Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 41 ESTUDIO

Diospaq junt’aq kasun manchay ñak’ariy tiempopi

Diospaq junt’aq kasun manchay ñak’ariy tiempopi

“Señor Diosta munakuychis, llapa paypi sonqollikuqkuna, Señor Diosqa llapa paypaq junt’aqkunatan waqaychan” (SAL. 31:23)

129 TAKI Allinta aguantasun

KAYKUNAMANTA YACHASUN *

1, 2. a) ¿Imatan nacionkunata kamachikuqkuna ninqaku? b) ¿Ima tapuykunamanta kaypi yachasun?

KAYPI piensasun, nacionkunata kamachiqkunan nishankuña: “Kunanmantaqa thajpin kausasun, allin waqaychasqan kasunchispas”, nispa. Paykunaqa piensankun thaj kausaypi kashanankupaq, chaymi nishanku: “Runakunaqa atinchismi ima sasachaytapas allichayta”, nispa. Ichaqa manan jark’ayta atinqakuchu chay qhepallaman imaymana pasananta. ¿Imarayku? Biblian niranña: ‘Chayllamanmi qonqaylla ch’usaqyachisqa kanqaku, [...] manapunin maymanpas ayqekuyta atinqakuchu’, nispa (1 Tes. 5:3).

2 Chaymi kay tapuykunamanta yachasun: ¿Imakunan pasanqa “manchay ñak’ariy” tiempopi? ¿Ima ruwananchistan Jehová Dios munanqa? ¿Imaynatan preparakunanchis “manchay ñak’ariy” tiempopi junt’aq sonqo kananchispaq? (Mat. 24:21.)

¿IMAKUNAN PASANQA “MANCHAY ÑAK’ARIY” TIEMPOPI?

3. Apocalipsis 17:5, 15-18 textopi nisqanman jina, ¿imaynatan Jehová Dios ‘jatun Babiloniata’ ch’usaqyachinqa?

3 (Leey Apocalipsis 17:5, 15-18). Jatun Babilonian ch’usaqyachisqa kanqa. Chaytaqa manan pipas jark’ayta atinqachu. ¿Imarayku? ‘Jehová Dios kamachikuqkunaman chay yuyayta churasqanrayku’. Arí, Jehová Diosmi ‘chunka  waqrakunayoq k’anchaq puka colorniyoq manchay phiña animalman yuyayta churanqa llapa pantasqa religionkunata ch’usaqyachinanpaq. * Chay animalpa chunka waqrankunaqa llapa gobiernokunan kanku, chay gobiernokunan Naciones Unidas nisqata apoyanku. Manchay animaltaq Naciones Unidas nisqa (Apo. 17:3, 11-13; 18:8). Chay gobiernokuna pantasqa religionkuna contra phawaykuqtinmi manchay ñak’ariy tiempo qallarinqa. Chaymi qonqaylla pasanqa, pachantinpitaqmi pasanqapas.

4. a) ¿Imaraykun gobiernokuna yaqapas pantasqa religionkunata ch’usaqyachinqaku? b) ¿Imatan yaqapas ruwanqaku religionkunaman perteneceq runakuna?

4 ¿Imaraykun gobiernokuna pantasqa religionkunata chinkachinqaku? Chaytaqa manan yachanchisraqchu. Yaqapaschá ninqaku: “Religionkunaraykun kay pachapi mana thaj kausay kanchu. Religionkunapi umalliqkunan gobiernokunaq kamachisqanman chapukunku. Otaq religionkunaqa askha kaqniyoqmi kanku”, nispa (Apo. 18:3, 7). Jinaspapas gobiernokunaqa manachus jina llapa religionkunaman perteneceq runakunatachu wañuchinqaku. Aswanpas religionkunallatan chinkachinqaku. Chay religionkuna manaña kapuqtinmi runakunaqa reparanqaku religionninkupi umalliqkuna llulla kasqankuta, jinan ninqaku: “Manañan religionniyoqchu kayku”, nispa.

5. ¿Imatan Jehová Dios prometeran manchay ñak’ariy tiempomanta? ¿Imaraykun chayta prometeran?

5 Bibliaqa manan willanchu jayk’a tiempopi jatun Babilonia ch’usaqyachisqa kananta, ichaqa pisi tiempollan kanqa (Apo. 18:10, 21). Jehová Diosqa prometeranmi ajllakusqankunata, cheqaq religiontapas salvananrayku chay p’unchaykunata pisiyachinanta (Mar. 13:19, 20). Ichaqa, ¿ima ruwananchistan Jehová Dios munan manchay ñak’ariy tiempopi?

 JEHOVÁ DIOSTA SERVISHALLASUN

6. ¿Imakunatan Jehová Dios munan ruwananchista?

6 Ñaupaq yachachikuypi estudiasqanchis jina Jehová Diosqa munanmi jatun Babiloniamanta t’aqakunanchista. Ichaqa, ¿ima ruwananchistawanmi munan? Tukuy sonqowan Jehová Dios servishanallanchistan. Iskay ruwaymanta rimasun.

Manan juñunakuyninchista saqenanchischu sasachakuykunapi tarikuspapas (7 parrafota qhaway) *

7. a) ¿Imata ruwaspan rikuchishanchis Diospa kamachikuyninkunata kasukusqanchista? b) Hebreos 10:24, 25 textopi nisqanman jina, ¿imaraykun hermanonchiskunawan juñunakushanallanchis?

7 Ñaupaq kaq, Diospa llapa kamachikuyninkunatan kasukunanchis. Manan kay pachapi qhelli kausaytaqa allinpaqqa qhawarinanchischu. Ejemplopaq, manan qhelli ruwaykunata ruwananchischu nitaq warmipura otaq qharipura casarakuytapas allinpaqqa qhawarinanchischu (Mat. 19:4, 5; Rom. 1:26, 27). Iskay kaq, Diostan hermanonchiskunawan kuska adorashanallanchis. Chaytaqa ruwashanallanchismi juñunakunanchis wasipi, otaq hermanokunaq wasinpi otaq pakallapipas. Imaña pasaqtinpas manan juñunakuyninchista saqenanchischu. Aswanpas astawanmi chayta ruwananchis ‘Diospa p’unchaynin cercapiña kasqanrayku’ (leey Hebreos 10:24, 25).

8. ¿Imatan yaqapas willasunchis manchay ñak’ariy tiempopi?

8 Yaqachus jina manchay ñak’ariy tiempopiqa manaña Diospa gobiernonmantachu willasunchis nitaq runakunatachu yanapasun Jesuspa discipulon kanankupaq. Aswanpas Diospa juicionmantachus jina willasunchis, Biblian chay willakuyta tupanachin jatunkaray chijchikuna urmaykamusqanwan (Apo. 16:21). Yaqapaschá runakunaman ninanchis kanqa: “Diosta mana kasukuqkunan wañuchisqa kanqaku”, nispa. Jamuq tiempopin allinta yachasun imatachus willananchista, imaynata ninanchistapas, wasin-wasintachus willasunchis icha jujniraymantachus chaytapas. Imaynaña kaqtinpas, chay ruwayqa sumaqmi kanqa, chaywanmi Jehová Diospa juicionta willaypi yanapakusunchis (Ezeq. 2:3-5).

9. ¿Imatan yaqapas gobiernokuna ruwayta munanqaku? Ichaqa, ¿imamantan mana iskayananchischu?

9 Yaqachus jina gobiernokunaqa jark’ayta munawasunchis amaña Diospa juicionta willananchispaq. Ichaqa Jehová Diospa yanapayninpin confiananchis kanqa, imaynan kunanpas ruwashanchis chhaynata. Jehová Diosqa kallpatan qowasunchis munayninta junt’ananchispaq (Miq. 3:8).

DIOSPA LLAQTAN CONTRA GOG PHAWAYKUNQA, CHAYPAQ PREPARAKUSUN

10. Lucas 21:25-28 textopi nisqanman jina, ¿imaynapin runakuna tarikunqaku manchay ñak’ariy tiempopi?

10 (Leey Lucas 21:25-28). Manchay ñak’ariy tiempopin runakunaqa rikunqaku kamachikuqkunapas, negociokunapas manapuniña allinchu kasqanta. Chaymantapas sut’itan reparanqaku wañunanku p’unchay chayamushasqanta, jinan sinchita llakikunqaku (Sof. 1:14, 15). Yaqachus jina Jehová Diosta serviqkunapaqpas chay tiempopi kausayqa sasa kanqa. Kay pachapi sinchi sasachakuykuna kasqanraykun Diosta serviqkunapaqpas mana kanqachu llapa necesitasqanku cosaskuna.

11. a) ¿Imaraykun runakuna cheqnikuwasunchis manchay ñak’ariy tiempopi? b) ¿Imanaqtinmi mana manchakunanchischu manchay ñak’ariy tiempopi imachus pasawananchismanta?

11 Yaqapaschá religionninkuq ch’usaqyachisqa kasqanta rikuq runakunaqa sinchita  phiñakunqaku Diospa llaqtan mana chinkachisqa kasqanmanta. Jinaspa tukuy ladopi, internetpi ima chayta runakunaman willanqaku. Satanaspas kamachisqan gobiernokunapas sinchitan cheqnikuwasun Diosta adorasqanchismanta. Paykunaqa ninqakuchá: “¿Imanaqtintaq kaykunari mana ch’usaqyachisqachu karanku?”, nispa. Jinan chay tiempopi gobiernokunaqa Diospa llaqtan contra phawaykunqaku, chhaynapin junt’akunqa Gogpa ruwananmanta profecía * (Ezeq. 38:2, 14-16). Kunanqa manan llapantapuniqa yachanchischu manchay ñak’ariy tiempopi imachus pasananmanta. Chaymi wakinninchisqa llakikusunman, ichaqa manan llakikunanchischu. ¿Imarayku? Diosmi niwasunchis salvakunapaq imachus ruwananchista (Sal. 34:19). Chaymi umanchista oqarisun salvakunanchis p’unchay chayamushasqanrayku. *

12. ¿Imaynatan “allin yuyayniyoq junt’aq kamachi” jamuq tiempopaq preparawashanchis?

12 ‘Allin yuyayniyoq junt’aq kamachiqa’ manchay ñak’ariy tiempopi aguantananchispaqmi preparawashanchis (Mat. 24:45). ¿Imaynatan chayta ruwashan? 2016-2018 watakunapi asambleakuna aparikusqanpin yanapawaranchis Jehová Diospa manaraq p’unchaynin chayamushaqtin junt’aq kananchispaq, ama pisipananchispaq, ama manchakuq kananchispaqwan. Chaykunamanta pisillapi yuyarisun.

KALLPACHAKUQ, MANA MANCHAKUQ JUNT’AQ IMA KASHALLASUN

Preparakusun manchay ñak’ariy tiempopi salvakunanchispaq (13-16 parrafokunata qhaway) *

13. ¿Imata ruwaspan astawan Jehová Diospaq junt’aq kasunman? ¿Imaraykun kunan kallpachakunanchis junt’aq kananchispaq?

13 Junt’aq kasun. 2016 watapi asamblean niran: “¡Jehová Diospaq junt’aq kasun!”, nispa. Chay asambleapin yacharanchis junt’aq kanapaqqa Jehová Diosta astawan munakunanchis kasqanta. Chaypaqqa tukuy sonqomantan mañakuna allintataq Bibliata estudiana. Chaykunata ruwaspan ima sasachaytapas atipasun. Diosta mana kasukuq runakunaq wañunan p’unchay qayllaykamusqanman jinan Diosman junt’aq kasqanchisqa astawanraq probasqa kanqa. Yaqapaschá runakuna noqanchismanta burlakunqaku mana mayqen gobiernotapas apoyasqanchisrayku (2 Ped. 3:3, 4). Chaymi kunan kallpachakunanchis junt’aq kananchispaq, chhaynapin junt’aq kallasuntaq manchay ñak’ariy tiempopipas.

14. a) ¿Ima pasanqa manchay ñak’ariy tiempopi Diospa llaqtanta umalliqkunawan? b) ¿Imaraykun kasunanchis kanqa chay tiempopi Diospa llaqtanta umalliqkunata?

14 Manchay ñak’ariy tiempopin janaq pachapaq ajllasqa cristianokuna janaq pachaman ripunqaku Armagedón guerrapi maqanakunankupaq (Mat. 24:31; Apo. 2:26, 27). Chay tiempopiqa manañan umalliq t’aqaqa kay pachapi kanqañachu. Chhaynaña kaqtinpas Diospa llaqtanqa allin organizasqan kashanqa. Waj ovejamanta nombrasqa hermanokunan Diospa llaqtanta umallinqaku. Paykunawanmi Diosqa chay tiempopi kamachiwasun imachus ruwananchista. Chaymi paykunaq kamachisqanta kasukunanchis  kanqa, chayta ruwaspallan manchay ñak’ariy tiempopi salvakusun.

15. ¿Imatan ruwananchis ima sasachakuytapas aguantananchispaq? ¿Imaraykun kunan yachananchis aguantayta ima sasachakuytapas?

15 Aguantashallasun. 2017 watapi asamblean niran: “¡Kallpachakushallay!”, nispa. Chay asambleapin yacharanchis ima sasachakuytapas aguantanapaqqa mana kallpanchispichu confiananchis kasqanta, aswanpas Jehová Diospa yanapayninpi (Rom. 12:12). Manan qonqananchischu Jesuspa nisqanta: ‘Tukukuykama aguantaqmi salvasqa kanqa’, nispa (Mat. 24:13). Chaypi nisqan jina ima sasachakuypiña kaspapas kasukushanallanchismi Jehová Diosta. Sichus kunan ima sasachakuytapas aguantasunchis chayqa, manchay ñak’ariy tiempopipas aguantallasuntaqmi.

16. ¿Imata ruwaspallan mana manchakuq kasunchis? ¿Imatan ruwananchis kunan tiempopi mana manchakuq kananchispaq?

16 Mana manchakuq kasun. 2018 watapi asamblean niran: “¡Ama manchakuychu!”, nispa. Chay asambleapin niwaranchis manan noqallanchismantaqa mana manchakuq kaytaqa atisunmanchu nispa. Aswanpas Jehová Diospa yanapayninpin confiananchis. ¿Imatan chaypaq ruwasunman? Bibliatan sapa p’unchay leenanchis, piensananchistaq Jehová Dios ñaupaqpi serviqninkunata imayna salvasqanpi (Sal. 68:20; 2 Ped. 2:9). Manchay ñak’ariy tiempopi gobiernokuna noqanchis contra jatariqtinkun rikuchinanchis kanqa Diospi confiasqanchista (Sal. 112:7, 8; Heb. 13:6). Sichus kunan Diospi confiashallasun chayqa, manan manchakusunchu Gog nisqa wañuchiyta munawaqtinchis. *

KACHARICHISQA KANANCHISTA SUYAKUSUN

Pisillamantan Jesusqa ejercitonwan Diospa enemigonkunata Armagedón guerrapi ch’usaqyachipunqa (17 parrafota qhaway)

17. ¿Imanaqtinmi Armagedón guerra qallariqtin mana manchakunanchischu kanqa? (Qhaway tapanpi kaq dibujota).

17 Ñaupaq yachachikuypin yacharanchis yaqa llapanchispas tukukuy tiempopiña  tiyasqanchista. Chaymi suyakushanchis manchay ñak’ariy tiempopi salvakuyta. Armagedón guerrapin wañupunqaku millay runakuna. Chay tiempopiqa manan imamantapas manchakunanchischu kanqa. ¿Imarayku? Diospa guerran kasqanrayku (Prov. 1:33; Ezeq. 38:18-20; Zac. 14:3). Jehová Diospa nisqan tiempopin Jesucristoqa ajllasqa cristianokunawan millonninpi angelkunawanpas maqanakunqaku Satanaswan supayninkunawan kay pachapi ejercitonkunawanpas (Dan. 12:1; Apo. 6:2; 17:14).

18. a) ¿Imatan Jehová Dios prometewanchis? b) ¿Imaynatan Apocalipsis 7:9, 13-17 texto yanapawanchis jamuq tiempopi ama manchakunanchispaq?

18 Jehová Diosmi prometewanchis: “Manan ima ruwasqa armapas imanasunkipaschu”, nispa (Is. 54:17). “Ancha askha runakunan” manchay ñak’ariy tiempopi salvakuspa Diosta servishallanqaku (leey Apocalipsis 7:9, 13-17). ¡Bibliaqa askha kutipin riman salvakunanchismanta! Noqanchisqa yachanchismi ‘Jehová Diosqa llapa paypaq junt’aqkunata waqaychasqanta’ (Sal. 31:23). Diosta munakuqkunan kusisqa kasunchis Jehová Dios sutinta jatunchaqtin (Ezeq. 38:23).

19. ¿Iman pisi tiempollamanta kanqa?

19 Satanás manaña kaqtinqa 2 Timoteo 3:2-5 textopi nisqan runakunaqa jujniraymi kanqaku (qhaway “ ¿Imaynan runakuna kanqaku jamuq tiempopi?” nisqata). George Gangas * umalliq t’aqamanta hermanonchismi niran: “¡Llapa runakunan juj familia jina Jehová Diosta adoranqaku, jinan kay pachapi kausayqa munaypuni kanqa! Pisi tiempollamantan mosoq pachapi chay kausay kanqa. Imaynan Jehová Diospas wiñaypaq kausan chhaynatan qanpas kausanki”, nispa. ¡Chay kausayqa may munaypunichá kanqa!

122 TAKI “Qaqata sayaychis”

^ párr. 5 Pisi tiempollamantan llapa runakuna manchay ñak’ariy tiempo chayamusqanta rikunqaku. ¿Iman pasanqa Diospa serviqninkunawan? ¿Ima ruwananchistan Jehová Dios munanqa? ¿Imayna runan kananchis chay tiempopi mana pisipaspa Diosta servinanchispaq? Chay tapuykunamantan kaypi yachasun.

^ párr. 3 ASTAWAN YACHANAPAQ: Pantasqa religionkuna ukhupin kashallantaq cristianon kayku niq religionkunapas. Chay religionkunamanta kaqkunaqa manan Jehová Diospa kamachikuyninman jinachu adoranku.

^ párr. 11 ASTAWAN YACHANAPAQ: Manchay ñak’ariy tiempopi Jehová Diospa llaqtan contra phawaykunankupaq juñunasqa gobiernokunatan “Gog” nispa nikun.

^ párr. 11 ¿Imakunapiwanmi pasanqa Armagedón guerra chayamunanpaq? Chaymanta astawan yachanaykipaq qhaway ¡Diospa gobiernonqa kamachishanñan! libropi 21 capitulota. ¿Imaynatan Gog nisqa Diospa llaqtan contra phawaykunqa? ¿Imaynatan Jehová Dios llaqtanta pakaykunqa Armagedonpi? Chaymanta yachanaykipaq qhaway 2015 watamanta 15 julio Qhawaq revistapi 9-15 paginakunata.

^ párr. 16 2019 watapi asamblean nin: “Munakuyqa mana jayk’aq tukukuqmi”, nispa. Jehová Diosqa munakuwanchismi, chaymi mana imamantapas manchakunanchischu, chaytan chay asambleapi yacharanchis (1 Cor. 13:8).

^ párr. 19 Qhaway 1994 wata 1 diciembre La Atalaya revistapi “Sus obras lo siguen” nisqata.

^ párr. 65 FOTOMANTA WILLAKUY: Manchay ñak’ariy tiempopin mana manchakuq hermanonchiskuna juñukushanku sach’a-sach’a ukhupi.

^ párr. 67 DIBUJOMANTA WILLAKUY: Ancha askha cristianokunan manchay ñak’ariy tiempopi salvakunqaku, jinaspa kusisqa kausanqaku.