin: “Manan munaranichu último ratopaq ruwanayta saqesqayrayku, llank’anaywan Jehová Diosta p’enqachiyta”, nispa. Kunanqa Isabellaqa manañan último ratopaq ruwananta saqenchu.

Kelly sipaspas ninmi: “Trabajoyta entreganay kaqtinqa último ratollapaqñan postergaq kani. Chaymi waqaq kani, pisillatan puñuq kani, llakikuqtaq kanipas”, nispa. Proverbios 13:16 textopi consejon allinta yanaparan, chaypin nin: “Yuyayniyoq runaqa yachaywanmi ruwan, mana yuyayniyoqmi ichaqa mana yuyayniyoq-kayninta rikuchin”, nispa. Chay versiculota entiendespan Kelly nin: “Allinpunin ñaupaqmantaña imatapas ruway, planificaypas. Kunanqa kanmi juj agenday, ruwanaykunata programanaypaq. Chaymi yanapawan organizasqa kanaypaq, jinallataq ama último ratopaq ruwanaykunata saqenaypaq”, nispa.

AMA SAPANCHIS SIENTEKUNAPAQ

Cristina willakun: “Qosaymi wijch’uwaran tawa wawakunayoqta”, nispa. ¿Ima yachachikuymi payta yanaparan? Proverbios 17:17 nin: “Tukuy tiempon amigoqa munakun, llaki-phutiy tiempopipas wayqe jinan khuyapayakun”, nispa. Payqa Diospa llaqtanpin yanapayta maskharan. Ninmi: “Amigoykunan imaymanapi yanapawaranku. Wakinqa mijunata t’ikakunata iman wasiyman apamuwaranku. Kinsa kutipin askhallaña amigoykuna yanapawaranku wasimanta astakunaykupaq. Jujnintaq llank’anata maskhapuwaran. Amigoykunaqa tukuy tiempon yanapawaranku”, nispa.

Dianapas sapanmi sientekuran. Paymi yuyarin tukuyta pierdespa imayna tarikusqanta, nin: “Juj peliculapipas jujkuna kusisqa kasqanta qhawaylla qhawashayman, noqataq mana kusisqachu kashayman jinan sientekurani, sapay”, nispa. Salmos 68:6 texton yanaparan, nin: “Diosmi mana piniyoqkunaman familiata qon”, nispa. Paymi nin: “Yacharanin chay versiculoq nisqanqa mana juj wasillamantachu rimashasqanta. Entienderanin Diosqa espiritual wasita qowasqanchista, chaypiqa seguron sientekunchis, jinallataq Diosta munakuq runakunawan kuska. Ichaqa yacharanin mana Diosman qayllaykuspaqa mana jujkunaq cercanpichu sientekunayta. Salmos 37:4 textoq nisqanmi yanapawaran: ‘Señor Dioswan anchata kusikuy, paytaq sonqoykiq munasqankunata qosunki’”, nispa.

Dianaqa khaynatan tukun: “Cuentatan qokurani Jehová Diosman astawan jap’ipakunay kasqanta, payllan aswan allin amigoqa. Diosta adoraq runakunawan amigota armanaypaqmi listata ruwarani, paykunawan imakunata ruwanaypaq. Jujkunapi allin kaqkunata qhawariytan yacharani, imapipas pantasqankuta perdonaytapas”, nispa.

Diosta serviqkunaqa imapipas pantankun. Jehová Diospa testigonkunaqa lliu runakuna jinan problemakunapi tarikunku. Ichaqa Bibliapi yachachikuykunan kallpachan jujkunata yanapanankupaq. Chay jina amigokunayoq kayqa may allinmi. Ichaqa, ¿yanapawasunmanchu Bibliapi yachachikuykuna problemakunata atipanapaq? Yaqapaschá chaykunaqa kanman mana allichakuyta atikuq problemakuna, mana jampiy atikuq onqoykuna otaq pininchispas wañupuqtin.

Bibliapi consejokunata kasukuyqa yanapawanchismi allin amigokunata tarinapaq